Ebikorwa 8
8
Abe:kirisya nibanyasibwa nibanyaragana
1Ku rusiku orwo nikubao okunya:sibwa kunene ku kanisa inu yariga mu Yerusalemi. Bo:ne nibanyaraganira mu:si ja Buyaudi na Samaria, tari jintumwa era. 2Aba:nu abe:ikanyibwa nibasi:ka Stefano, nibamuririra muno. 3Nawe Saulo nanyamuraga muno ikanisa, nengira mu nyumba jo:ne nabakurura abarume na bagasi, nabatu:ra mu nyumba yo buboywa. 4Mbe banu banyaragene nibaja ei ne:i, nibasimura ecigambo ca Nyamuanga.
Filipo nasimura mu Samaria
5Filipo natebera mu musi gwa Samaria, nabasimurira Kristo 6Ebise nibitegeresya na mutima gumwi ebyo Filipo a:ikaga, wejire bongwa nibarora ebirugu:ro binu akoraga. 7Okuba mwabo ba:fu bariga ne misambwa emibi:bi, mbe nijibaso:kako, nijikunga na buraka bunene. Na ba:fu banu bariga barwae econdo na barema mbaosibwa. 8Nikubao kukonderwa kwafu mu musi ugwo.
Simoni omurosi nabatijibwa
9Mbe mu musi ugwo ariga:rio mu:nu umwi risi:na ryae Simoni, unu akoraga amaiku, nabataŋaŋasyaga ba:nu ba Samaria, ne:ku:ya ati ni mukuru. 10Nibamungwaga bo:ne okwambira ku muto:to kukinga ku mukuru, niba:ika ati, Omu:nu unu ni muike mukuru wa Nyamuanga. 11Nibamungwaga, okuba abataŋaŋa-syaga na makura gae siku nyafu, 12Nawe wejire be:kirisya Ebigambo byo bwana binu Filipo abasimuriye ebyo bukama bwa Nyamuanga, na risi:na rya Yesu Kristo, nibabatijibwa abarume na bagasi. 13Ka na Simoni omwene one ne:kirisya. Ejire amara okubatijibwa, nabaga aamwi na Filipo. Narora ebirugu:ro bya managa ne bibarikisyo ebinene binu byakorwaga, nataŋaŋara.
Petero na Yoana mbalumwa Samaria
14Mbe, jintumwa banu bariga bari Yerusalemi, bejire bongwa ati, Abasamaria be:kirisisye omusango gwa Nyamuanga, nibabatumira Petero na Yoana. 15Abene nibateberayo, nibabasabirwa bayabwe Omwoyo Mweru. 16Okuba ariga acari ku be:kako na umwi, nawe babatijibwe era mwisi:na rya Ratabugenyi Yesu. 17Mbe nibabatako amaboko, nibayanwa Mwoyo Mweru. 18Nawe Simoni ejire arora ati, bayabwa Mwoyo Mweru kubwo kubaterako amaboko ga jintumwa, nabare:tera jimpirya, 19Na:ika ati, Munane anye one obuinga bunu, korereki unu wo:ne niratagako amaboko, ayabwega Mwoyo Mweru. 20Petero namubwira ati, Nu:fwe na mapirya gao, okuba we:togera ati, eciyanwa ca Nyamuanga ecigurwa na jimpirya. 21Awe utana mugabo nakabee eba:ra mu cigambo cinu, okuba omutima gwao gute:mire imbere ya Nyamuanga. 22Mbe nu:te obubi:bi bwao bunu, usabwe Nyamuanga, ke:fura amwi nakwiswaririra eri:ganirisyo ryo mutima gwao. 23Okuba enikurora uri mu bururu bwa induru, ka uboyerwe mwifu:ta ryo bwiko:te. 24Simoni naindura na:ika ati, Munsabirwe ku Nyamuanga, byasiga kunkingako ebyo mwaika. 25Mbe wejire bamara okwaika no kusimura omusango gwa Ratabugenyi, nibasuba Yerusalemi, nibasimura Ebigambo byo bwana mu misi myafu ja Basamaria.
Filipo nabatija omu:nu wa Etiopia
26Nawe maraika wa Ratabugenyi nabwira Filipo ati, Imuka ugende mu marimbe mu njira inu eitebera okuso:ka Yerusalemi kukinga Gaja, niyo injira ya mwibara. 27Ne:muka nagenda. Mbe narora omu:nu wa Etiopia, unu ariga omunaure Omukuru mu bukama bwa Kandake, niwe omukamagasi wa Baetiopia. Ariga:ri mubi:ki we bi:nu byae byone, ariga ajiye Yerusalemi okuramya. 28Mbe nasuba enyanjire mwigari ryae, nasoma ecitabo co muragi Isaya. 29Omwoyo Mweru nabwira Filipo ati, Fugera ubumbirisyanye na rigari eryo. 30Filipo nabirima namungwa nasoma ecitabo co muragi Isaya, nabu:sya ati, ?Ousombo:kerwa binu ousoma? 31Omwene na:ika ati, ?Enimenya kutiki nitatangasibwe na mu:nu? Naremberesya Filipo arinye enyanje aamwi nage. 32Na binu byandikirwe binu ariga nasoma ni binu ati,
Agegerwe okujo:kwitwa rwa ina:ma,
Na rwo mwana wa ina:ma kutyo eijibira imbere ya banu abaitemako obufufi,
Nyaburiko atatanyisye munwa gwae.
33Mu kwigairisibwa kwae aramuywe naso:sibwao.
?Niga unu ke:resya orwiburo rwae?
Okuba obuanga bwae bwaso:sibwe mu:si.
34Omunaure naindura Filipo, na:ika ati, Enikusabwa, ?omuragi a:ikire byaga? ?Ni byae omwene, tere amwi ni bya mu:nu undi? 35Filipo nata:nya omunwa gwae, nambira ku binu byandikirwe ebyo, namusimurira Ebigambo byo bwana ebya Yesu. 36Mbe anu bariga bacaribata mu njira, nibakinga ku manji. Mbe omunaure na:ika ati, Ngaga amanji, ?niki eco ecinyingirira okubatijibwa? ( 37Filipo na:ika ati, Uke:kirisya no mutima gwao gwone outura. Omwene naindura ati, Namwikirisya Yesu Kristo ati niwe Omwana wa Nyamuanga.) 38Naragirira rigari okwimereguru. Nibe:ka ku bubiri mu manji, Filipo no munaure, namubatija. 39Wejire baso:ka mu manji, Omwoyo gwa Ratabugenyi ngumugwafya Filipo, omunaure atasubire kumurora. 40Nawe Filipo abonekee mu Ajoto. Anu aitiŋanaga nasimura mu misi jo:ne ndijei nakinga Kaisaria.
Atualmente selecionado:
Ebikorwa 8: KIJ1960
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Kijita New Testament © The British and Foreign Bible Society and The Bible Society of Tanzania, 1960.