MATHAI 28
28
Jesuh Angthawklethaih
(Mrk 16:1-10; Luk 24:1-12; Jhn 20:1-10)
1Sabbath ni aboeng boah moa Yahni akhawnbang khawnthaw ah Meri Magdalin hoi kalah Meri loa taprong khet hanah caeh hoi. 2Tona-ah mawnhoe aiah tali kana parai a hnawh. Angraeng ih vanmi longto to van bang hoitoah anghum moa taprong khahhaih ih hlungpui to takhoe ving moa ato nuiah anghnut. 3A tungkraang loa tangphra ka puek batiah a oh moa khukbuenh loa dantui batiah anglung. 4Taprong toepkungnawk loa a zit o loiah anghuen o moa kadueh batiah a oh o.
5Vanmi mah nongpui cae khaeah, “Zi hoi hmah, kraws ah takhing ih Jesuh to na pakrong hoi tito kang panoek. 6Hiah om ai boah, a thuih ih batiah angthawk zawh boah. Angzo hoi aloa pasonghaih ih ahmuenh hae khen hoi ah. 7Vaihi karang ah caeh hoi aloa a hnukbangnawk khaeah, ‘Duekhaih thung hoitoah angthawksak let boah; nangcae hma-ah Galili ah caeh ueloa toah anih to na hnuh o tih,’ tiah thui pae oh. Kang thuih o ih hae pahnet o hmah,” tiah a naa pae.
8Topongah taprong hoitoah karang ah amlaem hoi, a zit hoi, to-e anghoehaih hoiah koi hoi moa hnukbangnawk khaeah thuih hanah a cawnh hoi.
9Poeklak ai puiah Jesuh loa anih hnit khaeah a phak moa, “Nang hnit khaeah monghaih oh na soe,” tiah a naa pae. Anih khaeah a caeh hoi thuih, a khok patawn pae hoi moa a bok hoi. 10Jesuh mah anih hnit khaeah, “Zi hoi hmah, caeh hoi aloa kam nauk kamzanawk to Galili ah caeh hanah thuii pae hoi ah; toah to kai hae na hnuh o tih,” tiah a naa pae hoi.
Taprong Toepkungnawk Ih Lokthuih
11Nongpuinawk loa amlaem o nathuemah taprong toepkung risa thoemto loa vangpui thungah a caeh o moa a hnuk o ih hmuen boih to qaihmanawk khaeah a thuih pae o. 12Qaihma kacoetanawk loa kacoetanawk hoiah angqum o moa lok aram o; risanawk to tangka zetpui a paek o moa, 13“‘Qum ka iih o nahlanah a hnukbangnawk angzoh o moa a qok to paquk o ving,’ tiah naa pae oah. 14Ato kawng to prae ukkung mah thaih moeng nahaeloa, nangcae loa zaehaih tawn ai tiah kang thuih pae o han, mawnhaih hanah tidoeh om ai,” tiah a naa pae.
15Taprong toepkungnawk loa tangka to talawk o moa a thuih pae o ih batiah to a sak o. Topongah ato kawng to Judah kaminawk mah vaihni ni khoekto a thuih o toemoe.
A Hnukbangnawk Khaeah Amtuenghaih
(Mrk 16:14-18; Luk 24:36-49; Jhn 20:19-23; Tok 1:6-8)
16A Hnukbang hahlaitonawk loa Galili prae ah caeh o moa Jesuh mah a thuih pae o ih maenui ah to a dawh o.#Mat 26:32; Mrk 14:28 17Angmah to a hnuk o na-ah a bok o, thoemto mah loa oepvawthaih to a tawnh o. 18Jesuh loa a hnaihthuih moa anihcae khaeah, “Long hoi van ih akaatawnhhaih boiboih loa kai khaeah ang paek boih boah. 19Topongah caeng kami boiboih khaeah caeh oloa kai ih hnukbang ah coengsak oah. Ampa, Capa hoi Cai Pakhra hmin hoiah baptisma paek oah.#Tok 1:8 20Topacoengah ka lokpaek ih boih to pazui hanah patuk oah. Moa dung aboeng khoekto nangcae khaeah kang ohhaih poe han,” tiah a naa.
Atualmente selecionado:
MATHAI 28: AKNT2023
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Asang Khongso New Testament in Eastern Khumi © Bible Society of Myanmar, 2023.