MARKA 9
9
1Topacoengah anih mah, “Loktang ta-ah kang thuih o: Sithaw Poenghaih to hmuensak thaihaih ih hoiah kangzo to na hnuh o airoek loa ka dueh han ai kami thoemto hiah a oh,” tiah a naa pae bae.
Tungkraang Anglaihhaih
(Mat 1:1-13; Luk 9:28-36)
2Ani tarukto pacoengah Jesuh loa Piter hoi Jaem hoi Johan to a caeh haih moa angmahcae khueh ah mae kasang ah a dawh haih. Anihcae mah a khet o nathuemah Jesuh ih tungkraang loa anglaih ving moa #2 Pit 1:17-18 3khukbuenh loa anglung pin moa sadae ah sadae hlup; totih khoekto kanglung pinah longnui ah mita mah doeh pasuk thaih mak ai. 4Topacoengah hnukbang longthumto mah Elijah hoi Mosi to Jesuh hoiah lok ka ram to a hnuk o. 5Piter mah Jesuh khaeah, “Patukkung, hiah oh hae natanmaw zong a oh! Buk thumto, nang hanah maeto, Mosi hanah maeto, Elijah hanah maeto sah o si,” tiah a naa pae. 6Kawmawtiah piter hoi ampui hnit loa tasoeh loiah tidoeh thuih han panoek hoi ai pongah ni.
7Topacoengah tamai angzang moa anihcae to a khuk hmoek, moa tamai thung hoitoah lok to angthoh, “Hi loa ka palung duek ih ka Capa ni, anih ih lok to tahngai oah,” tiah a naa.#Mat 3:17; Mrk 1:11; Luk 3:22 8A taenghaek to a khet o phrat e mita doeh hnuh o ai, Jesuh khueh ni angmahcae taengah kaom to a hnuk o.
9Mae hoitoah ahum o tathuk na-ah Jesuh mah, “Kami Capa hae duekhaih thung hoitoah kang thawklet airoek loa na hnuk o ih to mita khaeah doeh thui o hmah,” tiah lok a paek.
10A lokpaek to loa pazui o, to-e angmahcae thungah, “Duekhaih thung hoitoah angthawklet, tihae ahlongrui loa timaw?” tiah longto hoi longto angduengh o tuek. 11Topacoengah anihcae mah Jesuh khaeah, “Tipongmaw Tawklok Patukkungnawk mah Elijah angzo hmaloe tih, tiah a thuih o,” tiah a duengh pae o.#Mal 4:5; Mat 11:14
12Jesuh mah, “Tiboih to coengcoe ta-ah sak coek hanah Elijah loa angzo tangtang tih. To-e tipongmaw Cabu Kacai mah ‘Kami Capa loa katingai patang khang ueloa tahnawng o sut tih’ tiah a thuih? 13Topongah loktang kang thuih o: Elijah loa angzoh zawh boah moa Cabu Kacai mah a thuih ih batiah kaminawk mah anih to koeh ngaih ah a sak o boah,” tiah a naa.
Taqawk Kasae Katawn Naukta A Hoihsak
(Mat 17:14-21; Luk 9:37-43)
14Hnukbang kalahnawk khaeah a phak o na-ah mipui paroeai mah a ven o thuih khuk moa Tawklok patukkung thoemtonawk hoiah kangaek o to a hnuk. 15Mipui mah Jesuh to a hnuk o na-ah paroeai a dawnrai o, a cawnh o moa a dawt o. 16Jesuh mah a hnukbangnawk khaeah, “Ti kawng to maw nang aek o haih tuek loa,” tiah a duengh pae.
17Mipui thungih kami longto mah, “Patukkung, ka capa to taqawk mah a sak moa lok doeh apae thaih ai pongah nang khaeah kangzoh haih. 18Taqawk mah akunthuih nakruek ah long ah angvah kawngkawng moa pakhaa ah tamtui ka poepbuk to tacawt, a haa to pakuep moa takbum boih to takawraw ah oh. Na hnukbangnawk khaeah taqawk to haek hanah ka thuih pae e ah loa pathok o thaih ai,” tiah a naa pae.
19Jesuh mah anihcae khaeah, “Nangcae taanghaih ka tawn ai kaminawk! Nasetto roek maw kang oh o haih han? Nasetto maw kang pazoi o thuih bae han vop? Naukta to kai khaeah na sin oah,” tiah a naa pae. 20Anihcae mah naukta to Jesuh khaeah to a sinh o.
Taqawk mah Jesuh to a hnuk phrat hoiloa naukta to takawraw ah a sak moa long ah amtim, tamtui poepbuk ah tacawt moa amlet kawnkawn. 21Jesuh mah ampa khaeah, “Hitiah a ohhaih ih hae akraa laih boah maw?” tiah a duengh.
Anih mah, “A nauktak ta nahoi ih boah ni. 22Avaih paroeai taqawk mah paduek hanah hmai thung hoi tui thungah to a vah tuektuek. Na sak thaih paakoi nahaeloa na tahmen loa na bom rae ah,” tiah a naa.
23Jesuh mah, “Na sak thaih paakoi nahaeloa, tiah na thuih. Ahlong! Taanghaih ka tawn kami hanah loa tiboih hae angcoeng thaih,” tiah a naa.
24Ampa loa, “Taanghaih ka tawnh, to-e tamsi. Kanoi ah tawnh hanah na bom ah,” tiah a hangh phrat roep.
25Tona-ah mipui mah a hnaih o thuih hruet hruet tito Jesuh mah a hnuk na-ah taqawk kasae to akaa a paek. “Naa kapang hoi lok-aa taqawk kasae, hi naukta thung hoitoah tacawt aloa natuek doeh akun let hmah laih, tiah lok kang paek,” tiah a naa.
26Taqawk loa a hangh, naukta to anghuensak moa amletsak kawnkawn pacoengah tacawt. Naukta loa kadueh qok batih toengah a oh moa mi boih mah, “A duek boah,” tiah a thuih o. 27To-e Jesuh mah naukta to a ban hoiah pathawk moa angdoet.
28Jesuh loa im thungah akun pacoengah a hnukbangnawk mah tamqu lamah, “Tipongkhoe maw kaicae mah taqawk ka haek o thaih ai?” tiah a duengh o.
29Jesuh mah, “Hibatih hae loa khophoehhaih khueh mah ni pathok thaih, kalah tidoeh mah pathok thaih ai,” tiah a naa pae.
A Duekhaih Han Kawng A Thuih Let Bae
(Mat 17:22-23; Luk 9:43-45)
30Jesuh hoi a hnukbangnawk loa ato hmuenh to tacawt o tak moa Galili prae thung bangah a caeh o. Jesuh loa mita mah doeh a ohhaih to panoeksak han koeh ai, 31kawmawtiah a hnukbangnawk to patuk li pongah ni. A patukhaih ih loa: “Kami Capa hae minawk ban ah paek ah om ueloa hum o tih. To-e ani pathum pacoengah angthawklet tih,” tiah a thuih pae.
32To-e a patukhaih ih ahlong arui to thaih panoek o ai, to-e duengh han doeh a vam o.
Mimaw Kalen Koek
(Mat 18:1-5; Luk 9:46-48)
33Kapernaum vang to a phak o, im thungah akun o pacoengah Jesuh mah a hnukbangnawk khaeah, “Lam salak ah tih kawng maw zetto nang aek o haih mut loa?” tiah a duengh.
34To-e pathim pae o ai, kawmawtiah lam salak ah angmahcae thungah mimaw kalen koek tiah angaek o pongtoah ni.#Luk 22:24 35Jesuh loa anghnut, a hnukbang hlaihnetto to a kawk moa anihcae khaeah, “Ami doeh hmaloe koek ah oh han ka koeh loa hnukkhuem koek ah oh moa mi boih ih tamtoeh ah oh han a krak,” tiah a naa pae.#Mat 20:26-27; 23:11; Mrk 10:43-44; Luk 22:26 36Topacoengah naukta to a lak moa mipui hma-ah angdoetsak. Naukta to ban hoiah takoi moa anihcae khaeah, 37“Ami doeh ka hmin hoiah hi nauktanawk hae longlongto doeh ka talawk loa kai ka talawk ni; ami doeh kai ka talawk loa kai khueh aiah patoehkung to doehsoe a talawk toeng,” tiah a naa.#Mat 10:40; Luk 10:16; Jhn 13:20
Ka Aek Ai Loa Kaicae Kami Ni
(Luk 9:49-50)
38Johan mah, “Patukkung, na hmin hoiah taqawk ka haek longto ka hnuk o moa kaicae thungah ka paa ai kami ah oh pongah ka pakaa pae o,” tiah a naa.
39Jesuh mah, “Pakaa pae o hmah! Kawmawtiah ka hmin hoiah dawnraihaih hmuen ka sah to loa kai to ka zoipen ah kasae thui o mak ai. 40Kawmawtiah ami doeh aicae to ka aek ai loa aicae bang kami ni.#Mat 12:30; Luk 11:23 41Loktang ta-ah kang thuih o: Kai ih kami ah na oh o pongah ami doeh nangcae to tui boengloeng maeto ka paek kami loa kawnvang to a hnuh khaekhaeh tih,” #Mat 10:42 tiah a naa.
Zaepacunghaih
(Mat 1:6-9; Luk 17:1-2)
42Jesuh mah, “Ami doeh hibatih naukta tanawk thungih longto hae kai taanghaih ih to paro hanah ka sah loa cangkaehhaih hlungsum kalenpui to tahnong ah a oihsak moa tuiculi ah vah zup to anih hanah hoih kue tih. 43Topongah na ban mah na taanghaih to angkhraengsak nahaeloa na ban to takroek pat ah! Na ban hnetto hoiah ka dueh kanghmang hell hmai thungah krak pongh loa ban maeto om aiah hinghaih thungah na kun to nang han a hoih kue.#Mat 5:30 44(Toah loa anihcae ka caa lungkawk to dueh mak ai boah moa anihcae kakaang hmai to doeh dueh mak ai boah.) 45Moa na khok mah na taanghaih ih to angkhraengsak nahaeloa boeng dok ah! Na khok hnetto hoiah hell thungah krak pongh loa khok maeto om aiah hinghaih thungah na kun to a hoih kue. 46(Toah loa ‘anihcae ka caa lungkawk to dueh o mak ai boah moa anihcae kakaang hmai to doeh dueh mak ai boah.’) 47Moa na mik mah na taanghaih angkhraengsak nahaeloa talaih ving ah! Mik hnetto hoiah hell thungah krak pongh loa mik maeto khueh hoiah Sithaw Poenghaih thungah na kun to a hoih kue.#Mat 5:29 48Toah loa ‘anihcae ka caa lungkawk to dueh o mak ai boah moa anihcae kakaang hmai to doeh dueh mak ai boah.’#Isa 66:24
49“Angbawnhaih moi loa paloi hoiah thoengsak batiah mi boih to hmai hoiah thoengsak ah om toengh tih.
50“Paloi loa a hoih; to-e a khrumhaih to dap ving nahaeloa kawbangmaw na khrumsak thaih let tih?#Mat 5:13; Luk 14:34-35
“Nangmahcae thungah angkom amzenhaih ih paloi to tawn oloa longto hoi longto angdaehhaih hoiah om oah” a naa pae.
Atualmente selecionado:
MARKA 9: AKNT2023
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Asang Khongso New Testament in Eastern Khumi © Bible Society of Myanmar, 2023.