Génesis 3
3
So Adán chaqai aso Eva se na'xaỹaxanta ñi qota'olec
1Qam so nanaic paguec co'ỹaxaraic quená'ogue na liỹa iseripi neuec quená'maq lo'ueenatec ñi qara'gaxala' qota'olec. Ca inato' aso 'aalo:
—¿Peeta'a llic quiyim ñi qota'olec se ỹasenema qamiri quiyim a'guii ana la ana qo'paq quena lanaxanqa'?
2Ca' aso 'aalo 'naaco':
—Qomi' seshitaq sa'guinaq ana la acanchaqaca cana qo'paq. 3Qam aca la ada qo'paq neetañigui na lavinñi na nanaxanqa', 'naac ñi qota'olec quiyim se sa'guinaq chaqai se seconaxagui aca la dajo qo'paq. Ma' no'm shinqa'tegue dajo, ca' qareleu.
4Qam so nanaic 'naaco' caso 'aalo:
—La'maachic. Se rillivii. 5Ma' ñi qota'olec ỹaatqajam ỹa'deenta quiyim ma' 'guii ana la ada qo'paq, ca' 'yiiñii ma'le ca lo'yaxanec chaqai ca se no'uen. Ca ma'le, ca 'ñiitari' ñí'maq qota'olec.
6Ca' aso 'aalo iuana quiyim aso qo'paq chalego loyac. Ca 'uo' da lishoxo quiyim ỹa'ic, qaiyi 'ue ca la'deenec. Ca' naqato' na'le aso la, ca' ỹa'ic, ca' ỹaanem qai'neeta so loua. Ca so'maxare ỹa'ic. 7Ca co'na'le, ca' naviguerec naua nqote' saua'maxare. Ca saua'que ỹa'deene' quiyim neesauec. Co'na'le, ca neuajta' ana laue ana qo'paq leenaxat higo, ca ỹo'ueete' saua lo'laate'.
8Ca' so ỹale chaqai aso loua 'xairaque ñi qara'gaxala' qota'olec ỹouoxontac yi lanaxanqa' hueetaugui so nonot 'oom queso avit. Ca' saua'maxare nqañoxoterapeguem, tarougui yi qo'paxasat quiyi nanaxanqa'. 9Qam ñi qara'gaxala' qota'olec roỹaxana so ỹale. Ca' inato':
—¿Negue' ca vi'sa'gue?
10Ca' so ỹale 'naaco':
—Sa'xaỹaque qami' quiyim huoxoñi'sac na nanaxanqa'. Qam yo'chi, ma' sentauec. Ca vichiguiño' ñqañoxojñi.
11Co'na'le, ca' qainato' quiñi qota'olec:
—¿Nega'ỹo' cá'maq 'naapega qami' quiyim ñi'sauec? ¿Peeta'a 'qui' aca la ada qo'paq dá'maq shinac quiyim sqa 'qui'?
12Ca' so ỹale 'naaco':
—Adá'maq 'aalo nañaañi' quiyim ñauegaxaua nañaañim ca la, ca' ỹim sa'ic.
13Co'na'le, ca' ñi qara'gaxala' qota'olec inato' aso 'aalo:
—¿Chi'neco' ma' 'viichi' dajo?
Ca' aso'maxare 'naaco':
—So nanaic só'maq yayin, ca' sa'ic aca la ada qo'paq.
14Co'na'le, ca' ñi qara'gaxala' qota'olec 'naaco' queso nanaic:
—Qami' ma' 'viichi'o' dajo, ca' se no'uen da qayicyaxaqui', mesqai 'ñiite' ná'ogue na liỹa iseripi. Nagui, ca chicqochi'ñi quiyim nqai'qui'segueri', chaqai 'qui'sac na lamoxoỹaxa na 'laua. 15Ca' nagui so'uet quiyim qami' chaqai ada 'aalo qamiri pa'guenaxaua', ca 'nejem ca qachaalaxai'pi chaqai ca llaalqaipi ada'maxare. Ca llaalqaipi ada'maxare co'vigui na rqahiqui', chaqai qami' a'quirigui ana la'ỹaaxa.
16Chaqai 'naaco' caso 'aalo:
—Ñoquiigaxatec nagui da re'xoriqui' ma' ỹovita quiyim 'ue ca qachaalqui', chaqai ỹaatqajam 'xoic da nqui'ic ma' co'i'. Qam qami' pacqajñirauec da roua'e' chaqai da'maxare ỹoiquentac aqami'.
17Chaqai 'naaco' quesó'maq ỹale:
—Sauaxat ma' na'xaỹaxañiteto' ada roua'e' co'na' 'qui' aca la ada qo'paq dá'maq shinac quiyim sqa 'qui', ca nagui na 'laua huaalec na se no'uen sauaxat qami'. Ỹaatqajam 'ue da na'ñaaqataxaqui' quiyim 'ueenataxañi', ca' qaigueme 'ue ca qanoqe' quenaua'que naua na'xata' queda nachaalataxaqui'. 18Na 'laua ma'le ñaxajlec ná'ogue ana ỹoreta'oguit le chaqai ana cotague. Ca 'qui' ma'le ana la ana qo'paq 'oochise. 19Ỹaatqajam nenoqoichiriñi 'ueenataxañi'sac, ca' qaigueme naviqui' ca qanoqe', chi ỹovireta'a ma' pillirougui na 'laua ná'maq chicqoiraugui na' qaro'viichi'. Ma' qami' 'laua na'le, ca' ñigui 'laua qami' ma'le.
20So ỹale leenaxato' Eva nqai'en aso loua, ma' so'maxare chaqaso asó'maq late'e ná'ogue na 'ue da nachaalataxac. 21Ca' ñi qara'gaxala' qota'olec ỹo'ueeto'o' saua loho, ỹachigoxoterauguilo na isecỹac loshicmaxa, qaiyi so ỹale chaqai aso loua ỹañiñi. 22Ca 'naaco': Ca' nagui da ỹale 'nejme' qomi', ma' ỹa'den ca lo'yaxanec chaqai ca se no'uen. Qaiyi se naqat na la ada qo'paq chicqaugui da nca'laxa, ca ỹa'ic, ca' sqaica lqodoc da nachaalataxac.
23Ca' vichiguiño' ñi qara'gaxala' qota'olec naqata'a so ỹale, ca'e nqai'en yi nanaxanqa' huaugui yi 'laua leenaxat Edén. Ca' ỹo'uet nqai'en na 'laua ná'maq chicqaugui na'le so'maxare co'na' qaỹo'uet. 24Ca co'na' ime naqata'a so ỹale, ca pa'xanda'gue da lqodoigue quiyi nanaxanqa' saua lelaatqa piguim lase', chaqai so lecat ỹaviquetaugui yá'ogue ỹaqaletentac, qaiyi qaica ỹovira'a adá'maq qo'paq chicqaugui da nca'laxa.
Atualmente selecionado:
Génesis 3: MCV91
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.