Yoane 21
21
Yesu la Petelo nda lieke ja Tibelia
1Ndʼafeka ba baoyiʼako, aoleneyʼende mongo elʼakimiʼakande nda lieke ja Tibelia; aoyaeneyʼende mongo elengʼene. 2Simona Petelo la Toma, otangema Jasa, la Natanaele, bosi Kana ea Ngalilaya, lʼana ba Zebedayo, lʼakimiʼamo bafe bakotakai. 3Simona Petelo akela, Nsocwʼasa nse. Iyo bakela, Ko iso tocwe la we. Baocwʼokondela nda wato, ko botsʼoko ntabaoma nse nye.
4Ndʼekyelo ea jefa, Yesu akemi ndʼeselo ea lieke, lolo bakimi ntabea wae ende ale Yesu. 5Ko Yesu aolakela, Bana, loata nde yomba ya ndala? Baolamba, O mpampa. 6Aolakela, Lusʼojanga nda wiji wʼelome ea wato ko lifotana. Nkako baolusʼojanga, ko ntabakuseya lobela bojanga ndʼewelʼea bofula wa nse. 7Ko bokimi oko oki Yesu okaka eefe, aokela Petelo, Ale o Nkolo! Aki Simona Petelo okaka wae ale Nkolo, aoyalotsa bonkoto wʼaliko, ekiʼnde lʼotaka, ko aokwela lieke. 8Lolo bakimiʼamo baoya ndʼiyatato, ekiʼyo ntabaki esi lʼokili nkina metres bonkama, ko baobela bojanga bokama la nse.
9Akiʼyʼosafwa ndʼokili, baolena tsa ta baala, ko nse njafema nda tsa, ko la mampa. 10Yesu aolakela, Loyelʼaeyoko nse ikiʼnyʼoomaka. 11Simona Petelo aokondelʼa wato ko aobelʼojanga bokama la nse yʼinene ndʼokili, bonkama bomoko la ntuku itano la nse isato: o la bouke wa nse ngoko, bojanga ntawatsa. 12Yesu aolakela, Loyaka lole toma ta nkesa. Nkʼomo owa bakimi okuseya louolʼe-nde, We na? ekiʼyʼoeaka wae ende ale Nkolo. 13Yesu aoya ko aokola mampa ko aolakaya, ko la nse ngoko. 14Bone wae wenya wʼesato boki Yesu enyaka ele bakimi limʼakiʼndʼoetswaka limʼele bawei.
Biuo bia Yesu la biambo bia Petelo
15Akiʼyʼoleke toma, Yesu aokela Simona Petelo, Simona bona owa Yoane, onjokʼemi eefe elekola eefe ea bane? Aokela, O nde Nkolo, we wea wete nkolanga we. Yesu aolotoma, Leya bana ba mpate bakami. 16Aolokela lenkina bokela wʼefe, Simona bona owa Yoane, onjokʼemi eefe? Aoloutola, O nde Nkolo, we wea wete nkolanga we. Yesu aolokela, Esanya mpate ikami. 17Aolokela bokela wʼesato, Simona, bona owa Yoane, Ondangʼemi? Petelo aoloka lokeseli eki Yesu okelakʼende bokela wʼesato Ondangʼemi? ko aolokela, Nkolo, we wea baoyiʼauma, wea wete nkolanga we. Yesu aolokela, Leya mpate ikami. 18Nsosolo, nsosolo, nkosangela, aki we bosekota, olembaki bombembe boke mongo, ko okendaki wiji bokiʼwʼolangaka, lolo ae wʼokita mpaka, wifosembya bakata ko omo ifokolembʼombembe, ko ifokotomba wiji bofa wʼolange. 19Atefelaki joi liko wae eneya elenge eaiwa i endʼomemya Nzakomba. Akiʼndʼotefelaka joi line, aolokela, Onkimʼemi.
20Petelo aokengwana, ko aolena bokimi oki Yesu okaka eefe ayokime, wae ende okeki nda ntolo ea Yesu ndʼelelo ea toma tʼokolo ko okelaki, Nkolo, Osʼokangela na? 21Aki Petelo oenakʼende, akela Yesu, Bontʼone, mpangʼe-nde akele na? 22Yesu aolokela, Ayaka ndanga wae acikale elaka nkʼaʼemʼoya, la joi like nde? We, onkimʼemi. 23Etefeelo ene eolongwana ele balongo, wete bokimi oko afaowa: lolo Yesu ntasangelʼende wae afaowa; lolonde, Ayaka ndanga wae acikale elaka nkʼaʼemʼoya, la joi like nde?
24One wete bokimi osanga nsango ea baoyiʼane ko okotaki bako: ko tea wae nsango ikae ile nsosolo.
25Koko bamʼaoyiʼauke baki Yesu okelaka balʼeko; nga bakotama bakʼauma, ntanga wae bokili mongo bofokoke lʼenkanda beyokotame.
Atualmente selecionado:
Yoane 21: LOL87
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Bible en Lomongo © Societe Biblique de la R.D. Congo 1987