Lucas 4
4
Jesústa Satanás tentayta munashqan
Mateo 4.1-11; Marcos 1.12-13
1Bautizakurir Espíritu Santupa munaynincho Jesús kaykaptinmi Jordán mayupita chunyaq jirkaman Espíritu Santu pusharqan. 2Tsaycho chusku chunka (40) junaq kaykaptinmi diablu tentarqan. Tsay junaqkuna imatapis mana mikurmi Jesús pasaypa mikanarqan.
3Tsaymi diablu kayno nirqan: <<Diospa Tsurin kaykarqa mä kay rumita tantaman tikratsiy>>.
4Tsayno niptinmi Jesús kayno nirqan: <<Tayta Diospa palabrancho kaynömi qelqaraykan: <Manami tantata mikulartsu runa kawan, [sinöqa Tayta Dios nishqankunata cäsukurmi kawan]> >>.#Deut. 8.3.
5Tsaypitanami altunnin puntaman diablu pushaykur maytsay nacionkunata rätula rikarkatsir 6kayno nirqan: <<Lapan rikashqayki nacionkunata y tsaycho kaq riquëzakunatami qoykushayki. Tsaykuna noqapa kaptinmi munashqä kaqta pitapis qoykushaq. 7Qonqurpaykur adoramaptikiqa lapan rikashqaykikunatami qoykushayki>>.
8Tsaymi Jesús kayno nirqan: <<[¡Witikuy, Satanás!] Tayta Diospa palabrancho kaynömi qelqaraykan: <Tayta Dioslata adorapäkunki. Pay japalanta sirvipäkunki> >>.#Deut. 6.13.
9Tsaypitanami Jerusalénman Jesústa diablu pusharqan. Tsaychönami templupa altunnin kaq puntanman ichiykatsir kayno nirqan: <<Diospa Tsurin karqa mä kaypita jeqay. 10Diospa palabrancho kaynömi qelqaraykan: <Angilninkunatami Tayta Dios kachamunqa imapitapis tsapäshunaykipaq. 11Paykunami tsarishunki chakilaykitapis rumikunaman mana takakunaykipaq> >>.#Sal. 91.11-12.
12Niptinmi Jesús kayno nirqan: <<Tsaynöpis Tayta Diospa palabrancho kaynömi niykan: <Tayta Diosta ama tentankitsu> >>.#Deut. 6.16.
13Jesústa tentayta mana kamäpakurnami diablu aywakurqan yapay kutimunanyaq.
Galileacho Jesús wilakuyta qalaykushqan
Mateo 4.12-17; Marcos 1.14-15
14Tsaypitanami Espíritu Santupa munayninwan Galileaman Jesús kutirqan. Tsay markakunachömi Jesús ali yachatsikuq kashqanta runakuna parlapäkuq. 15Sinagögakunacho yachatsiptinmi payta kayno nir alabapäkurqan: <<¡Payqa alimi yachatsin!>>
Nazaret markacho Jesús wilakushqan
Mateo 13.53-58; Marcos 6.1-6
16Tsaypitanami markan Nazaretman Jesús kutiykur costumbrin kashqanno jamay junaqcho sinagögaman aywarqan. Tsaychömi Tayta Diospa palabranta liyimunanpaq runakunapa nawpanman ichirqan. 17Profëta Isaías qelqashqan rölluta makyaptinmi liyiyta munashqanta kicharkur liyimurqan kayno nir:
18<<Tayta Diosmi Espïritunta noqaman kachamushqa.
Paymi akramashqa waktsakunata ali wilakuyninta wilanäpaq.
Tsaynöpis kachamashqa [lakishqa kawaqkunata shakyätsinäpaq,]
juk lädu nacionman prësu apashqankuna librina kashqanta wilanäpaq,
qaprakunapa nawinta aliyätsinäpaq,
contrankunapa makincho nakaykaq runakunata jorqunäpaq
19y Tayta Dios salvananpaq kaq tiempu chayamushqanta wilakunäpaq>>.#Isa. 61.1-2.
20Tsayno liyirkurnami rölluta wankurkur kutiykatsirqan sinagögacho yanapaq runata. Jamaykuptinnami tsaycho kaykaq runakuna payta rikarpaykarqan. 21Tsaymi Jesús kayno nirqan: <<Liyipämushqächo nishqannömi kanan cumplishqa kaykan>>.
22Tsayno niptinmi runakuna kushikushpan nipäkurqan: <<¡Payqa shumaqmi parlan! ¿Manaku Josépa tsurilan kaykan?>>
23Tsawraqa Jesús kayno nirqan: << <Jampikuq karqa kikikiraq jampikuy> nishqannöchari qamkunaqa munarkaykanki Capernaúmcho milagruta rurashqäno kay markantsichöpis milagruta ruranäta>>.
24Nirkurmi kayno nirqan: <<Rasunpami kayno nï: Manami mayqan profëtatapis markanchöqa chaskikärintsu. 25Rasunpami kayno nï: Profëta Elías kawanan witsan kimsa wata soqta killan mana tamyaptin maytsay Israel markakunacho fiyupa muchuy karqan. Tsay witsan Israel nacioncho atska viüdakunami karqan. 26Tsayno kaykaptinpis Tayta Dios Israelcho mayqan viüdata yanapananpaqpis manami Elíasta kacharqantsu, sinöqa Sidóncho kaq Sarepta markacho taq viüdalata yanapananpaqmi kacharqan.
27<<Profëta Eliseo kawanan witsanpis Israelcho leprawan qeshyaykaqkuna atskami karqan. Tsayno kaykaptinpis manami mayqantapis Eliseo aliyätsirqantsu, sinöqa Siria nacionpita kaq Naamánlatami aliyätsirqan>>.
28Jesús tsayno niptinmi sinagögacho kaykaq runakuna fiyupa rabyakärirqan. 29Tsaymi Jesústa markapita jorqur marka kuchun tunaman apapäkurqan tsaypita tanqarinanpaq. 30Tsayno aparkaykaptinmi chawpinpita Jesús aywakurqan.
Supay löcuyätsishqan runata Jesús aliyätsishqan
Marcos 1.21-28
31Tsaypitami Galileacho Capernaúm markaman Jesús aywarqan. Tsaychömi cada jamay junaq runakunata yachatsirqan. 32Ali yachatsishqanta mayashpanmi kushikur kayno nipäkurqan: <<¡Payqa munayniyuq karmi shumaq yachatsimantsi!>>
33Tsay sinagögachömi kaykarqan supay löcuyätsishqan runa. Paymi qaparar kayno nirqan: 34<<¡Nazaretpita kaq Jesús, [kaypita aywakuy]! ¿Imatataq noqakunawan munanki? ¿Ushakätsimänaykipaqku shamushqanki? ¡Noqa musyämi Tayta Dios kachamushqan santu runa kashqaykita!>>
35Tsawraqa supayta olqüpar Jesús kayno nirqan: <<¡Upälala kay runapita yarquy!>>
Tsayno niptinmi lapan runakunapa nawpancho tsay runata saqtariykur aywakurqan. Saqtarpis manami däñarqantsu. 36Tsayta rikaykurmi kushikärishpan juknin jukninpis kayno nipäkurqan: <<¡Imatanataq rikantsi! ¡Munayninwan niptin supaykunapis cäsukurmi aywakärin!>>
37Supayta qarqushqanta mayaykurmi intëru Galileacho Jesús munayniyuq kashqanta parlapäkuq.
Pedrupa suedranta Jesús aliyätsishqan
Mateo 8.14-15; Marcos 1.29-31
38 Sinagögapita yarqurirnami Simónpa wayinman Jesús aywarqan. Chayananpaq Simónpa suedran shanapäkuy qeshyawan antsa jitaraptinmi Jesústa ruwakärirqan aliyätsinanpaq. 39Tsawraqa qeshyaq kaqman witiykur shanapäkuy qeshyata olqüpaptin jinan höra aliyarqan. Aliyarkurnami mikuyta paykunata qararqan.
Atska qeshyaqkunata Jesús aliyätsishqan
Mateo 8.16-17; Marcos 1.32-34
40Inti jeqaykaptinnami tukuy niraq qeshyawan qeshyaykaqkunata Jesúsman apapäkamurqan. Makinta jananman churaykularmi paykunata aliyätsirqan. 41Wakin qeshyaqkunapitanami supaykunapis yarqupäkurqan kayno qaparpashpan: <<¡Qamqa Diospa Tsurinmi kanki!>>
Tayta Dios kachamushqan Cristo kashqanta supaykuna niptinmi Jesús olqüparqan mana rimakunanpaq.
Jesús wilakur purishqan
Marcos 1.35-39
42Patsa wararkuptinnami chunyaqninman Jesús aywakurqan. Tsawraqa runakuna ashishpan pay kaykashqan kaqman chayaykur manakärirqan paykunapita mana aywakunanpaq. 43Tsaymi Jesús kayno nirqan: <<Tayta Dios mandaykashqanpa ali wilakuyninta wakin markakunachöpis wilakunämi kaykan. Tsaypaqmi Tayta Dios kachamashqa>>.
44Nirkurnami intëru Israel markakunapa purir#4.44 Wakin griego copiakunachöqa Galileapa purir ninmi. sinagögakunacho Tayta Diospa wilakuyninta Jesús wilakurqan.
Atualmente selecionado:
Lucas 4: qvmB
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2003, Wycliffe Bible Translators, Inc. All rights reserved.