Yohanna 2
2
Mulapa N Kana
1Shi anyipyei ngun aba ɓo la, diya, Yesu ʼya wa lo mula pa n Kana Galili nya. 2Yesu ɓedo nwo abara ɓei nyi ce n mula pa ʼbahi.
3Esa nu nya sin-sin yi ɓo ku zo na mula pa ba yi, Yesu ʼya wa gna Yesu ge, “Gye nyasin-sin yi ku zo.”
4Yesu wa ci wo ʼya ge, mita zhin nyaho-nyahoyi n saiye m. Ai omi sa to sin n mi ɓa zhin oɓo wo-woyi nyi m.
5Yesu ʼya wa gna atnu-tnui ge, “ɓo wa gna fye ge fye zhin, fya zhin.”
6A shakun yakwo ɓei zhin ɓo n gun tnanyi, a shakun akuta nya nu ɓei. Ɓaɓo zhin ɓai gyi a garuwa-kanazuru nya ngye shiba (20) ko kuwa shita (30), a Yahudiyi ɓei zhin amula ɓo n ɓai nu. 7Yesu wa ci ge, “Fye nu ɓa n nuwan yi.” Nsayi-sayi-i yi, ɓa nuɓa. 8Yesu wa ci ɓa ge, “fye lo cei fye ga mula-tukwoda.” Ɓahin kwa ɓa lo n cei.
9Shi wo ɓo to wo, to wakpe aba n kwa gmi m, ama atnu-tnuyi da ɓei kpe. Ntu cenu mula tukwoda wa yi mula ɓa.
10Wa ci wo ge, “Nyasin-sinyi ye dalo sosai. Knihin nu na zhin ai ɓei n deyeyi so shi a? Azaje zhin ɓa ɓe n nyasin-sinyi manayi nu na bye. N kwa ku zo, a kma ɓe n nukwoyi yi.”
11Deye nu ɓei zhin ɓo wo-woyi kmisunyi, n Yesu ɓo zhin dna n Kana Galili nya. Shi owa bara ɓo gye wo mwa-mwa, ɓa ga wo gaiciya.
12Shi na ɓo knu na mula ɓo zhin ba, Yesu wa lo Kafarnahum n wo ʼya yi n wa zaje yi, n wa barai, ama ɓa to ɓo mwasa n ɓom.
Aduwa Nyakun To Zhin Gniko Num
13Esa nu Paska ɓo la wu viyi, Yesu wa lo Urushelima.
14Wa gye aza fi n na duwa-nyakun ɓai kun anya. A nakwo, akni, ɓedo n na lukpe yi. Agyiwye shanyi ɓo nyi ce. 15Wa pmi knalufin wa nya ɓa ya na duwa nyakun, Wa nya anyakunyi ya, Wa kni atebur nyikun. 16Wa gna alukpe kunyi ge, “fye kun anya ye ya n ya. Fye to ze ʼmi Dada nyakun a gnikwo gni ba m.”
17Owo abara ɓa pa ge, Littafi Alkawali kwo-kwoyi ɓo ku da ge, “Wyenyi ntu ho nyakun ɓo, kwo nu ɓa gyi mi ngye ona.”
18A Yahudiyi ɓa nya ɓo ge, “Nyika ga ho iko yeʼa? Ngye Shekwoyi iko nu, gna yi ya wo. Zhin aɓo wo-woyi ya gye.”
19Yesu wa cige, “To, miɓa zhin ga fye. Fye la aduwa-nyakun ye ya, miɓa mi kwo n na nyipyei ngun ata kawai.”
20Nsayi ɓa ya aɓoda, “Yi ɓei mi nyakun ye n na ye shinyi nu, Hoi gna ho ɓa mi kwo na nyipyei ngun ata kawai? Kwo ta ye zhin.” 21Ama Yesu ɓei da wo nayi nu ɓo. 22Sanu n wo ɓo laka n vingwo, Owa bara ɓa pa nya wo ɓei gna ɓa nyi. Ɓa ga Littafi Gyi-gyi-yi gaiciya. Ɓa ga Yesu eda gaiciya njesun.
23Aza n mwa begye n paska ɓa gawo gaiciya, ntu naɓo wo-woyi ɓo n ɓa ɓei gye nyi. Kwa wu ɓage, wonu zhin aza gniyi. 24Yesu to ɓei ga ɓa gaiciya m, gama wo kpe zanyi-kwoci bugba ye lo sarai. 25Zaho-zahoi ta mi wa gna wo zado ɓon. Ntu ge wo kpe aza bugba lo sarai. Zado nu to ɓei ɓa gna wo zanyi-kwoci ɓon. Wo ɓei kpe shi za bugba pye doshan yi.
Selectat acum:
Yohanna 2: GAW
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.