Yohanna 3
3
Zhiɓeyi N Sukwoyi
1Nwyihoyi, sukwoyi la zhin, a, Yahudiyi adini tukwoda ho, n dna na farisiyi kpegye ai yi wo ge Nikodimu. Wo ɓei lo Yesu aba ntuge wa nya wo ɓo fya-a. 2Wa gna Yesu ge, “Mallam, yi kpe lo ge Shekwoyi na tnu n hoi ha wuyi nya. Yi kpe lo lonu, ntu naɓo wo-woyi ɓo n ho zhin nyi.”
3Yesu wa gna wo, “Miɓa gna ho gaiciya, sai a shan ho ma, ho ta mi ha gye Shekwoyi bemi m.”
4Ce ɓei wo Nikodimu n mwa, wa nya ge, “A shan mi ma n wu na? A zhin a shan zakwoyi ma? Zakwoyi ɓa mi wa lo wo ʼya nubo a je wo ma?”
5Yesu wa gna wo ge, “Zaho-zahoi to lo n wo vi mi ɓemwi to ai shan wo ma n nuwan yi ɓedo n Zafun yi m.” 6Aza ɓami ɓa ma azanyikwoci. Ama Zafun Gyi-gyi-yi nu ga wye-wyeyi n kwo gmi n ʼshe nyi. 7Ce to wo hon, shi ma gna ho ge, “Tile a shan ho man.” 8Ese zhin kwa ci a ku gye ko wye? Ho zhin ha wo ashan nu kawai. Ho ta kpe bwa kwo kun, kwo kwa aba kwo lon. Zafun ɓo wu lo nu, yi ta kpe shi Zafun lo tnu-tnu wa ma aza m.
9Nikodimu wa nya wo ɓo ge, Kni nu ho da n wu lonuʼa?
10Yesu wa nya wo ɓo ce, “Ho to zhin a Israilayi male nun? Hoi gna ge ho ta kpe ɓo lo n mi da nyin kwo?
11“Ɓehin-hin, ma gna ho, Yi da ɓo nu yi kpe. Enya ya gye yi zhin kwo nu saida, ama fye ta gwo yi saida lon. 12Ama n fye to ga aɓo gaiciya n mi gna fye n ɓa zhin lo dna n na nyin, fye ɓa ga gaiciya n wuna, mi ya gna fye ɓo n kwo zhin lo n ʼshe miʼa? 13Mi gmi n ʼshe nu, ama zaho to shin eshe lo m, sai omi oza Nugun. 14Njesun shi Musa ɓo ku owa sunknanya kpe n busi dna zhabui nyi, n lonu na ɓa zhin mi. 15N nabayi zaho-zahoi n wa gami gaiciya wa bwa wye-wyeyi nyalo-nyalo nya.” 16Gama Shekwoyi wa ye na nyi yi, har wa wo ʼɓi gba gmanyi ga, ntuge zaho-zahoyi n wa gawo gaiciya, wota bwi n, ama wo ɓa bwa wye-wyeyi nyalo-nyalo nya. 17Shekwoyi to ɓei tnu n wo ɓi-i ntu ge wa da ʼwa nun, ama ntuge wa gni anyi.
18Aza n ɓa gawo gaiciya ɓa ta bwi aba fi n wan, ama aza n ɓa na wa ɓo, aku alaifi wa pma ɓa da, ntuge ɓa to ga Yesu, n wo zhin Shekwoyi ʼɓigba gmanyi, gaiciyan. 19Owa ku gyi ɓa ge, buzangna la ɓe anyi mi, ama ɓa gna wyegma ye ndu buzangna. Ntuge ɓa zhin aɓo nukwoyi zhin yi nu. 20Ɓa ɓo wun buzangna ʼshe nya nu, ntuge ɓa ɓei ye ɓa zhin aɓo nukwoyi fi n wyegmaa, to a gye ɓa wyen m. 21Gaiciya dayi zhin Wa ye buzangna cici, Wo ta wo vinyikwon, ntu ge wo zhin ɓo dna n Shekwoyi yenu, woi ye aza ɓa gye.
22Avun deye Yesu wa fa Urushelima wa ɓe Yahudiya n wa barai, Nbwayi ɓa fi ɓo woi zhin aza batisma.
Yohanna N Yesu Yi
23Yohanna njesun woi zhin batisma ce. A yi abayi ge Aenon, Ko ɓo wu vivi n Salim yi, Nuwan ɓei nyi n ɓo n mwa. 24Yohanna to ɓei lo jalu kpam. 25Nwyihoi, Aza ho ɓai na aɓo Yohanna barai, ɓai gna ɓa ge, Yesu batisma gna Yohanna nya bmiya lo. 26Nsayi-sayi Yohanna bara ɓa lo da Yohanna. Ɓa gna wo ge, Male, oza n yi ɓei gye n Urdun kma, ha ga saida tu nwo tukwo nyi wo zhin batisma lo ce. Aza vinya njesun ɓai lo wo aba nu.
27Yohanna wa gna ɓa ge, Shekwoyi na ga zaho-zaho wo tnu-tnu. 28Mi to ɓo ku gna fye ge, mi to zhin Kristi nu m? Mi zhin wo tnu-tnuyi nu, miye aza vinya ɓa lo wo abanu. 29Oza n wo n mula-nyikwoyi, wo nu zhin mula-ɓa. Mula-ɓa nugundo kwa woi dagma n jesun. Mi zhin mula-ɓa nugundo nu. Mi dagma lo n woi. 30Owo mwa-mwa ɓa ɓe-ɓe. Ama tile ma gba-gba.
31Oza wo gmi n ʼshe nyi wo du zaho-zahoyi lo. Mi zhin anyi nya nu. Emi ɓeye-kpe to mwa lo m.
32Nya wa wo, woi gye, ko nu n wo da, ama aza fyewyi nu ga wo ɓeda gaiciya. 33Aza n ɓa ku gaiciya ga wo, ɓa kpe lo ge owo ɓeda zhin gaiciya nu. 34Yesu n Shekwoyi wa tnu woi nyi, wo da owo aɓeda nu; Shekwoyi la Zafun gawo ntna cezhiba. 35Shekwoyi ye Yesu har wo ku anya ga wo vinya. 36Oza wa ga Yesu gaiciya wo ɓa bwa wye-wyeyi. Oza n wo to ga Yesu gaiciyan wo ɓa bwi. Shekwoyi minagyi ɓa tu nwo tukwo.
Selectat acum:
Yohanna 3: GAW
Evidențiere
Partajează
Copiază
Dorești să ai evidențierile salvate pe toate dispozitivele? Înscrie-te sau conectează-te
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.