Bikambelo biki bikima 1
1
1O Teofilo ndʼonkandʼoki joso nkotaki nsango ea baoyiʼauma baki Yesu oangaka okela ko lʼolaka, 2elaka nko mbile ekiʼulelaka, ndʼafeka bʼetomelo ekiʼndʼotomaka bikima bakiʼndʼosonaka la Bolimo wʼoeko. 3Ndʼafeka bʼelo ekae aovaeneya elʼiyo mbaika la ntaza iuke itakusʼoikyama ekoli; wae aokongʼenyʼelʼiyo la bembile ntuku inei, ko aolasangela baoyi ba likulaka ja Nzakomba.
Baoyi ba ncindeza ba Yesu
4Ko atakanʼende lʼiyo aolasangela wae batimanake Yelusalema, lolo aokela, Lolendeza nkʼeko elaka ea Fafa ekiʼnyʼokaka limʼeremi; 5ele nsosolo, Yoane inakʼanto ndʼasi, lolonde atafa bembile beuke oleka, inyo lifinama nda Bolimo wʼoeko.
Ulelo ea Yesu nda loola
6Akiʼyʼotakane, baolouola, bakela, Nkolo, wifuteya likulaka ele Yisalaele ndʼekekʼene nde? 7Ende aolakela, Afokaema elʼinyo wete lea bikeke la bileko biki Fafa obuzaka nda mpifo ekande mongo. 8Lolonde ae Bolimo wʼoeko oyʼelʼinyo lifamba mpamba, ko lifoyalema basangi bakami la nda Yelusalema la nda bise biuma bia Yudea la bia Samalia, ko elaka nko nsuko mongo eʼokili. 9Akiʼndʼotefelaka ngoko, o nkʼandoalʼiyo, aolulela, ko litute joloamba limʼaiso bakiyo. 10Ko ateezʼiyo tee nda loola andulelʼende, bala bantʼafe, balotsama la bito bia fe, baolemala lʼiyo, 11baokela, Banto ba Ngalilaya, lolemala ngoe, ko loala tee nda loola lae? Yesu one ondambema limʼelʼinyo nda loola ifoya lenkina o lʼelenge ekiʼnyʼoenaka wae aokenda nda loola.
Matia aosulungana Yudasa
12Nkako baoluta nda Yelusalema lima ngongo etangema Bilaya, ele ntutama la Yelusalema, esi ngole lokendo ja Sabata. 13Ko akiʼyʼokitakʼeko, baoundanda ntena eʼaliko ekiʼyʼokitakʼase; wae Petelo la Yoane la Yakobo la Andelo, la Filipo la Toma, la Balutomayo la Matayo, la Yakobo, bonʼowa Alafayo, la Simona owa Zelote, ko la Yuda bonʼowa Yakobo. 14Bakʼauma baoyalekya la lokai lomoko nda boondo la loncinji, iyo lʼamato ko la Malia, nyango ea Yesu, ko lʼakune ba Yesu.
15Ndʼembilʼeko Petelo aolemala ndʼetei eʼalongo (boloi bokiyo boki nga bonkama la ntuku ife), ko aokela, 16Balongo, ekeji wae ekotelo iele, wete eko eki Bolimo wʼoeko otelaka nda joso lʼomwa wa Dawidi ndʼeloko ea Yudasa, endʼoki bolonji owa mboka elʼiyʼakandaki Yesu. 17Elʼende aki ndʼoanjiʼokiso, ko aki la Hondo nda bolemʼone. 18(Bontʼone asombaki lisala la nyongo ea bobeʼokae. Ende akweki besunangongo, likunju likae jolatsa kwa, ko besofo bekae beuma beolola bu. 19Joi liko joleana elʼantʼauma bafetsaki nda Yelusalema; la ngoko lisala liko jotangema, nda lofoso lokiyo Akeladama, wae Lisala jʼalongo.) 20Ele joi jokotama ndʼonkanda wa Njemba ya Losimo,
Kela lifeta likae liyale elaji,
Ko bontʼonkina afofetsʼeko nye, ko
Kela bontʼonkina ambe mpifo ekiʼnde.
21Ndʼewelʼeko eji wae omo limʼelʼanto bako baamanaki lʼiso bembile beuma beki Nkolo Yesu otswaka ko olaka lʼiso, 22mbaanga lʼinelo eki Yoane elaka nko mbile ekiʼndʼulelaka limʼelʼiso wae omo owʼantʼako ayale lʼiso bosangi owʼeetswelo ekande limʼiwa. 23Ko baolemya bafe, wete Yosefa otangema Balusaba, ondetamaki Yuseto, ko la Matia. 24Nkako baondaki, baokela, We Nkolo ondea betema biʼantʼauma, oteneya limʼele banto banʼafe oko oki we osonaka, 25wae akole efosa eʼesaelo ene eʼekima eki Yudasa imanaka wae acwe wijiʼokae mongo. 26Nkako baokela ntaza yʼesonelo, ko esonelo eokwela Matia. Limʼako ende aandemaki la bikima jom lʼomoko.
Atualmente selecionado:
Bikambelo biki bikima 1: LOL87
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Bible en Lomongo © Societe Biblique de la R.D. Congo 1987