LUCAS 18
18
Sapalla mamaguhuan, imatapash cashcatapacha na ruraj juezhuan chimbapurashpa parlashcami
1Diosta mañanataca, na shaijushpa mañashpa causachunmi, Jesusca cutin cashna chimbapurashpa parlajurca: 2“Shuj pueblopi causajuj juezca, Taita Diostapash na manllashpa, gentecunatapash na cazushpami causajurca. 3Chai pueblopillatami, shuj sapalla mamagupash causajurca. Chai mamaguca: ‘Ñucata na ricunayachij runamanda mitsashpa, imatapash cashcatapacha rurashpa carai’ nishpami, juezpajman rijurcalla. 4Shina rijujpipash chai juezca, unaita na uyashpa causarcallami. Ña unaipimi, paipaj shungupi cashna yajurca: ‘Diostapash na manllanichu, gentecunatapash na cazunichu. 5Ashtahuangarin cai sapalla huarmica, ñucata fiñachij shamujuhuanllami. Chaimandallami, imatapash cashcatapacha paiman ruragrini. Na chashna rurajpica, fiñachij shamujushpallata shaijuchihuangami’ yajurcami” nijurcami.
6Shina nishpallami Apunchi Jesusca, cashnatapash nirca:
“Imatapash cashcatapacha na ruraj chai juez imata nishcatapash uyaichi. 7Taita Dioscarin, ¿nachu pai agllashcacuna tutandi, punllandi caparishpa mañanajujta uyashpaca, imatapash cashcatapacha ruranman? ¿Uyashpapash, na tigrachishpa shuyajungallachu? 8Cangunataca cashnami nini: Diosca, paicunamanga uchami imatapash cashcatapacha ruranga. Ashtahuangarin Runa Aichayu tucushca ñuca shamushpaca, ¿cai pachapica cashna ali crijcunata japij shamushachu, imashi?” nircami.
Fariseohuan, impuestota japijhuan chimbapurashpa parlashcami
9Ñucanchillami imatapash cashcatapacha ruranchi nishpa, shujcunata yangapi churashpa purijcunamanmi, Jesusca cashna chimbapurashpa parlajurca:
10“Ishcaipura runacunami, Diospaj huasiman Diosta mañangapaj vichai rinajurca. Shujca, fariseomi carca. Shujca, impuestota japishpa causajmi carca. 11Chai fariseo runa shayarishpaca, cashna nishpami mañajurca: ‘Taita Dioslla, candaca pashi nipanimi. Na caishuj gentecunashna shuhua, imatapash cashcatapacha na rurajpash, cazarashca jahua shujcunahuan causajpash na capanichu. Impuestota japishpa causaj cai runashnapash na causapanichu. 12Canda yarishpami semanapica, ishcai punllacaman na micushpa chishapani. Imaguta charishpapash, chungamanda shujgutaca canmanmi carapani’ nishpami mañajurca. 13Ashtahuangarin impuestota japishpa causaj runaguca carullaman rishpami, vichai ricuitapash na ushashpa, llaquirishpa, pechota huactarishpa: ‘Ñuca Taita Dioslla, ñuca juchasapa runata llaquihuayari’ nijurca. 14Cangunataca, cashnami nini: Impuestota japishpa causaj runagurami, imatapash cashcatapacha rurashcatashna Dios chasquijpi, huasiman tigrarca. Ashtahuangarin fariseotaca, na chasquircachu. Maijambash jatun tucushpa purijca, pingaichi tucungami. Shinallata na jariyashpa causajca, jatunyachi tucungami” nijurcami.
Huahuacunatami Jesusca bendiciashca
(Mat. 19:13-15; Mar. 10:13-16)
15Huahuacunapaj uma jahuapi maquita churachun nishpami, Jesuspajman apamunajurca. Shina apamujta paipaj yachajujcuna ricushpami, jarcashpa rimanajurca. 16Ashtahuangarin Jesusca, paicunata cayashpami, cashna nirca:
—Huahuacuna ñucapajman shamunajujtaca, na jarcashpa saquinallami canguichi. Taita Dios mandajuj llactaguca, cai huahuacunashna shamujcunapajllami. 17Na llullashpami, cangunataca cashna nini: Taita Dios mandajujta shuj huahuashna na chasquishpaca, Dios mandajuj llactaman yaicuitaca, napacha ushangachu— nircami.
Shuj ninan charij, chairalla viñai runamandami villajun
(Mat. 19:13-15; Mar. 10:17-31)
18Mandaj puramanda shuj runami, Jesustaca cashna tapurca:
—Causaita causagrinata ñuca charingapaca, ¿imatata runana capani, aliguta Yachachij?— nishpami tapurca.
19Shina nijpimi Jesusca, chai runata cashna nirca:
—¿Imashpata ñucataca, ali runagumi cangui nihuangui? Pipash alica na tianllu, Taita Diosllami alica tian. 20Dios mandashca shimicunapi nijujtaca, canllata ñami yachangui. Chaipica cashnami nijun: ‘Cazarashca jahua ama shujhuan causanguichu, pitapash ama huañuchinguichu, ama shuhuanguichu. Chashnapachami nishpa ama juchachishpa villanguichu. Cambaj taitata, mamatapash ninanda alicachingui’ nijunmi— nircami.
21Shina nijpimi Jesusca, cashna nirca:
—Mandashca shimipi chashna nijujtaca, huahuamandapachami tucuita pactachijupani— nircami.
22Shina nijta Jesús uyashpami, cashna nirca:
—Cashnata pactachinarami cangui: Can imata charishcatapash, tucuilla jatushpa, chai culquitaca imagutapash na charijcunaman caragri. Chashna carashpaca, jahua pachapimi ninan charij cangui. Chai jipaca, ñucata catingapaj tigramugrilla— nircami.
23Jesús chashna nijta uyashpami chai runaca, ninan charijpacha cashcamanda, ninanda llaquirirca. 24Shina ninanda llaquirijta Jesús ricushpami, cashna nirca:
—¡Ninan charijcunapaca, Taita Dios mandajuj llactaguman yaicunaca, ninan shinllipachami! 25Dios mandajuj llactaguman, ninan charij shuj runa yaicungapaj randica, camello nishca animalrapashmi, auja utujuta fangalla yalinman— nircami.
26Shina nijta uyajcunaca:
—Shinaca, ¿pita quishpiri ushangayari?— nishpami tapunajurca.
27Shina tapujpimi Jesusca, paicunata cashna nirca:
—Gentecunapaca, caica napacha ushanallachu. Ashtahuangarin Taita Diospaca, rurai ushanallami— nircami.
28Shina nijpimi Pedroca, cashna nirca:
—Ricui, ñucanchica imaguta charishcatapash, tucuita saquishpami, candaca catinajunchi— nircami.
29Shina nijpimi Jesusca, cashna nirca:
—Na llullashpami, cangunataca cashna nini: Taita Dios mandajuj llactagupaj ali cachunmi, paipaj huasita, paipaj taitata, paipaj mamata, paipaj huauquicunata, paipaj huarmita, paipaj huahuacunata pipash saquinga. 30Shina saquishpaca, cai pachapimi ashtahuan japijunga. Jipa causaipicarin, causaita causagrinatami japinga— nircami.
Jesusca, pai huañunatami cutin villashca
(Mat. 20:17-19; Mar. 10:32-34)
31Jesusca, paipaj chunga ishcai yachajujcunatalla, ashaguta pushashpami, cashna nijurca:
—Ricuichi, Jerusalenmanmi vichai rinajunchi. Dios ima nishcata villajcuna, Runa Aichayu tucushca ñucamanda imata escribishcapash, tucuimi chai pueblopica pactanga. 32Chaipimi ñucataca, na israelcunaman japishpa cuhuanga. Paicunami, ñucataca pugllashpa asinajunga. Nalicachishpa rimashpa, t'ucashpami churahuanga. 33Ña astishca jipaca, huañuchihuangami. Ashtahuangarin quimsa punllahuanga causarishallami— nijurcami.
34Ashtahuangarin Jesús imata nijujtapash, paipaj yachajujcunaca, na yachai usharcachu. Imamanda chashna nishcatapash na villashca cajpimi, paicunaca na entendinajurca.
Ñausa runagutami, Jericó shuti pueblopi alichishca
(Mat. 20:29-34; Mar. 10:46-52)
35Jericó shuti puebloman Jesús ña chayajujpica, cashna tucurca: Shuj ñausa runagumi, culquita mañashpa ñambi tiajushca carca. 36Chai ñausa runaguca, ashtaca ashtaca gentecuna yalinajujta uyashpami:
—¿Imashpata chashna yalinajun—? nishpa tapurca.
37Shina tapujpica:
—Nazaret pueblomanda Jesusmari yalijun— nishpami villanajurca.
38Shina villajpimi:
—¡Ñaupa taita Davidpaj Churi Jesús, ñucataca llaquihuayari!— nishpa, capari callarirca.
39Shina caparijujpimi, ñaupashpa rinajujcunaca:
—Ama chashna caparichu— nishpa jarcanajurca.
Shina jarcajpipash, ashtahuanmi:
—¡Ñaupa taita Davidpaj Churi, llaquihuayari ninimari!— nishpami, ninanda caparirca.
40Shina caparijujpimi, Jesusca shayarishpa:
—Chai runaguta ñuca ñaupajman pushamupaichi— nishpa mandarca.
Chai runagu shamujpimi, Jesús tapushpaca:
41—Canga, ¿imagutata rurachun munangui?— nishpa tapurca.
Shina nijpimi, chai ñausa runaguca:
—Ñuca ñavigu ricuchun alichihuai, Apunchi Jesús— nircami.
42Shina nijpimi Jesusca, cashna nirca:
—Ali tucui ninimi. Tucui shunguhuambacha crishcamandami, ña quishpirishcangui— nircami.
43Shina nijpi ricushpami, Taita Diostaca ninanda alicachishpandi, Jesusta catishpa rirca. Shina alichijta ricushpami gentecunaca, Taita Diosta tucuilla alicachinajurca.
Atualmente selecionado:
LUCAS 18: QUII
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Quichua Imbabura Bible © United Bible Societies, 1994.