Sơnròp Gơlik Gơs 17
17
Yàng Tom Trồ tòmgơl sơnđan Abram la Abraham
1Tòm tŭ Abram neh tơl sin jơt sin nam, gen Yàng Jehôwa tơlik mat mơ khai mơ đơs lah: “Añ la Yàng Tom Trồ Gơnap Gơnoar Làm Jơh, mê lòt tĕ di đap Añ mơ lơh gơs dô nă cau wil tơl. 2Añ rơp lơh bơta ho bal digùl Añ mơ mê, mơ rơp lơh jơi bơtiàn mê in gơs rơ̆sơmpài ràipơjềng ò git lơh.”
3Gen Abram tơmbic să tòm ù, mơ Yàng Tom Trồ đơs mơ khai lah: 4“Do, đah mơ Añ, Añ neh lơh bơta ho bal mơ mê, mê rơp gơlik gơs bèp oă làng bol dê. 5#Rôm 4:17.Cau ò tai sơnđan mê la Abram,#17:5 Abram hơ̆ la “bèp dờng màng”. mơ rơp sơnđan mê la Abraham,#17:5 Abraham Hơ̆ la “bèp oă jơi bơtiàn dê”. bơh Añ sơnđan mê la bèp oă làng bol dê. 6Añ rơp lơh mê in tơnggơs oă ngan, lơh mê in gơlik gơs oă lơgar, mơ ală bơtau rơp bơh mê mơ gơs. 7#Luk 1:55.Añ rơp lơh bơta ho bal digùl Añ mơ mê, mơ jơi bơtiàn mê tòm ală rài bol khai dê, do la dô bơta ho bal kòp rài gam sùm sùm, tồ Añ lơh gơs Yàng Tom Trồ mê mơ jơi bơtiàn mê dê sơl. 8#Broă 7:5.Añ rơp ai mê mơ jơi bơtiàn mê in lơgar mơ mê ơm ing, hơ̆ la làm lơgar Kanaan, lơh gơs sre brê kòp rài gam sùm sùm, mơ Añ rơp lơh gơs Yàng Tom Trồ bol khai dê.”
Sơntòm bơta siat gơltau
9Yàng Tom Trồ đơs mơ Abraham lah: “Pơnah đah mê mơ jơi bơtiàn mê dê rơp prap gàr bơta ho bal Añ jê tòm kòp rài bol mê dê. 10#Broă 7:8; Rôm 4:11.Do la bơta ho bal Añ jê mơ rơp prap gàr digùl Añ mơ mê mơ ală jơi bơtiàn tơnơ̆ mê tai, hơ̆ la kòp nă cau klau pal rơp siat gơltau. 11Ală bol mê pal siat gơltau, bơta hơ̆ rơp la dô nơm tềl bơta ho bal digùl Añ mơ ală bol mê. 12Tòm ală rài, kòp nă cau klau tòm ală bol mê bulah deh tòm hìu hala ai jền blơi#17:12 Cil: rwat. bơh cau bơdìh, ò di bal mơ jơi bơtiàn mê dê, tòm tŭ neh tơl phàm ngai rau, gen pal siat gơltau.
13Kòn klau lơi deh tòm hìu mê, mơ cau klau lơi mê blơi mơ jền, gen siat tĕ gơltau: behơ̆ bơta ho bal Añ jê rơp gam sùm sùm tòm poac să ală bol mê dê. 14Dô nă cau klau lơi ò bài kong siat gơltau tòm poac să khai dê gen rơp bơtrơh tơlik bơh làng bol khai dê, cau hơ̆ la cau gơltac bơta ho bal Añ jê.”
Yàng Tom Trồ ho ai Isak Abraham mơ Sara in
15Yàng Tom Trồ đơs mơ Abraham lah: “Ai Sarai bau mê, bañ sơnđan la Sarai tai, mơya sơnđan khai la Sara.#17:15 Sara: Jơnau do tòm jơnau Hebrơ gơs gơtha la “kòn ùr bơtau”. 16Añ rơp ai lơngai khai in, mơ bơh di khai Añ rơp ai mê in dô nă kòn klau. Añ rơp ai lơngai khai in, mơ bơh khai rơp gơlik gơs oă làng bol; ală cau bơtau ală làng bol dê rơp bơh khai mơ gơlik gơs.”
17Gen Abraham tơmbic să tòm ù, khai ñŏ mơ đơs tòm nùs lah: “Gơs dô nă cau neh tơl dô rhiang nam rau mơ tơnggơs dô nă kòn klau di sơl? Ai Sara neh sin jơt nam, rơp deh di sơl?” 18Abraham đơs mơ Yàng Tom Trồ lah: “Ơi, dan Ismael geh kis di đap Kơnràñ!” 19Yàng Tom Trồ đơs lah: “Ò di behơ̆, Sara, bau mê rơp deh dô nă kòn klau, mê rơp sơnđan la Isak.#17:19 Isak: Jơnau do tòm jơnau Heb gơs gơtha la “ñŏ”. Añ rơp lơh bơta ho bal mơ khai, nàng lơh bơta ho bal kòp rài gam sùm sùm jơi bơtiàn khai in. 20Añ kung dòp jơnau mê hòi dan Ismael in. Añ ai lơngai khai in, rơp lơh khai in tơnggơs rơ̆sơmpài ràipơjềng. Khai rơp tơnggơs jơt bàr nă kòn bơtau, mơ Añ rơp lơh khai in gơlik gơs dô nơm lơgar dờng. 21Mơ Añ rơp lơh bơta ho bal Añ jê mơ Isak, mơ Sara rơp deh mê in tòm nam dă, kơnhai do.” 22Dơ̆ Yàng Tom Trồ neh đơs sir mơ khai rau, gen Kơnràñ guh bơh dê Abraham.
23Abraham ai Ismael, kòn klau khai dê, mơ jơh ală cau klau tòm hìu, deh tòm hìu hala blơi mơ jền, mơ tòm ngai hơ̆ khai siat gơltau bol khai in jat be jơnau Yàng Tom Trồ neh sồr. 24Abraham neh tơl sin jơt sin nam tòm tŭ khai siat gơltau. 25Ai Ismael, kòn klau khai dê, tơl jơt pe nam tòm tŭ khai siat gơltau. 26Mơ tòm dô ngai hơ̆ Abraham mơ Ismael, kòn klau khai dê siat gơltau. 27Mơ tơl nă cau klau tòm hìu, bulah deh tòm hìu hala blơi mơ jền bơh cau bơdìh, siat gơltau bal mơ khai.
Atualmente Selecionado:
Sơnròp Gơlik Gơs 17: KPM2018
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2018 United Bible Societies. All rights reserved.