Mâki 11
11
Zîsɛ è tɛ̀ Zerusâlɛŋ a yee-tɛɛ-maa sia
(Maafîu 21:1-11; Lûu 19:28-40; Zɔ̂ŋ 12:12-19)
1Díkɛɛ lɛɣɛ̂i Zerusâlɛŋ, dí tɛ̀ Bɛfazi da Bɛtɛni taai su, Ŋulɔ-wuru Yeei kɔlɛ. Ǹya ƃé Zîsɛ è ŋɔpôlu-ƃelai veerɛ tɛ̀ɛ, 2ǹyɛɛ diai, “Ka lí gbanâŋ lá tuɛ. Ka sèri naa, ka pâi wɛlɛ-sôo-loŋ kâai gbulɔ̂ŋɔɔ, núu da fé tá seêni bôlu. Ka vúloŋ ká pá la. 3Núu da à kámarê kɛ̀, ‘Ka gɛ̂i ŋí lé mɛni ma?’ Ka m̀ó ma kâai, ‘Kúnuu-namui a ŋ̀wɛ́li kɛ̂i. A pâi dɛɛ̂i pôlu lónii ma.’ ” 4Nya ƃe dí lì naa dí wɛlɛ-sôo-loŋ káa gbulɔ̂ŋɔɔ bɛ́rɛi lá daai su, dí vúloŋ. 5Diai kɛ̀ tɔɔ̂ni naai, dí dímarê kɛ̀ dîyɛɛ dîai, “Ka ŋ̀wɛlɛ-sôo-loŋ fúlonîi lé mɛni ma?” 6M̀ɛnii Zîsɛ è m̀o dîai, dí mò dîa, dí fáa ma a gɛ́ɛ dí lí la. 7Nya ƃe dí lì a ŋ̀wɛlɛ-sôo-loŋ Zîsɛ pɔ́, dí díseɣe-ŋai pɛ́lɛ m̀ɛi, Zîsɛ é sée bôlu. 8Núu támaa dí díseɣe-ŋai pɛ̀lɛ berei ma. Díta-ní dí láa tèe ǹɔɔi su dí dɔɔ berei ma. 9Diai kɛ̀ dúɛ-pere da diai kɛ̀ bôlu-perei, dí kɛ̀ lâɣii, “Kwa laa-maa-tɛ tɛɛ Ɣâla pɔ́! Lûwa é kɛ́ ǹúui ma a pâi Kúnuu-namui láai su! 10Lûwa é kɛ́ Kúnâŋ Deeƃé ŋɔkâloŋ-laai ma, nyii gáa pâi! Kwa laa-maa-tɛ tɛɛ Ɣâla pɔ́ ɣelêi-pere póŋ-póŋ!”
11Nya ƃe Zîsɛ è tɛ̀ Zerusâlɛŋ é lí Ŋ̀âla-pɛrɛ Kɛ́tɛi mu. Zãai kélee maa kpɛ̀ɛ m̀ii, è gbâa kɛ̀ a ɣele-wulii. Nya ƃe da ŋɔpôlu-ƃela puu kao féerɛi dí lì Bɛtɛni.
Zîsɛ è fii wurui náɣâŋ làa
(Maafîu 21:18, 19)
12Zîsɛ da ŋɔpôlu-ƃelai kɛ́ɛ da kùla Bɛtɛni dí kɛ́ lene pôlu a bôlu ma ɣelei, puru è kɛ̀ Zîsɛ kɛ̂i. 13È fii wuru da kàa kwaa kôyaa ma, ǹáa támaa ma. È lì naa a gɛ́ɛ é gáa à kɛ̀ m̀á káa ŋ̀á. Zeriɛ́ɛ ŋ̀úrii kpîŋ mui, vé m̀á da káa ní ŋ̀á, fɛ̂ɛ nɔ́ ǹáa tée-tee, kpɛ́ni fêi, vé kɛ́ ní a fii ƃá tãi. 14Nya ƃe m̀o ŋ̀úrii ma ǹyɛɛi, “Núu da kélee fé ŋɔ́nɔ wɔ́lɔ pâi íƃa da miî é síɣe sâa ma.”
Ŋɔpôlu-ƃelai dí m̀ɛnii ŋí mɛni.
Zîsɛ è lì Ŋ̀âla-pɛrɛ Kɛ́tɛi mu
(Maafîu 21:12-17; Lûu 19:45-48; Zɔ̂ŋ 2:13-22)
15Dí lì dí sèri Zerusâlɛŋ. Zîsɛ è lì Ŋ̀âla-pɛrɛ Kɛ́tɛi mu, é pɛ́lɛ bɔni tɔɔ-ƃelai da bɔni sãa yá-ƃelai kpɛ̂i. È zɛŋ-kao maa faleŋ-ƃelai díteƃele-ŋai da dòloŋ-kɔlɛ-ƃelai dísee sãai pìli é doo. 16Vé kɛ́ faa ní kɛ̀ ma a gɛ́ɛ núu da kélee é tɛ́ɛ a sɛŋ da Ŋ̀âla-pɛrɛ Kɛ́tɛi sâmai. 17Nya ƃe è Ɣâla mɛni lɛ̀ ǹûai dîa. È m̀o dîa, ǹyɛɛi, “Ɣâla è m̀o Ŋ̀âla-kɔlɔi su ǹyɛɛ, ‘Da pâi ŋápɛrɛi tôlii a Ɣâla fɛli-pɛrɛ sîi kélee mɛni ma.’ Kɛ́lɛ, ká naa kɛ́ a ŋúma-ƃela kɛ̂i.” 18Zâla láa soŋ-ƃela kpaya-kpayai da Dɔ̂ŋ lɛ́-ƃelai dí m̀ɛni, dí pɛ́lɛ pere kɔ̂rii a gɛ́ɛ dí bàa, kɛ́lɛ, dí kɛ̀ yaôi, kpɛ́ni fêi, Ŋɔɣâla mɛni lɛ́-perei è gbɔŋ kélee líi mu sìɣe. 19Ŋ̀ele-wûlii kɛ́ɛi, Zîsɛ da ŋɔpôlu-ƃelai dí kùla daa-leei su.
Fîi wuruii Zîsɛ è ǹáɣaŋ làai m̀aa mɛni
(Maafîu 21:20-22)
20Dí kɛ́ɛ siâi berei ma a ŋ̀ele-wala pɛpɛi, dí fii ŋ̀úrii kàa Zîsɛ è ǹáɣaŋ làai, a kpála a seri zame ma. 21Fîi wuruii ŋí maa mɛni è lɛ̀ɛ Pitɛ kíli ŋá. Nya ƃe è m̀o Zîsɛ ma, “Kaamɔ̂ɔ, gáa! Fîi wuruii í ǹáɣaŋ laai, a kpála.” 22Zîsɛ è m̀o dîa ǹyɛɛi, “Ka láa a Ɣâla. 23Tɔ̃yâ ma, ŋá m̀ó kâa, à kɛ̀ núu da à mò ǹyéei ŋí ma, ‘Ímu síɣe í píli ǹyái su,’ à wàla sîa too ǹíi su, kɛ́lɛ, à làa la a gɛ́ɛ m̀ɛnii a m̀ôi a pâi kɛ̂i, gɛ̀ ní, a pâi kɛ̂i m̀ɛni ma. 24M̀ɛni ma, ŋá m̀ó kâa, nyii kélee ka Ɣâla fɛ̀li m̀ɛni ma, kà zìɣe a tɔ̃yâ a gɛ́ɛ ka pâi zɔlɔ ƃôi, a pâi kɛ̂i káyêei. 25Kà kɛ̀ Ɣâla fɛlîi, núu da kélee sɔŋ à kɛ̀ kâa, kà maa nuui su-mɛni lɛɛ, a gɛ́ɛ Kánâŋ máŋ gáa ŋ̀elei sui, é kásu mɛni lɛɛ zɔnyɔ̂ŋ-ŋai ka gɛ́i mɛni ma. [ 26Kɛ́lɛ, kà wàla nûa su-mɛni lɛɛ, Kánâŋ máŋ gáa ŋ̀elei sui vé pâi kásu-mɛni lɛɛ̂i zɔnyɔ̂ŋ-ŋai ka gɛ́i mɛni ma.”]
Dí Zîsɛ marê kɛ̀ é pîlaŋ ŋɔwála-wala-laai ma
(Maafîu 21:23-27; Lûu 20:1-8)
27Nya ƃe dí ŋɔ́nɔ lì Zerusâlɛŋ. Zîsɛ kɛ́ɛ siâi Ŋ̀âla-pɛrɛ Kɛ́tɛi mui, zâla láa soŋ-ƃela kpaya-kpayai, Dɔ̂ŋ lɛ́-ƃelai da ǹúu-pɔ̂lɔ-ŋai dí pà bɔ́, 28dîyɛɛ m̀ai, “Lé wala-wala-laa ƃé ya mɛni-ŋai ŋí kɛ̀ lai, kpaa máŋ, gbɛ̂ɛ ƃé ŋ̀wála-wala-laai ŋí tɛ̀ɛ ípɔi?” 29Zîsɛ è díwoo su tòo ǹyɛɛ dîai, “Ŋa pâi mare-kɛ̂ɛ tɔnɔ kɛ̂i kâa, kà zu-kula, gɛ̀ ní, ŋa pâi m̀ôi kâa ŋ̀wála-wala-laai ŋa mɛni-ŋai ŋí kɛ̂i lai. 30Ka m̀ó ḿâ, gbɛ̂ɛ ƃé batâi kɛ́ mɛni maa wâla-walai tɛ̀ɛ Zɔ̂ŋ pɔ́i, Ɣâla, kpaa núu-kpune?” 31Nya ƃe dí kɛ̀ sîa toôi díkîe-ní loai, dîyɛɛi, “À kɛ̀ kwà kɛ̀ ma, ‘Ɣâla ƃe,’ gɛ̀ ní, a pâi kúmarê kɛ̂i, ‘Lé ƃé gɛ̀ káfe lâai a Zɔ̂ŋ?’ 32Kwà kɛ̀ m̀a, ‘Núu-kpune yêei.’ ” Dí kɛ̀ yaôi ǹûai dîa, kpɛ́ni fêi, ǹûai kélee dí fàa ma a gɛ́ɛ Zɔ̂ŋ è kɛ̀ a Ɣâla ŋɔlóno kɛ́-nuu kpîŋ. 33Nya ƃe dí Zîsɛ wóo su tòo, dîyɛɛ mai, “Kúfe gɔ́lɔŋ.” Zîsɛ ǹyaŋ ǹyɛɛ dîa, “Gɛ̀ ní, ńyaŋ fé pâi m̀ôi kâa ŋ̀wála-wâla-laai ŋa mɛni-ŋai ŋí kɛ̂i lai.”
Atualmente selecionado:
Mâki 11: KWB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão