Mateo 22
22
Hidi webote bidi fanebona
1Yeso mai‑ya kanawatobona mai‑ya hiyare,
2“Neme‑ke ai nafi‑ka hidi kitabote tohawahebona tamine dai watohi. Ai one mai‑ka hidi webote bidi fanebona, mai dami‑ya haanane, mai tafabonehe.
3Hika yo‑yose mai‑ya yose,
‘Mai oni tiawahi. Mai dai haanahi, marina‑ya mai kamabonehe.’ Hidi webote ati ne,
mai‑ya mai haana, mai ati a‑arira, mai kamaki awirani.
4Hika yo‑yose mai one‑ya yosemaki,
‘Mai dai haatonamatasahi. Oka bani mai wataka mai onahaba, ai tefe‑bone hawa tohini, mai kama kanibote niyahi.’ Hidi webote ati nane.
5Mai mai haahina yama tokomaki‑ya mai nofara, fadara‑ya mai one toka, yama‑ya da‑daa‑kaya mai one toka na, hidi webote bidi marine‑ya mai ati toki nofarani.
6Mai mai haahina, mai one hama, hidi webote‑ka yo‑yose mai one‑ya mai bisi, mai one‑ya mai nanahaba, mai nineni.
7Mai tamine‑ya hidi webote mite, yawawahe, sodado mai‑ya yose, mai‑ya mai nanahaba, mai tabori‑ya mai sarikanamakeni.
8Hika yo‑yose mai one‑ya yosemakitase,
‘Hibati‑ya mai haa·ona mai ati kasirani.
9Bara mai‑ya dai haanahi, mai nafi. Tabora nafi‑ya dai tokiya, mai dai haanahi.’ Hidi webote ati nane.
10Mai toka, mai nafi‑ya mai haana, mai ati kasira mai‑ya mai haa, mai ati amosa mai‑ya mai haa na, hidi webote tabaro kibawahane.
11Mai‑ka hidi webote mai‑ya kiine, maki ohari bora amosara‑ya sakone‑ya awane.
12 # 22:12 Bora amosa ai ene amosa tamine amani. Yeso ati ai nofa, bora amosa ai sakona‑nima ai teni. ‘Hini yamata‑bone bora amosa‑ya sakotini awiriti?’ Hidi webote ati ne,
maki ati yanarene.
13Hidi webote hika yo‑yose mai‑ya yose,
‘Yehe, teme ne, dai sokikaseya, dai korotowitiho, yama soki‑kaya mai ohinabone, mai kome kitaboneni.’ Hidi webote ati nane.
14Mai nafi‑ya Deoso haane, mai fa‑famaraba na mai‑ya Deoso kadikebonane.” Yeso ati nemarine.
Hidi webote‑ka yinero
15Fariseo mai toka, mai ibi hiyara,
“Ai ati ene Yeso ati tosawariba awane.” Mai ati namaroni.
16Mai‑ka mai da‑daba mai‑ya mai yose, i‑di Erodi‑ka mai one mai‑ya mai yose, Yeso‑ya mai hiyara,
“Ayo, keyehe hirititerani. Deoso ati tikamine amosatene. Webote mai‑ya tinayofinara, fara yokana tikaminateni.
17Tiwati oda mitabone, ai‑ka yinero‑ya Sesa haaneya, yinero ai daanibaraniha?” Mai ati namaroni.
18Mai atibodi ati amosara‑ya Yeso wato,
“Towe dai amani. Owa‑ya dai watabone dai ati amani.
19Sesa‑ka yinero‑bona oaweba, dai namoho.” Ati ne,
barata wamani‑ya mai daanamamaroni.
20“Yinero bako dai awahi. Ebeni‑ke korimari amanati, oni tohaneri?” Yeso ati ne,
21“I‑di Sesa korimari, oni ne, yinero bako‑ya waane.” Mai ati namaroni.
“Sesa‑ka yama‑ya Sesa‑ya dai daatonama, Deoso‑ka yama‑ya Deoso‑ya dai daatonamahari, dai nahi.” Yeso ati nemarine.
22Yeso ati‑ya mai mita,
“Ka! Yeso yama‑ya watone.” Mai atibodi ati na, mai yamatonamaroni.
Ai kitamabone
23Sadoseo mai one kamakemaroni, Yeso ati‑ya mai mitabonehe.
“Ai aba ai kitamaterani.” Sadoseo mai ati teni.
Mai kobona, Yeso‑ya mai hiyara,
24“Yeso, tiwati oda mitaboneni. Hibati‑ya i‑di Mose ati‑mata timitahi,
‘Ayo abeya, fadi hasina, bidi, bide mai na, mai wadara, anidi fadi‑ya famawahayaho. Bidi toheya, anidi abemari oni‑ya bidi weyenayaho.’ Mose‑ka yama hani ati nineni.
25Ai owa‑ka soho mai 6 kana, fane, kahiware, abe, fadi‑ya sohori famawahemarine.
26Sohori kahiware, abamakitasemarine. Anidi fadi‑ya mai nafi kayafa, mai nafi abamaroni.
27Mai nafi aba, mai‑ka yibote abamakemaroni.
28Yeso, oda ati timitahi. Mai nafi‑ka yibote tohamaro, mai kitamiya, ebeni‑ke fadi tohawahibati?” Sadoseo mai ati namaroni.
29Yeso mai‑ya hiyare,
“Deoso‑ka yama hani dai watorihi, Deoso ene dai watorihi, dai na, dai tosawarineni.
30Mai aba Deoso ati ene mai kitamiya, neme‑ya mai winiya, mai fanamateraboneni. Deoso‑ka yo‑yose mai‑nima mai naboneni.
31‘Ai aba, ai kitamateraboneni.’ Dai ati na,
Deoso‑ka yama hani ati dai mitahi.
32‘I‑di Abaraho, i‑di Isaki, i‑di Yako mai na, mai‑ka Deoso ama·oni.’ Deoso ati nematamonane.
Hibati‑ya mai abametemoneni. Mai wadamara mai‑ka Deoso tohaterene. Mai hasinibisa mai‑ka Deoso amane.” Yeso ati nemarine.
33Mai dama Yeso ati‑ya mai mita,
“Ka! Yeso yama‑ya watone.” Mai atibodi ati namaroni.
Deoso ati kitabote
34Yeso ati ene sadoseo mai ati fawana, mai tamine‑ya fariseo mai mita, mai yorotokanamaroni.
35Mai‑ka owa Mose‑ka yama hani ati‑ya ka‑kanawato sawi,
“Owati ihi Yeso ati tosawaribonane.” Atibodi ati nemarine.
Yeso‑ya haane,
36“Naki, yama hani ati kote amosabote tikaminahi.” Fariseo owa ati nemarine.
37“‘Ai‑ka hidi webote i‑di Deoso dai nofi nafiyahi. Yama one dai nofi nafiriyahi. Deoso‑ta dai nokotonibisahi.’ Yama hani ati na,
38ati amosabote amani.
39‘Hini tiwa‑ya tinofi‑nima dai yakari‑ya mai sawe mai tinofiyahi.’ Yama hani ati na, ati amosabotehari amani.
40Ati amosabote fama, ati‑ya mai tokadabiya, Mose‑ka yama hani ati nafi‑ya mai tokadaba, Deoso ati‑ya mai mi‑mita‑mete mai‑ka yama hani ati nafi‑ya mai tokadabahari, mai teni.” Yeso ati nemarine.
Ebeni‑ke‑ka nodi i‑di Kirisito toha
41Fariseo mai yorotokana, mai‑ya Yeso hiyare,
42 # 22:42 “Deoso‑ka Ka‑kadika ai owa tohe, Deoso Bidi tohi awire.” Fariseo mai atibodi ati na, mai tosawarineni. Deoso‑ka Ka‑kadika ai owa toha, Deoso Bidi tohahari nane. “Dai ati omitaboneni. Ebeni‑ke‑ka nodi Deoso‑ka Ka‑kadika amanati?” Yeso ati ne,
“Dafi‑ka nodi amane.” Mai ati namaroni.
43-44“Deoso‑ka Ka‑kadika tamine‑ya i‑di Dafi kanahano, ati dai mitahi.
‘Oka hidi webote‑ya Deoso hiyare,
—Owa mano kanika‑ya tiwitarihi. Owati ihi tiwa‑ya mai ka‑kako mai‑ka hidi tihawahaboneni.—’
Deoso‑ka Ka‑kadika tamine‑ya Dafi atibodi‑ya Deoso‑ka Doni kamine, yama hani‑ya Dafi kanahanomatamonane.” Yeso ati nemarine.
45Yeso ati yananamatase,
“Deoso‑ka Ka‑kadika i‑di Dafi‑ka hidi webote tohemona i‑di Dafi ati nematamonane. Fare Dafi‑ka nodi tohe, i‑di Dafi‑ka hidi webote tohahari ne.” Yeso ati nemarine.
46Yeso ati‑ya mai mita, mai ati yanani awira, Yeso‑ya mai nafi nayofina, mai ati fawanamaroni.
Atualmente selecionado:
Mateo 22: jaaNT
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão