Enzũko 14
14
Amalwa wʼabami mwenda
1Neryo oko biro bya Amũrafelĩ Omwami wʼeSĩnarĩ, na Arĩokĩ Omwami wʼeElasarĩ, na Kedorĩ-laomerĩ Omwami wʼeElamũ, na Tĩdalĩ Omwami wʼeGoĩmĩ, 2mobalwa na Bera Omwami wʼeSodomo, na Bĩresa Omwami wʼeGomora, na Sĩnabũ Omwami wʼeAdĩma, na Semeberĩ Omwami wʼeZeboĩmũ, nʼomwami wʼeBela. Oyũ nĩ Zoarĩ. 3Abosĩ aba mobahĩndana haguma omo musya wʼeSĩdĩmũ. Eyo ye ngetsi yʼomũnyũ. 4Oko myaka erĩkũmĩ nʼeyĩbĩrĩ babya bakakolera Kedorĩ-laomerĩ, nʼoko mwaka wʼerĩkũmĩ nʼeyĩsatu mobakarama mobahona. 5Nʼoko mwaka wʼerĩkũmĩ nʼeyĩnĩ Kedorĩ-laomerĩ, nʼabami babya haguma naye mobasa mobĩta Abarefaĩmũ oko Astarotĩ-karanaĩmũ, nʼAbazũzĩ eHamũ, nʼAbaemĩ eSawe-kĩrĩataĩmũ, 6nʼAbahorĩ oko kitwa kyabo kyʼeSeĩrĩ, erĩhĩka Elĩparanĩ, ekiri hakũhĩ nʼembwarara. 7Neryo mobasubula, mobasa oko Enĩ-mĩsĩpatĩ. Eyo ye Kadese. Neryo mobĩta ekihugo kyosĩ kyʼAbamelekĩ, nʼekyʼAbaamorĩ, ababya bĩkere eHazezonĩ-tamarĩ. 8Neryo Omwami wʼeSodomo mwahuluka, nʼomwami wʼeGomora, nʼomwami wʼeAdĩma, nʼomwami wʼeZeboĩmũ, nʼomwami wʼeBela. Eyo ye Zoarĩ. Mobategeka oluhi lwabo omo musya wʼeSĩdĩmũ, 9erilwa na Kedorĩ-laomerĩ Omwami wʼeElamũ, na Tĩdalĩ Omwami wʼeGoĩmĩ, na Amũrafelĩ Omwami wʼeSĩnarĩ, na Arĩokĩ Omwami wʼeElasarĩ, abami bani erilwa nʼabatanu. 10Nĩkwa omusya wʼeSĩdĩmũ abya oswĩre mwʼebyũna byʼeribumba. Abami bʼeSodomo nʼeGomora mobatibita, mobatogongera mubyo, nʼabasaka mobatibita oko bitwa. 11Neryo abakĩndabo mobahũnga ebindu byosĩ byʼeSodomo nʼeGomora, nʼakalyo kabo kosĩ, neryo mobayigendera. 12Kandi mobatwala na Lotĩ, omwana wa mugala wabo Abramu, oyo wabya ĩkere eSodomo, nʼebindu biwe, neryo mobalũayo.
13Neryo omuguma oyo wabala mwasa, mwabwira Abramu Omuebrania. Nĩkwa abya ĩkere hakũhĩ nʼemiti yʼeMamũre, Omunya Amore, mugala wabo Eskorĩ, kandi ni mugala wabo Anerĩ. Aba babya basakene na Abramu. 14Neryo omugulu Abramu owa ko mugala wabo abirinyegwa, mwasondola abalume buwe abo ĩgĩsaya amalwa, ababutawa omo nyũmba yiwe, amagana asatu nʼerĩkũmĩ nʼomunani, neryo mwakwamirirabo erĩhĩka eDanĩ. 15Neryo Abramu mwagabanĩa abagombe buwe omo kiro, neryo mwĩta esyonzĩgũ esyo, kandi mwakwamirirabo erĩhĩka eHoba, eyiri oko luhande lwʼamalembe lwʼeDamasĩkĩ. 16Neryo mwasũbũlya ebindu byosĩ, mwaleta mugala wabo ye Lotĩ, nʼebindu biwe, nʼabakalĩ, nʼabandu.
17Neryo Omwami wʼeSodomo mwayahĩndana naye akasubula okwʼĩta Kedorĩ-laomerĩ nʼabami ababya haguma naye, omo musya wʼeSawe. Oyo go musya wʼOmwami. 18Neryo Melkĩsedekĩ Omwami wʼeSalemĩ mwaleta obundu nʼebĩnyũ. Naye abya mũhererĩ wa Nyamuhanga Wʼendata Kutsibu. 19Neryo Melkĩsedekĩ mwatsumula Abramu, ati, Omũyĩsa abye uku Abramu wa Nyamuhanga Wʼendata Kutsibu, Omũhangĩkĩ wʼolubula nʼekihugo; 20Nyamuhanga Wʼendata Kutsibu apipawe, oyo wahĩra esyonzĩgũ syawe omo byala byawe. Neryo Abramu mwamuha ekiguma kyʼerĩkũmĩ oko byosĩ. 21Nĩkwa Omwami wʼeSodomo mwabwira Abramu ati, Umba bandu, nawe wĩmaye ebindu. 22Nĩkwa Abramu mwabuga nʼomwami wʼeSodomo ati, Nabirisumba ebyala byage oko Mwami Mukulu, Nyamuhanga Wʼendata Kutsibu, Omũhangĩkĩ wʼolubula nʼekihugo. 23Nyiti sĩndĩendĩmya engohe kutse omũlĩkĩ wʼesyongendero kutse kandu kahi kawe uwite, ũkasyabũga uti, Namatekesya Abramu; 24bye nʼebyo abalwana balya, nʼekihande kyʼabalume abagenda haguma nage, Anerĩ, Esĩkolĩ, na Mamũre, ulekebo bĩmaye amagabo wabo.
Atualmente selecionado:
Enzũko 14: KB80
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible in Kinandi © Bible Society of the Democratic Republic of Congo, and Bible Society of Uganda, 1980.