YAPHANG 15
15
Kaitor Abram bai swmai tangmani
1Aboni ulo khe, Abramno Subraiyung imang-mukthang khe hai hwnwi samano khna kha, “Ta kiri di, Abram, Ang nini phui; nini sokat belai kotor wngnai.”
2Tamo khe Abram hai hwnwi sa kha, “O Subraiyung Kaitor,#15.2. Subraiyung Kaitor: Hibru kók bai “Adonai”. nwng ano tamo rwnai, tamni hwn ba ang tabukbo bwsa se kwrwi kho, ani bebakni mannai wngnai le Damaskosni Eliaser se?” 3Abram hai hwnwi sa kha, “Nai di, nwng ano bwsa-bẃtẃi se rw ya kho; tei ani nogo achainai seleng se ani bebakno mannai.”
4Nai di hai hwnwi Subraiyungni kók bini thani sók phai kha, “O borok nini bosongni manthaino man glak; nini sakni tei okni bwsa se nini bosongni mannanino mannai.” 5#Rum 4.18; Hib 11.12.Tei bo bono phataro tubu-ui hai hwnwi sa phai kha, “Nwng nokha saka bwkhak naisa di tei nwng athukirirokno lekhaui da man nai di.” Hakhe bo bono hai hwnwi sa kha, “Nini bosongbo abo hai’-no wngnai”.
6 #
Rum 4.3; Gal 3.6; Jak 2.23. Abram Subraiyungno bwkha bera kha; tei aboni bagwi Subraiyung bono bwkha phurjak kha tei bono borok kaham hwnwi yachak kha.
7Tei bono hai hwnwi sa kha, “Ang’-no Subraiyung, nono Koldiarokni ha Ur hani o hano rwnani tei tongna bagwi ringwi tubunai.”
8Tamo khe bo hai hwnwi sẃng kha, “O Subraiyung Kaitor, ang abono mannai hwnwi bahai khe saui mannai?”
9Bo bono hai hwnwi sa kha, “Ani thani nokha bisik thamni musuk masa, pun masa tei mera masa, tokthu masa tei pharuk bwsa masa tubu-ui phai di.” 10Hakhe bo abórokno bebakno tubu-ui phai kha tei kochoknwi khe rathar kha, khaksa khaksano nahar lalai khe beraui rw kha; tamo khe tokrokno le bo kochoknwi khlai li ya. 11A kwthwirokni saka-o sikruk klai phai kha, tamo khe abórokno Abram rwgwi rohor kha.
12 #
Job 4.13,14. Sal tháng rw rwk wng kheno, Abram belai khe muktrwi phaijak kha; hakhe bini sago kirima tei mwnakma phai sók phai kha. 13#Lam 1.1-14; Sam 7.6.Hakhe Subraiyung bono hai hwnwi sa kha, “Nini bwsarok buini ha-o phatarni borok wngwi ma tongwinai; bórok aro seleng wngwi ma tongwinai tei bisibrwira belai khe sátokjagwi ma tongwinai; 14#Lam 12.40-41; Sam 7.7.tamo khe bórokno seleng khati rwnairokno ang majra rwnai tei bórok a hani nongkhorwi phai phuru khe bórok kwbángma rangchak-ríchak tlangwi thángnai. 15Nwng sakbo umor kolok wngwi tongwi kwchang kwchang khe chakra umoro thwiwi phobjaknai. 16Nini bosongrok oro kiphilwi phai ya sini aro bosong kusungbrwi kánai; tamni hwn ba, Amorsarok belai borok hamya wng súgwi majra berjakna nang súk ya sak ang bórokno rwkhlai glak.”
17Sal thángwi, mwnak wng khe, hoku nongkhorjak hórni twk tei hór chẃngjak homchang nukjagwi a ratharjak muini kwchar tẃi láiwi tháng kha. 18#Sam 7.5.A salo Subraiyung Abram bai hai hwnwi saui swmai tang kha, “Nini bosongrokno ang o hano rw-o; Ijipni twimani simi Uphratis twima jorani harok, 19Kenini ha, Kenijisasongni ha, Kadmosongni, 20Hitisongni, Peressongni, Rephaimsongni, 21Amorsasongni, Kanansasongni, Girgassasongni tei Jebussasongni ha.”
Выбрано:
YAPHANG 15: KOKBSI
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.