متّانین رئوایت 4
4
ائبلئس عئسانی ائمتاحان اله‌یئر
1بوندان سورا موقدّس روح عئسانی چؤله آپاردی کی، ائبلئس طرفئندن ائمتاحان اولونسون. 2عئسا قیرخ گون-قیرخ گجه اوروج توتاندان سورا آجیقدی. 3ائمتاحان اله‌ین اونون یانینا گلدی و عئسایا ددی: «اگر سن تارینین اوغلوسان، امر اله کی، بو داشلار چؤره‌یه دؤنسونلر.» 4عئسا جاواب ورئب، ددی: «تؤورات کئتابیندا یازیلیب کی:
«”آدام آنجاق چؤرک ائنن یاشاماز،
بلکی تارینین آغزیندان چیخان هر بئر سؤز ائنن یاشار.“»
5ائبلئس، عئسانی اورشلئم شهرئنه آپاردی و اونی معبدئن لاپ اوجا یِرئنه قویوب، 6اونا ددی: «اگر سن تارینین اوغلوسان، اؤزونی آشاغی آت. چونکی داوودون زبور کئتابیندا یازیلیب:
«”او، سنئن حاقّیندا ملکلرئنه امر الئیه‌جک،
و اولار سنی اَللَری اوستونده گؤتوره‌جکلر،
اولمایا کی، آیاغین بئر داشا دَیسئن.“»
7عئسا جاوابیندا اونا ددی: «تؤورات کئتابیندا بو دا یازیلیب کی:
«” رب تارینی ائمتاحان اله‌مه.“»
8ائبلئس گئنه عئسانی چوخ اوجا بئر داغین اوستونه آپاردی و دونیانین بوتون پادشاهلیقلارینی و اولارین بوتون جلالینی اونا گؤرسه‌دئب، 9ددی: «اگر یره دوشوب، منی پرستئش الئیه‌سن، بولارین هامیسینی سنه وره‌رم.» 10عئسا اونا ددی: «اوزاق اول، ای شیطان! چونکی تؤورات کئتابیندا یازیلیب کی:
«”رب تارینی پرستئش اله
و فقط اونا قوللوق اِله.“»
11او زامان ائبلئس اونی بوراخدی و ملکلر گلئب، اونا خئدمت اله‌دئلر.
عئسا خئدمته باشلاییر
12عئسا یحیانین توتولماسینی اشئدن واخت جلئل وئلایتئنه قاییتدی. 13و ناصئره شهرئنی ترک اله‌یئب، کفرناحوم شهرئنده ساکئن اولدی. کفرناحوم زِبولون و نفتالی بؤلگه‌سئنده، جلئل گؤلونون قیراغیندا ائدی. 14بو اولدی کی اِشَعیا پیغمبرئن واسئطه‌سی ائنن دیئلن سؤز یرئنه یتئشسئن:
15«زبولون دئیاری، نفتالی دئیاری،
دهنز قیراغیندا کی یولدا، اوردون چایینین او تاییندا،
قیری‌یهودئلرئن جلئلئنده!
16قارانلیقدا یاشایان خالق
بؤیوک بئر نور گؤردی،
اؤلومون کؤلگه سالدیغی دئیاردا یاشایانلارا
ائشیق دوشدی.»
17او واختدان عئسا تعلئم ورمه‌یه باشلاییب، ددی: «تؤوبه اله‌یئن، چونکی گؤیون پادشاهلیغی سئزه یاخینلاشیب.»
عئسانین ائلک شاگئردلری
18عئسا جلئل گؤلونون قیراغیندا گزنده، ائکی قارداشی، پِطروس آدلانان شَمعونی و اونون قارداشی آندریاسی گؤردی کی، گؤله تور آتیردیلار، چونکی اولار بالیق توتان ائدئلر. 19عئسا اولارا ددی: «منئم دالیمجا گلئن. من سئزی ائنسان اووچوسی اله‌رم.» 20اولار دا او آندا تورلارینی بوراخیب اونون دالیسیجا گتدئلر. 21عئسا اوردان بئر آز قاباقا گدئب، آیری ائکی قارداشی دا گؤردی کی، آدلاری یعقوب و یوحنّا ائدی و زِبِدی اوغوللاری ائدئلر. اولار آتالاری زِبِدی ائنن قاییقدا تورلارینی حاضیرلاییردیلار. عئسا اولاری چاغیردی؛ 22اولار دا او آندا قاییق و آتالارینی قویوب عئسانین دالیسیجا گتدئلر.
عئسا ناخوش آداملارا شفا ورئر
23عئسا بوتون جلئل وئلایتئنده دولانیب، اولارین عئبادتگاهلاریندا تعلئم ورئردی و گؤیون پادشاهلیغینین خوش خبرئنی اعلان اله‌یئب، خالق آراسیندا هر جور مرض و ناخوشلوغی شفا ورئردی. 24اونون حاقّینداکی خبر بوتون سورئیه دئیارینا یاییلدی و جوربه‌جور ناخوشلوق و دردلره دوچار اولان ناخوشلاری، ائبلئس روحلارا اسئر اولانلاری، غشّئلری، و ائفلئجلری اونون یانینا گتئردئلر و اولارا شفا وردی. 25جلئل وئلایتئندن، دکاپولئس منطقه‌سئندن، اورشلئم شهرئندن، یهودئیه وئلایتئندن، و اوردون چایینین اوتاییندان بؤیوک بئر جاماعات اونون دالیسیجا گتدئلر.
လက္ရွိေရြးခ်ယ္ထားမွု
متّانین رئوایت 4: CAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company