متّانین رئوایت 3
3
تعمئد قوسلی ورن یحیانین اعلانی
1او گونلرده تعمئد قوسلی ورن یحیا ظوهور اله‌دی. او یهودئیه چؤلونده تعلئم ورئردی و 2دیئردی: «تؤوبه اله‌یئن، چونکی گؤیون پادشاهلیغی سئزه یاخینلاشیب.» 3بو، اله او آدام دیر کی، اِشَعیا پیغمبرئن واسئطه‌سی ائنن اونون حاقّیندا دیئلمئشدی:
«بئر آدام چؤلده جار چکئر:
ربّئن یولونی حاضیرلایین،
اونون یوللارینی دوز اله‌یئن.»
4یحیانین دَوه توکوندن پالتاری، بلئنده ده دَرئدن قاییشی وار ائدی؛ اونون یِدئیی چَکئرتگه و چؤل بالی ائدی. 5اورشلئم شهرئندن، بوتون یهودئیه وئلایتئندن و اوردون چایینین بوتون اطرافلاریندان خالق اونون یانینا گلئردی 6و گوناهلارینا اعتئراف اله‌یئب، اوردون چاییندا اوندان تعمئد قوسلی آلیردیلار.
7آمّا او زامان کی، یحیا فرئسی فئرقه‌سئنئن و صادوقی فئرقه‌سئنئن عالئملرئندن بئر چوخونی گؤردی کی، تعمئد قوسلی آلماق اوچون اونون یانینا گلئرلر، اولارا ددی: «ای افعئلر نسئلی! سئزی کئم آییق سالدی کی گله‌جک قَضبدن قاچاسیز؟! 8اله ائشلر گؤرون کی گؤرسنسئن، دوغرودان دا تؤوبه اله‌یئبسئز. 9اؤز اؤزوزه دمه‌یئن ”بئزئم آتامیز، ائبراهئم پیغمبر دئر“. چونکی بونی سئزه دیئرم، تاری قادئردئر کی، بو داشلاردان ائبراهئمه اؤولاد یاراتسین. 10حتّا اله ائندی ده بالتا، آغاجلارین کؤکونه یاتیب. هر آغاج یاخشی ثمره ورمسه، کَسئلئب اودا آتیلار.
11من سئزی تؤوبه اوچون سو ائنن تعمئد ورئرم، آمّا او کی مندن سورا گلئر، مندن چوخ قووّتلی‌دئر. من اونون باشماغینی گؤتورمه‌یه بِله لایئق دِیئلم. او، سئزی تارینین موقدّس روحی و اود ائنان تعمئد وره‌جک. 12اونون شَنه‌سی الئنده‌دئر. خرمنئنی تمئز سووروب، بوغداسینی آنبارا ییغاجاق، آمّا سامانی سؤنمه‌ین اود ائنان یاندیراجاق.»
عئسا تعمئد قوسلی آلیر
13او زامان عئسا جلئل وئلایتئندن اوردون چایینا، یحیانین یانینا گلدی کی، اوندان تعمئد آلسین. 14آمّا یحیا قویماییب، ددی: «من سندن تعمئد آلماغا مؤحتاجام، سن منئم یانیما گلئرسن؟!» 15عئسا اونا جاواب ورئب ددی: «قوی ائندی بله اولسون، چونکی بئزه بله یاراشیر کی، دوز اولان هر شیی یرئنه یتئرک.» او زامان یحیا راضی اولدی. 16عئسا تعمئد آلیب فورَن سودان چیخدی. او آندا گؤیلر اونون اوزونه آچیلدی و تارینین روحونی گؤردی کی، گؤیرچئن کئمی انئب اونون اوستونه قوندی. 17و گؤیدن بئر سس گلئب ددی: «بو منئم عزئز اوغلومدور، اوندان چوخ راضی‌یام.»
လက္ရွိေရြးခ်ယ္ထားမွု
متّانین رئوایت 3: CAB
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company