Mâki 10
10
Zîsɛ è sɛŋ lɛ̀ é pîlaŋ taa-laa ma
(Maafîu 19:1-12; Lûu 16:18)
1Zîsɛ è sìɣe naa é lí Zuda kpiniŋ su Zɔdiŋ Yai pôlu. Kpɔŋ è ŋɔ́nɔ ŋ̀á tɛ̀ mà gɔlɛ é ŋɔ́nɔ Ɣâla mɛni lɛ̀ dîa yɛ̂ɛ berei è kɛ̀ gɛ̂i lai.
2Faresii-ŋa dí pà bɔ́ a gɛ́ɛ dí zu kɔɔ̂ŋ. Dí m̀arê kɛ̀, dîyɛɛ mai, “Gáa dɔ̂ŋ lá-wooi ma a gɛ́ɛ núu é ŋɔnɛnîi lɛ́ɛ?” 3È dímarê kɛ̂, ǹyɛɛ dîai, “Lé tɔŋ ƃé Mose è dɛ̀ɛ kápɔ é pîlaŋ nyíŋi mai?” 4Dí mò ma, “Mose è fàa ma a gɛ́ɛ núu é táa-laa-kɔlɔ pɔ̃yɛ é dɛɛ ŋɔnɛnîi pɔ́ é ǹɛɛ.” 5Kɛ́lɛ, Zîsɛ è m̀o dîa, “Káwolii kpɔ̂lɔ mɛni ƃé è dɔ̂ŋ ŋí pɔ̃yɛ la. 6Kɛ́lɛ, maa-ŋuŋ su, Ɣâla è ǹɔii kpɛ̀tɛ, é núu kpɛtɛ, a surɔ̂ŋ da nɛnî. 7Nyíŋi mɛni ma surɔ̂ŋ a pâi ǹâŋ lɛɛ̂i da ǹee é kánaŋ ŋɔnɛnîi ma, 8da ǹyaa da pâi kɛ̂i a kpono tɔnɔ. Dífa ŋɔ́nɔ kɛ̀ a kpono feerɛ, kɛ́lɛ, díkaa a kpono tɔnɔ. 9Mɛni ma, sɛŋ Ɣâla a bú gîe mai, núu da fé gula gîe ma.”
10Zîsɛ ŋɔpôlu-ƃelai dí ŋɔ́nɔ m̀arê kɛ̀ bɛ́rɛi mu é pílaŋ mɛni tɔnɔi ŋí ma. 11È zu tòo ǹyɛɛ dîai, “Núu à ŋɔnɛnî lɛ̀ɛ é nɛnî da kpɛ́ni kula, gɛ̀ ní m̀aa nuui tí a wulu-wulu kɛ́. 12À kɛ̀ nɛnî da à ŋɔsurɔ̂ŋ lɛ̀ɛ é surɔ̂ŋ da kpɛ́ni kula, m̀aa nɛnîi ǹyaa máŋ a wulu-wulu kɛ́.”
Zîsɛ è lûwa tòo nîa-pɛlɛɛ dîa
(Maafîu 19:13-15; Lûu 18:15-17)
13Nûa dí kɛ̀ nâa pâi a ǹîa-pɛlɛɛi Zîsɛ pɔ́ a gɛ́ɛ é ǹyée pɛlɛ dîa. Kɛ́lɛ, ŋɔpôlu-ƃelai dí díkpèra. 14M̀ɛnii ŋí naa káa Zîsɛ mii, è ǹíi ŋwàna é m̀o dîa ǹyɛɛi, “Ka ǹîa-pɛlɛɛi lɛ́ɛ naa dí pá ḿbɔ, káfe díkpera, kpɛ́ni fêi, ǹúu kɛ́ɛ-ŋai ŋí ƃé Ɣâla ŋɔkâloŋ-laai káa dímɛni ma. 15Tɔ̃yâ ma, ŋá m̀ó kâa, ǹúui va ǹyée sèe Ɣâla ŋɔkâloŋ-laai mu yɛ̂ɛ lôloŋ, va li naa.” 16Nya ƃe è ǹyée zãa é bɛ̀lɛ ǹîa-pɛlɛɛi dîa é lûwa tòo dîa.
Ǹyaŋkpa tɔɔ́i
(Maafîu 19:16-30; Lûu 18:18-30)
17Zîsɛ kɛ́ɛ liî ŋɔsiâi mai, nalôŋ tɔnɔ è pà bɔ́ a kîrɛ é pɛ́lɛ ŋume ŋá dúɛ ǹyɛɛ m̀ai, “Kaamɔ̂ɔ lɛ́lɛɛ, lé ƃé ŋa pɔ̂ri gɛ̂i a gɛ́ɛ ŋá wɔ́lɔ-wɔlɔ fulu-laa sɔlɔ ƃói?” 18Zîsɛ ǹyɛɛ m̀ai, “Yâ kɛ̂i ḿâ núu lɛ́lɛɛ, lé mɛni ma? Núu da fé lɛ́lɛ ní, fɛ̂ɛ nɔ́ Ɣâla ǹyaa tɔnɔ. 19Í dɔ̂ŋ-ŋai kɔ́lɔŋ: ‘Ífe núu pàa, ífe wulu-wulu kɛ̀, ífe ŋúma kɛ̀, ífe wôya sere-faa kɛ̀, ífe wôya kɛ̀, ƃâa kɛ́ ínâŋ ma da ílee.’ ” 20Ǹalôŋ è mò Zîsɛ ma ǹyɛɛi, “Kaamɔ̂ɔ, ŋa dɔ̂ŋ-ŋai ŋí kélee mɛi káa, é sìɣe ŋásurɔ̂ŋ-loo tãi ma.” 21Zîsɛ è ŋ̀ɛi pìlaŋ mà a wɛli kɛ́-maa pere, ǹyɛɛ m̀ai, “Mɛni tɔnɔ ƃé a lɛɛ. Lí í íyeêi sãai kélee kɔ́lɛ, zɛŋ yâ gula zui, dɛɛ gôlo-ƃelai pɔ́, gɛ̀ ní, laai-kɛ-sɛŋ a pâi kɛ̂i íyeêi Ɣâla-taa. Nyíŋi pôlu ma, pá í kɛ́ ḿbôlu.” 22Ǹalôŋ kɛ́ɛ a ŋ̀óoi ŋí mɛnîi, è ŋ̀ɛ́i yèŋ zu é lí a malôŋ pere, kpɛ́ni fêi, sãa támaa è kɛ̀ ǹyêei.
23Zîsɛ è tìnaŋ, é m̀ó ŋɔpôlu-ƃelai dîa ǹyɛɛi, “Gbanaŋɔɔ̂i kpɔ́ a gɛ́ɛ diai tɔɔ sãa támaa a díyêei dí lí Ɣâla ŋɔkâloŋ-laai su!” 24Bôlu-ƃelai kíli ŋá e tɛ̀i a ŋ̀óoi ŋí. Kɛ́lɛ, Zîsɛ è ŋɔ́nɔ lì tuɛ pere a ŋ̀óo ǹyɛɛ dîai, “Ńônii, gbanaŋɔɔ̂i kpɔ́ a gɛ́ɛ núu é lí Ɣâla ŋɔkâloŋ-laai su (à kɛ̀ a gíli kɛ̀ tɔɔ-laa ma)! 25Tɔɔ-nuu liɛ́ɛ Ɣâla ŋɔkâloŋ-laai su kpanaŋɔɔ̂i é tɛ́ɛ la soo-fáleŋ tɛ̂ɛi ma saɣílaŋ-wôlo su.” 26Ŋ̀óoi ŋí è ŋɔpôlu-ƃelai kíli ŋá tɛ̀i kpɔ́ a ŋ̀ánaa, dîyɛɛ m̀ai, “Gɛ̀ ní, gbɛ̂ɛ ƃé ŋaŋ a pɔ̂ri ƃâloi?” 27Zîsɛ è díkàa kpɔ́ sĩ́i ǹyɛɛ dîai, “Bɔri fé núu mi, fɛ̂ɛ nɔ́ Ɣâla ǹyaa tɔnɔ. Mɛni kélee m̀aa pɔ̂ri káa mì.” 28Pitɛ è m̀o m̀a ǹyɛɛi, “Gáa. Kwâa kúyêei sãa kélee lɛ́ɛ kwa pîlaŋ ípôlu.” 29Zîsɛ ǹyɛɛ dîai, “Tɔ̃yâ ma, ŋá m̀ó kâa, núu da à bôlu fè ŋɔpɛ́rɛi ma, kpaa máŋ ǹîa-ní, ǹéɣe-ní, ǹee, ǹâŋ, ǹônii, da ŋɔlɔii ma ḿaa mɛni ma da Duŋ Lɛ́lɛɛi, 30m̀aa nuui tí a pâi pɛ́rɛ-ŋa sɔlɔ ƃôi é tɛ́ɛ ŋ̀uŋ támaa ma ŋ̀éniɛi ŋí su, da lia-surɔŋ da nɛnî-ŋa, leɣe-surɔŋ da leɣe-nɛnî-ŋa, ǹee-ní támaa, nîa-pɛlɛɛ támaa kɛ́ ƃò ǹyêei da lɔii, gbɔara-ƃela támaa máŋ. Ǹyaŋ a pâi wɔ́lɔ-wɔlɔ fulu-laai sɔlɔ ƃôi tuɛ-pere ɣéniɛi su. 31Diai díkaa a duɛ-tuɛi, da pâi kɛ̂i a gbɛɛ ŋái, diai a gbɛɛ ŋái díkɛ ƃo a duɛ-tuɛi.”
Zîsɛ è ŋɔ́nɔ ŋɔsaai maa mɛni ƃò naa tuɛ
(Maafîu 20:17-19; Lûu 18:31-34)
32Nya ƃe dí kɛ̀ berei su, díkɛ li Zerusâlɛŋ, Zîsɛ kɛ́ sia dítuɛ dípɛlɛ púɔɔ. Diai kélee pîlaŋ bôlui dí kɛ̀ yaôi. È ŋɔpôlu-ƃela puu kao feerɛi sìɣe ŋɔ́nɔ, gɛ́ m̀ɛni-ŋai ƃo dîa, nyii pâi kɛ̂i lai. 33È m̀o dîa ǹyɛɛi, “Ka gáa. Kwa nâa kɛ́ liî Zerusâlɛŋ. Nàa ƃé da pâi núu-kpune Ǹóŋ sonîi naa, dí dɛɛ zâla láa soŋ-ƃela kpaya-kpayai pɔ́ da Dɔ̂ŋ lɛ́-ƃelai. Da pâi tɔ̂ŋ pûi ma a gɛ́ɛ é sáa, dí dɛɛ Zɛ̃tai-ŋai pɔ́. 34Da pâi ɣɛ́lɛ-maa kulâi gbonôi, dí díla-ya pú ma, dí ǹokwa, dí bàa. Kɛ́lɛ, ɣele kûu saaƃa à tɛ̀ɛ, a pâi m̀u siɣêi ŋɔ́nɔ saa yêei.”
Zĩi da Zɔ̂ŋ dí mɛni da wɛ̀li
(Maafîu 20:20-28)
35Zɛƃɛdi ǹóŋ Zĩi da Zɔ̂ŋ dí kùla díƃarâai sáma, dí pá bɔ́ dí m̀o ma, “Kaamɔ̂ɔ, kwa ŋ̀wɛ̂lii í mɛni da kɛ́ kûɛ.” 36Ǹyɛɛ dîai, “Lé ƃé ka ŋ̀wɛ̂lii ŋá gɛ́ kâai?” 37Dí mò m̀a, “Gɛ́ kútɔnɔ da é sée ílaa-mii-yee mɛi, gbelii é sée íkɔɔ-yee mɛi-pere yâ kɛ̀ ífolo-laai su.” 38Kɛ́lɛ, Zîsɛ è m̀o dîa, “Káfe m̀ɛnii kɔ́lɔŋ ka vɛlîi. Ka pɔ̂ri kákpelêi a gbele-kɔɛi ŋa ŋ́gbele lai? Ka pɔ̂ri káyee seêi batâi sii mu da ŋábatâi kɛ̀ lai?” 39Dí mò ma, “Kwa pɔ̂ri.” Zîsɛ è m̀o dîa, “Gbele-kɔɛi ŋa ŋ́gbele lai, ka pâi kákpelêi la, berei da pâi ŋábatâi kɛ̂i lai bere ƃé da pɔri kábatâi kɛ̂i la. 40Kɛ́lɛ, a gɛ́ɛ núu da é sée ńaa-mii-yee mɛi, kpaa máŋ ŋ́gɔɔ-yee mɛi pere m̀aa ŋuŋ ma ƃò fé ńyêei, kɛ́lɛ, gáa diai mɛni ma Ɣâla a naa kpɛtɛ dímɛni mai.” 41Bôlu-ƃela puui kɛ́ɛ da m̀ɛnii, dí dílii ŋwàna Zĩi da Zɔ̂ŋ dia. 42Zîsɛ e dítòli è m̀o dîa, “Ká gɔ́lɔŋ a gɛ́ɛ diai da sîa a wala-wala-laa Zɛ̃tai-ŋai mɛi, da gɛ̀ a ŋɛi-kpala. Dínuu kɛ́tɛ-ŋai da wála-wala-laa sîa kpɔ́ a ŋánaa. 43Kɛ́lɛ, vé pâi kɛ̂i tí kásama. Kɛ́lɛ, à kɛ̀ núu da à ŋ̀wɛli é kɛ́ a núui gɛ́tɛi kásama, fɛ̂ɛ m̀aa nuui a gbîŋ kɛ̀ a kálɔmu-nuu, 44ǹyaŋ à kɛ̀ núu da à ŋ̀wɛli é kɛ́ a núu-tuɛ-nuu kásama, fɛ̂ɛ é kɛ́ a luɛ kákelee káyêei, 45kpɛ́ni fêi, núu-kpune Ǹóŋ máŋ fé pá ní a gɛ́ɛ núu é tíi kɛ́ mì. Kɛ́lɛ e pà a gɛ́ɛ é tíi kɛ́ nûa dîɛ, é ŋɔfúlu-laai tɛ́ɛ a maa tee sɛŋ núu támaa mɛni ma.”
Zîsɛ è ŋ̀ɛi-pu-nuui Batimiɔ ƃalo
(Maafîu 20:29-34; Lûu 18:35-43)
46Dí sèri Zɛleko. Zîsɛ, ŋɔpôlu-ƃelai da kpɔŋ kɛ́tɛ dí kɛ́ kulâi Zɛlekoi, ŋɛi-pu-naloŋ tɔnɔ è kɛ̀ seêni berei kɔlɛ. Ǹáa ƃé kɛ̀ a Batimiɔ, Timîa ǹóŋ. 47Gɛ́ɛ a m̀ɛni a gɛ́ɛ è kɛ̀ a Nâzarɛ Zîsɛ, è pɛ̀lɛ láɣiɛɛ ma, ǹyɛɛi, “Deeƃé Ǹóŋ Zîsɛ, ḿalôŋ káa!” 48Núu támaa dí gbèra dí m̀o ma a gɛ́ɛ é m̀ɛni sáa, kɛ́lɛ, è làɣi kpɔ́ a zu kɛ́tɛ, ǹyɛɛi, “Deeƃé Ǹóŋ, ḿalôŋ káa!” 49Nya ƃe Zîsɛ e tɔ̀ɔ e m̀o dîa, “Ka dóli.” Dí ŋɛi-pu-nuui tòli, dí m̀o ma, “Ílii kpéle í ímu siɣe. A ítolîi.” 50Batimiɔ è ŋɔpili-kpãai pìli é píli ɣelêi é pá Zîsɛ pɔ́. 51Zîsɛ è m̀arê kɛ̀, “Lé ƃé yâ ŋ̀wɛ̂lii ŋá gɛ́ yɛ̂i?” Batimiɔ ǹyɛɛ m̀ai, “Kaamɔ̂ɔ, gɛ́ ŋá kwaa káa.” 52Zîsɛ è m̀o ma, “Ye lí nâa yɛ̂, ílaa-lai a íƃalo.” È m̀o nɔ́ tí, ǹalôŋ é kwaa káa, é pîlaŋ bôlu berei ma.
Atualmente selecionado:
Mâki 10: KWB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão