Mâki 13
13
Zîsɛ è lòno é pîlaŋ Ŋ̀âla-pɛrɛ Kɛ́tɛi su-kara mɛni ma
(Maafîu 24:1, 2; Lûu 21:5, 6)
1Zîsɛ kúlaa kɛ̀ Ŋ̀âla-pɛrɛ Kɛ́tɛi mui, ŋɔpôlu-ƃelai dɔnɔ è m̀o m̀a ǹyɛɛi, “Kaamɔ̂ɔ, gáa, lé-pɛrɛ maa pɔ́lɔ-pɔlɔ-ŋa ƃéi dítɔɔ̂i a gɔni lɛ́lɛ-lɛlɛ-ŋai ŋí!” 2Zîsɛ è m̀o ma, ǹyɛɛi, “Ya bɛ́rɛ kpaya-kpayai ŋí kâai? Kɔni tɔnɔ kpîŋ fé pâi lɛɛ̂i ƃɛ́ gîe mɛi. Da pâi díkelee toôi ǹɔii ma.”
Mɛni kpɔ̂lu da kpɔara káa pâi
(Maafîu 24:3-14; Lûu 21:7-19)
3Zîsɛ è kɛ̀ seêni Ŋulɔ-wuru Yeei ma, Ŋ̀âla-pɛrɛ Kɛ́tɛi téniŋ ma. Pitɛ, Zĩi, Zɔ̂ŋ, da Aŋdulu dí pà bɔ́ naa loo pere su dîyɛɛ m̀ai, 4“M̀ó kûa, ŋ̀elei nênɛ ƃé nyíŋi a pâi kɛ̂i lai? Lé ŋɛi-kɛ-maa ƃé pâi ǹɛ̂i kûa a gɛ́ɛ m̀ɛni-ŋai ŋí kélee da pâi kɛ̂i?” 5Zîsɛ è m̀o dîa, ǹyɛɛi, “Ka kámɛi káa a gɛ́ɛ núu da fé kápɛlɛ. 6Núu támaa da pâi pâi ńaai su dîyɛ kâai, ‘Ńyãa ƃa ǹyaa!’ Da pâi díyee lâai núu támaa ma. 7Ka kɔ́ mɛni mɛ̀ni da kɔ́-ŋa tuŋ, káfe kɛ̀ wúlee. Fɛ̂ɛ nyíŋi a kɛ̀, kɛ́lɛ, ŋ̀éniɛi gbɛɛ ŋái fé nîi seri ní. 8Sîi-ŋa da pâi tɔɔ̂i díkîe-ní dîa, kâloŋ-laa kɛ́ kɔ̀ kâloŋ-laa pɔ́, ǹɔii a pâi kpɛ̃lini kwaa támaa ma. Puru su-kɛ́tɛ a pâi toôi. Kɛ́lɛ, nyíŋi-ŋai káa nɔ́ a mɛni solii kɔ́ɔ pîlanii.
9“Mɛni ma, ka kákpîŋ mɛi káa, kpɛ́ni fêi, da pâi kásonîi dí lí a káa mɛni sâa ƃó kwaa-ŋa ma. Da pâi ká lôkwai a ŋ̀ánaa Ŋ̀âla fɛli-kêre-ŋai mu. Da pâi gɛ̂i kátɔɔ lɔii lonii láa- tuɛ ƃela da kâloŋ-ŋa ŋɛ́i túɛ ḿaa mɛni ma a gɛ́ɛ ká Duŋ Lɛ́lɛɛi maa sere-faa kɛ́ díŋɛi. 10Kɛ́lɛ, fɛ̂ɛ Duŋ Lɛ́lɛɛi é ƃó sîi kélee ma. 11Dà kásoŋ dí lì a káa mɛni sâa ƃó kwaa-ŋai ma, kálii fé sɛ̀lɛŋ m̀ɛnii ma ka pâi m̀ôi. Kɛ́lɛ, m̀ɛnii nyii pâi tɛ̂i kála a tãi ti nɔ́ ƃé ká m̀ó, kpɛ́ni fêi, káa fé pâi kɛ̂i maa lonoi kpîŋ kɛ̂i, fɛ̂ɛ M̀ɔlêŋ Maa Waai. 12Lee-kaa tɔnɔ su-ƃela da pâi díkîe-ní tɛɛ̂i nûa pɔ́ a gɛ́ɛ dí dípaa. Lóŋ káa sinaa da pâi kɛ̂i m̀ɛni tɔnɔi kɛ̂i a dílônii. Nîa-pɛlɛɛ da pâi tɔɔ̂i díkaa-ƃela dîa dí gɛ́ díkaa-ƃelai kpîŋ dí saa sɔlɔ ƃó. 13Núu kélee da pâi kákpɔarâi ńaai mɛni ma. Kɛ́lɛ, ǹúui a ǹíi kpèle é lɛ́ɛ la zu ŋ̀elei gbɛɛ ŋá é serii, a pâi ƃâloi.
Zɛŋ Nyɔ́mɔɔ Kɛ́tɛi pá mɛni
(Maafîu 24:15-28; Lûu 21:20-24)
14“Kɛ́lɛ, tãi ka m̀ili sii-kpalo mɛnii káa la gɛ́ ƃò ƃɛ́i vêi kpɛtɛ naai (ǹúui a ǹónôi, é táre zu), gɛ̀ ní, diai díkaa Zuda, tɔɔ dí pu dí li ǹyée-ŋai su. 15Tɔɔ ǹúui gáa ŋɔpɛ́rɛi kɔŋ mai, vé pîlaŋ é lɔ́ ŋɔpɛ́rɛi mu a gɛ́ɛ é sɛŋ da kúla naa. 16Tɔɔ ǹúui gáa gbâlaŋ ŋái, vé lì pôlu a gɛ́ɛ é ŋɔpili-kpɛ̃yai siɣe. 17Kpalo-ƃêlaai ǹɛyâai dîa díkaa kpáaŋ sui da ǹee-ƃelai dîa pâi kɛ̂i ŋini tɛɛ̂i dílônii pɔ́ a ŋ̀ele-ŋai tí! 18Ka Ɣâla fɛli a gɛ́ɛ vé kɛ̀ a sama-ɣele, 19kpɛ́ni fêi, maa ɣele-ŋai tí, mɛni kpɔ̂lu a pâi pâi, nyíi dɛɛ̂i m̀arâai kélee ma é síɣe tãi ma Ɣâla è ŋ̀éniɛi kɔ́ɔ pìlaŋ la é seri sâa ma da fé pâi ŋɔ́nɔ wɔ́lɔ kɛ̂i. 20À kɛ̀ Kúnuu-namui fé ŋ̀ele kûu-ŋai su kpua ní, núu-kpune da fêi pɔ̂ri ƃâloi. Kɛ́lɛ, è ŋ̀ele kûu-ŋai su kpua diai mɛni ma a dísiɣe zui. 21Gɛ̀ ní, núu da kélee à mò kâa, ǹyɛɛi, ‘Ka gáa, Kôrai káa ƃɛ́!’ kpaa ‘Ka gáa, gáa naa!’ káfe zìɣe a tɔ̃yâ, 22kpɛ́ni fêi, lɛ́ɛ Kôrai-ƃela da Ɣâla maa wôya lono kɛ́-ƃela da pâi pîlanii dí ŋɛi kɛ́-maa-ŋa lɛ́, da mɛni maa pɔlɔ-pɔ́lɔ-ŋa a gɛ́ɛ dí díyee láa diai dîa Ɣâla a dísiɣe zu a gbɔɔi-ƃelai. 23Kɛ́lɛ, ka kámɛi káa, kpɛ́ni fêi, ŋa gbâa m̀ɛni-ŋai kélee ƃó kâa a gɔ́ɔ pîlanii.
Núu-kpune Ǹóŋ pá pere
(Maafîu 24:29-31; Lûu 21:25-28)
24“M̀ɛni kpɔ̂lui tí pôlu ma, vóloi su a pâi kpínîi, ŋ̀áloŋ fa ŋɔ́nɔ fòlo. 25Bɛmɛlɛŋ-kao-ŋai da pâi toôi ǹɔii ma, ŋ̀elei su kpîŋ kɛ́ ƃò wúlee. 26M̀ɛni-ŋai ŋí kélee da kpaa kɛ̀, da pâi núu-kpune Ǹóŋ kâai, gɛ́ yèŋ ɣele-kɔlɔŋ kole su, wála-wala-laa kpaya-kpaya da fólo-laa kɛ́ ƃò bôlu. 27Gɛ̀ ní, a pâi ŋɔkéla-ŋai tɛɛ̂i é diai ŋáa tɛ́ ma, diai da kûla ǹɔii ƃéla náaŋ sui, dí kúla ǹɔii koyâŋ ma é tóo la ŋ̀elei koyâŋ ma.
Fîi-wuruii ŋɔsɛŋ lɛɛi
(Maafîu 24:32-35; Lûu 21:29-33)
28“Ka ŋ̀úrii da kɛ̂ ma fîi kɛ́ pere maa kɔ́ri, ǹyaa ƃa tãi ŋoŋo à kɛ̀ la a dɔ́ɔ, ǹáa kɛ́ tɛ̀nîŋ da tãi ǹáa a kɛ̀ pûi lai. Ǹáa a kɛ̀ pûi ka gɔ́lɔŋ a gɛ́ɛ folo-laa ƃóɔɔ a lɛɣɛ. 29Bere nɔ́ ƃé gáa la a káa, kà kɛ̀ m̀ɛni-ŋai ŋí kélee kâai kɛ̂i, ka gɔ́lɔŋ a gɛ́ɛ ŋ̀elei a gbâa lɛɣɛ góraŋ lá. 30Tɔ̃yâ ma, ŋá m̀ó kâa, diai ɣele ma lónii mai da fé pâi saâi é lɛ́ɛ la zu mɛni-ŋai ŋí kélee dí kɛ́. 31Ŋ̀elei da ǹɔii da pâi tɛɛ̂i, kɛ́lɛ, ŋáwooi fé pâi wɔ́lɔ tɛɛ̂i.
Núu da fé ŋ̀elei kpaa máŋ aƃai kɔ́lɔŋ
(Maafîu 13:32-44)
32“Maa ɣele kuui tí kpaa máŋ aƃai núu da kélee fé gɔ́lɔŋ. Ŋ̀âla-taa kela-ŋai kpîŋ dífe gɔ́lɔŋ, kpaa máŋ Ǹoŋ-nuui, fɛ̂ɛ nɔ́ Nàŋ-nuui. 33Ka káŋɛi lá ƃó, ká kámɛi káa, kpɛ́ni fêi, káfe ŋ̀elei kpîŋ kɔ́lɔŋ kpaa máŋ tãi. 34Gɛ̂ɛi yɛ̂ɛ núu à kɛ̀ liî sia kôyaa ma. À kɛ̀ kulâi ŋɔpɛ́rɛi lá, díi a ŋ̀wɛ̂lii ǹyée mu-ƃelai dí gɛ̂i a ǹɛ dîa é m̀ó gbôŋ lá mɛi káa-nuui ma a gɛ́ɛ é naa mɛi káa a ǹɛ́lɛɛ. 35Maa mɛni ma, ka kámɛi kaa, kpɛ́ni fêi, káfe tãi kɔ́lɔŋ bɛ́rɛ namui a pâi lai, à kɛ̀ a pâi kɛ̂i ɣele-wulii, kpaa kpíni sáma, kpaa tɛ́ɛ wóo píli tãi, kpaa máŋ Ŋ̀ele-wâlai, 36vé lâa tɛ́ la a káa é kákaa nyiî. 37M̀ɛnii nyii ŋa m̀ó kâai, ŋa mò núu kélee ma: Ka káŋɛi lá ƃó!”
Atualmente selecionado:
Mâki 13: KWB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão