انجیلِ یوحنا 2
2
معجزه عروسی د
1سوّمین روزَ، قانا جلیل منطقه دِهَ دَ، عروسی بِه و عیسی ما نی بِر، بِه. 2عیسی و چُو شاگرده عروسی دعوت بِنده. 3وختی شراو تموم آبه عیسی ما اجو بِوات: «دِ شراو نِدارنده!» 4عیسی اَجو بوات: «ای زنک، از اَم کاره ییَم چه کار دارِم؟ چمن وقت هنوز نِرَسِسه.»
5عیسی ما، نوکرونِش بِوات: «هر چه شَماش بِوا، بِکَرا.» 6بِر، شش سِگیه خمرَه بِه که یهودیون مذهبَ چو آوشون نجسَ چیون پاک کردنه را استفادشون کردَی و هر کومینَ دَ صد و بیست لیتر آو جاش گَتَی . 7عیسی نوکرونِش بِوات: «اَم خمرَه عون آوییَم مَشت آکَراه.» پس خمره عونشون لَوالَو مَشت آکه. 8اُخُری عیسی اَجون بِوات: «هَنِنه ایکه از اَو اوگورا و مجلسه رئیس وَر ببرا.» پس اَوُن ببردشون. 9وختی مجلسه رئیس آوی که شراو آبییه به بچَشِسِشِه، نزونِسَی اَوشون از کا آیردنده، ولی نوکرونی که آوشون اوگَته به زونِسَینده. پس مجلسه رئیس زماش وُنگ بِکَه 10و اَجو بِوات: «همَّه اولَ چاکه شراوییَم پذیرایی کرنده و وختی مهمونه مست آبِنده، ارزونَ شراوه آیرنده؛ امّا ته چاکه شراور تا هارویین روز نیار بِدا!»
11هِمنَه عیسی اِشتن اولین علامت و معجزش قانا جلیل منطقه دَ انجامش بدا و اِشتن شکوه و جلالش آشکار آکَه و چو شاگرده اَجو ایمانشون بایرد.
12اُخُری اِشتن ما و برارون و شاگردون خمنا بِشه شهر کَفَرناحوم، و چند روز بِر وندردنده.
عیسی معبد دَ
13یهودییون پِسَخ عید نزدیک به، عیسی بِشه شهر اورشلیم. 14معبد حیاطَ دَ بیوینتِشه که بعضیه گاو و گوسپند و کوتره خِروشِنده و صرّافه نی نشتِنده و کسب و کار کرنده. 15پس عیسی لافونییَم شلاقیش رچ آکه و اَجونش همُّن چون گوسپندون و گاون خمنا معبد دَ اَبَر بِکَه. و صرّافون سِکه عونش زمینِ سر ایکَه و چون میزونش آگاردونِس 16و کوتر خِروشونِش بِوات: «اَجِمون ببه بَرِسَر و چِمن پِه کییه کسب و کار محل مکرا!» 17اُخُری چو شاگرده ویرشون بایرد که مقدسه نیویشته عونَ نویشتِشونه که: «آتش غیرتی که اِشته کییه را دارم اَمِن سوجونه.» 18پس یهودیون عیسی شون بوات: «چه علامت و معجزه ای اَجَما نشون آدی تا بزونوم اَم کارون را اجازَه داری؟» 19عیسی چون جواوَ بوات: «اَم معبده خراو بِکَراه که از سه روز دلَ هنی اَجو رچ کرم.» 20یهودیون بواتشون: «اَم معبد رچ کردن چهل و شَش سال طولِش کَشِسِه، هَنِنه ته گَوی سه روز دلَ اَجو رچ بکَری؟» 21امّا معبدی که عیسی چو لاوش کردَی اشتن بدن بِه. 22پس وختی که مردنه پَش زندَه آبه، چو شاگرده اَم لاوشون ویر بایرد و مقدّس نیویشته عون و چو لاوَعونشون ایمان بایرد.
23مدتی که عیسی پسخ عید را اورشلیمَ دَ به، خیلیون وختی بیوینتشون علامت و معجزه عون انجام آدی چو نومشون ایمان بایرد. 24امّا عیسی چون ایمانش اعتماد ندَ چون همه‌ی مردمش آزونِسَی 25و لازم نبه کسی دربارَه انسانه چیزی اجو بوا چون اَو اِشتن زونِسَی انسانون دلَ دَ چِه اِسه.
လက္ရွိေရြးခ်ယ္ထားမွု
انجیلِ یوحنا 2: KTT
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
@ 2024 Korpu Company