Mâki 12
12
Záŋ bîlaŋɔɔi m̀á kpɔmɔ-kpalaŋ da díi-kɛ́-ƃelai dîai
(Maafîu 21:33-46; Lûu 20:9-19)
1Zîsɛ è pɛ̀lɛ lônoi dípɔ sãŋ-woo su, ǹyɛɛi, “Naloŋ tɔnɔ da ƃé wɔ́lɔ ƃá-kpɔmɔ kpalaŋ kɛ̀ é kóraŋ tínaŋ ma é lóa tée kpɔmɔ-ƃa táŋ loai mɛni ma é yeŋkêŋ tɔɔ naa é tɛɛ kpâlaŋ tii kɛ́-ƃela da-ŋa pɔ́ a gɛ́ɛ dí ƃò naa dí kɛ́ zûti kpɛ̀ɛ é lí lɔii da kpɛ́ni su. 2Gbɔmɔ-kpâlaŋ ƃa kpɔlu tãi kɛ́ɛ a serii, è ǹyée mu-ƃelai dɔnɔ tɛ̀ɛ díi kɛ́-ƃelai pɔ́ naa a gɛ́ɛ dí ŋɔkpɔmɔ-ƃai da tɛɛ mi. 3Kɛ́lɛ, dí zòŋ dí ǹokwa dí dɛɛ pôlu a ǹyée fólo. 4È ŋɔ́nɔ ǹyée mu-ƃelai dɔnɔ tɛ̀ɛ dípɔ naa. Kɛ́lɛ, dí ŋ̀wana ŋ̀uŋ ma, dí ŋumɛ-tua tee-tee kɛ́ la. 5Nya ƃe è ŋɔ́nɔ da kpɛ́ni tɛ̀ɛ. Kɛ́lɛ, dí bàa. Bere ƃé è kɛ̀ la a ǹúui gbeli-ŋai è dítɛ̀ɛ naai. Dí da-ni lòkwa, dí da-ni paa. 6Ǹúu tɔnɔ kpéŋ nɔ́ lɛ̀ɛ ƃé kɛ̀ a ǹalôŋ ŋɔwɛli kɛ́-maa loŋ. Nya ƃe è dɛ̀ɛ a gbɛɛ ŋái, ǹyɛɛi, ‘Ńâai kpɔ́ la da pâi ŋumɛ mâa tɛɛ̂i bɔ́.’ 7Kɛ́lɛ, díi kɛ́-ƃelai tí dí mò díkîe-ní dîa, ‘Bɔɔ-sɛŋ namui ká ŋí. Kwa bàa, gɛ̀ ní, bɔɔ-sɛŋ a pâi kɛ̂i a kúpɔɔ.’ 8Nya ƃe dí zòŋ dí bàa, dí bili góraŋ pôlu-pere. 9Lé ƃé gbâlaŋ-namui a pâi gɛ̂i a ǹûai ŋí? A pâi pâi é díi kɛ́-ƃelai páa é gbâlaŋ tɛ́ɛ nûa da kpɛ́ni-ŋa pɔ. 10Káfe tá m̀ɛnii ŋí lóno ní Ŋ̀âla-kɔlɔi su?
‘Gɔnii nyii bɛ́rɛ tɔɔ-ƃelai dí díŋɛi nàɣiŋ mɛi,
a kɛ́ a bɛ́rɛi sonôŋ su-kɔnii gbîŋ-kpiŋ.
11Ǹúu-namui ƃé m̀ɛnii ŋí kɛ̀.
Gáa kúŋɛi a mɛni mĩli-mĩliɛɛ.’ ”
12Dí nâa kɛ̀ pere kɔ́rîi a gɛ́ɛ dí Zîsɛ soŋ, kɛ́lɛ, dí kɛ̀ yaôi gbɔŋ ma, kpɛ́ni fêi, dí gɔ̀lɔŋ a gɛ́ɛ m̀ɛni pɔ́lɔi è kɛ̀ m̀ôi bîlaŋɔɔi kɛ̀ dîa. Nya ƃe dí ǹɛɛ naa dí li.
Kú ŋ̀uŋ-fela-fei tɛ́ɛ Siizɛ pɔ́?
(Maafîu 22:15-22; Lûu 20:20-26)
13Ɛɛlɔ Nuu-kpului è Faresii-ŋai da-ni tɛ̀ɛ Zîsɛ pɔ́ naa a gɛ́ɛ dí zoŋ ǹóno-woo ma. 14Dí pà bɔ́ dí m̀o ma, “Kaamɔ̂ɔ, kú gɔ́lɔŋ a gɛ́ɛ íkaa a tɔ̃yâ nuu, ífa tɔɔ núu da kélee pôlu, kpɛ́ni fêi, ífe kpaaŋ ní núu tɔɔ̂i mɛni ma, kɛ́lɛ, ya Ɣâla ŋɔperei lɛ̂ tɔ̃yâ ma. Gáa dɔ̂ŋ lá-woo ma a gɛ́ɛ kú ŋuŋ-fela-fei tɛɛ Gâloŋ Siizɛ pɔ́, kpaa vé tí? 15Kú dɛɛ, kpaa kúfe dɛɛ?” Kɛ́lɛ, Zîsɛ è díkiri-lii su kàa, ǹyɛɛ dîai, “Lé mɛni ƃé ka ŋ̀wɛ̂lii ká ńzoŋ la ŋ́oo mai? Ka pá mî a zɛŋ-káoi kpîŋ ŋá gáa.” 16Dí pà bɔ́ a dɔnɔ. È dímarê kɛ̀, ǹyɛɛi, “Gbɛ̂ɛ pɔkɔɔŋ da ǹáa ƃé ŋí mai?” Dîyɛɛ mai, “Gâloŋ Siizɛ.” 17Zîsɛ è m̀o dîa, “Zɛŋ gáa a Gâloŋ Siizɛ pɔ́ɔi, ka dɛɛ Gâloŋ Siizɛ pɔ́, ǹyaŋ zɛŋ gáa a Ɣâla pɔ́ɔi, ka dɛɛ Ɣâla pɔ́.” Ŋ̀óoi ŋí è díla kpàla dîa.
M̀are-kɛi bîlaŋɔɔi mu-siɣe saa-yeei mai
(Maafîu 22:23-33; Lûu 20:27-40)
18Sâdusii-ŋai, dífe láa ní a m̀u siɣe saa yêei maa mɛnii da-ŋa dí pà Zîsɛ pɔ́, dîyɛɛ m̀ai, 19“Kaamɔ̂ɔ, Mose è dɔ̂ŋ ŋí bɔ̃̀yɛ kûɛ, ‘Surɔ̂ŋ da nɛnî da kɛ̀ tûai da wàla lóŋ maa sɔlɔ ƃó, maa surɔŋ a sàa, fɛ̂ɛ maa surɔŋ tí ǹeɣe é bɔɔ-nɛnîi kúla da ǹyaa dí lóŋ káa ǹîa mɛni ma.’ 20Nya ƃe lee-kaa-sinaa lɔ́ɔlu mɛi feerɛ dí kɛ̀ naa. Dília kɛ́tɛi è nɛnî kùla da ǹɛnîi dífe lóŋ da maa sɔlɔ ƃó ní ǹoo-surɔŋ kpîŋ é sáa. 21Bôlu leɣe nuui è ǹɛnîi ŋí kùla, ǹyaa máŋ é sáa, vé lóŋ da maa sɔlɔ ƃó ní ma. Zaaƃa ɣelei mɛni tɔnɔi è kɛ̀ la. 22M̀ɛni tɔnɔi ŋí è kɛ̀ a ǹúu lɔ́ɔlu mɛi feerɛi. Gbɛɛ ŋái, ǹɛnîi ǹyaa kpîŋ è sàa. 23M̀u siɣe saa yêei ŋ̀ele à sèri, gbɛ̂ɛ ŋɔnɛnî ƃé pâi kɛ̂i a ǹɛnîi ŋí? Ǹúu lɔ́ɔlu mɛi feerɛi dí ǹɛnîi ŋí kùla a nɛnî.”
24Zîsɛ è díwoo su tòo, ǹyɛɛ dîai, “Ka bɔara mâai káa ka gɛ̂i. Ká gɔ́lɔŋ lé ƃe? Ka gɛ̂i tí, kpɛ́ni fêi, káfe Ŋ̀âla-kɔlɔi kɔ́lɔŋ da Ɣâla ŋɔwála-wala-laai. 25M̀u-siɣe sìɣe saa yêei pôlu ma, nɛnî kula mɛni fé pâi kɛ̂i naa, kpaa máŋ dí nɛnî tɛɛ surɔ̂ŋ pɔ́. Kɛ́lɛ, da pâi kɛ̂i yɛ̂ɛ Ɣâla-taa kela-ŋa. 26Kɛ́lɛ, ka mare kɛ̂ɛ kɛ̂i é pîlaŋ zaa-ƃelai mu-siɣe mɛni ma saa yêei. Káfe nîi Mose kɔlɔi m̀ɛ́i lóno ní ǹɔɔi kéreŋ mɛni pɔ́lɔi pɔ̃yɛɛ̂i naai? Nàa ƃé Ɣâla è m̀o naa Mose ma, ǹyɛɛi, ‘Ńyãa ƃa Eberaɣɛ̃ɛ Ŋɔɣâlai, Aise Ŋɔɣâlai da Zeeka Ŋɔɣâlai’? 27Ɣâla fé a zaa-ƃelai Díɣâla, kɛ́lɛ vúlu-ƃelai. Ka pɔ́ara mâa su kɛ́tɛ kɛ̂i.”
Dɔ̂ŋ Gɛ́tɛi
(Maafîu 22:34-40; Lûu 10:25-28)
28Dɔ̂ŋ lɛ́-ƃelai dɔnɔ è kɛ̀ naa gɛ́ dísîa too-wooi mɛni. È gàa a gɛ́ɛ Zîsɛ è díwoo su tòo a ǹɛ́lɛɛ. È Zîsɛ marê kɛ̀, ǹyɛɛ m̀ai, “Dɔ̂ŋ nênɛ ƃa dɔ̂ŋ gɛ́tɛi dɔ̂ŋ-ŋai sámai?” 29Zîsɛ ǹyɛɛ m̀ai, “Dɔ̂ŋ duɛ-tuɛi ƃa, ‘Óo Eezuɛ, ka káwoli tɔ́ɔ: Kúnuu-namui Ɣâla káa a Nuu-namu tɔnɔ. 30Ínuu-namu Ɣâla wɛ́li a ílii kélee, ímɔ̂leŋ kélee, íkili kélee, da íwala-wala-laai kélee.’ 31Veerɛ ɣelei ká ŋí, ‘Íkɔlɛ ma-nuui wɛ́li yɛ̂ɛ yá kpîŋ.’ Dɔ̂ŋ da kpɛ́ni fé naa é tɛ́ɛ nyiŋi-ŋai ŋí dîa.” 32Dɔ̂ŋ lɛ́-nuui è m̀o Zîsɛ ma, “Ee Kaamɔ̂ɔ. Tɔ̃yâ kpîŋ ƃe. Yâ m̀ó a tɔ̃yâ a gɛ́ɛ Ɣâla káa tɔnɔɔ. Ɣâla da kpɛ́ni kélee fé naa fɛ̂ɛ nɔ́ ǹyaa tɔnɔ. 33Ɣâla wɛ́liɛɛ kûɛ a kúlii kélee, kúkili kélee, kúwala wala-laai kélee, kú kúkɔlɛ ma-ƃelai wɛ́li yɛ̂ɛ kûa kpîŋ, tɛɛ̂i fɛnɛ-sãa kúlaa Ɣâla ma ɣâla-teƃele ŋá a kéreŋ sala da sâla da kpɛ́ni-ŋa kélee.” 34Zîsɛ è gɔ̀lɔŋ a gɛ́ɛ Dɔ̂ŋ lɛ́-nuui a ŋ̀óo su tòo a târe perei, È m̀o m̀a ǹyɛɛi, “Ínaa fé ŋɔ́nɔ kôyaa ní Ɣâla ŋɔkâloŋ-laai ma.” Nyíŋi pôlu ma, núu da líi fé ŋɔ́nɔ kpele ní kɛ̀ é mare-kɛ̂ɛ da píli Zîsɛ ma.
M̀are-kɛ̂i bîlaŋɔɔi M̀asâyai mai
(Maafîu 22:41-46; Lûu 20:41-44)
35Zîsɛ è kɛ̀ Ɣâla mɛni lɛ̂i Ŋ̀âla-pɛrɛ Kɛ́tɛi mu. È ǹûai marê kɛ̀ ǹyɛɛ dîai, “Dɔ̂ŋ lɛ́-ƃelai da pɔ̂ri m̀ôi léŋ a gɛ́ɛ Kôrai káa a Deeƃé ǹóŋ? 36Deeƃé ǹyaa kpîŋ è m̀o M̀ɔlêŋ Maa Waai sârai, ǹyɛɛi,
‘Nùu-namu-nuui è m̀o Ŋánuu-namui ma,
See ńaa-mii-yee mɛi,
é lɛ́ɛ la zu ŋá íkpɔara-ƃelai pú íkɔɔ mu.’
37Deeƃé ǹyaa kpîŋ è Kôrai tòli a ŋɔnuu-namui. Gɛ̀ ní, a pɔ̂ri kɛ̂i léŋ a ǹóŋ?”
Zîsɛ è Dɔ̂ŋ lɛ́-ƃelai lia-woo ƃò
(Maafîu 23:1-36; Lûu 20:45-47)
Gbɔŋ kɛ́tɛi su-ƃelai dí kɛ̀ a Díwoo Zîsɛ ma nɛ̃ɛ pere. 38Gɛ́ɛ Ɣâla mɛni lɛ̂i ǹûai dîai, è m̀o dîa, ǹyɛɛi, “Ka kámɛi káa a Dɔ̂ŋ lɛ́-ƃelai. Dia dínîa mɛni ƃa dí yokpo kôyaa-koya too dîa díkɛ tɛɛ-tɛ̀ɛ ǹɔ́ɔ-kpâlaŋ-ŋai ŋá, a gɛ́ɛ nûa díkɛ díla ti dîa a ƃaa kɛ́-maa pere. 39Dí wɛ́lini ǹûa kpaya-kpayai see kwaa-ŋai ma kɛ́ ƃò nɔ́ a gbɛtɛɛ dímɛni ma Ŋ̀âla-fɛli kerei mu da gúu-ŋai su. 40Kɛ́lɛ, da díŋɛi ǹaɣiŋ pɔ́ɔ-nɛyaai mɛi díkɛ díwôya díkpîŋ díkɔ̃liŋ-ŋai su bɔɔ-nɛyâai kpîŋ díkole-ŋai su. Da Ɣâla fɛli a zu kôyaa a gɛ́ɛ dí dímɛni nyɔ́mɔɔi mɛi pɛlɛ. Kɛ́lɛ dímɛni kula maai a pâi kɛ̂i a maa-nɔ̃ɔ su kɛ́tɛ.”
Gôlo pɔ́ɔ-nɛnîi ŋɔsama-sɛŋ
(Lûu 21:1-4)
41Zîsɛ è kɛ̀ seêni zama-sɛ̂ŋ soŋ gãlai kɔlɛ Ŋ̀âla-pɛrɛ Kɛ́tɛi mu gɛ́ ǹûai maa kpɛ̀ɛ, díkɛ zama-sã̂ai tôo. Tɔɔ-ƃela támaa díkɛ̀ naa díkɛ sɛŋ-kâo kpaya-kpaya tòo gãlai su. 42Nya ƃe kôlo pɔɔ-nɛni tɔnɔ è pà é sɛŋ-kâo kpua-kpua feerɛ tóo gãlai su, nyii kɛ̀ nɔ́ a kâpa tɔnɔi. 43Nya ƃe è ŋɔpôlu-ƃelai tòli é m̀ó dîa, ǹyɛɛi, “Tɔ̃yâ ma, ŋá mó kâa, gôlo pɔɔ-nɛnii ŋí è sɛŋ-kâo támaa tòo zama-sɛ̂ŋ soŋ gãlai su é tɛ́ɛ ǹúui gbeli-ŋai kélee dîa. 44Díkelee dí dísama-sã̂ai tôo gãlai su yɛ̂ɛ berei gɛ́tɛi la díyêei. Kɛ́lɛ, zɛŋ ǹɛnîi ŋí kíli è kɛ̀ a dɔ́ɔ mà ŋɔkɛ-ɣeniɛi mɛ́ni mai, ǹyaa ƃé è dòo gãlai su.”
Atualmente selecionado:
Mâki 12: KWB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão