Sơnròp Gơlik Gơs 18
18
Ală cau gơnrơh lòt còp Abraham
1Yàng Jehôwa tơlik mat mơ Abraham di tòm chi Mamre, tòm tŭ khai nggui di mpồng sàl tòm gùl ngai. 2#Heb 13:2.Abraham pò mat gŏ pe nă cau klau ntào di đap khai. Dơ̆ khai gŏ gen ntoat tus di đap pe nă cau hơ̆ mơ tơmbic să tòm ù, 3mơ đơs lah: “Ơ Kơnràñ, dilah añ geh bơta nđàc di đap Kơnràñ, bañ lòt sơrlèt rlau mơ dan dah còp hìu cau dĭ Kơnràñ dê. 4Añ dan ală ồng ai gơnoar cau in ai dô êt dà rào jơng ală ồng in, mơ dan ală ồng rlô di tòm chi do. 5Añ rơp lòt nàng ai dô pet piang lă mơ cèng ală ồng in nàng sa tồ gơ ram kơndul#18:5 ram kơndul: Cil: kram nùs. ală ồng gen sồng lòt gùng tai, tài bơh ală ồng lòt tus di hìu cau dĭ ală ồng dê.” Bol khai đơs lah: “Kư̆ lơh tĕ be jơnau mê neh đơs.”
6Gen, Abraham sơrbac sơrbang mut tòm sàl, tus hơ Sara mơ đơs lah: “Ai tĕ mhar pe jơrlŭ kơmbuh phe,#18:6 Js: 3 se-a, pơgap 20 kg (kơr). bơcă klac tĕ mơ lơh piang lă dềt.” 7Gen Abraham ntoat tus dê mpồl kơnrồ, kup dô nơm kơnrồ kòn mƀòc#18:7 mƀòc: Cil: rhum. poac, ai cau lơh broă in gơm mhar mơ yò sào. 8Lồc behơ̆, khai ai dơngi dà toh mơ dà toh bal mơ kòn kơnrồ neh gơm rau, yò sào di đap bol hơ̆; ai Abraham ntào di tòm chi di gah bol khai. Behơ̆, bol khai sào.
Yàng Tom Trồ yal jơnau deh Isak
9Ală ồng hơ̆ lùp Abraham lah: “Ntềng đah Sara, bau mê taih?” Khai ho lah: “Ne, khai tòm sàl ne.” 10#Rôm 9:9.Dô nă đơs lah: “Añ rơp rê wơl ngan mơ mê tòm kơnhai do nam dă, mơ tŭ hơ̆, Sara, bau mê rơp gơs dô nă kòn klau.” Sara ơm di mpồng sàl bơh ngkòi cau hơ̆, kơno ală jơnau hơ̆.
11Abraham mơ Sara neh kra, sơnam neh jòng rau, Sara ò tai gơs be òs cau ùr dê. 12#I Pier 3:6.Sara ñŏ tòm nùs mơ đơs lah: “Neh kra be do rau, añ gam gơs bơta chò hòp hơ̆ tai sơl ơ? Mơ kơnràñ añ kung neh kra rau.” 13Yàng Jehôwa lùp Abraham lah: “Ñchi bơh tài Sara ñŏ mơ đơs lah: ‘Añ rơp deh ngan tòm tŭ añ neh kra sơl ơ?’ 14#Luk 1:37.Gơs bơta lơi Yàng Jehôwa ò rgơi lơh sơl ơ? Tus di kơnhai neh pơgon, Añ rơp rê wơl hơ mê, mơ Sara rơp gơs dô nă kòn klau.” 15Bơh Sara rngòt gen pơndang mơ đơs lah: “Añ ò ñŏ ò!” Mơya Kơnràñ đơs lah: “Ngan ai neh ñŏ rau.”
Abraham hòi dan ala làng bol Sôdôm in
16Ală cau hơ̆ ñă lòt, sền hơ đah Sôdôm. Abraham kung lòt bal jun bol khai.
17Yàng Jehôwa đơs lah: “Añ pồn mơ Abraham ñchi bơta lơi Añ rơp lơh sơl ơ? 18Abraham rơp gơlik gơs ngan dô nơm lơgar dờng mơ pràn kơldang, ală làng bol tòm dunnia rơp kơnòm di khai mơ geh lơngai. 19Añ neh sac rwah khai nàng khai bơto sồr ală kòn mơ hìu nhă khai dê jat gùng Yàng Jehôwa dê, lơh ală bơta song ngan mơ song ring, gen behơ̆, Yàng Jehôwa rơp lơh gơlik di ngan be ală jơnau Kơnràñ neh ho mơ Abraham.”
20Yàng Jehôwa đơs lah: “Tài bơh jơnau hòi driau bơh Sôdôm mơ Gômôrơ la oă ngan, tồi glài ală ƀòn hơ̆ la kơnjơ̆ ngan, 21gen tàng Añ kòñ mù nàng sền dilah ƀòn hơ̆ lơh ngan be jơnau neh hòi tus hơ Añ, dilah ò ngan gen Añ rơp git.”
22Ală cau hơ̆ bơh tềng hơ̆ lòt tus hơ Sôdôm mơya Abraham gam ntào di đap Yàng Jehôwa. 23Abraham lòt tus rềp mơ lùp lah: “Kơnràñ rơp tơnroh cau song ring bal mơ cau iơh bơsak sơl ơ? 24Digơlan tòm ƀòn gơs pram jơt nă cau song ring, Kơnràñ kung tơnroh jơh bol khai sơl ơ? Kơnràñ ò toh glài ƀòn hơ̆ in bơh pram jơt nă cau song ring ơm tòm ƀòn hơ̆ sơl ơ?
25Ò gơs tŭ lơi Kơnràñ lơh behơ̆ ò, tơnroh tơn cau song ring bal mơ cau iơh bơsak, gen behơ̆ cau song ring kung be cau iơh bơsak sơl ơ? Ò, Kơnràñ ò gơs tŭ lơi lơh behơ̆ ò! Bơtau cahrña jơh dunnia ò di ò lơh bơta song ring sơl ơ?” 26Yàng Jehôwa ho lah: “Dilah Añ jòi gơs tòm Sôdôm pram jơt nă cau song ring, gen bơh ală cau hơ̆ Añ rơp toh glài jơh dô ƀòn.”
27Abraham đơs tai lah: “Bulah añ do la kơmbuh ù mơ bùh, añ kung khin đơs tai mơ Yàng. 28Dilah tòm pram jơt nă cau song ring mơ ò tơl pram nă, bơh ò tơl pram nă gen Yàng rơp tơnroh jơh ƀòn sơl ơ?” Kơnràñ ho lah: “Dilah Añ jòi gơs poan jơt pram nă cau, Añ ò tơnroh ƀòn ò.”
29Abraham kư̆ đơs lah: “Digơlan tòm ƀòn gơs mìng poan jơt nă cau song ring.” Kơnràñ đơs lah: “Añ rơp ò tơnroh bơh di poan jơt nă cau do.”
30Abraham đơs tai: “Añ dan Kơnràñ bañ gơjrañ gen añ rơp đơs tai: Dilah tòm ƀòn hơ̆ gơs mìng pe jơt nă cau song ring.” Kơnràñ đơs lah: “Dilah Añ jòi tòm hơ̆ gơs pe jơt nă cau gen Añ ò tơnroh.”
31Abraham đơs tai: “Do, añ khin đơs mơ Kơnràñ: Dilah gơs bàr jơt nă cau song ring lơm.” Kơnràñ đơs lah: “Bơh di bàr jơt nă cau hơ̆, Añ rơp ò tơnroh ƀòn.”
32Abraham đơs tai lah: “Dan Kơnràñ bañ gơjrañ gen añ rơp đơs dô dơ̆ tai: Dilah jòi gơs mìng jơt nă cau song ring tòm hơ̆ lơm.” Kơnràñ đơs lah: “Añ kung ò tơnroh ƀòn hơ̆, bơh di jơt nă cau hơ̆.”
33Tòm tŭ Yàng Jehôwa neh sir tòmbơhbơr mơ Abraham rau, gen Kơnràñ lòt; mơ Abraham rê hơ sàl khai dê.
Atualmente Selecionado:
Sơnròp Gơlik Gơs 18: KPM2018
Destaque
Compartilhar
Copiar
Quer salvar seus destaques em todos os seus dispositivos? Cadastre-se ou faça o login
© 2018 United Bible Societies. All rights reserved.