MATEO 18
18
Machꞌa a te mukꞌ ya xkꞌote
1Jaꞌ mismo a tijilaj tal ta stojol Jesus te jnopojeletike. La sjojkꞌobeyik:
—¿Machꞌa a te mas mukꞌ te ba ay ta mantal te Diose? —xchiik.
2Te Jesuse la yikꞌ tal jtul chꞌin alal, sok la stejkꞌanbe ta yolilik. 3La yal:
—Jamal ya kalbeyex. Teme ma xjelonexe sok teme ma jichuk chꞌin ya awakꞌ abaik jich tutꞌil te chꞌin untike, ma xjuꞌ ya awajwalinik te Diose. 4Jaꞌ yuꞌun te machꞌa chꞌin ya yakꞌ sbae jich tutꞌil te chꞌin untik to, jaꞌ me mukꞌ ya xkꞌot te ba ay ta mantal te Diose. 5Sok te machꞌa joꞌon ta jkuenta te ya yikꞌ ta sna jtuluk jich tutꞌil te chꞌin untik to, joꞌon la yikꞌon ta sna abi.
Aꞌ me yil sba te machꞌa ya syaleswan ta mulile
6“Machꞌauk a te ya yakꞌ yaluk ta mulil jtuluk te machꞌatik chꞌin ayik te xchꞌuunejikone, jaꞌ lek te yauk yichꞌ chukel mukꞌul chaꞌton ta snukꞌ te ya xchꞌojot ochel ta stoylejal te mare.
7Oꞌol sbaik te genteetike skaj te yalesel ta mulile. Puersa ay machꞌatik ya syaleswan ta mulil, pero oꞌol me sbaik te machꞌa jich ya spase.
8“Jaꞌ yuꞌun teme jaꞌ ya syalesat ta mulil te akꞌabe o jaꞌ te awoke, boja lokꞌel sok chꞌoja bael. Jaꞌ lek te yauk xꞌochat ta kuxlejal manchuk me koxoat manchuk me mokol akꞌab. Jaꞌ ma lekuk teme xchebal akꞌab sok teme xchebal awok te ya xchꞌojelat ochel ta kꞌakꞌ te ma xtup sbajtel kꞌinale. 9Sok teme jaꞌ ya syalesat ta mulil te jpꞌej asite, lokꞌesa sok chꞌoja bael. Yuꞌun jaꞌ lek te yauk xꞌochat ta kuxlejal manchuk me yal jpꞌej te asite. Ja ma lek teme xchebal asit te ya xchꞌojelat ochel ta kꞌakꞌ yuꞌun te kastigoe.
Seña kꞌop te karnera te chꞌayeme
10“Ila me abaik, ma me ayuk jtuluk te maꞌyuk ta jkuenta awuꞌunik te machꞌatik chꞌin ayike. Ya kalbeyex te sil tiempo tekꞌatik te chꞌul angeletik yuꞌunik ta stojol te jTat te ay ta chꞌulchane. 11Jich te Nichꞌanile tal skoltay te tutik chꞌayeme.
12“¿Tut lek ta pasel ya awaꞌiy? Teme ay jtul winik te ay sien ta jkojt te skarnerae, teme jowi jilel ta be jkojtuke, ¿me ma wan yauk sjiles ta wits te noventa y noeve, yuꞌun ya xba slej tal te jkojt skarnera te chꞌay jile? 13Teme la staj tal ta leele, jamal ya kalbeyex, mas ya skꞌupin yoꞌtan yuꞌun te jkojte yuꞌun te noventa y noeve ta jkojt te maꞌ jowibale. 14Jich euk te aTatik te ay ta chꞌulchane ma skꞌan teme ya xchꞌay jtuluk te machꞌa chꞌin ayike.
Tutꞌil ya skꞌan ya apasbe perdon te awermanoe
15“Sok teme ay tut ma tsaꞌamuk a spasbeyat te awermanoe, baan kꞌopona aba sok ta stukel nax. Aꞌbeya snaꞌ te tut ma tsaꞌamuk spasoje. Teme la yaꞌibe sluwar te akꞌope, lek ayatix sok a te awermano abi. 16Pero teme maꞌ yaꞌibeyat sluwar te akꞌope, ikꞌa xan bael jtul o chebuk yuꞌun ay me chaꞌoxtul testigoetik ya xkꞌopoj awuꞌunik spisil te tut la awalik teꞌae. 17Teme ma skꞌan a yaꞌibe sluwar skꞌopik euk te jtul-chebe, albeya yaꞌiy spisil te hermanoetike. Teme ma skꞌan a yaꞌibe sluwar skꞌopik euk te hermanoetike, jich me aꞌ kꞌotuk awuꞌunik te tutꞌil machꞌa ma xchꞌuunejuk te Diose, sok jich tutꞌil te jkꞌan-tojemale.
18“Jamal ya kalbeyex te tut ya akomik ta pasel liꞌ ba balmilale, jich kombil ya xkꞌot skꞌoplal ta chꞌulchan. Jich euk te tut ya awakꞌik ta pasel liꞌ ba balmilale, jich albilix skꞌoplal ta chꞌulchan abi.
19“Sok ya kalbeyex: teme ay chaꞌtulex tem ya achap akꞌopik liꞌ ba balmilale tem ay tut ya akꞌanbeyik te Diose, te jTat te ay ta chꞌulchane ya me yaꞌbeyex. 20Jich te ba ya atsob abaik ta cheb-oxeb teme joꞌon ta jkuentae, ayon me ta awolilik —xchi te Jesuse.
21Te jPedroe tal sjojkꞌobe te Jesuse: —¿Kajwal, jayeb buelta ya skꞌan ya jpasbe perdon teme ay tut ma tsaꞌamuk ya spasbon te kermanoe? ¿Me tey a te jukeb bueltae? —xchi.
22La sjakꞌ te Jesuse:
—Ma xkalbeyat te tey a te jukeb bueltae. Jaꞌ to tey a te setenta ta jmel sietee te ya apasbe perdone.
Seña-kꞌop te jꞌaꞌtel te ma spas perdone
23“Jaꞌ yuꞌun te ba ay ta mantal te Diose, jachik kꞌoem te tutꞌil ay jtul ajwalil te la skꞌan yichꞌbe jkuenta sbet te aꞌteletik yuꞌune. 24Kꞌalal lijk yichꞌbe jkuenta sbet ta jujutule, ikꞌot ochel jtul winik te bayal ta miyon te sbete. 25Te tutꞌil maꞌyuk tut ya stoj a te sbete, la yakꞌ mantal te ajwalile te ya xchonot bael ta mosoile sok yinam sok xnichꞌnab, y spisil te tutik ay yuꞌune, jich me ya xtoj a te sbete.
26“Jich te jꞌaꞌtele la skejan sba ta sit te yajwale la skanbey pawor: “Kajwal, awokoluk, malibon xan. Ya jtojbeyat spisil ta kꞌun”, xchi ta stojol. 27Te ajwalil la snaꞌbe yoꞌolil sba. Jicha spasbey perdon yuꞌun te sbete y libre yakꞌ bael.
28“Pero kꞌalal lokꞌ bael te jꞌaꞌtele la sta sba sok jtul sjoy ta aꞌtel te ay chꞌinuk sbet yuꞌune. La stsak y la xmichꞌbe snukꞌ. La yalbe: “Tojbon te abete”, xyut.
29“Te sjoy ta aꞌtele la skejan sba ta sit, la skꞌanbe pawor ta stojol: “Awokoluk, malibon xan. Ya jtojbeyat spisil ta kꞌun”, xchi ta stojol. 30Pero ma skꞌan a smalibe. La yakꞌ ta prexo jaꞌ to teme la stoj te sbete.
31“Kꞌalal la yaꞌiyik te sjoꞌtak ta aꞌtele, bayal a yakꞌ yajtal yoꞌtanik yuꞌun. Jicha ba yalbeyik spisil te tuti kꞌot ta pasel te yajwalike. 32Jich te ajwalile la yakꞌ tal ta ikꞌel te jꞌaꞌtele y la yalbe: “Ma tsaꞌamukat. Te joꞌone la jpasbeyat perdon spisil te abete yuꞌun la akꞌanbon pawor. 33Jich euk te jaꞌate, jicha skꞌan la apasbe perdon te ajoy ta aꞌtele jich tutꞌil te la jpasbeyat perdone”, xyut. 34Te ajwalile ilin yuꞌun. La yakꞌ mantal te ya yichꞌ kastigo jaꞌ to teme la stoj spisil te sbete.
35“Jaꞌ jich euk te jTat te ay ta chꞌulchane, jich me ya spasbeyex teme makꞌ ya apasbe abaik perdon jujutul ta awoꞌtanik sok te awermanoe —xchi te Jesuse.
Atualmente selecionado:
MATEO 18: AMANNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Nuevo Testamento Tzeltal de Amatenango © Sociedad Bíblica de México, 2006.