Matalikilo 27
27
Isaki mbwaakapa Jakobo coolwe
1Isaki ono wakacembela akupofola. Wakatuma nkombe kuli Esau mwanaakwe munenebantu ayi ese. Mpeeke wakamwaambila ayi, “Omwanaangu!” Lakwe wakakumbula ayi, “Ee nkambo.”
2Isaki wakaamba ayi, “Waboona kwaamba ayi ndakuula alimwi inga ndafwa coonoono. 3Bwesa buta bwako amifwi uye muluundu uncaileewo munyama. 4Utelekeewo cakulya cilya cibotu ico ncensuni, undetele. Ndamana kulya ntookupa coolwe cakweelaako kaantana kufwa.”
5Isaki ndyaakalinga kubandika aEsau, Labeka wakalinga kukutika. Lyalo Esau ndyaakaya mukufwima, 6Labeka wakaambila Jakobo ayi, “Ndalinga kukutika baiso kabaambila Esau ayi, 7‘Undetele nyama akumambila cakulya cilya cibotu. Ndamana kulya ntookupa coolwe pameenso aMwaami Lesa kaantana kufwa.’ ” 8Labeka wakatolelela akwaamba ayi, “Ono omwanaangu, ukutike akucita nceshi ŋambe. 9Koya kulitanga lya mpongo usale tupongo twaana tobilo twiinite kwaamba ayi nteleke akubamba cakulya cilya ncebasuni bunene baiso. 10Lyalo ubatolele kwaamba ayi balye, mpeeke batookupa coolwe kabatana kufwa.”
11Sombi Jakobo wakaambila banyina ayi, “Mulishi kwaamba ayi Esau ulicite booya, sombi nebo nditeshimitebo. 12Cimwi ciindi bata bancaatecate akwishiba ayi ntoobabecabo. Ono ubo te inga ndaliletela lishingo kuleka coolwe kuswa kuli mbabo?” 13Banyina bakakumbula ayi, “Omwanaangu, lishingo lili lyoonse alise pali ndime. Citabo mbondakwaambila, uye undetele tupongo.” 14Aboobo wakaya waleta tupongo kuli mbabo, mpeeke bakateleka cakulya cibotu ceenka baishi ncebasunishi. 15Lyalo wakabwesa shakufwala shiindaawo kubota shakwe Esau mwanaakwe musankwa munenebantu, isho nshaakalinga kusungite muŋanda, akufwalika Jakobo mwanikebantu. 16Wakabwesa tupaya twa mpongo akutubika pamikono yakwe apalubasu lwa nshingo apo mpwaakalinga kutacite booya lakwe. 17Mpomunyaawo wakamupa cakulya cibotu cilya pantu pomwi ashinkwa ngobakapanga.
18Lyalo Jakobo wakaya kuli baishi akwaamba ayi, “Ta!” Wakakumbula ayi, “Woo, anu ndiwe mwanaangu uli?” 19Mpeeke Jakobo wakaambila baishi ayi, “Ndimwanaanu munenebantu, Esau. Ndaciita kweelana ambomwandwiita. Amubuke mulye nyama njindamuletela kwaamba ayi mumpe coolwe canu.”
20Isaki wakeepusha ayi, “Ino waicana buyani bwaangu, omwanaangu?” Jakobo wakakumbula ayi, “Mwaami Lesa, Lesa wanu wancafwa kwaamba ayi njicaane bwaangu.”
21Mpomunyaawo Isaki wakaambila Jakobo ayi, “Sena pafwaafwi nkucaatecate na ncakwiila ndiwe Esau?” 22Jakobo wakasena kuli baishi abalo bakamucatacata akwaamba ayi, “Liswi litoonyumfwika anga nguJakobo sombi mikono anga nguEsau.” 23Taakwe kumwishiba Jakobo mukwiinga mikono yakwe yakalinga kunyumfwika booya anga njimikono yakwe Esau. Isaki wakalinga wayanda kale kumupa coolwe. 24Ono wakeepusha alimwi ayi, “Sa ncakwiila ndiwe Esau?” Alakwe wakakumbula ayi, “Ee ndime.”
25Isaki wakaamba ayi, “Ndetele nyama imwi iniini. Ndamana kulya ntookupa coolwe.” Jakobo wakamuletela alimwi wakaleta awaini ayi anwe Isaki. 26Lyalo baishi bakaamba ayi, “Sena pafwaafwi umfyoonte omwanaangu.” 27Ndyaakalinga kwisa cisena, Isaki wakanunsha shakufwala, aboobo wakamupa coolwe. Wakaamba ayi,
“Bweema bubotu bwa mwanaangu
buli anga mbweema bwa muunda
uyo Mwaami Lesa ngwaapa coolwe.
28Lesa aakupe mume kuswa kwiculu
akulengesha myuunda yako kuba amboleshi!
Aakupe shili anga ngamaila shiinji awaini uunji.
29 #
Ebulu 11:20
#
Mata 12:3
Mishobo amishobo aikakusebensele
abantu bapusenepusene bakakufukamine.
Buleli bwa beshikamukowa bako abukabe kuli ndiwe,
alimwi bamulunyungu lwa banyoko abakakufukamine.
Aakashinganwe uyo woonse weshi akakushingane.
Aakapekwe coolwe uyo woonse weshi akakupe coolwe.”
Esau mbwaakasenga coolwe
30Isaki ndyaakamanisha kumupa coolwe, Jakobo wakacita ingayi asweekobo kuli baishi, alakwe Esau nkupola kuswa mukufwima. 31Alakwe wakateleka cakulya cilya cibotu akutola kuli baishi. Mpeeke wakabaambila ayi, “Ta, amubuke mulyeeko nyama ya muluundu kwaamba ayi mumpe coolwe canu.”
32Isaki wakeepusha ayi, “Ndiwaani?” Wakakumbula ayi, “Ndime Esau, mwanaanu wakwiiya.”
33Lyalo Isaki wakatalika kututuma abuumbi. Mpeeke wakeepusha ayi, “Ono ngani wacaya nyama muluundu akwiileta kuli ndime? Ndiwapola apa ndindamanishabo kwiilya. Ndamupa coolwe cangu cakweelaako alimwi ncakwiila unanoolibo aco lyoonse alyoonse.”
34Esau ndyaakanyumfwa boobo wakalila abuumbi cakooloma akwaamba ayi, “Anebo amumpe coolwe ta!” 35Isaki wakakumbula ayi, “Mukwanu nkwaalinga kuno akunyinda kumaano. Aboobo wabwesa coolwe cako.”
36Esau wakaamba ayi, “Ulu ndwabili kunyinda kumaano. Anu nceceeco liina lyakwe ncelyakabeta ayi Jakobo. Wakanyaya bunenebantu bwangu alimwi bulya wabwesa acoolwe cangu. Sa tamukwe kunshiilaawo coolwe nabi comwi nebo?”#Mata 25:29-34 37Isaki wakakumbula Esau ayi, “Ndalengesha kale ayi abe mwaami wako, alimwi ayi boonse beshikamukowa bakwe babe basha bakwe. Ndamupa shili anga ngamaila awaini. Ono taaku cacaala nceshi nkupe, omwanaangu!”
38Esau wakatolelela kukombelela baishi ayi, “Sa mulicitebo coolwe comwi ta? Anebo ta amumpeewo coolwe!” Mpeeke wakatalika kulila.#Ebulu 12:17
39Lyalo Isaki wakamwaambila ayi,
“Webo teshi ukatambuleewo mume kuswa kwiculu,
alimwi teshi ukabeewo amyuunda icite mboleshi.
40Ulaakunoocana buumi kwiinda mukusebensesha mupeeni,
alimwi ulaakuba musha wa mukwanu.
Sombi waakwaashuka,
ulaakupatuka kuswa mubweendeleshi bwakwe.”#Ebulu 11:20#Mata 36:8; 2 Baami 8:20
41Esau wakapata Jakobo ceebo baishi bakapa nguwe coolwe. Wakayeeya ayi, “Bata bali pafwaafwi kufwa, ono na cikeende cililo, Jakobo ndaakumucaya.”
42Ono Labeka ndyaakalwiitikwa shamuyeeyo wakwe Esau wakatuma nkombe ayi Jakobo ese. Mpeeke wakamwaambila ayi, “Nyumfwa, mukwanu utoyeeya kukucaya kwaamba ayi cili kumoyo cisutuke. 43Ono omwanaangu ucite nceshi nkwaambile. Unyamuke bulya uye kuli nandumi yangu Labani kuAlani. 44Lyalo ukekaale anguwe kushikila mukwanu akabooshemo moyo, 45akuluba ncewacita kuli nguwe. Lyalo ndaakutuma muntu kwisa mukukubwesa uko. Nshikwe kunyonyookelwa baana basankwa bobilo paciindi comwi.”
Isaki mbwaakatuma Jakobo kuya kuli Labani
46Labeka wakaambila Isaki ayi, “Bamakaakwe Esau baswamashi bandemya. Na Jakobo alakwe akeebe womwi pakati ka banakashi bene Iti, anu anebo ncibotu kufwabo.”
Atualmente selecionado:
Matalikilo 27: BBBLI
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Lenje Bible with Deuterocanon © Bible Society of Zambia, 2003.