Yoane 15
15
Yesu nga ndikidi bakakue
1“Mi nga ndikidi bakakue, Buba nga babanda ati. 2Gu be du ti re dunduko azu nga ya, ko di he adia ku sa yo. Gu be dunduko nazu, ko girisi he agirisa, si zu susi gu nadu mbata. 3Oni ima du gigiri mbiko gu pai gumba mi fu roni. 4Oni nyé rogo re yo, mi nye rogo roni yo a. Ka behe zu nga ni tihe te, kina gu ka si nye rogo bakakue yo; wo du oni, kina gu ka oni nye rogo re yo. 5Mi nga bakakue, oni nga abehe; gu ni ka nye rogo re yo, mi ki nye rogo ni yo, ni ka zu gbe; bambiko kparaka oni ti re ka oni mangi nga he wa sa te. 6Ka boro anye nga rogo re yo ya, i ba ni aba wa be ngua, si ki ugu auga; i ki dungura ha, ki ba ha ku we yo, si ki gbi. 7Ka oni nye rogo re yo, gimi apai ki nye rogo roni yo, oni nikpari akpara tipa gu he oni akpi nyemu he, si ki mangi amanga fu roni. 8Ka oni azuka gbe, si ka Buba du ti ni ni taasitaasi ko; si ka oni du ti ni a ni gimi abawiriki. 9Wa Buba nakpi nyemu re, mi nakpi nyemu roni a; oni nyé rogo gi nyemuse. 10Ka oni ka kuti gi rugute, oni nye anye rogo gi nyemuse; wa ka mi kuti ga Buba rugute, ki nye rogo gako nyemuse. 11Gumba mi agi apai fu roni re, gi ngbarago du rogo roni, gaoni ngbarago moi pai.
12“Gi nga gi rugute re, nga oni nikpi nyemu akuaroni, wa gu mi nakpi nyemu roni. 13A nga boro sa du na bakere nyemuse susi gi nga, boro bagi kpioni tipa abadiangbani te. 14Ka oni amanga agu apai mi arugu roni kuti ni, abadiangbare nga oni. 15Wa du rago re mi ayamba nga roni ni amoyambu te; bambiko moyambu aina nga gu pai bairani amanga te: ono mi yambu roni ni abadiangba; bambiko agu apai dũ mi agi ngba Buba mi yugu he fu roni. 16Oni asia nga re te, ono mi nasia roni, ki moi roni, oni ndu ka zuka, gaoni rindi ngua nye anye. Gu he ka oni kpari fu Buba tipa ha ni rimore, ko fu he afu fu roni. 17Agi apai re mi naruga roni kuti ni, oni kpí nyemu akuaroni akpi.
Ga zegino sogote
18“Ka aboro asoga roni asoga zegino, oni ini aina ya i aima soga re mbata i nikasoga roni. 19Ka oni du ni aboro zegino, ka aboro zegino nakpi nyemu gayo aboro; ono bambiko wa adu nga oni ni aboro zegino ya, mi asia roni asia zegino, si aboro zegino asoga roni ti ni. 20Oni tíngidi gu pai mi agumba fu roni ya, ‘Moyambu nakia nga susi bairani te.’ Si ngia i arungosi re arungosi, I arúngosi roni arungosi a; si ngia i aka kuti gi pai, i aká kuti gaoni a. 21Ono agi apai dunduko re i amánga ha ti roni mbiko rimore, bambiko i aina nga gu ko nakedi re te. 22Ka mi aye nga ki gumba pai fu yo ya, ka i adu nga na gbegberẽpai te; ono awere pai ngbayo tipa gayo gbegberẽpai wa sa te. 23Gu ni nasoga re ni nasoga Buba a. 24Ka mi amanga nga agu apai ku dagba yo yo aboro amanga nga ha wa sa ya, ya, ka i adu nga na gbegberẽpai te; awere i ta bi rani na Buba nisogo rani a. 25Ono mangi gere gu pai da ti rengo du ni keke he rogo gayo rugute yo, ya ‘I asogo re asoga zanga nduhe’. 26Ono ho Mounda ka ye ni, nga gu ko mi ka keda ko kono du oni ni yo du Buba ni, nga gu Toro nga irarengo, naye yo du Buba ni, ko nikadu ni dezirere. 27Oni nga adezirere a, bambiko ani aima diga niima na oni.
Atualmente selecionado:
Yoane 15: ZB1978
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
La Sainte Bible en Zande © Alliance Biblique Universelle, 1978.