Matalikilo 19
19
Shibiibi sha bamuSodoma
1Baanjelo bobilo ndibakesa muSodoma macolesha, Loti wakalinga kushiite pamwinjililo wa ndabala inene iyo. Ingayi ababonebo wakanyamuka waya mukubaansha. Wakafukama akushisha ciwa panshi kunembo lyabo 2akwaamba ayi, “Nobamaami bangu, nebo ndiwaano kwaamba ayi mucaafwe. Ndasengesha ayi tushike kuŋanda yangu. Inga mwasambaako kushimpanta alimwi akoona kwaamba ayi ciilo mukafumebo kunooya palweendo lwanu.” Sombi bakakumbula ayi, “Ne, tutokoona pansengwe mweenka muno mundabala inene.”
3Loti wakatolelela kubasenga, lyalo kumamanino bakasumina kuyaakwe kuŋanda. Mpeeke Loti wakapanga cimaande akubambila beensu cakulya cibotu. Ndicakabambwa bakalya.
4Beensu abo kabatana kuya mukoona basankwa ba muSodoma bakashinguluka ŋanda iyo. Basankwa boonse bamundabala, banene abanike bakalingaawo apo. 5Bakoolobesha kuli Loti ayi, “Bali kuli basankwa besa mukoona kokuno sunu? Bakushe utupe kuno!” Basankwa bene Sodoma abo bakalinga kusuni kukumanaabo.
6Loti wakaya pansengwe akushiya wacalaako kumulyango. 7Mpeeke wakabaambila ayi, “Nobeensuma, ndamusenga kwaamba ayi mutaciti cintu citonda ca mushobo uyu! 8Nebo ndicite baana bamyooye bobilo batana kukumanaawo amusankwa. Amuleke mukushile, alimwi inga mwacitaabo cili coonse ncemusuni. Ono mutaciti nabi comwi abasankwa aba. Beensu aba bali muŋanda yangu, aboobo ndyeelete kubeemikanina.”#Boombo 19:22-24
9Sombi bakaamba ayi, “Swaako webo omuswamashi! Ndiwaani webo kutulwiita ncetweelete kucita? Swaako twiinde, na utoocita shitaala, nsheshi tucite kuli ndiwe, shitokwiinda nshitwalinga kusuni kucita pabasankwa abo.” Mpeeke bakashindika Loti akwisa ayi banyonyoole cisasa. 10Sombi basankwa bobilo abo bakalinga muŋanda bakwelela Loti mukati akucala kumulyango. 11Lyalo bakalengesha basankwa boonse bakalinga pansengwe kuba boofu kwaamba ayi batakonshi kubona cisasa.#2 Baami 6:18
Loti mbwaakaswa muSodoma
12Mpomunyaawo basankwa bobilo abo bakaambila Loti ayi, “Na ulicitewo baana basankwa, banakashi, bakwe basankwa nabibo beshikamukowa bamwi bekala mundabala inene iyi, ubakusheemo 13ceebo tutoonyonyoola musena uno. Mwaami Lesa wanyumfwa milandu iyoosha ya bantu aba, alimwi watutuma ayi tunyonyoole Sodoma.”
14Lyalo Loti wakaya kubasankwa bakalinga bamamikila bana bakwe banakashi akubalwiita ayi, “Amweendeshe musweemo muno. Mwaami Lesa utoonyonyoola musena uno.” Sombi balo bakayeeya ayi utoosekanabo.
15Kumuyamaca baanjelo bakatalika kwaambila Loti ayi, “Endesha bwesa mukaako abana bako banakashi musweemo muno kwaamba ayi mutafwiti kuntu komwi. Mwaami Lesa utoonyonyoola musena uno.” 16Loti wakatonshatonsha. Nacibi boobo Mwaami Lesa wakamufwita nkumbu. Aboobo basankwa balya bakacata Loti, mukaakwe, abana bakwe banakashi pamaansa akubakusha mundabala iyo.#2 Pita 2:7 17Mpeeke munjelo womwi wakaamba ayi, “Amucice mupuluke! Kutalanga kwisule alimwi kuteemikana muliwesa. Amucicile kutulundu kwaamba ayi mutacaikwi.”
18Sombi Loti wakakumbula ayi, “Sobwe nkambo, mutatulengeshi kucita boobo. 19Mwanyumfwila kale nkumbu alimwi mwapulusha buumi bwangu. Ono kutulundu kwalaampisha kucicilaako. Kunyonyoolwa uku kutooncanikisha akuncaya kaantana kushika kutulundu. 20Sa mwaibona ndabala iniini ilya? Ili pafwaafwi nkweenga ndacicila. Amusuminishe ncicile nkuko. Sa te njiniini abuumbi? Ncakwiila buumi bwaangu butoopulushikwa uko.”
21Lakwe munjelo wakaamba ayi, “Ncibotu, ndasumina alimwi teshi nyonyoole ndabala ilya. 22Kweendesha! Cica! Nshikoonshi kucita cintu nabi comwi kootana kushika kulya.”
Ono mukwiinga Loti wakaamba ayi ndabala ilya njiniini, yakeetikwa ayi Sowa.
Kunyonyooka kwa Sodoma aGomola
23Loti wakashika kuSowa lisuba kaliswa. 24Mpomunyaawo Lesa wakalosha mulilo wa salufa paSodoma aGomola 25wanyonyoola mandabala ayo alimwi aliwesa pantu pomwi abantu boonse bakalingaamo alimwi asheesho shoonse shakalinga kumeneteemo.#Mate 10:15; 11:23-24; Luka 10:12; 17:29; 2 Pita 2:6; Judi 7 26Sombi muka Loti wakalanga kwisule, mpeeke wakaaluka libwe lya mwiinyo.#Luka 17:32
27Macuunsacuunsa, bushiku bwakaboolaawo Abulaamu wakaya waawo mpwaakalinga kwiimfwi pameenso aMwaami Lesa. 28Wakalangilisha Sodoma aGomola aliwesa lyoonse. Mpeeke wakabona bwiishi kabusunta anga butooswa mumunyumbi unene. 29Sombi Mwaami Lesa ndyaakanyonyoola mandabala a muliwesa umo mwakalinga kwikala Loti, wakalinga kwiingashite kusenga kwakwe Abulaamu aboobo wakasuminisha Loti kuswaamo akuloboka.
Loti abana bakwe banakashi
30Ono ceebo cakwaamba ayi Loti wakalinga kuloondete kwikala muSowa. Lakwe abana bakwe bobilo banakashi bakalongela mutulundu akwikala mucimfwengo. 31Bumwi bushiku mwaana munenebantu wakaambila mwanikebantu ayi, “Bata batooya cicembela ono taaku musankwa pafwaafwi kuno ngweenga watweeba ayi tushale baana kweelana ambocicitika mucishi ca panshi coonse. 32Atukoleshe bata waini, lyalo tukumanaabo kwaamba ayi tulame mukowa kwiinda muli mbabo.” 33Mashiku ayo bakapa waini ishiwabo, mpeeke munenebantu wakakumanaabo. Ono bakakolwa cakwaamba ayi tabakwe kwishiba acakacitika.
34Bushiku bwakaboolaawo mwaana mwanakashi munenebantu wakaambila mwanikebantu ayi, “Ciilo mashiku ndakakumana abata. Tubanwishe waini alimwi mashiku awebo uye ukumanaabo kwaamba ayi tulame mukowa kwiinda muli mbabo.” 35Aboobo bakanwisha waini ishiwabo mashiku ayo aalo. Mpeeke alakwe mwanikebantu wakaya wakumanaabo. Alimwi tabakwe kwishiba cakacitika. 36Munshila iyi bana bakwe Loti bobilo banakashi mbobakamita kwiinda muli ishiwabo. 37Munenebantu wakashala mwaana musankwa uyo ngwaakatumba ayi Moabu. Wakalinga ngomushali mukulukulu wa baabo beetwa ayi bene Moabu shino nshiku. 38Mwanikebantu alakwe wakashala mwaana musankwa akumutumba ayi Benami. Wakalinga ngomushali mukulukulu wa baabo beetwa ayi bene Amoni shino nshiku.
Atualmente selecionado:
Matalikilo 19: BBBLI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Lenje Bible with Deuterocanon © Bible Society of Zambia, 2003.