Juan 1
1
Naging Tao ang Salita
1Nang pasimula,#1:1 Nang pasimula: Sa mga Hudyo, ipinapaalala ng mga katagang ito ang salaysay ng paglikha sa lahat ng bagay. Tingnan ang Gen. 1:1. naroon na ang Salita. Ang Salita ay kasama ng Diyos at ang Salita ay Diyos. 2Sa simula pa lang ay kasama na siya ng Diyos. 3Nilikha ang lahat ng bagay sa pamamagitan niya, at kung wala siya, walang anumang nilikha ang nalikha. 4Nasa kanya ang buhay at ang buhay na ito ang siyang ilaw na nagbibigay-liwanag sa mga tao. 5Ang ilaw na itoʼy nagliliwanag sa kadiliman, at kailanmaʼy hindi madadaig ng kadiliman.
6May isang taong nagngangalang Juan na isinugo ng Diyos. 7Isinugo siya bilang saksi upang magpatotoo tungkol sa ilaw, nang sa gayon ay sumampalataya ang lahat ng tao sa pamamagitan niya. 8Hindi si Juan ang mismong ilaw, kundi naparito siya upang magpatotoo tungkol sa ilaw.
9Ang tunay na ilaw na nagbibigay-liwanag sa lahat ng tao ay dumating na sa mundo. 10Pumarito siya sa mundo ngunit hindi siya kinilala ng mundo, bagamaʼt nilikha ang mundo sa pamamagitan niya. 11Dumating siya sa sarili niyang bayan, ngunit hindi siya tinanggap ng kanyang mga kababayan. 12Gayunpaman, ang lahat ng tumanggap at sumampalataya sa kanya ay binigyan niya ng karapatang maging anak ng Diyos. 13Naging anak sila ng Diyos, hindi sa pamamagitan ng pisikal na pagkasilang dahil sa kagustuhan ng laman o kalooban ng tao, kundi ng Diyos.
14Naging tao ang Salita at namuhay kasama namin. Nakita namin ang kaluwalhatian niya bilang kaisa-isang Anak#1:14 kaisa-isang Anak: O natatanging Anak. ng Ama, puspos ng kagandahang-loob at katotohanan.
15Nagpatotoo si Juan tungkol sa kanya at ito ang kanyang sinabi: “Siya ang tinutukoy ko nang sabihin kong, ‘May isang darating na kasunod ko na higit kaysa sa akin, sapagkat narito na siya bago pa man ako ipanganak.’ ” 16Sa kasaganaan ng kanyang kagandahang-loob ay tumanggap tayong lahat ng abot-abot na pagpapala. 17Ibinigay sa atin ng Diyos ang Kautusan sa pamamagitan ni Moises, ngunit ang kagandahang-loob at katotohanan ay natanggap natin sa pamamagitan ni Hesu-Kristo. 18Walang sinumang nakakita sa Diyos; ngunit ang kanyang kaisa-isang Anak, na Diyos mismo at pinakamalapít sa Ama ang nagpakilala sa kanya.
Itinanggi ni Juan na Siya ang Mesias
(Mat. 3:1‑12; Mar. 1:1‑8; Luc. 3:1‑18)
19Ito ang patotoo ni Juan nang magsugo sa kanya ang mga pinunong Hudyo mula sa Jerusalem ng mga pari at mga naglilingkod sa Templo, upang tanungin kung sino talaga siya. 20Walang pag-aalinlangang tinapat sila ni Juan at sinabi, “Hindi ako ang Mesias#1:20 Mesias: Sa Griyego, Kristo..”
21Nagtanong sila, “Kung ganoon, sino ka? Ikaw ba si Propeta Elias#1:21 Mal. 4:5‑6.?”
Sumagot siya, “Hindi.”
Muli nilang tinanong si Juan, “Ikaw ba ang Propeta?”
“Hindi rin,” sagot niya.
22Kaya sinabi nila sa kanya, “Kung ganoon, sino ka talaga? Sabihin mo sa amin para may maisagot kami sa mga nagsugo sa amin. Ano ang masasabi mo tungkol sa sarili mo?”
23Sumagot si Juan ayon sa sinabi ni Propeta Isaias, “Ako ang tinig na sumisigaw sa ilang, ‘Tuwirin ninyo ang daan para sa Panginoon.’ ”#1:23 Isa. 40:3.
24Kaya ang mga sinugo kay Juan na mula sa mga Pariseo 25ay muling nagtanong, “Bakit ka nagbabautismo kung hindi naman pala ikaw ang Mesias, o si Elias, o ang Propeta?”
26Sumagot si Juan, “Nagbabautismo ako sa tubig, ngunit nariyan ngayon sa inyong kalagitnaan ang isang taong hindi ninyo nakikilala. 27Siya ang sinasabi kong darating na kasunod ko, na kahit ang magkalag ng tali ng kanyang sandalyas ay hindi ako karapat-dapat.”
28Nangyari ito sa Betania, sa kabila ng Ilog Jordan, kung saan nagbabautismo si Juan.
Nagpatotoo si Juan Tungkol kay Hesus
29Kinabukasan, nakita ni Juan si Hesus na papalapit sa kanya. Sinabi niya sa mga tao, “Narito ang Kordero ng Diyos na nag-aalis ng kasalanan ng sanlibutan! 30Siya ang tinutukoy ko nang sabihin ko, ‘May isang darating na kasunod ko na higit kaysa sa akin, sapagkat narito na siya bago pa man ako ipanganak.’ 31Noong unaʼy hindi ko rin kilala kung sino siya. Ngunit naparito akong nagbabautismo sa tubig upang ipakilala siya sa Israel.”
32Pagkatapos, nagpatotoo si Juan, “Nakita ko ang Espiritu na bumaba mula sa langit tulad ng isang kalapati at nanatili sa kanya. 33Noong unaʼy hindi ko rin kilala kung sino siya, ngunit ang Diyos na nag-utos sa akin na magbautismo sa tubig ang nagsabi sa akin, ‘Kapag nakita mong bumaba ang Espiritu at nanatili sa isang tao, ang taong iyon ang magbabautismo sa pamamagitan ng Banal na Espiritu.’ 34Ito nga ang nakita ko, kaya pinapatotohanan ko na siya ang Anak ng Diyos.”
Sumunod kay Hesus ang mga Alagad ni Juan
35Kinabukasan, naroon ulit si Juan kasama ang dalawa sa mga alagad niya. 36Nang makita niya si Hesus na dumaraan, sinabi niya, “Tingnan ninyo, narito ang Kordero ng Diyos!”
37Nang marinig iyon ng dalawang alagad niya, sinundan nila si Hesus. 38Lumingon si Hesus at nakita silang nakasunod. Kaya tinanong niya sila, “May kailangan ba kayo?”
Sumagot sila, “Rabbi, saan po kayo tumutuloy?” (Ang ibig sabihin ng Rabbi ay “Guro”.)
39Sinabi sa kanila ni Hesus, “Halikayoʼt makikita ninyo.”
Kaya sumáma ang dalawa at nakita nila ang tinutuluyan niya. Bandang alas kuwatro na noon ng hapon, at doon sila nanatili hanggang gabi.
40Ang isa sa dalawang nakarinig ng sinabi ni Juan at sumunod kay Hesus ay si Andres na kapatid ni Simon Pedro. 41Hinanap kaagad niya ang kapatid niyang si Simon at sinabi sa kanya, “Natagpuan na namin ang Mesias” (na kung isasalin ay Kristo). 42Dinala niya si Simon kay Hesus.
Tinitigan ni Hesus si Simon at sinabi, “Ikaw si Simon na anak ni Juan. Mula ngayoʼy tatawagin ka nang Cefas” (na kung isasalin ay Pedro#1:42 Ang ibig sabihin ng Cefas o Pedro ay “Bato”.).
Tinawag ni Hesus sina Felipe at Natanael
43Kinabukasan, nagpasya si Hesus na pumunta sa Galilea. Dooʼy nakita niya si Felipe at sinabi niya rito, “Sumunod ka sa akin.”
44Si Felipe ay taga-Betsaida, tulad nina Andres at Pedro. 45Hinanap ni Felipe si Natanael at sinabi niya rito, “Natagpuan na namin ang taong tinutukoy ni Moises sa Kautusan, na siya ring isinulat ng mga propeta. Siya si Hesus na taga-Nazaret na anak ni Jose.”
46Tinanong siya ni Natanael, “May mabuti bang nanggagaling sa Nazaret?”
Sumagot si Felipe, “Halika, tingnan mo.”
47Nang makita ni Hesus na papalapit sa kanya si Natanael, sinabi niya, “Narito ang isang tunay na Israelita na hindi nandaraya.”
48Tinanong siya ni Natanael, “Paano ninyo ako nakilala?”
Sumagot si Hesus, “Bago ka pa man tawagin ni Felipe, nakita na kita noong nasa ilalim ka ng puno ng igos.”
49Sinabi ni Natanael, “Guro, kayo nga ang Anak ng Diyos! Kayo ang hari ng Israel!”
50Sinabi sa kanya ni Hesus, “Sumampalataya ka ba sa akin dahil lang sinabi kong nakita kita sa ilalim ng puno ng igos? Higit pa rito ang masasaksihan mo.” 51Sinabi pa niya, “Sinasabi ko sa inyo ang totoo, makikita ninyo na bubukas ang langit, at akyat-baba ang mga anghel ng Diyos#1:51 Gen. 28:12. sa Anak ng Tao#1:51 Titulong madalas gamitin ni Hesus para sa kanyang sarili..”
Atualmente selecionado:
Juan 1: ASD
Destaque
Partilhar
Copiar
Quer salvar os seus destaques em todos os seus dispositivos? Faça o seu registo ou inicie sessão
Ang Banal na Bibliya, Ang Salita ng Diyos™, ASD™
Karapatang-sipi © 2009, 2011, 2014, 2025 ng Biblica, Inc.
Ginamit nang may pahintulot ng Biblica, Inc.
Reserbado ang lahat ng karapatan sa buong mundo.
―――――――
Holy Bible, Tagalog Contemporary Bible™
Copyright © 2009, 2011, 2014, 2025 by Biblica, Inc.
Used with permission. All rights reserved worldwide.
