MARKA 8
8
Kami Sangpalito Buh A Kok
(Mat 15:32-39)
1Topacoeng akraa parai aiah mipui kalah katingai angzoh o cu bae. Mipui loa cak han tidoeh om ai na-ah Jesuh loa a hnukbangnawk to a kawk moa, 2“Hi kaminawk hae ka tahmen parai, kawmawtiah ni thumto thung kai khaeah a oh o boah moa vaihi cak han tidoeh tawn o ai boah. 3Anihcae to buh pacah aiah amlaemsak nahaeloa lamsui sabong ah angpho o tih, kawmawtiah thoemto loa lam hla parai hoitoah kangzonawk ni,” a naa pae.
4A hnukbangnawk mah, “Hibatih praetanghaeng ah hae mimah maw kami hi zetto pacah hanah buh to pakrong pae thaih tih?” tiah a naa pae o.
5Jesuh mah, “Takaw kae nazetto maw na tawnh o?” tiah a duengh.
Anihcae mah, “Kae sarihto,” tiah pathim pae o.
6Anih mah mipui to long ah anghnut hanah lok a paek. Topacoengah kae sarihto to a lak moa Sithaw khaeah kawn lok to a thuih pacoengah a aeh, mipui to pazet hanah a hnukbangnawk to a paek; moa a hnukbangnawk mah pazet o. 7Tangaa doeh zetta a tawnh o. Jesuh loa kawn lok to a thuih moa tangaa to doeh pazet hanah a hnukbangnawk to pacin. 8-9Mi boih mah a cak o moa zok koi o rip, kami loa sangpalito roek a phak. Topacoengah a hnukbangnawk mah caknoi kamhlai daengkraem sarihto ka koi pakuem o. Jesuh mah mipui to amlaemsak moa 10karang ah palong thungah a hnukbangnawk hoiah angthueng o moa Dalmanutha prae bangah to a caeh o.
Dawnraihaih Sak Hanah Pacae O
(Mat 12:38-42; 16:1-4)
11Farasi thoemto Jesuh khaeah angzoh o moa lok angaek o. Jesuh ih zaehaih to naeh hanah koeh o pongah, “Sithaw mah patoeh ih kami ah oh tito patueng hanah dawnraihaih to na sah ah,” tiah pacae pae o.#Mat 12:38; Luk 11:16 12To-e Jesuh loa ahaam ui moa, “Tipongmaw vaihi dung ih kaminawk mah dawnraihaih sak han nang pacae o? Kang sah pae o mak ai, kang thuih o: Tobatih dawnraihaih to hi kaminawk khaeah paek ah om mak ai,” tiah a naa pae.#Mat 12:39; Luk 11:29
13Anihcae to tacawt tak, palong thungah to akun bae moa tuili hapbang yaeh ah to a caeh.
Farasinawk hoi Herod Ih Tae
(Mat 16:5-12)
14A hnukbangnawk loa to ka khawt ah sinh hanah pahnet o ving moa palong thungah kae maeto ta khueh to a oh. 15Jesuh mah anihcae khaeah, “Farasinawk hoi Herod ih tae to acoe oah,” tiah a naa pae.#Luk 12:1
16Anihcae mah, “Takaw tawn o ai pongah ni loa hitiah a thuih,” tiah longto hoi longto ang thuih o.
17A thuih o ih to Jesuh mah panoek moa anihcae khaeah, “Tipongmaw om ai kawng to na ram o? Na panoek o ai moa na thaih o thaih ai vop maw? Palung mik natanmaw na maengh o? 18Mik na tawnh o, na hnuh o ai maw? Naa na tawnh o, na thaih o ai maw? Kami sangpangato han-iah,#Jer 5:21; Ezk 12:2; Mrk 4:12 19kae pangato ka aeh to na pahnet o boah maw? Cak kamhlai to daengkraem ka koi nazetto maw na pakuem o?” tiah a duengh pae.
Anihcae mah, “Phawh hlaihnetto,” tiah pathim pae o.
20Topacoengah Jesuh mah, “Kami 4,000 to hanah kae sarihto ka aeh na-ah kamhlai phawh nazetto ka koiah maw na pakuem o?” tiah a naa pae.
Anihcae mah, “Phawh sarihto,” tiah pathim pae o.
21Moa Jesuh mah anihcae khaeah, “Vaihi khoekto na thaih o thaih ai toengtoeng vop maw?” tiah a naa pae.
Bethsaida Ah Mikmaeng A Hoihsak
22Bethsaida vang ah to a phak o moa toah to kami thoemto mah mikmaeng nongpa longto to Jesuh khaeah angzoh o haih moa a sui pae hanah a hnik o. 23Jesuh mah mikmaeng nongpa to a ban ah yaeh moa avang laep ah to a caeh haih. A mik pongah tamtui a nok pacoengah Jesuh mah a ban to koeng moa, “Tita vai maemaeto na hnuk thaih maw?” tiah a duengh.
24Mikmaeng nongpa mah van bangah a doeng tahang moa, “Ue, kaminawk ka hnuk thaih; to-e thingkungnawk ka caeh batiah a oh,” tiah a naa.
25Jesuh mah ato nongpa ih a mik ah to a ban a koeng pae let bae. Mikmaeng nongpa loa mik to khoeh puiah padai, a mik loa aang pae let moa tiboih to ka caisoek ta-ah a hnuk thaih. 26Jesuh mah im ah amlaemsak moa, “Vang thungah akun hmah,” tiah lok a paek.
Jesuh Kawng Piter Ih Taphonghaih
(Mat 16:13-20; Luk 9:18-21)
27Topacoengah Jesuh hoi a hnukbangnawk loa Sisaria Filipi taenghaek vangcanawk ah to a caeh amkaeh. Loklam salak ah a hnukbangnawk khaeah, “Kai hae minawk mah amimaw ang naa o, thui o noek ah?” tiah a duengh.
28Anihcae mah, “Thoemto mah baptisma paekkung Johan ni, a ti o. Thoemto mah Elijah ni a ti o. Mi kalah mah tahma longlongto ni a ti o,” tiah pathim pae o.#Mrk 6:14-15; Luk 9:7-8
29Jesuh mah, “Nangcae mah loa, mimaw nang naa o?” tiah a duengh pae.
Piter mah, “Nang loa Messiah ni,” tiah pathim pae.#Jhn 6:68-69
30Tona-ah Jesuh mah, “Kai ih kawng hae mita khaeah doeh thui o hmah,” tiah lok a paek.
A Patanghaih hoi A duekhaih Han Kawng
(Mat 16:21-28; Luk 9:22-27)
31Topacoengah Jesuh mah a hnukbangnawk to a patuk pae moa, “Kami Capa loa patang khanghaih katingai tongh ueloa kacoetanawk, qaihma kacoetanawk hoi Tawklok patukkungnawk ang tahnawng o tih; na hum o tih, to-e ni thumto pacoengah angthawklet tih,” tiah a naa pae. 32Ato lok to anihcae khaeah kacai ta-ah a thuih pae. Topongah Piter mah Jesuh to kalah bangah a caeh haih moa a zoeh. 33To-e Jesuh loa angqoi moa a hnukbangnawk to khet lamhoi Piter khaeah, “Setan, kai khae hoitoah caeh ving ah. Kawmawtiah na dawnhaih ih hae Sithaw khae hoi-ih kangzo na ai ni, kami bang hoitoah kangzo ni,” tiah takhih pae.
34Topacoengah Jesuh mah mipui hoi a hnukbangnawk to a kawk moa, “Ami doeh kai hnukah baang han ka koeh loa angmah taham koehhaih ih to suem sut na soeloa kraws to apu na soeloa baang na soe.#Mat 10:38; Luk 14:27 35Kawmawtiah ami doeh a hinghaih pahlong han ka koeh loa sung tih; to-e ami doeh kai kawng ih pongah hoi Tamthang Kahoih kawng ih pongah a hinghaih ka sung to loa a hinghaih to pahlong tih.#Mat 10:38; Luk 14:27 36Mimah long bum hae hak qoek cadoeh a hinghaih sung ving nahaeloa amraihaih ih oh maw? Tita doeh om ai. 37A hinghaih hak let hanah a paek thaih ih tidoeh om ai. 38Vaihi dung, Sithaw tamu suekhaih ai ih dung hoi tue kasae dung ah hae kami longlongto mah kaimah hoi ka patukhaih ih hae ka zat haih to loa Ampa ih lensawkhaih hoi vanmi kacainawk hoiah angzoh na-ah Kami Capa mah doeh azat haih toeng tih,” tiah a naa.
Atualmente selecionado:
MARKA 8: AKNT2023
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Asang Khongso New Testament in Eastern Khumi © Bible Society of Myanmar, 2023.