انجیلِ یوحنا 1
1
کلامه انسان بیین
1اوَلَ کلام بِه و کلام خدا ور بِه و کلام، خدا بِه؛ 2هَه اوَلَ خدا ور بِه. 3همَّه چی چُو واسطییَم به وجود بومه، و از هر چه که به وجود بومه، هیچ چی نبه که بیدون چو به وجود با.
4چو وجودَ زیندگی به و اَ زندگی، آدمون نور بِه. 5اَم نور تاریکیه دَ سو زنه و تاریکی چو اَم جور نبه.
6مردکی بومه که خدا اَجو خِرسایه به؛ چو نوم یحیی بِه. 7اَو ای شاهدی شارین بومه، که اَ نوره را شهادت بیدی تا همه‌ی مردم چُو واسطییَم ایمان بایرنده. 8یحیی اَ نور نِبه، بلکم بومه تا اَ نور را شهادت بیدی. 9اَ حقیقیه نور که به هر انسانی روشنی دراینه، اومَی اَم دِنیا.
10اَو دِنیا دَ بِه، و دِنیا چو واسطییَم به وجود بومه امّا دِنیا اَوِش اونزونس. 11اَو بومه اِشتن قومه وَر، ولی چو قوم اَوِشون قبول نِکَه. 12امّا به همَّه‌ی کسونی که اَوِشون قبول بکه، اَم قدرتش آدا که خدا خوردگ بیبینده، ینی به هر که چو نوم ایمان بایره؛ 13اَونی که نه خوردگِ جسمییم دِنیا اومنده، نه گوشت و خونییم دِنیا اومنده، نه انسان خواسته ییم دِنیا اومنده، بلکم خدا دَ دِنیا بومنده.
14و کلام، انسان ببه و چَما میون ساکن آبه. و اَما چو شکوه و جلالمون بِوینت، شکوه و جلالی که اَ ای زا شایسته اِسته، که پِه طرفَ بومه که فیض و حقیقت ییَم مَشتِ. 15یحیی دربارَه اَو شهادت دایَی و جیکیلَییَم واتِشَی که: «اَم هَه کسیه که چو دربارم بوات: ”اَو که چِمن پَش آ چو مقام چِمِنَ ویشتره چون پیش از چِمِن اَو بِه“.» 16اَما چو پِرییَه دَ بهرِمون بِبَه، فیض فیضه سر. 17چون شریعتشون، موسی واسطَه یین آدایشونه؛ فیض و حقیقت، عیسی مسیح واسطَییَم بومه. 18هیچکس هرگز خداش نِوینته. امّا اَ ای یگانه زا که پِه وَر اِسه، هَو به که خداش چَمنا آشکار آکه.
یحیی شهادت
19اَم یحیی شهادته وختی که یهودیون، کاهنان و معبد خادمون شون اورشلیمَ دَ بخرساشون چو وَر تا چو کودَ آپَرسنده که: «ته کییش؟» 20یحیی انکارش نکه، بلکم اعترافش بِکَه که: «از مسیح موعود نیم.» 21اَوُن آپرسسشون: «پس کییش؟ ایلیایش؟» یحیی جواو بدا: «نه نییم.» آپرسسشونه: « ته اَ پیغمبری اِسیش که موسی چو اومییَن اَجَماش وعدِش آدایه به؟» یحیی جواو بدا: «نه!» 22اُخُری بواتشون: «پس ته کییش؟ اَما گَوَن چما خرسییارِ را چه جواوی ببروم؟ دربارَه اشتن چه وای؟» 23یحیی همنه که اشعیای پیغمبر واتِش به، بِوات:
«از کسی صَصم که بیابونَ دَ جیکیله بکه بوات
خداوند راهه دوز بِکَرا.»
24اَوه که فریسی فرقه علما طرفَ اومییه بنده، 25یحیی کودَ آپرسسشونه: «اگم ته نه مسیح موعودیش، نه ایلیایش، و نه اَ پیغمبر، پس چرا تعمید دی؟» 26یحیی جواو بِدا: «از آوییَم تعمید دیم، امّا شَما میون ای نفر وِندَرده که شَما اَجو اونزونا 27هَوی که چِمن پَش آ و از لایق نیم چو پای جارِ بنده آکرم.»
28اَمِه همَّه بِیت‌عَنْیا دهَ دَ که اُردن رووارِ اَ دیم اِسه اتفاق دکَتِنده. بِر که یحیی تعمید آدایَی.
خدا قربانیه وَرِه
29ای روز بعد وختی یحیی بوینتشه که عیسی چُو طرف آ بِوات: «اَم اَ خدا قربونیه وَرَه عه که دِنیا گناهون ایگیره! 30اَم اَ کسیه که درباره اَو واتِم به” چِمن پَش مردَکی آ که چو مقام چَمنَ ویشتره چون پیش از چِمِن اَو بِه.“ 31از اِشتن اَجو اونِزونِسَیم امّا چمه خونَین بومَیم و آوییَم تعمیدِم بِدا تا اَو خدا قومه را ظاهر آبه.» 32یحیی شهادتش بدا، بِوات: «خدا روحم بوینت که کوتری شارین آسمون دَ نازل آبه و چو سر بنشتشه. 33از اِشتن اَجو اونزونِسَیم امّا اَوی که اَمِنِش بِخِرسا تا آوییَم تعمید بدیم، اَمِنِش بوات: ”هر موقَع بوینتَیش خدا روح کسی سر نازل آبه و چو سر بنشت، بزون اَو هه کسیه که خدا مقدس روح ییَم تعمید دی.“ 34و از بوینتَیم و شهادت دیم که اَم خدا زاعه.»
عیسی اولین شاگرده
35صبایین روز، هنی یحیی اِشتن دِ شاگردونییَم وِندَردَ بِه. 36وختی که عیسی آوِردَی یحیی اَوِش ددشت و بِوات: «دِدِسا! اَم هه خدا قربونیه وَرَه عه!» 37وختی اَ دِ شاگرد اَم لاوِشون بَشنوس، عیسی پَش راه دِکَتِنده. 38عیسی آگَردس و بیوینتِشه که اَوه چو پش آینده. اَجون بِوا: «چِه گَوا» بواتشون: «رَبّی ینی ای استاد، کا وندری؟» 39عیسی اَجون بِوات: «بایا و بوینا.» پس عیسی خَمنا بِشنده و بیوینتشونه که کا وندره و اَ روز چو ور وندردنده. چون تقریبا ساعت چهار بعد ناهار به.
40ای نفر از اَ دِ نفر که یحیی لاوَعون اَشنوِسَنییَم بِشه عیسی پش، آندریاس، شَمعون پِطرُس بِرا بِه. 41آندریاس اول، اِشتن برا شَمعونش آلوِس و اَجو بوات: «اَما مسیح موعودمون آلَوِسه، هَه ’مسح بیه‘ موعود.» 42و شمعونش بِبَه عیسی وَر. عیسی شعمونِش ددشت و بوات: «تَه شَمعونْ یوحنا زایش، امّا ’کیفا‘ صدار کرنده (هه پطرس که چُو معنی سِگ اِسه).»
عیسی فیلیپُس و نَتَنائیل دعوت کره
43ای روز بعد عیسی تصمیمش بگت که بشییَه جلیل منطقه. اَو فیلیپُسش آلَوِس و اَجو بوات: «چمن پَش بوره!» 44فیلیپُس آندریاس و پِطرُسِ شارین اهل بیت صیدا بِه. 45فیلیپس، نَتَنائیلش آلوِس و اجو بِوات: «اَما اَ کسی که موسی، توراتِ کتابَ دَ اجوش اشاره کرده، و پیغمبره نی چو درباره نیویشتشونه، وینتمونه. اَو عیسی، یوسفه زا، ناصره شهر را اسه!» 46نَتَنائیل اَجو بوات: «مگم بی ناصره دَ چاکه چی اَبَر با» فیلیپُس جواو بدا: «بوره و بِوینِ.»
47وختی عیسی بیوینتِشه نَتَنائیل چو ور آ، چو دربارَه بِوات: «دِدِسا او ای حقیقیه اسرائیلیه که هیچ حیله ای نِداره!» 48نَتَنائیله اجو بوات: «چه طره اَمِن آزونی؟» عیسی جواو بدا: «پیش از اَم که فیلیپُس اَته وُنگ بکره، وختی که هلا انجیله داره بِن بَیش، اتِم بِوینت.» 49نَتَنائیله جواو بدا: «استاد، ته خدا زایش! ته اسرائیل پاتشاه موعودیش!» 50عیسی چو جواوَ بوات: « چمه خونَین که بواتِم اَتِم انجیله داره بِن وینتِه، ایمان آیری؟ چِمه پَش، پیله تره چیون وینی.» 51اُخُری بِوات: «حقیقتا، شَما را وام که وینا آسمون آبی و خدا فرشتَه عون وینا که انسانه زا ور اشنیوَ آینده و آگردنده اروازه آسمون.»
လက္ရွိေရြးခ်ယ္ထားမွု
انجیلِ یوحنا 1: KTT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company