Matalikilo 18
18
Kushalwa kwakwe Isaki mbokwakashomeshekwa alimwi
1Mwaami Lesa wakaboneka kuli Abulaamu pamibanga ya kuMamule. Abulaamu ndyaakalinga kushiite pamulyango wa tente yakwe muciindi ca malumwi ndikupya bunene, 2wakeenamuka akubona bantu botatwe kabeemfwi pafwaafwi bulya. Ndyaakababonabo wakabacicilila kwaamba ayi abaanshe. Wakafukama akushisha ciwa panshi,#Ebulu 13:2 3lyalo wakaamba ayi, “Nkambo, muteendilibo paŋanda yangu cakuteemikana. Ndiwaano kwaamba ayi mucaafwe. 4Amuleke kuletwewo tumaanshi musambe kushimpanta. Amookeshe mucisamu umu. 5Ntooletaawo atwakulya tweshi tumupeeko nkusu shakutolelela lweendo lwanu. Mwampa bulemu kwisa paŋanda yangu, ono amuleke mutebete.”
Mpeeke bakakumbula ayi, “Twalumba, amucite mbomwaamba.” 6Abulaamu wakeenda cakufwambaana wenjila mutente akwaambila Saala ayi, “Endesha nyamuna fulaulo wako wiindaawo kubota upange shinkwa.” 7Mpeeke wakacicila kulitanga lya ŋombe, waya wasalawo moombe wacimoofu alimwi wiinite akupa musebenshi alakwe weendesha wamubamba. 8Abulaamu wakabwesa bwaanda, mukupa, anyama ilya ya moombe akubambila beensu abo. Ciindi ndibakalinga kulya alakwe wakalinga pafwaafwi mucisamu mweenka umo.
9Lyalo beensu abo bakeepusha Abulaamu ayi, “Ino mukaako Saala uli kuli?” Wakakumbula ayi, “Mwaali mulya mutente.”
10Lyalo Mwaami Lesa wakaamba ayi, “Ncakwiila ndaakwisa kuli ndiwe paciindi ceenka cino mwakali, alimwi Saala mukaako ulaakushala mwaana musankwa.”#Loma 9:9
Ico ciindi Saala kaalibo kwisule lyakwe pamulyaango wa tente alimwi kaakutika. 11Abulaamu aSaala bakalinga bacembela abuumbi alimwi Saala kaacilekete kale akukubala. 12Aboobo Saala wakaseka mwiine eenka akwaamba ayi, “Ono bulya mbondacembela akumana nkusu sa inga kukumana abamaandaangu kwankonda? Alimwi abalo bamaandaangu bakula.”#1 Pita 3:6
13Lyalo Mwaami Lesa wakeepusha Abulaamu ayi, “Ino Saala wasekelanshi akwaamba ayi, ‘Sa ncakwiila inga ndaba amwaana bulya mbondacembela?’ 14Sa kuliiwo ciyumu kuMwaami Lesa? Ono bweenka mbondaambaawo kale ayi ndaakwisa kuli ndiwe paciindi ceelete mwakali alimwi Saala ulaakushala mwaana musankwa.”#Luka 1:37
15Ono mukwiinga Saala wakaloonda, wakakaka ayi, “Nshikwe kusekaawo nebo.” Sombi lakwe wakakumbula ayi, “Ee waseka, utakaki.”
Abulaamu mbwaakasengelaako bene Sodoma cankusu
16Mpeeke basankwa abo bakaya pamusena apo ndabala ya Sodoma mpoyakalinga kukonsha kuboneka. Abulaamu alakwe wakayaabo kwaamba ayi abashindikishe mulweendo lwabo. 17Mwaami Lesa wakalyaamboosha ayi, “Teshi mushiise Abulaamu ncentooyanda kucita. 18Bamulunyungu lwakwe balaakuba mushobo unene wiindaawo, alimwi nkwiinda muli nguwe mweshi nkapete coolwe mishobo yoonse. 19Ndamusala kwaamba ayi aambile bana bakwe abamulunyungu lwakwe ayi banyumfwile akucita shiluleme. Mukucita boobo, ndaakumucitila shoonse nshindakamulasha.”
20Lyalo Mwaami Lesa wakaambila Abulaamu ayi, “Kuli milandu iyoosha pali Sodoma aGomola, alimwi kubisha kwabo nkunene abuumbi. 21Ndyeelete kuyaako kwaamba ayi nkaboneshe na ncakwiila milandu njendakanyumfwa njancinencine.”
22Mpeeke basankwa bobilo abo bakanyamuka baya kuSodoma, sombi Mwaami Lesa wakacaala aAbulaamu. 23Lyalo Abulaamu wakasena kuMwaami Lesa akwiipusha ayi, “Sa mutoonyonyoola cancinencine bacite milandu abatacite? 24Ino na muli bali makumi osanwe batacite milandu, sa mutoonyonyoola ndabala yoonse? Sa teshi mukailekelele kwaamba ayi mupulushe baabo bali makumi osanwe? 25Ndushinisho teshi mucaye batacite milandu pantu pomwi abacite milandu. Tamukoonshi kucita boobo, ceebo na mwacita boobo, nkokwaamba ayi batacite milandu batootondeshekwa bukali pantu pomwi abacite milandu. Ono ico tacicitiki. Moomboloshi wa cishi coonse ulyeelete kucita shintu cabululami.”
26Mwaami Lesa wakakumbula ayi, “Na ncane bantu bali makumi osanwe batacite milandu, teshi nyonyoole ndabala yoonse ceebo cabo.”
27Abulaamu wakabooshaawo alimwi ayi, “NoBaami baLesa, ndaseenga mundekelele kutolelela kwaamba amwebo. Nebo ndibo anga ndusuko nabi milota alimwi nshicite nkusu shakwaamba cili coonse. 28Cimwi ciindi inga kamulibo bali makumi one abosanwe batacite milandu kuteshi bali makumi osanwe. Sa mutoonyonyoola ndabala ceebo ca bosanwe babulila?” Mwaami Lesa wakakumbula ayi, “Teshi nyonyoole ndabala na ncaneemo bali makumi one abosanwe batacite milandu.”
29Abulaamu wakabooshaawo alimwi ayi, “Ino na kucanikebo bali makumi one?” Mwaami Lesa wakakumbula ayi, “Teshi njinyonyoole na ncaneemo bali makumi one.”
30Abulaamu wakaamba ayi, “NoBaami baLesa, mutakalali, ndisuni kwiipusha alimwi. Ino ono na kulibo bali makumi otatwe?” Lakwe wakakumbula ayi, “Teshi njinyonyoole na ncaneemo bali makumi otatwe.”
31Abulaamu wakaamba ayi, “NoBaami baLesa, ndasengesha mundekelele kuyanda kwiipushisha. Ino na mwacanaakobo bali makumi obilo?” Wakakumbula ayi, “Teshi njinyonyoole ndabala na ncaneeko bali makumi obilo.” 32Abulaamu wakaamba ayi, “NoBaami baLesa ndaseenga mutakalali njipushe cakweelaako. Ino na kucanikebo bali likumi?” Wakakumbula ayi, “Teshi njinyonyoole na kucanike bali likumi.” 33Mwaami Lesa ndyaakamanisha kwaamba aAbulaamu wakaya, alakwe Abulaamu wakaboolela kumishaabo.
Atualmente selecionado:
Matalikilo 18: BBBLI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Lenje Bible with Deuterocanon © Bible Society of Zambia, 2003.