Mavanga 1
1
Kotili muhanda
1Ngeele Tehofile, mu buuku la me la tsomi, me atsonihi moosi ma Yisu habandihi uvanga na ulongese, 2nate mu ilumbu hi nde havati hu yulu. Tswamina Yisu mu uvata hu yulu, nde asooli bilumbi na aviidi byo tumili mu matwala ma Livupu la Ngidi.
3Humbisa umono pasi yi lipfu, Yisu ayamonehele huli baatu mobaana, na umwese bo mu bilimbu bi bilahi, ti mbuli nde monyi ali. Nde ayamonehele huli bo, mu maku mana ma bilumbu. Mu tangu moyina, nde ayabisi bo mambu ma Ipfumu hya Nzambi.
4Ilumbu imosi hi Yisu hakadya mu itwadi na bilumbi, nde aviidi bo tumili moyiniyi: «A lipala mu Yeruselemi ve, ka keelaani nde wuuna wu Taata hasiidi lahi. Ni nde wuuna wu me anzaabisi benu. 5Yowani atondihi baatu mu mamba, ka mu bilumbu hole, Nzambi utondehe benu mu Livupu la Ngidi.»
Yisu avati hu yulu
6Ba baakukimi ŋa pedu a Yisu, baafuuli nde: «Pfumu, ni mu tangu moyiniyi we ufutala ipfumu hya Isereli?» 7Yisu afutili bo: «A huli dyambu la benu mu uyaba, ki matangu na matsuhu ma Taata hakese mu lituma la nde mwakulu ve. 8Ka benu lu uyaka matwala, bu Livupu la Ngidi lukulamana ŋa yulu a benu. Benu lu uba bambangi ba me mu Yeruselemi, mu itanzi hya Yuda hyosi na hya Samariya, nate hu hwasuka toto.»
9Bu hamani uleele mambu momaana, Yisu avati hu yulu. Bu bilumbi byosi byakatala nde, yidu laabiti nde. 10Bu bo baakatala hu yulu hu Yisu hakayene, baatu boole ba baaba baalwata bikutu bi bifuka, baayamonehele ŋa busu bwa bo. 11Baatu mobaana baaleeli bo: «Benu bisu Ngalili, hima benu lamiiteleme ŋa, mu ubaatala hu yulu? Yisu mowunuwu, wu Nzambi amiimasa ŋa hati la benu mu ubita hu yulu, uyafutaha we bu benu limoni nde mu uyene.»
Matyasi miikisana Yuda
12Bilumbi byafutihi hu Yeruselemi mu umata hu isyelo hya Olive. Isyelo mohiina hyaba bebele na musyenge a Yeruselemi, mu itsudu hya ngunga mosi mu dwe la miilu. 13Bu bo baatodi hu musyenge a Yeruselemi, bo baavati hu itini hi ibanga hya yulu hu bo baaba na ipfu hi upfutana. Ŋa hati la bo aba Peetelo na Yowani, Yaki na Andele, Filipo na Tomaasi, Batolomayi na Mataayi, Yaki mwana a Alafe, Simoni wu aba mu kabu li «bazeloti#1.13 Bazeloti: aba kabu la baatu ba baakalwanisa bisu Looma mu usaha bunyanga bwa Isereli.» na Yuda mwana Yaki. 14Boosi mu matsimi mamosi, baakapfutana tangu yoosi mu usambila Nzambi. Itwadi na bakaasu bakima, Mariya ngu a Yisu, na baana ba ngu a Yisu.
15Mu bilumbu mobiina, banga hiitu baapfutini. Bo aba bebele a kama na maku moole (120). Peetelo atelimi ŋa hati la bo, na aleeli: 16«Baana ba ngu a me, hwafwana ti mambu ma Livupu la Ngidi laayabisa mu bisono mu munywa a Davidi, matswiha. Mu toni a Yuda wu alahi nzila huli ba baayakanga Yisu. 17Yuda aba mumosi ŋa hati la bisu a benu, na nde akasala itwadi na bisu. 18Mu mbongo yi baaviidi mu pfuta lisumu la Yuda, baasumbili nde ngundu. Ni hutso a ngundu moyiina, nde habwidi mutswe mu toto, monyi a nde atubihi na bihati bya nde byosi byasudimi. 19Bisu Yeruselemi boosi baayuhi musamu mowuna. Ni mu buuna, ngundu moyiina baaviidi yo nduhi mu ndaha a bo: “Akelidama”, mbindulili ti: “ngundu makila”. 20Buuna baasonehe mu Mikuunga mya Davidi:
“Nyaha nzo a nde babungasana yo,
na tso muutu mumosi a hatsahala mu yo ve!”
Na baabwesonehe:
“Muutu mukima akiisana ŋa isalu hya nde#Mkg 69.26; 109.8.”
21Laafwana mu usoolo muutu mumosi ŋa hati la ba baakayavehese bisu a benu, mu tangu yoosi yi Pfumu Yisu hakadyenge na bisu a benu. 22Muutu mowuna abeedi ŋana, umata tangu yi Yowani hakatondehe, nate bu Yisu havati hu yulu. Hwafwana ti mumosi ŋa hati la baatu mobaana, aba mbangi a bisu mu tsuhili a Yisu mu babaakwa.»
23Baatelimisi baatu boole. Muutu wa tsomi Yosefi, wu bubaateele Barasabasi. Kumbu a nde kima Yusetusi. Muutu wa boole, wu bubaateele Matyasi. 24Baasambili bunuubu: «Pfumu, we ni wu yabi mitima mya boosi. Mwese bisu, na we sooli ŋa hati la baboole baniiba, 25mana nde asala isalu hi bulumbi ŋa ikiisa hya Yuda. Nde wuuna wu atimbi isalu hya nde, mu uyene hu mbuha yi yafwana na nde.» 26Bo baatidi ngodo, na baasooli muutu wa boole Matyasi, wu baabwesi ŋa hati la kumi na ilumbi imosi.
Atualmente selecionado:
Mavanga 1: TSA
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© (Active), Wycliffe Bible Translators, Inc. All rights reserved.