Ebikorwa 9
9
Yesu nasoromokera Saulo
(Ebikorwa 22:1-16; 26:9-18)
1Nawe Saulo ariga acasinya okubakanga abe:te abe:igisibwa ba Ratabugenyi, nagenda ku mugabisi Omukuru, 2Namusabwa jinyaruba jo kugenda najo Damasiko, ku mekofyanyisyo, korereki akabonayo aba:nu ba Injira eyo, bakaba barume amwi bagasi, abare:te Yerusalemi baboyerwe. 3Mbe anu ariga acaribata, ajo:kukinga Damasiko, ne:furwa obweru nibumuse:ka:nira okusoka mu rwire, nibumusingira, 4Nagwa a:si, nongwa oburaka nibumubu:sya ati, Saulo, Saulo, ?niki cinu oukora nuunyasya anye? 5Omwene na:ika ati, ?Nawega Ratabugenyi? Omwene na:ika ati, Nanye Yesu unu awe ounyasya. 6Nawe imuka wingire mu musi. Oujo:kubwirwa binu bikwiire okukora. 7Nawe abamura banu aribataga nabo nibe:mereguru nibataŋaŋara, nibongwa oburaka nawe batabwene mu:nu. 8Saulo ne:muka a:si. Wejire e:sya ame:so, atabwene ci:nu. Nibamugwata okuboko nibamusira Damasiko. 9Namara siku isatu atakurora, atakurya, atakunywa.
Anania natumwa ku Saulo
10Ariga:rio mwiigisibwa mu Damasiko, risi:na ryae Anania. Ratabugenyi namubwira mu ciroro ati, Anania. Omwene ne:tabwa ati, Ndi anu, Ratabugenyi. 11Ratabugenyi namubwira ati, Imuka ugende mu njira inu eitogwa Ingororoke, ubu:sye mu nyumba ya Yuda omu:nu risi:na ryae Saulo, owende Tariso, okuba rora, kasabwa. 12Arorere mu biroro omumura, risi:na ryae Anania, nengira namutako amaboko arore. 13Nawe Anania naindura ati, Ratabugenyi, nonguywe ebyo mumura oyo ku ba:nu ba:fu, rwa kutyo akoreraga bubi:bi bwafu abe:ru bao banu bari mu Yerusalemi. 14Na anu one ano buturo okusoka ku bagabisi abakuru, aboega bo:ne banu abasabwa risi:na ryao. 15Nawe Ratabugenyi namubwira ati Genda:ra, okuba oyo ni cikorero ecisorwa cani, asirega risi:na ryani imbere ya bamaanga na bakama, na ba:na ba Israeli. 16Okuba ndimweresya ebigambo byafu binu bimwiire okunyasibwa kurwa risi:na ryani. 17Anania ne:muka nagenda, nengira mu nyumba, namutako amaboko, na:ika ati, Saulo wa:su, Ratabugenyi antumire, niwe Yesu oyo amakusoromokera mu njira inu wamaturako. Antumire korereki urore, wijusibwe Mwoyo Mweru.
Paulo nabatijibwa, namba okusimura
18Aonao nibigwa okuso:ka ku me:so gae uti bikamba, narora. Ne:muka nabatijibwa. 19Ejire arya ebiryo, najira amanaga. Nabaga na be:igisibwa banu bariga mu Damasiko siku nyafuo. 20Aonao nasimura Yesu mu mekofyanyisyo ati, Oyo niwe Omwana wa Nyamuanga. 21Bo:ne banu bamungwaga nibarugu:ra, nibabu:sya ati, ?Tari niwe unu abanyasyaga banu basabwaga risi:na rinu mu Yerusalemi, na ka e:jire anu akorereki abasire baboerwe ku bagabisi abakuru? 22Nawe Saulo neyongesya okujira amanaga, nabaganda:sya Abayaudi banu bariga be:kae Damasiko, nakomeresya ati, Oyo niwe Kristo. 23Mbe wejire jaturao siku nyafu Abayaudi nibarwaja okumwita. 24Nawe Saulo namenya ina:ma yebwe. Nibamwitende:ra ku marango go musi mu mwisi na mu ngeta, bamwite. 25Nawe abe:igisibwa nibamugega nibamwisisya ku ndugu ari mu ri:bo. 26Saulo ejire akinga Yerusalemi, naregeja okusasikana na be:igisibwa. Nibamu:baya bo:ne, bate:kirisisye ati ni mwiigisibwa. 27Nawe Barinaba namugega, namure:ta ku ntumwa, nabasombo:rera kutyo arorere Ratabugenyi ku njira, na rwa kutyo a:ikire nage, na rwa kutyo asimuraga mwisi:na rya Yesu no buba:si mu Damasiko. 28Mbe nabaga aamwi nabo mu Yerusalemi, nengiraga no kuuruka. 29Nasimura no buba:si mwisi:na rya Ratabugenyi Yesu. Na:ika nabambasyanya na Baeburania be Cigiriki. Nawe abene nibayenja obwenge bwo kumwita.
Paulo nagenda Tariso
30Nawe abairi bejire bamenya nibamuyeregesya Kaisaria, nibamuraga aje Tariso. 31Mbe jikanisa nijibona omurembe mu Buyaudi yo:ne na mu Galilaya na mu Samaria, nijumbakwa mu byo mwoyo nijiribata mu ku:baya Ratabugenyi, na mu kusi:ri:sibwa kwo Mwoyo Mweru, nijiyongesya.
Petero naosya Ainea
32Mbe Petero anu aitiŋanaga wo:ne wo:ne, natebera okuja ku be:ru banu bariga be:kae mu Luda. 33Nasangayo omu:nu risi:na ryae Ainea, unu ariga ama:mire ku buriri emyaka eta:nu ne:satu, ariga afu:ye amaguru. 34Petero namubwira ati, Ainea, Yesu Kristo akuosya. Imuka, wanje oburiri bwao. Aonao ne:muka. 35Bo:ne banu bariga be:kae mu Luda na mu Saroni nibamurora nibamuindukira Ratabugenyi.
Tabisa nafwa nasubamo mwoyo
36Mbe mu Yopa ariga:rio mwiigisibwa umwi, risi:na ryae Tabisa, obugajuro bwaryo ati Dorika (kasosoji). Omugasi uyo ariga e:juye ebikorwa byo bwana ne biyanwa binu aso:syaga. 37Mbe e:ya mu siku ijo namara nafwa. Wejire bamara okumwosya nibamutera mwisago rya inguru. 38Na Luda yariga yei na Yopa. Nikwo abe:igisibwa bonguywe ati Petero ariyo, nibamutumira ba:nu babiri, nibamuremberesya ati, utako:ra oku:ja kwiswe. 39Petero ne:muka nagenda nabo. Wejire akinga nibamusira mwisago rya inguru. Abatumba bo:ne nibe:mereguru yei nage nibarira, nibe:resya jikanju ne bifwaro binu akoraga acari nabo. 40Nawe Petero nabaurusya bo:ne, nafukama nasabwa. Nainduka ku citundu na:ika ati, Tabisa imuka. Omwene ne:sya ame:so. Ejire arora Petero, ne:muka neyanja. 41Namuyana okuboko, namwimusya. Wejire amara okubirikira abe:ru na batumba, namuta imbere yebwe ari muanga. 42Omusango gunu nigumenyeka mu Yopa yo:ne. Ba:fu nibe:kirisya Ratabugenyi. 43Ejire e:ya ne:kara mu Yopa siku nyafuo, mu nyumba ya Simoni, omuyasi wa jinjai.
Atualmente selecionado:
Ebikorwa 9: KIJ1960
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Kijita New Testament © The British and Foreign Bible Society and The Bible Society of Tanzania, 1960.