Enzũko 15
15
Endagano ya Nyamuhanga uku Abramu
1Enyũma wʼemyatsi eyo ekĩnywa kyʼOmwami Mukulu mokyahĩka uku Abramu omo nzolĩ kiti, Sigubahe, Abramu; Ĩngye indi ngabo busana nawe; oluhembo lwawe lwasyabya lunene. 2Neryo Abramu mwabũga ati, Mwami Mukulu Nyamuhanga, wasyambakĩ, nage singwite omwana? Kandi Elĩezerĩ oyũ wʼeDamasĩkĩ asyabya mwenye mwandu wage. 3Neryo Abramu mwabũga ati, Lebaya, sulitamba omwana; neryo lebaya, oyo wabutawa omo nyũmba yage nĩ mũlĩ wʼomwandu wage. 4Kandi, lebaya, ekĩnywa kyʼOmwami Mukulu mokyamũhĩkako kiti, Omundu oyũ yutendisyabya mũlĩ wʼomwandu wawe, nĩkwa mugala wawe asyabya mũsĩgalya wawe. 5Neryo Nyamuhanga mwamũhũlũkĩrya eyĩhya mwabũga ati, Ũlebaye omo kyanya, uganze esyongũnũnũ, wamabya wanganatoka eriganzasyo. Neryo mwabũga naye ati, Abana bawe ko basyabya batya. 6Naye mwĩkĩrĩrya Omwami Mukulu, neryo iye mwamuganziralyo mo mutunganene. 7Neryo Nyamuhanga mwabũga naye ati, Ĩngye indi Mwami Mukulu oyo wakuleta erĩlũa eŨrĩ yʼeKaldea erikuha ekihugo ekĩ mo ndagane. 8Neryo Abramu mwabũga ati, Uwe Mwami Mukulu Nyamuhanga, nasyaminya nyiti ngoko nasyasĩgalyakyo kwehĩ? 9Neryo mwabũga naye ati, Ĩmaya enyana yʼemyaka ĩsatu, nʼesũhene yʼemyaka ĩsatu, nʼembangale yʼemyaka ĩsatu, nʼakatungula, nʼekyana kyʼakalĩkũkũ. 10Neryo mwĩmya ebyosĩ ebĩ, neryo mwagabasyo mo luhande-luhande, mwahĩra obuli luhande oko lundi luhande nĩkwa esyonyonyũ mwatagabasyo. 11Ebihũngu mobyandagalira endata oko bĩnda, neryo Abramu mwahigabyo.
12Neryo omugulu eryuba lyalenga, Abramu mwaya otũgotserĩ tunene, neryo lebaya eriubaha lyʼomwĩrĩmya munene molyamuhamba. 13Neryo Nyamuhanga mwabũga na Abramu ati, Uminye ndeke kwʼabana bawe basyabya babunga omo kihugo kite kyabo, neryo basyakolera abandu bayo, basyagalyabo emyaka magana ani. 14Nĩkwa ekihanda ekyo basyakolera nasyatswerakyo, nʼenyũma wʼaho basyalũayo nʼebindu binene. 15Nĩkwa uwe wasyeya abotata-kulu wawe nʼobuholo, wasyatabwa wabikululira ndeke. 16Nʼoko lulengo lwʼakani basyasuba eno kandi, kusangwa obubi bwʼOmunya Amorĩ sĩbwebwahĩkana. 17Neryo omugulu eryuba lyalenga, iniamabibya mwĩrĩmya, lebaya, ekĩrĩko ekĩkatũmba, ekisosomole kyʼekirimi kyʼomuliro, mobyalaba omo katĩkatĩ kʼebihande ebĩ. 18Oko kiro ekyo Omwami Mukulu mwayira endagane na Abramu ati, Nasyaha ekihugo ekĩ oko bana bawe erĩtsũka oko lũsĩ lwʼeMĩsĩrĩ erĩhĩka oko lũsĩ lunene lwʼeEfũratĩ. 19Ekihugo kyʼOmũkenĩ, Omũkenĩsĩ, Omũkadĩmonĩ, 20Omũhĩtĩ, Omũperĩzĩ, Omũrefaĩmũ, 21Omũamorĩ, Omukanana, nʼOmũyebũsĩ.
Atualmente selecionado:
Enzũko 15: KB80
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Bible in Kinandi © Bible Society of the Democratic Republic of Congo, and Bible Society of Uganda, 1980.