LUCAS 19
19
Zaqueo shuti runaguhuan Jesús parlashcami
1Jericó shuti puebloman Jesús chayashpaca, pueblo chaupitami yalijurca. 2Chai pueblopimi, Zaqueo shuti runaguca causajurca. Paica, impuestota japishpa causanajuj runacunata mandajmi carca. Paica, charij runami carca. 3Paimi, Jesustaca maijan cajta rijsingapaj ninanda ricunayachirca. Ashtahuangarin gentecuna ninanda jundariajpimi, Zaqueo shuti runaguca uchilla cashpa, na ricui usharca. 4Shina cashpami, sicómoro nishca quiru jahuamanda Jesusta ricungapaj, ñaupashpa calparca. Jesusca, chaitapachami yalina carca. 5Chai quiruman Jesús chayashpa vichai ricushpami, Zaqueo runagutaca ricushpa cashna nirca:
—Zaqueo, ucha uriajumui. Cunanga, cambaj huasipi mingachigrihuai— nircami.
6Shina nijpi ucha uriajushpami, Zaqueo runaguca ninanda cushijushpa, Jesusta mingachigrirca.
7Chaita ricushpami, tucuicuna ninanda nalicachinajurca. Juchayu runapaj huasipirachu mingarin nishpami nalicachinajurca.
8Ashtahuangarin Zaqueo shuti runaguca shayarishpami, Apunchi Jesustaca cashna nirca:
—Apunchi Jesús, cashnatami ruragripani. Ñuca imata charishcatapash chaupitami, imagutapash na charijcunaman caragripani. Maijandapash umashpa, culquita japijushcatapash, chuscucamambachami tigrachigrini— nircami.
9Shina nijpimi Jesusca, cashna nirca:
—Cunanmi, cai huasipi causajcuna quishpirina punlla chayamushca. Paipash, ñaupa taita Abrahambaj mirai purami. 10Runa Aichayu tucushca ñucami, chingashca causajcunata mascashpa, quishpichingapaj shamurcani— nircami.
Mina nishca chunga culquihuan chimbapurashpami parlashca
11Chashna nijujta uyanajujpimi Jesusca, ashtahuan chimbapurashpa parlajurca. Paica, Jerusalenman ñami chayagrijurca. Shinamandami gentecunaca: “Taita Dios mandai callarinaca, ñallami chayamunga” yanajurca.
12Shinamandami cashna nijurca: “Ninanda alicachi tucushca runaguca, caru llactapi pai mandanata chasquishca jipa, tigramungapajmi rirca. 13Paica, nara rishpallatami, paipaj chunga servijcunata cayashpa, ninan valishca mina nishca culquicunata, paicunaman shuj shujlla mingarca. Shina mingashpami: ‘Cai culquihuanga, ñuca tigramungacaman randishpa, jatushpa mirachinguichi’ nirca. 14Ashtahuangarin paipaj llactapi causajcunaca, ninanda na ricunayachishpami: ‘Chai runa ñucanchita mandaj cachunga, napacha munanchica’ nichunmi, villaj runacunata cachanajurca. 15Shina cajpipash, cashnami tucurca: Chai runaguca, pai mandanata chasquishca jipami tigramurca. Shina tigramushpami, pai mingashca culquita mashnata mirachishcatapash yachangapaj, paita servijcunata cayachun cacharca. 16Paita servij runagu, pundalla chayamushpami: ‘Can mingashca mina culquigutaca, chungacamanmi mirachiparcani, taita’ nirca. 17Shina nijpimi chai mandaj runaguca, cashna nirca: ‘Canga, aliguta ruraj runagumi cashcangui. Ashagutalla mingajpipash, aliguta cuidashpa pactachin cashcamandami, chunga pueblocunata mandajuchun, candaca churasha’ nircami. 18Chai jipami, caishuj servij runa chayamushpaca: ‘Can mingashca mina culquigutaca, pichacamanmi mirachiparcani, taitalla’ nirca. 19Shina nijpimi: ‘Picha pueblocunata mandajuchunmi, candapash churasha’ nirca. 20Chai jipaca, shuj servij runa chayamushpami cashna nirca: ‘Taitalla, can mingashca mina nishca culquica caipimi. Shuj findupi huatashpami alichiriarcani. 21Candaca, fiñajlla runa cajpimi manllarcani. Canga, tarpuchun muyuta na cushpapash, tandachijpi chaupingapaj shamuj runami cangui’ nircami. 22Shina nijpimi, chai mandaj runaguca, paita cashna nirca: ‘Canga, nali runamari cashcangui. Canllata chashna nirijushcamandami, llaquichi tucungui. Fiñajlla runa cajtapash, ñucataca yachashcanguimi. Tarpuchun muyuta na cushpapash, tandachijpi chaupingapaj shamuj cashcatapash yachahuashcanguimi. 23Shina yachashca jahuaca, ¿imashpata ñuca culquitaca, bancopi na churagrircangui? Bancopi churajpica ñuca tigramushpaca, mirashca culquindimi japiman carcani’ nircami. 24Shina nishpallami chaipi shayajcunataca, cashna nishpa mandarca: ‘Cunanga, cai runa charijuj mina culquita quichushpa, chunga mina culquicunata charij runaman cuichi’ nircami. 25Shina nijpimi paicunaca, cashna ninajurca: ‘Paica, ñamari chunga mina culquicunata charin, taitalla’ ninajurca. 26Shina nijpimi chai mandaj runaguca, cashna nirca: ‘Cangunataca, cashnami nini: Ashtacata charij runami carajpi, ashtahuan charinga. Ashtahuangarin na charij runataca, ashata charishcatapashmi quichunga. 27Paicunata mandachun, ñucata na munashpa fiñajcunataca, cai ñuca ñaupajman apamushpa, cungata muchupaichi’ nishpami mandarca” nijurcami.
Ninanda alicachijtami, Jerusalenman Jesús yaicushca
(Mat. 21:1-11; Mar. 11:1-11; Juan 12:12-19)
28Chashna villaita tucuchishpallami Jesusca, Jerusalenman ashtahuan vichai rijurca. 29Betfagé shuti, Betania shuti pueblo ladomanmi, Jesusca chayajurca. Chai ladopillatami, Olivos shuti urcupash tian. Chaiman chayajushpami Jesusca, paipaj yachajuj puramanda ishcai runacunata cacharca. 30Paicunataca, cashna nishpami cachajurca:
—Chai chimba uchilla llactaguman ripaichi. Chaiman chayashpaca, pipash nara tiarishca maltun burroguta huatashca shayajujtami taringuichi. Chai burrogutaca, cacharishpa apamupanguichilla. 31Canguna cacharijujpica: ‘¿Imapajta cacharinajunguichi?’ ningami. Shina nijpica: ‘Apunchi Jesusmi apamugri’ nijpi apanajunchi ninguichi— nishpami cacharca.
32Shina cachajpimi, chai ishcai yachajujcuna rishpaca, Jesús imashna nishcashna tarigrirca. 33Maltun burroguta cacharijujpi, dueñocuna ricushpami:
—¿Imapajta chai maltun burrogutaca cacharinajunguichi?— nishpa tapunajurca.
34Shina tapujpica:
—Apunchi Jesús apamugri nijpimi apanajupanchi— ninajurcami.
35Ña Jesuspajman chai maltun burroguhuan chayamushpaca, paicunapaj jahualla churajushcatami, lomopi churanajurca. Shina churashpami, Jesustaca chai maltun burro jahuapi tiachirca. 36Jesús ña yalijujpica gentecunaca, paicunapaj jahualla churajunacunatami, ñambi mandanajurca. 37Olivos urcumandami, ña urai rinajurca. Jerusalenman ña chayagrijujpica, Jesusta catishpa rinajuj tucuilla gentecunami, ninanda cushijushpa capari callarinajurca. Paicunaca, imagutapash Jesús juyailla rurashpa purijujta ricushca cashpami, Taita Diostaca ninanda alicachishpa, 38cashna ninajurca:
—¡Jatun Diospaj shutipi shamujuj jatun mandajca, aligumari cangui ni tucushca cachun! ¡Jahua pachamandaca, casilla ali causaiguta caramuchun! ¡Jahua pachapi tiajuj Diosca, punchapambagumi cangui ni tucushca cachun!— ninajurcami.
39Shina ninajujpimi, chai ashtaca gentecunapaj chaupipi rinajuj, huaquin fariseocunaca cashna nirca:
—Yachachij, cambaj yachajujcunataca, upalla caichi niyari— ninajurca.
40Shina nijpimi Jesusca, cashna nirca:
—Cangunataca cashnami nini: Cai gentecuna upallayajpica, rumicunarami caparinga— nircami.
41Jerusalenman Jesús ña chayajushpaca, chai pueblota ricushpami, chai pueblomanda huacarca. 42Shina huacashpami, cashna nijurca: “¡Cangunamambash, ali causaita caramujujta cunanllata yachashpaca, alichari canguichiman! Ashtahuangarin cangunapaj ñavitaca quilpashcashna cajpimi, cunambica imatapash na yaringuichi. 43Cangunata llaquichina punllacunaca chayamungami. Chai punllacunapimi, cangunata fiñajcunaca, chaupipi churashpa patata ruranga. Shina rurashpami, cangunataca caimanda, chaimanda japij shamunga. 44Shina shamushpaca, huasicunata urmachishpa ñutushpami, rumicunatapash tucuillata alpapi shitanga. Cangunatapash, huañuchishpami tucuchinga. Dios llaquishpa quishpichingapaj shamushcata imatapash na yarishcamandami, chashna llaquichi tucunguichi” nijurcami.
Diospaj huasitaca mapa illajtami rurashca
(Mat. 21:12-17; Mar. 11:15-19; Juan 2:13-22)
45Diospaj huasiman Jesús yaicushpaca, jatushpa tiajcunatapash, randishpa purijcunatapashmi llujchishpa calpachirca. 46Shina calpachishpami, Jesusca cashna nirca:
—Escribishcapica cashnami nijun: ‘Ñuca huasiguca, ñucata mañana huasimi ni tucushcami canga’ nijunmi. Ashtahuangarin cangunaca, shuhuacuna pacajuj utujutashnami, cai huasitaca rurashcanguichi— nircami.
47Diospaj huasipica, punllandimi Jesusca yachachijurca. Ashtahuangarin curacunata mandajcuna, mandashca shimita yachachijcuna, gentecunata mandajcuna huañuchingapajmi munanajurcami. 48Ashtahuangarin Jesús villajujtaca, tucuilla gentecuna aligutapacha uyanajujpimi, imatapash na rurai usharca.
Atualmente selecionado:
LUCAS 19: QUII
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Quichua Imbabura Bible © United Bible Societies, 1994.