Lóka 11
11
Mɛmani Mokonga ɓe
(Ɔna phɔtɔ Mat 6.9-13; 7.7-11)
1Esa moci, Yéso ɗáɔmɛma Mokonga k'ɔ́ma moci. Ɓî agɔɓi ye, ka ɓagoigi moci áomúsia: «Mɔkɔta, ósogoisaga ɛmɛmi ɓíndɔ Yoáni-Mɓatisi ɗégoisigi ɓagoigi nɛkɛ.» 2Yéso áǒngoɗea: «Mbenɔ nde ɓɔɔmɛma, yɔngani ɓe:
Abɛ,
Ina akɔ áɓɛ n'obebɔ.
Koɓoamɛ nɛkɔ ábikɛ.
3Ósopha eea nde akeni ka ɓesu kesande.
4Íma ɓojeɗe nɛsu
nga, ɓesu sasasu ɓe phɔtɔ oíma ka ɓakpa ɓɔbu ɓojeɗe nde ɓasogǐí.
Kosóɗeketɛmbɛ ka mbenɔ á tombaga.»
5Â goto ǒngoɗea ɓe: «Aoɓá ka ɓenu n'ana dakɛ, n'agě ondonda k'ésa angɛndi dakɛ áongea: ‹Dani ɔ́mɔɛkisa phɔ́ ɓamokati ɓasaɔ 6nga, ka ɓadani moci amodondi, n'atóki tamba. Cɔ, ké na ka kema nde neomopha.› 7Aoɓá mmbɔ a suɓi éndu na ansikisíí te: ‹Kómoagatisɛmbɛ nga, kɛ̌kɛnde nephembeketi ye kǐo. Eme na ɓaniki nɛmɔ ɓěnanu. Ké ye ɔtɔka na němesi ka opha akɔ mokati.› 8Cɔ, nenógie, nanga kěmesi ka opha akɛ nga ande dakɛ, amophande tɔ kema bui nde ana siki í nga, anagatisi kángá á soni.
9Kaɓondɔ unge nenóngoɗi, mɛmani, ɓánophande. Káɓágani, ɓɔɔnande. Gbondoagani kǐo, ɓánoúkuiande. 10Nga, nkpa buakɛ mmbé aɔmɛma ɓámophande. Mmbé aokáɓaga, aɔnande. Mmbé aogbondoaga kǐo, ɓámúkuiande. 11Aba-miki sina sɔsɔɓɛ anu aɔtɔka n'amophi anakɛ njɔka n'ammɛmi ndiu sú#Ɔna Mat 7.9? 12Aɔmmɛma eke, amophande nkoto? 13Ɓenu gǎkɛ, nanga ɓî ɓonde ɓato ájeɗe, ɓo tɔ oúba gabea á ɓ'ananu kema ánjánja. Cɔ, Abanu mmbé á na koba, anɔ́nyɛ́nyi ɗoni k'égabɔ. Aeɓophande phɔtɔ Měma nɛkɛ á kanga ɓojeɗe ɓunde ɓáɔmmɛma.»
Yéso nnaɔɔngana na ɓansombo
(Ɔna phɔtɔ Mat 12.22-30; Mkɔ 3.22-27)
14Yéso ɗáǒjuanisa ɓansombo suɓi á kaúma. Ɓî ɓansombo ndɔ ɓájuani ye, kaúma ndɔ áokpanga yɔnga. Usɛsɛ á ɓakpa ɓáotangaaga phɛɛ. 15Ɓunɛngbo gǎkɛ, ɓáogea: «Yéso aǒjuanisa ɓansombo ka ɓukpɛkpɛ á Bɛljɛbúli#Ɔna Mat 10.25, mɔkɔta ndea ɓansombo.»
16Ɓunɛngbo ɓáontombaga ka kaɓa mphangiɔ ɓáúbɛ gea, Yéso atóki na koba ɗoni. 17Yéso aúbi ye kanisia nɛɓɔ, áǒgea te: «Aoɓá ɓato á ka koɓoamɛ moci na ɓákatanigi, koɓoamɛ ndɔ áoújukana, endu ndɔ áɔngbɔɔkana. 18Aoɓá Sɛtáni n'aǒmanisa sasakɛ, koɓoamɛ nɛkɛ amamande ɓo? Negi ɓó nga, ɓogi te neǒjuanisaga ɓansombo ka ɓukpɛkpɛ á Bɛljɛbúli. 19Aoɓá n'ande ɗoni gea te, neǒjuanisa ɓansombo ka ɓukpɛkpɛ á Bɛljɛbúli, cɔ, ani mmbé aéɓophi gǎkɛ ɓakpa nɛnu ɓukpɛkpɛ á juanisa á ɓansombo? Ka nyɔngɔ índɔ unge ɓakpa nɛnu ɓátenande nyɔngɔ nɛnu. 20Cɔ, eme gǎkɛ, ɓî neǒjuanisa ɓansombo ka ɓukpɛkpɛ á miki á njaga á Mokonga#Ɔna Jua 8.15, ande gea, koɓoamɛ ndea Mokonga anódondi.
21Mbenɔ nde nkpa akpɛkpɛ n'ana nkumba á emani aoamba endu nɛkɛ, ande gea te nkumba nɛkɛ aiki ka ɓujɛjɛ. 22A gǎkɛ oɓá nto á ɓukpɛkpɛ kɔnyɛ́nya yɛ n'ambiki í, áonkínda, áomuta nkumba á emani ndɔ yɛ abisíí měma, â phɔtɔ ogaba nkumba bui nde amutí.
23Nkpa buakɛ mmbé káɔngani n'eme, ande mɓiɓia ani. Mmbé nnaomoenga ka dondanisaga, aophanja.
Ɓansombo ɓánjíí goto nkpa
(Ɔna phɔtɔ Mat 12.43-45)
24Mbenɔ nde ɓansombo ɓáojuana ka nkpa, ɓáoga ka nkanda ka kaɓaga ɔma á ɓuiki. Ɓî ɓákáɔni, ɓáǒgea sasaɓɔ: ‹Cɔ, ɓejande mɔtɛ-asu suɓi éndu nɛsu nnde ɓetóki kau.› 25Ka ja aɓɔ, ɓáodonda endu na ɓáphǔ na ɓáɓɔngisi. 26Mpɔ, ɓáoga ɔ̌bɛɗa ɓadaɓɔ ɓansombo ɓundɔ ɓájeɗe kɔ̌nyɛ́nya ɓɔ mɔngɔ ngianjaga iɓɛ (7). Ɓâ ye tɔ oga oika wa. Mbusa í, nkpa ndɔ ɗátú na ɓansombo ndɔ, â ye tɔ oɓá ajeɗe phɛɛ kɔnyɛ́nya mosá.»
Maseye á ɗoni
27Mbenɔ nde Yéso ɗáɔyɔnga nyɔngɔ ndɔ, nke moci n'aka usɛsɛ, áongoɗea n'ɛsɔ akpɛ gea: «Maseye ka nke ndɔ ɗáɔɓɔkɔti na úngisa akɔ.» 28Yéso â gǎkɛ ǒsikisia gea: «Maseye a ndiu ka ɓundɔ ɓáɔɔ́ka nyɔngɔ á Mokonga na tɔtɔkisa í.»
Nyɔngɔ á kesande anyɛ́nyi nnde á kala
(Ɔna phɔtɔ Mat 12.38-42)
29Ɓî usɛsɛ á ɓakpa ɗáɓámɓombotaneigi, Yéso áǒgea: «Ɛɓɔkɔti ndea kesande aájeɗe. Ɓáokaɓa négeɛ ka ɓɔ ketangaɔ. Ɓáɔnande tɔ ketangaɔ moci, nnde akengeani n'índe á Yɔ́na. 30Nga, ɓî Yɔ́na ɗátú mphangiɔ á ketangaɔ ka ɓato á ka Nináwe#Ɔna Yɔ́n 3.3-5; Mat 12.41, ɓondɔ unge eme Muna-Nkpa neɓande k'ɛ́ɓɔkɔti ndea kesande. 31Esa á tena á nyɔngɔ, nke moamɛ ndea Sɛ́ba ɛ̌tɔngaeka ɓato á k'ɛ́ɓɔkɔti ndee, áotena nyɔngɔ nɛɓɔ akpɛ nga, ɗátóki ka nji á ɗanga phɛɛ kuɓî mokonda age osungiaga k'aphe á ɔ́ka á nyɔngɔ á kɔɓɔɔngɛ ndea moamɛ Sɔlɔmɔ́nɔ#Ɔna 1 Ɓam 10.1-10. Kɛ̌kɛnde gǎkɛ, nyɔngɔ á kesande anyɛ́nyi nnde á Sɔlɔmɔ́nɔ. 32Esa á tena á nyɔngɔ, ɓato á ka Nináwe ɓɛ́tɔngaeka ɓato á k'ɛ́ɓɔkɔti ndee. Ɓáotena nyɔngɔ nɛɓɔ akpɛ nga, ɗáɓákěti tambea aɓɔ ɓî ɗáɓáɔ́ki ɓɔphɛi ndea Yɔ́na#Ɔna Yɔ́n 3.5,8,10. Kɛ̌kɛnde gǎkɛ, nyɔngɔ á kesande anyɛ́nyi nnde á Yɔ́na.»
Iso ande ɔbɛa á ka nyama á nkpa
(Ɔna phɔtɔ Mat 5.15; 6.22-23)
33«Nna na nkpa nde aotoɓoa ɔbɛa ka sɔmɛa í, kaɓɛ ka gbukumia í na mbeka#Ɔna Mat 5.15; Mkɔ 4.21. Ɓá ndiu ɔbɛɛngisa ka ngeɔ ka gea te, ɓunde ɓáongia ɓáɔnɛ bɛnya í. 34Iso akɔ ande ɔbɛa á ka nyama akɔ. Aoɓá iso akɔ na ánjá, nyama akɔ bui áɔbɛnya. A gǎkɛ oɓá n'íso akɔ na ájeɗe, nyama akɔ áoɓá ka kaiphiɔ. 35Ɓî a ɓó, ɛ́ngɛpha ka gea, bɛnya nde a suɓi akɔ kěketiɛmbɛ ka kaiphiɔ. 36Aoɓá nyama akɔ bui n'aɔbɛnya, na kau nna ka kaiphiɔ, aɓande na bɛnya ɓea ɓî ɔbɛa aokojegisia bɛnya í.»
Kitɔngi ka Ɓaphaisáyɔ na ɓaɗundu-ɛɔphi
(Ɔna phɔtɔ Mat 23.1-36; Mkɔ 12.38-40)
37Ɓî Yéso ɗágɔɓi yɔnga, Mophaisáyɔ moci áɔmɔphanea eea mɔtɛ-akɛ. Wa, Yéso áongia, áoika ka mɛja. 38Mophaisáyɔ ndɔ, ɓî ɗáɔni gea, Yéso ɗákásokosi njaga mosá á eaga, áotangaaga.
39Mpɔ Mɔkɔta Yéso áongoɗea: «Cɔ, ɓenu Ɓaphaisáyɔ, ɓo tɔ osokosa cǎ n'ɔphɛphɛ ka ngɔngɔ í, měma anu n'atúmi gǎkɛ na kokae na ɓojeɗe. 40Ɓabóbó nde ca! Nkpa nde aɓɔngisigi ngɔngɔ á kema nna tɔndɔ yɛ aámbé aɓɔngisigi phɔtɔ suɓi í? 41Cɔ, óɓophani ɓato á ɓuyɛnɛ kema nde a suɓi anu. Mpɔ, nyɔngɔ nɛnu bui â ye tɔ oɓá ánjá.
42Ngomi ka ɓenu Ɓaphaisáyɔ! Ɓoongabea Mokonga phaeka moci á nkama á kema ábɔbɔbɔa nde aɔɛkɛmisaga eea#Ɔna Ɓlw 27.30; Tɔl 14.22. Ɓô ndiu ɔɓɛnjiaga koɗoni n'ekondi ndea Mokonga. Akeni ndiu ɓɔ́tɔtɔkisɛ nndɔ kángá á ɗeketa nndɔ á mosá. 43Ande ngomi ka ɓenu Ɓaphaisáyɔ, ɓo tɔ okonda ika ka kankaanga á mosá suɓi éndu á madondanɔ ndea Ɓayúda ka nyɔngɔ á Mokonga. Ɓokondi phɔtɔ ɓánoseseɛ ka ntanga. 44Ande ngomi ka ɓenu nga, ɓo ɓea bóta á kala, nnde ɓakpa ɓáotámbaga gǔ í na ɓáká ye oúba.»
45Wa, ka ɓaɗundu-ɛɔphi moci áongea: «Ngoisigi, ɔɔyɔnga ɓondɔ, ande gea osóbómi phɔtɔ.» 46Yéso áonsikisia: «Ngomi anu phɔtɔ ɓaɗundu-ɛɔphi nga, ɓǒkumbisa ɓakpa nkumba áɗoko ka kumba í, na ɓenu ɓókótanda okonda samboa kau na miki á njaga moci. 47Ngomi anu! Nga, ɓɔɔphɛkɛa bóta á ɓaɔtu-nyɔngɔ á kala ndea Mokonga, ɓundɔ ɓatatanu ɗáɓěme. 48Nndɔ aúbisi gea te, ɓoɓeekeani na ɓatatanu ka kema nde ɗáɓági nga, ɓɔ ɓáunge ɗáɓěme ɓaɔtu-nyɔngɔ ndea Mokonga. Ɓenu, ɓɔ̂phɛkɛa bóta aɓɔ. 49Nyɔngɔ ndɔ ungɔ Mokonga aengekisi ka kɔɓɔɔngɛ nɛkɛ: ‹Nětekisiande ɓaɔtu-nyɔngɔ nɛmɔ na ɓateki. Ɓémande ka ɓɔ na tambisaga á ɓunɛngbo.›
50Ka nyɔngɔ índɔ unge magia á ɓaɔtu-nyɔngɔ ndea Mokonga ɓɔbu, ɓundɔ ɗáɓěme ka kpanga á mokonda na kesande, a ka mɔ̌ á ɓato á k'ɛ́ɓɔkɔti ndea kesande. 51Nndɔ ɗákpangi n'aɗǔkana á magia ndea Abɛ́li na ka ɓî magia ndea Jakaía ɗáɗuúkani. Eya, ɗáɓámowe Jakaía sɔsɔɓɛ á ɛtɛ-ɔ́phɛ́ɔ na ɔma á ɓoombia á suɓi éndu á Mokonga#Ɔna Nkp 4.8; 2 Nyɔ 24.20-22. Eya, nenóngoɗi, nyɔngɔ ndɔ bui a ka mɔ̌ á ɓato á k'ɛ́ɓɔkɔti ndee.
52Ngomi anu ɓaɗundu-ɛɔphi! Ka nyɔngɔ nde ɓophembeketi kǐo á úbapha na ɓenu sisanu ɓókóongia kau. Ɓo ndiu ǒimisia ɓunde ɓá na siki á ngia.»
53Mbusa, Yéso áotóka ɓei. Ɓaɗundu-ɛɔphi na Ɓaphaisáyɔ ɓâ gǎkɛ okpanga ɓɛa phɛɛ, ɓáomúsiaga nyɔngɔ ásisǐ 54nga, ɗáɓáokáɓa gea te, áyɔngɛ ájeɗe, mpɔ ɓándungɛ.
Atualmente selecionado:
Lóka 11: KMW
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
© 2021, Wycliffe Bible Translators, Inc.