Lucas 11
11
Albꞌiltej Jun Txa Yu Jesús
(Mateo 6:9-15; 7:7-11)
1Jaꞌ yet junel, jix txali Jesús bꞌey jun lugar. Jaꞌ yet jix lawi xali, ey jun scuywom jix alon tet jaxca tiꞌ:
—Jaach Cuywam, ¿cꞌam mi cha cuyon yin txa, jaxca jix yute scuyon ebꞌ scuywom Juan? ẍi naj tet Jesús.
2Jix yalon Jesús tet ebꞌ jaxca tiꞌ:
—Jaꞌ yet chex txali, quey tiꞌ che yute je yalon jaxca tiꞌ:
Mamin, /tol ey jaach ecꞌ bꞌey satcan./
Miman ojabꞌ yeloc apnoj ja bꞌi.
Titan ja wakꞌ Yaawilal titiꞌ. /Jaxca ojabꞌ yunen tzet cha woche bꞌey satcan tuꞌ, quey ojabꞌ tuꞌ chi yun bꞌey sat txꞌotxꞌ tiꞌ./
3Akꞌ cu loꞌbꞌe cu loꞌ yet junjun cꞌu jon.
4Akꞌ mimancꞌulal kibꞌan yu cu penail, jaxca chi kute kakꞌon mimancꞌulal yibꞌan ebꞌ ey tzet chi cu uteni.
Manche jon ja wakꞌ akꞌle porobꞌal.
/Catuꞌ chon ja colon pax el yul skꞌabꞌ spenail./
5Jix lawi yalon Jesús wan tiꞌ xin, jix yalon pax jaxca tiꞌ:
—Kꞌinaloj ta ey junoj jex chi jul junoj je yamigo je cꞌatan yet chuman akꞌbꞌal. Chi jul yalon ey jex jaxca tiꞌ: “Jaach wamigo, akꞌ niꞌoj loꞌbꞌe jin qꞌuexaꞌ. 6Yutol ey jun wamigo lalanto sjul tiꞌ, naat taꞌ speto. Cꞌuxan cꞌam pax niꞌoj tzet watxꞌ wakꞌon tet,” ta ẍi chi jul je cꞌatan. 7Kꞌinaloj tucꞌal chex takꞌwi pax eltoj tet naj jaxca tiꞌ: “Manche jin ja wetne. Jix jin majche jin na an. Lalanxa jin wey yetoj ebꞌ wuninal sat txꞌat. Yuxan cꞌam chi skeꞌ chin a waan wakꞌon tzet cha kꞌan ey jin tiꞌ an,” kꞌinaloj je chi eltoj tet. 8Jain chi wal ey jex, caxcꞌal je yamigo, cꞌam chex a waan je yakꞌon tet yin eymanil. Ta jacꞌalaꞌ pax cꞌal skꞌanon ey jex, tejan chex a waan je yakꞌon tet, yet watxꞌ chi sbꞌej yawi octoj ey jex. Catuꞌ che yakꞌon jatacꞌalaꞌ jantaj tzet chi skꞌan tuꞌ. 9Yuxan chi wal pax ey jex: Kꞌanwej, oj yakꞌ Dios ey jex. Seywej, oj ilcha je yu. Awanwej octoj stiꞌ puerta, oj jajle ey jex. 10Yutol jaꞌ ebꞌ chi kꞌanoni, chi ẍaꞌ ebꞌ. Jaꞌ ebꞌ chi seyoni, chi ilcha yu ebꞌ. Yetoj pax ebꞌ chi awi octoj stiꞌ puerta, chi jajle tet ebꞌ.
11Jaꞌ jaex mame jex tiꞌ, ta chi skꞌan je yuninal junoj loꞌbꞌe ey jex, /¿tumi jaꞌ junoj chꞌen chꞌen che yakꞌ tet?/ Ta jaꞌ junoj pescado chi skꞌan ey jex, ¿tumi jaꞌ junoj labꞌa che yakꞌ tet? 12Ta jaꞌ junoj jos chi skꞌan ey jex, ¿tumi jaꞌ junoj noꞌ sinam che yakꞌ tet? 13Jaꞌ jaex tiꞌ, caxcꞌal pena jex, caw je yotaj che yakꞌ tzetyetal watxꞌ tet je yuninal. Yel cꞌal chi yakꞌ pax cu Mam eyecꞌ bꞌey satcan, chi yakꞌ Santo Espíritu tet ebꞌ chi kꞌanon tet, ẍi Jesús tet ebꞌ.
Jaꞌ Ebꞌ Jix Aloni Tol Jaꞌ Naj Diablo Eyoc Yin Jesús
(Mateo 12:22-30; Marcos 3:19-27)
14Jaꞌ yet junel, ey jun naj eyoc pena espíritu yin. Cꞌam niꞌoj chi skeꞌ skꞌanabꞌ naj yu. Jaꞌ Jesús, jix iꞌon el jun pena espíritu tuꞌ yin naj. Jaꞌ yet jix el yin naj, chi xa skeꞌ skꞌanabꞌ naj. Yuxan, ecꞌal ebꞌ ánima jix qꞌueya scꞌul yu. 15Ey pax wan ebꞌ jix alon jaxca tiꞌ:
—Jaꞌ jun winaj tiꞌ, chi ton skeꞌ yiꞌon el pena espíritu yin ánima yutol jaꞌ naj Beelzebú, jaꞌton naj yaawil ebꞌ pena espíritu tuꞌ eyoc yetoj, ẍi ebꞌ.
16Ey wan ebꞌ xin, tol jix yoche ebꞌ jix yakꞌ porobꞌal Jesús. Yuxan jix skꞌan ebꞌ yil junoj satcanil milagro tet Jesús yu xꞌoxon Naj yil ebꞌ ta tol yel jix tit Naj bꞌey Dios. 17Yotaj xa pax Jesús tzet lalan snaꞌon ebꞌ. Yuxan jix yal tet ebꞌ jaxca tiꞌ:
—Kꞌinaloj ta ey junoj miman conobꞌ bꞌey chi poꞌocha ebꞌ yaaw, catuꞌ chi yakꞌlen a jowal ebꞌ, chi lawi el jun conobꞌ tuꞌ. Kꞌinaloj ta ey junoj nail ebꞌ ánima chi poꞌocha yu jowal. Chi sajlemtoj jun nail ebꞌ ánima tuꞌ. 18Queyton pax tuꞌ Satanás, ta chi poꞌochatoj naj yetoj ebꞌ yet pena espíritu tuꞌ, ¿tumi chi cancan naj yin yopiso? Chi wal wan tiꞌ ey jex, yutol jaꞌ naj Beelzebú eyoc wetoj je yaloni, catuꞌ chi wiꞌon el ebꞌ yet pena espíritu. 19Ta tol yel che yalaꞌ. ¿Mac pax eyoc yetoj ebꞌ je cuywom yet chi iꞌle el ebꞌ pena espíritu yin ánima yu ebꞌ? Ilaꞌ xin, man jichanoj je naꞌoni, yutol jaꞌcꞌal oc ebꞌ je cuywom tuꞌ chi txꞌoxon eloj tol man jichanoj je naꞌoni. 20Jain tiꞌ, asan yipal Dios chi wakꞌbꞌalne catuꞌ chi wiꞌon el ebꞌ pena espíritu tuꞌ. Yuxan, miman txequel tol jix ẍaꞌel yich yakꞌon Yaawil Dios je xol.
21Kꞌinaloj ta ey junoj winaj caw ey yip. Ey smitxꞌkꞌabꞌ yet jowal, yet watxꞌ chi skeꞌ scolon sna. Cꞌam tzet chi oc yin stzettaj yetal tuꞌ. 22Kꞌinaloj ta chi jul pax junojxa mactxequel yel ecꞌbꞌan yip yintaj naj. Ta chi akꞌle eyqꞌuey naj yaaw na tuꞌ yu, chi yiꞌecꞌ masanil smitxꞌkꞌabꞌ naj eyoc yipoj scꞌul tuꞌ. Chi lawi jun tuꞌ, chi spoꞌon ecꞌ masanil wan chi stoꞌecꞌ tet naj tuꞌ. 23Jaꞌ ebꞌ man eyoj oc wetoj an, cajat oc ebꞌ win an. Jaꞌ ebꞌ cꞌam chi yambꞌan oc wetoj an, jaꞌton ebꞌ chi akꞌon sajlem cantoj ebꞌ.
Skꞌaneal Jun Pena Espíritu Chi Meltzotoj Bꞌey Ey Taꞌa
(Mateo 12:43-45)
24Kꞌinaloj ta ey junoj pena espíritu chi el yin junoj ánima tinaniꞌ. Chi lawi tuꞌ xin, chi ecꞌ bꞌey masanil tajin lugarlaj. Chi seyon ecꞌ bꞌey watxꞌ chi xew niꞌoj. Ta cꞌam chi ilcha bꞌey watxꞌ chi eyi. Chi snaꞌ jaxca tiꞌ: “Oj jin meltzo bꞌey ey jin taꞌa bꞌey jix jin tita,” ẍi. 25Jaꞌ yet chi apni, chi yilon oc spixan naj tuꞌ, laan jaxca junoj na qꞌuisbꞌil, caw watxꞌ yili. 26Yuxan chi too yiꞌtej jujwanojxa yet pena espíritu ecꞌbꞌanxa spenail yintaj. Catuꞌ chi swaꞌnen xacꞌal ey sbꞌa ebꞌ yin spixan naj. Yuxan, yel xacꞌal pena chi yun yeloc naj yintaj yet sbꞌabꞌelal, ẍi Jesús.
Ebꞌ Watxꞌ Yet
27Jaꞌ yet lalan yalon Jesús wan tuꞌ, ey jun ix ix jix awi a xol ebꞌ ánima tuꞌ:
—Caw watxꞌ yet ix ix ey jaach yuneꞌ, ix bꞌey jix jaach txutxwi, ẍi ix tet Jesús.
28Jix yalon Jesús jaxca tiꞌ:
—Yel xacꞌal ecꞌbꞌan swatxꞌil yet ebꞌ chi abꞌen skꞌane Dios catuꞌ chi sjijen ebꞌ, ẍi Jesús.
Ebꞌ Jix Kꞌanon Junoj Milagro Yilaꞌ
(Mateo 12:38-42; Marcos 8:12)
29Caw ecꞌal ánima jix oc joyan yin Jesús. Jix yalon tet ebꞌ jaxca tiꞌ:
—Jaꞌ ebꞌ ánima yet jun tiempoal tiꞌ, caw pena ebꞌ. Yutol tucꞌal chi skꞌan junoj milagro ebꞌ yilaꞌ, junoj chi txꞌoxon yipal Dios. Asan cꞌal jun milagro oj jin txꞌox yil ebꞌ. Jaꞌton junoj jaxca jun jix xꞌox Dios yin jun ẍejabꞌ chi yij sbꞌi Jonás. 30Jaꞌ naj Jonás tuꞌ, xꞌoxbꞌanil el yipal Dios tet ebꞌ ánima a conobꞌ Nínive yet peyxa. Jaxca naj Jonás tuꞌ quey jin ton tuꞌ, jain, Akꞌbꞌil Wopiso yu Dios xol ebꞌ ket animail tiꞌ an. Xꞌoxbꞌanil el yipal Dios oj jin utele sattaj ebꞌ ánima yet jun tiempoal tiꞌ. 31Jaꞌ yet oj jul scꞌual yet oj snaꞌon oc Dios yin ebꞌ ánima tiꞌ, jaꞌ ix yaaw bꞌey sur yet peyxa, oj a linan ix, catuꞌ oj yalon a ix spenail ebꞌ ánima tiꞌ. Yutol caw naat jix tit ix, jix jul ix yabꞌen tet naj Salomón jantaj sjelanil. Jaxa tinaniꞌ, ey jun mactxequel ecꞌbꞌan yeloc apnoj yintaj Salomón* tuꞌ, cꞌam pax chi jul ebꞌ ánima yabꞌ tzet chi yalaꞌ. 32Jaꞌ ebꞌ ánima a Nínive yet peyxa tuꞌ, jaꞌ yet jix ecꞌ yalon el skꞌane Dios naj Jonás xol ebꞌ, caw jix snaꞌ sbꞌa scꞌul ebꞌ. Jal tinaniꞌ, ey jun mactxequel ecꞌbꞌan yeloc apnoj yintaj naj Jonás tuꞌ, cꞌam pax chi snaꞌ sbꞌa ebꞌ ánima tiꞌ yin spenail. Yuxan, jaꞌ yet oj jul scꞌual yet oj snaꞌon oc Dios yin ebꞌ ánima tiꞌ, oj a waan ebꞌ a Nínive, catuꞌ oj yalon a spenail ebꞌ tinaniꞌ.
Skꞌaneal Tzejtebꞌal
(Mateo 5:15; 6:22-23)
33Jaꞌ yet chi kaon oc cu tzejtebꞌal, cꞌam bꞌey chi kaatoj bꞌey man txequeloj. Cꞌam bꞌey chi kaoctoj yalan junoj caanteꞌ. Jaꞌ yibꞌan junoj tzetyetal tol naat eyaoj, jatuꞌ chi kaatoj, yet watxꞌ chi tzejtenele ebꞌ eyoctoj yul na yu. 34Jaꞌ sbꞌakꞌ cu sat, laan jaxca junoj tzejtebꞌal yu cu mimanil. Yuxan, ta watxꞌ tzet bꞌey eyoc cu sat, sajkꞌinal jon toni, watxꞌ chi el kunen yetoj cu mimanil. Ta jaex pena bꞌey che yaoc je sat, chex can xol kꞌejkꞌinal yu. 35Che yil cꞌal je bꞌa xin, yet watxꞌ jaꞌ je tzejtebꞌal manche je qꞌuextoj yin kꞌejkꞌinalil. 36Ta sajkꞌinal yeoc masanil je mimanil, ta cꞌam niꞌoj kꞌejkꞌinal je yin, sajkꞌinal jex toni. Jaxca junoj tzejtebꞌal chex tzejtaneni, jaxca tuꞌ chi yun sajbꞌi el je naꞌbꞌal, ẍi Jesús.
Chi Yaltej Jesús Spenail Ebꞌ Fariseo Cꞌal Ebꞌ Cuywam Yin Sley Moisés
(Mateo 23:1-36; Marcos 12:38-40; Lucas 20:45-47)
37Jaꞌ yet jix lawi yalon Jesús wan tuꞌ, ey jun naj Fariseo jix iꞌontoj Naj low bꞌey sna. Yuxan jix too Jesús bꞌey sna naj tuꞌ. Jix ey chotan low yetoj naj. 38Jaꞌ naj Fariseo tuꞌ, jix qꞌueya scꞌul yutol ma sajbꞌane skꞌabꞌ Jesús jaxca sbꞌeybꞌal ebꞌ. 39Jix yalon Naj Kaawil tuꞌ tet naj jaxca tiꞌ:
—Jaex Fariseo jex tiꞌ, caw saj che yute yinlaj je vaso cꞌal je plato. Jal pax yin je naꞌbꞌal, asan chichoncꞌulal, yetoj wanxa tzetyetal man watxꞌoj eyocoj. 40Caw cꞌam je naꞌbꞌal, ¿tumi man je yotaj oj tol jaꞌ jun mactxequel jix waꞌnen wan tzetyetal chi kil yinlaj, jaꞌ pax jix waꞌnen wan tzetyetal cꞌam chi kil yul-laj? 41Ta watxꞌ che yun tet je yet animail, ta queytuꞌ che yute jaxca tuꞌ, oj sajbꞌoj el je pixan cꞌal je naꞌbꞌal. Chi yal yeloc apnoj cꞌamxa tzet pena eyoc je yin.
42Okꞌbꞌal jex cꞌule jaex Fariseo jex tiꞌ. Che yakꞌ sdiezmoal an alawen, yetoj an ruda. Tzꞌajan xacꞌal che yakꞌ sdiezmoal masanil ita.#11:42 Jaꞌ diezmo chi yal yeloc apnoj, jun chi el xol laonebꞌ catuꞌ chi akꞌle tet Dios jatacꞌalaꞌ tzet ẍi sley Moisés. Jaꞌ ebꞌ Fariseo chi yakꞌ sdiezmoal ebꞌ yin masanil tzetyetal, caxcꞌal comon ita, yet watxꞌ chi xꞌoxel ebꞌ tol caw miman yeloc apnoj Dios yul sat ebꞌ. Yu jun tuꞌ, jaꞌ je naꞌoni tol man sowalil oj watxꞌ che yute je naꞌbꞌal. Man sowalil oj che camcꞌulne Dios. Tol jaꞌ wan tiꞌ sowalil che yun pax oj, catuꞌ cꞌam che bꞌejcan je yunen cꞌaltaꞌ wan jix je yun tuꞌ. 43Okꞌbꞌal jex cꞌule jaex Fariseo jex tiꞌ. Jaꞌ bꞌey snail culto, asan bꞌey chi ey chotan ebꞌ mimej winaj che yoche chex ey chotanoj. Yetoj pax yet chex ecꞌ yul-laj calle, che yoche xacꞌal chi yiꞌey sbꞌa ebꞌ ánima ey jex. 44Caw okꞌbꞌal jex cꞌule. Caw caabꞌ sat jex. Laan jex jaxca bꞌey mujan junoj camnaj manxa txequeloj bꞌey mujan. Chi ecꞌ ánima yibꞌan, man pax yotaj oj ebꞌ ta ey mac kꞌaꞌnajxa eytoj bꞌey linan oc ebꞌ tuꞌ, ẍi Jesús. 45Jix lawi yalon jun tuꞌ, ey jun naj cuywam yin sley Moisés jix alon tet Jesús jaxca tiꞌ:
—Jaach Cuywam, jaꞌ yet jix ja walon wan tiꞌ, jaon tiꞌ, man watxꞌoj jix kabꞌe, ẍi naj tet Jesús.
46Jix yalon Jesús tuꞌ:
—Okꞌbꞌal jex pax cꞌule jaex cuywam jex yin sley Moisés tiꞌ. Jaꞌ wan je chejbꞌanil, laan jaxca junoj ijatz cꞌam chi laccha a yu ánima. Tucꞌal che bꞌulbꞌa a ijatz che yakꞌon yij ebꞌ ánima. Cꞌam pax chex oc mitxꞌan je tꞌunon a niꞌoj yijatz ebꞌ tuꞌ. 47Caw okꞌbꞌal jex cꞌule, yutol chi bꞌet cam je waꞌne spantion ebꞌ ẍejabꞌ Dios bꞌey camposanto, ebꞌ makꞌbꞌil cam yu ebꞌ je yichmam yet peyxa. 48Yuxan, jaꞌ yet che yunen wan tuꞌ, lalan je txꞌoxon eloj tol watxꞌ jix yute sbꞌa ebꞌ je yichmam je naꞌoni. Yutol jaꞌton ebꞌ makꞌnen cam ebꞌ ẍejabꞌ Dios tuꞌ. Jaex xa chex bꞌet je tzꞌaj je waꞌne a panteón yibꞌan ebꞌ.
49Yuxan jix yal can Dios yetoj sjelanil jaxca tiꞌ: “Oj jin chejtoj wan ebꞌ oj alon el jin kꞌane je nan je xol, yetoj wanxa ebꞌ jin chejabꞌ. Ey ebꞌ oj je makꞌ camoj. Ey ebꞌ tucꞌal oj je yetne yetoj syaꞌtajilal,” ẍi Dios. 50Yuxan, masanil ebꞌ ẍejabꞌ Dios makꞌbꞌil cam yet tax cꞌal jix el yich yul yibꞌankꞌinal tiꞌ, oj ale oc spenailoj ebꞌ ánima yet jun tiempoal tiꞌ. 51Masanil ebꞌ ẍejabꞌ Dios makꞌbꞌil xa camoj, yet cꞌal jix makꞌle cam naj Abel, masantaꞌcꞌal yet jix cam naj Zacarías,#11:51 Jaꞌ naj bꞌabꞌel winaj makꞌbꞌil cam yu yet animail, jaꞌton naj Abel. Chi kil skꞌaneal bꞌey Génesis 4:1-8. Jaxa naj Zacarías, slawubꞌ ẍejabꞌ Dios makꞌbꞌil cam naj yu yet animail. Chi kil skꞌaneal bꞌey 2a Crónicas 24:21. jun jix cam snan xol smeẍail xaambꞌal yetoj stemplo Dios. Jain chi wal ey jex, masanil ebꞌ makꞌbꞌil cam tuꞌ, oj ale oc spenailoj ebꞌ ánima yet jun tiempoal tiꞌ.
52Okꞌbꞌal jex cꞌule jex cuywam yin sley Moisés, yutol yin junelne che yal tol je yopiso je cuyon ebꞌ ánima yin skꞌane Dios. Ilaꞌ cꞌam pax che yaoc je naꞌbꞌal yin skꞌane Dios tuꞌ. Jal ebꞌ chi yoche chi yaoc scꞌul yin, cꞌam che chaꞌ pax yaoc scꞌul ebꞌ yin, ẍi Jesús tet ebꞌ.
53Yet jix lawi yalon Jesús wan tuꞌ, jix tit sjowal ebꞌ cuywam yin sley Moisés yetoj ebꞌ Fariseo tuꞌ yin naj. Caw ey tzetyetal jix skꞌanle ebꞌ tet Jesús. 54Jix yechbꞌane ebꞌ yabꞌeni, ta ey tzet pena oj yute yaloni, catuꞌ chi bꞌuchwa ebꞌ yin.
လက္ရွိေရြးခ်ယ္ထားမွု
Lucas 11: knj
အေရာင္မွတ္ခ်က္
မၽွေဝရန္
ကူးယူ
မိမိစက္ကိရိယာအားလုံးတြင္ မိမိအေရာင္ခ်ယ္ေသာအရာမ်ားကို သိမ္းဆည္းထားလိုပါသလား။ စာရင္းသြင္းပါ (သို႔) အေကာင့္ဝင္လိုက္ပါ
© 2016, Wycliffe Bible Translators, Inc. All rights reserved.