Génesis 4
4
So Caín ỹalauat so lqaỹa Abel
1Ca' so ỹale mashic viguit aso loua Eva, ca 'man aso'maxare, ca 'uo' so llaalec Caín. Ca 'naaco':
—Mashic 'ue ñi ỹaalec ỹale; nañaañim ñi qara'gaxala'.
2Ime, ca' lotqai 'ue so liỹa llaalec leenaxat Abel, lqaỹa so Caín. So Abel ỹalamqajlec quiyim neloxoỹaq cana qagreta, chaqai so Caín ỹalamqajlec da lo'ueenataxanaxac danaxantac, ỹanteguelec na 'laua.
3Ca mashic 'vio' saua ñaxari, ca 'uo' so na'xa'a so Caín ỹodouo' aso lachitaxanataxanqate quiñi qara'gaxala', ỹachigoxotaugui na laỹaxac da lo'ueenataxanaxac. 4Chaqai so Abel qai'neeta ỹodou'a ñi qara'gaxala' so 'auaxai chaqai paguec loyac quena llaalec so qagretaipi. Ca' ñi qara'gaxala' nqo'te'ta so Abel chaqai asó'maq ỹavigaxat lachitaxanataxanqate. 5Qam sqai 'ne'tegue dajo na' ra'ỹa'a so Caín chaqai aso lachitaxanataxanqate. Co'na'le, ca' ỹaatqajam ro'o so Caín, ca' ỹoqa'a na lashic. 6Co'na'le, ca 'naaco' ñi qara'gaxala' queso'maxare: ¿Chi'negue ma' 'ohi' chaqai ỹoqa'a na qashiiqui'? 7Quetqai 'viichi'saco' ca ỹa'maqachiguiñi, ca' nedaañichirishiguim quet. Qam ma' sqai 'viichi', ca yí'maq rasauaxashichi' nauaantaque cá'maq la'maqa' quiyim qami' loxonec. Qam qami' quet ná'maq qadoxonqui' quet da'maxare.
8Ca 'uo' so na'xa'a, ca' so Caín ỹauec so lqaỹa quiyim ỹouoỹa'pe. Ca co'na' mashic hueesalec yi no'ueenaxa, ca' so Caín i'guentalec so lqaỹa Abel, ca' ỹalauat. 9Co'na'le, ca ñi qara'gaxala' inato' so Caín, 'naaco':
—¿Negue' ca hueeta'gue ca rqaỹa'e' Abel?
Ca' so Caín 'naaco':
—'Taque', se sa'den. ¿Qa' ỹim quet neloxoỹaq queca'maxare?
10Qam ñi qara'gaxala' 'naaco' queso'maxare:
—¿Chi'neco' ma' 'viichi'o' dajo? Na leuoripi ca rqaỹa'e' coraxachira'pe na'le quena 'laua ỹaualqaso'ot aỹim, ỹahosaque quiyim seuejlgoto. 11Vichiguiño' nagui, ca' se no'uen da qayicyaxaqui', chaqai qaro'yirauec quenajo 'laua ỹaqane'o' na'le caua leuo' ca rqaỹa'e' cá'maq lauachi'o' na'le. 12Ca 'eno'm 'viichi'sac na 'laua, qam tot qaca ma'le aca la. Ca chaqai huoxoñi'sac ma'le ana 'laua qaica ca ra'aachi', chaqai qaica ma' shichi' quet quiyim nco'machirec.
13Ca co'na'le, ca' so Caín 'naaco' quiñi qara'gaxala':
—Ỹim ỹaatqajam se yalo'guit dá'maq chalego lecaic ỹouaxanaxaset. 14Nagui, ca' yo'yirauec quenajo seuetalec 'laua, ca chaqa shiqueteguelec na 'laua qaica ca ỹa'a', qoỹoqo'ta qami' caỹim, sqaica ca ñco'matqa'. Ca' canchaqaica iuanejlec aỹim, ca' yalauat ma'le.
15Qam ñi qara'gaxala' 'naaco' queso'maxare:
—No'm 'ue ca ralauachi', ca' siete qaỹopilaxatalec ca nouaxanaxaset.
Co'na'le, ca ñi qara'gaxala' ỹo'uet aso netanaxasete so Caín, qaiyi no'm qaiuanejlec, qam se qaỹalauat. 16Ca' so Caín eeco', ca'e yí'maq hua'ño' na' retaqata'pegue' ñi qara'gaxala'. Ca naalco' yi 'laua leenaxat la'a' na se ỹo'viijñi. Yi'maxare pa'a'gue da lqodoigue quiyi Edén.
So llaalqaipi so Caín
17Ca' so Caín co'na' viguit aso loua, ca aso'maxare 'mano', ca ne'qaaño' so llaalec Enoc. Ca co'na' ime, ca' so Caín no'xonshiguimo' so 'imqaipi, ca leenaxato' nqai'en Enoc, leenqashaxaua so llaalec. 18So Enoc chaqaiso so leta'a so Irad, ca' so Irad chaqaiso so leta'a so Mehujael, ca' so Mehujael chaqaiso so leta'a so Metusael. Ca' so Metusael chaqaiso so leta'a so Lamec. 19Ca' so Lamec dos saua loua': 'óna aso leenaxat Ada, chaqai aso liỹa leenaxat Zila. 20Ca co'na' co'o aso Ada, ca 'uo' so llaalec leenaxat Jabal. Ca chaqaiso' só'maq leta'a na neraugui naua na'derañi 'imqa, chaqai lalo ana huaca. 21Ca' so Jabal 'uo' so llaalec leenaxat Jubal. Ca' chaqaiso só'maq leta'a na niviigue lo'ollipi chaqai ana npe'te. 22Qam co'o' aso Zila, ca 'uo' so llaalec, ca leenaxat Tubal-caín. Ca so'maxare lecat lahi lo'o. Ca' ỹo'ueetetac na bronce chaqai na fierro. Ca' so Tubal-caín 'uo' aso lqaỹa leenaxato' Naama.
23Ca 'uo' so na'xa'a, ca 'naaco' so Lamec quesaua loua' Ada chaqai aso Zila:
Ỹaatqajam na'xaỹaxañii'ta dá'maq shinac caqamiri:
salauat so 'óna qom sauaxat ycoñirqachit,
chaqai salauat so ne'necoqui' ma' youaxan.
24No'm so Caín ỹovi' siete qaỹo'uet da lovi',
ca' aỹim ỹovi' setenta y siete quiyim qaỹa'ue ca ỹovi'.
So dalaxaic llaalec so Adán chaqai aso Eva
25Ca' so Adán lotqai liỹa viguit aso loua, ca aso'maxare 'uo' so llaalec. Ca leenaxato' nqai'en Set, ma' 'naaco': Ñi qota'olec nañan ñi liỹa ỹaalec, ñigui nqai'en so Abel só'maq ỹalauat na'le so Caín.
26Ca' so Set 'uo' qai'neeta so llaalec, ca leenaxato' nqai'en Enós. Ca' queco'na'le, ca' na qomyipi imaqachintac da leenaxat ñi qara'gaxala' qota'olec.
Atualmente selecionado:
Génesis 4: MCV91
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.