Lóka 10
10
Teka á ɓateki nkama ngianjaga iɓɛ na ɓaɓɛ (72)
1Mbusa índɔ, Mɔkɔta áɔ̌sɔmbɔa ɓakpa ɓunɛngbo nkama ngianjaga iɓɛ na ɓaɓɛ (72), áǒteka ɓaɓɛ-ɓaɓɛ mosá akɛ ka nji na ka ntanga-nji bui nde yɛ sasakɛ ɗáogea ágɛ kau. 2Aǒngoɗea: «Cɔ, ɗúngú aásii, ɓato á ɗungu ɓá gǎkɛ ɓábɔa. Kaɓondɔ, mɛmani mokô á ɗungu áetekɛ ɓato á ɗungua ɓásii ka ɗungua í. 3Cɔ, gǎni! Nenóteki ɓea ɓaniki á ɓamɔgɔgɔ ka nkíndí á ɓangbee. 4Ɓókóbɛɗɛmbɛ imɔna, maiɓɔta na ɓiato. Ɓókóɓungisɛmbɛ mbenɔ ka seseaga ɓakpa.
5Aoɓá na ɓongí k'éndu, geani phɔ́: ‹Ɓujɛjɛ áɓɛ k'éndu ndee.› 6Aoɓá nto á ɓujɛjɛ n'aɓei, nsesɔ á ɓujɛjɛ nɛnu áɔngɔna. A gǎkɛ oɓá na nna ɓó, ɓujɛjɛ áonójiia. 7Ikani k'éndu ndɔɔ. Eani, noani kema bui nde ɓánophi. Nga, mbɛɗanigi akeni n'ophendɔ nɛkɛ#Ɔna Mat 10.10; 1 Ɓkt 9.14; 1 Tim 5.18. Ɓókotoɛgɛmbɛ gǎkɛ endu k'éndu.
8Mbenɔ nde ɓoongia ka ntanga-nji moci na ɓánosesi, eani eea nde ɓáonópha. 9Óamisani phɔtɔ ɓasambi á ka nji ndɔ na ngoɗea ɓɔ te: ‹Koɓoamɛ ndea Mokonga a ye tɔ bíbí anu.›
10A gǎkɛ oɓá na ɓongí ka ntanga-nji moci na ɓákánosesi, tókani ɓei ɓɔ́yɔngɛ ɓe: 11‹Ɓenócicii mpusu á oɗo bui á ka ntanga-nji nɛnu nnde asóɗakati k'écinji#Ɔna Mkɔ 6.11. Úbani gǎkɛ gea, koɓoamɛ ndea Mokonga a ye tɔ bíbí.› 12Nenógie, esa á tena á nyɔngɔ, ɓato á ka ntanga-nji ndɔ ɓátambagaeka phɛɛ kɔ̌nyɛ́nya ɓato á ka Sɔdɔ́ma#Ɔna Nkp 19.24-28.»
Ntanga-nji ɗanga-ɗanga nde ɓakpa ɓáyé ɓeekea Yéso
(Ɔna phɔtɔ Mat 11.20-24)
13Yéso ɗági phɔtɔ: «Hoo! Ngomi anu ɓato á ka Koajíni. Hoo! Ngomi anu ɓato á ka Bɛtɛsaída nga, atú oɓá ɓato á ka Tílɔ na Sidɔ́na ɗáɓáɔni ketangaɔ nde ageani mɔtɛ-anu, ámbé ɗáɓáiki k'ebǔ na ɔ́la bɔngɔ á kekusa ka mbenɔ éndǎ.#Ɔna Mat 11.21 14Esa á tena á nyɔngɔ, ɓotambagande phɛɛ kɔ̌nyɛ́nya ɓato á ka Tílɔ na Sidɔ́na. 15Na ɓenu ɓato á ka Kapɛɛnaúmu, ɓookanisia te, Mokonga anótáisande na koba? Anódidisande ndiu ka nji á ɓasí#Ɔna Isa 14.13-15.»
16Wa, Yéso áǒngoɗea ɓagoigi nɛkɛ: «Nkpa nde aɔnɔɔ́ka, amɔɔ́ki phɔtɔ. Mmbé anóyé gǎkɛ, amoyé. Mmbé amoyé, an'yé ndiu mmbé amoteki.»
17Mbusa á tamba nɛɓɔ, ɓateki ndɔ nkama ngianjaga iɓɛ na ɓaɓɛ (72), ɓáoja na ɓátúmi na maseye phɛɛ, ɓáogea: «Mɔkɔta, ɓansombo ɗáɓátú phɔtɔ ɔsɔ́ɔ́ka k'ína akɔ.» 18Mpɔ, Yéso áǒgea: «Ɗɛ́mɔni Sɛtáni n'agú ka toka na koba ɓea phenua á mbua. 19Ɔ́kani phɔ́! Ɗénóphi kɔkɔta á ɗɛtɛa á ɓanjɔka, ɓankoto na ɓukpɛkpɛ bubui á mɓiɓia-Nketi. Ka kema ájeɗe kánogeɛku. 20Ɓî aɓó, ɓókóɓɛmbɛ na maseye ka nyɔngɔ á ɓeaga á ɓansombo. Ɓáni ndiu na maseye ka nyɔngɔ nde ɓáɗundu ina anu na koba.»
Maseye ndea Yéso
(Ɔna phɔtɔ Mat 11.25-27; 13.16-17)
21Ka mbenɔ ndɔ tɔ, Yéso áotúma na maseye ka ɓukpɛkpɛ á Měma á kanga ɓojeɗe. Áɔmɛma ɓe: «Hoo! Abɛ, Mɔkɔta á ka mokonda na koba, neosikisíí ɓosegi nga, ɔsɔ̌mi moangɔ nɛkɔ ka ɓaúbaphi na ɓato á kɔɓɔɔngɛ, ô ndiu obisa base ka ɓaniki ɓábɔbɔa. Eya, Abɛ! A ɓó nga, ɓondɔ unge ɗókondi.»
22Â phɔtɔ ogea: «Abɛ amopi kɔkɔta á kema bui. Nna na nkpa nde aomúba Miki mǒko#10.22 Wani Yéso aɔyɔnga ka phɔakɛ sasakɛ. tɔndɔ Abɛ. Nna na nkpa nde aomúba Abɛ#10.22 Wani Yéso aɔyɔnga ka phɔa Mokonga mmbé aonkumia Abakɛ., na nna tɔndɔ Miki mǒko, na mmbé Miki mǒko akondi phangia akɛ.»
23Mbusa, Yéso áǒpháia nci nde ɓagoigi nɛkɛ ɓáɔ, áǒngoɗea ɓɔ sasaɓɔ te: «Ɓosegi ka ɓakpa ɓɔbu ɓunde ɓáɔɔna nnde ɓɔɔni. 24Negie, ɓaɔtu-nyɔngɔ ndea Mokonga ɓásii na ɓaamɛ, ɗáɓátú na siki á ɔna á kema nde ɓɔɔni, ɓákáɔnɛ. Na ɔ́ka á kema nde ɓɔɔ́ki, ɓákáɔ́kɛ#Ɔna 1 Pɛ́t 1.10-12.»
Mɛní á Mosamalía anjánjá
25Mbusa, ngoisigi moci áomá, áokaɓa tombaga á Yéso, áomúsia: «Ngoisigi, négeɛ ɓo, néɓɛ na enda á mɛyɔ#Ɔna Ɓlw 18.5?» 26Yéso áonsikisia: «Cɔ, kema sina nde ɓáɗundu suɓi á ɓuku á ɛɔphi? Ekende ootanga suɓi í?» 27Nkpa ndɔ áonsikisia te: «Ónkondambɛ Mɔkɔta nɛkɔ Mokonga ka měma akɔ bui, ka enda akɔ bui, ka ɓukpɛkpɛ akɔ bui na ka kanisia akɔ bui. Nkonda phɔtɔ dakɔ ɓíndɔ ǒkondi sasakɔ#Ɔna Tɔl 6.5; Ɓlw 19.18.» 28Yéso áongoɗea: «Osikisi ɓoabi ánjá. Gea tɔ ɓó, mpɔ ôɓá na enda á mɛyɔ.»
29Ngoisigi-ɛɔphi â ndiu okaɓa úbisa gea músiɔ ndeakɛ a tɔ á ɗoni. Wa, â goto omúsia Yéso te: «Ani mmbé ande dani?»
30Mpɔ Yéso áonsikisia: «Nkpa moci ɗátóki na Yɛusalɛ́ma, áodida na Yɛíkɔ. Ɓî ɗáotamba, ɓakukuɓa ɓáondunga, ɓáomuta kema bui nde ɗátú ně, ɓáomɓinda, ɓáonɗeketa n'asóoɗɔɛa. Ɓáoga nɛɓɔ. 31Cɔ, ntoɓeigi-phɛ́a ɗáodida k'aphe ndɔɔ. Amɔni tɔ nkpa ndɔ, áomɓamboa. 32Moláwi moci â phɔtɔ ojua k'ɔ́ma ndɔɔ. Áɔmɔna, â goto tɔ omɓamboa.
33Ɓî Mosamalía ɗátú ɔnyɛ́nya k'aphe ndɔ, áojua bíbí akɛ. Áɔmɔna, â gǎkɛ onkuia ngomi phɛɛ. 34Wa, áɔnsɛkɛɗɛa, áonɗukia gamba na divai#10.34 Ka matú ndɔ gamba na divai ɗáɓáobɛnanɛaga ka dendemisa kokae á aphɛphɔa. Ɔna Isa 1.6 k'aphɛphɔa, áoɓóaga na phaeka á bɔngɔ. Mpɔ, áonkambisa ka mponda nɛkɛ, áonga ně k'éndu á ɓakɛni, áonsakoa kó. 35Mama í, áomphenda mɛna-endu na imɔna iɓɛ. Áongea: ‹Namba k'ani nkpa ndee. Kaɓɛ n'oɓúngisi imɔna nɛngbo gǔ índe, nekojisiande ka ja ani.›»
36Yéso áotútuisa yɔnga: «Cɔ, k'oɓɛ gǎkɛ, ka ɓakpa ɓasaɔ ndɔ, ani mmbé ande dakɛ na nkpa ndɔ ɓakukuɓa ɗáɓámɓindi?» 37Ngoisigi-ɛɔphi áonsikisia: «Mmbɔ ɗánkui ngomi.» Yéso áongoɗea: «Cɔ, gǎ! Ógeɛ phɔtɔ ɓó.»
Yéso mɔtɛ á Malía na Maatá
38Ɓî Yéso na ɓagoigi nɛkɛ ɗáɓátú otamba, ɓáojúa ka nji nde nke moci, ina akɛ Maatá ɗěsesi kau. 39Nke ndɔ ɗátú gǎkɛ na áwákɛ ina akɛ Malía. Malía áobika oika bíbí á Mɔkɔta, ka ɔ́ka á ɓɔphɛi#Ɔna Yoá 11.1; 12.1-3. 40Maatá ɗá gǎkɛ n'ekuma ásii phɛɛ á unanaga í. Kaɓondɔ, áombikia Yéso, áongoɗea: «Mɔkɔta, kó phɔ́ tanda oianaga ɓî áwáni amoɗeketei únanaga sasani? Cɔ, ngoɗea pɛ ámoengɛ.» 41Mɔkɔta áonsikisia: «Maatá! Maatá ca! Eke nde ootambaga ka kema ásii ně ɓende? 42Cɔ, nyɔngɔ moci tɔ unge ana kantíti. Nga kema nde Malía asɔmbu aánjá kɔnyɛ́nya kema bui. Nkpa nnaɔtɔka n'amuti ú.»
Atualmente selecionado:
Lóka 10: KMW
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc.