Lúkas 21
21
Madankuno gukan pi kahayakte givetunat Uhokri
Mk 12.41
1Ayteke ariwnteke ini ig Kiyavwiye Jesus ayge avuriwne hiyeg kakanhewnevwi gidahan Kiyavwiye Uhokri ayge ariku ini leglis kewye Uhokri Givin. Ig hiyap ka aynsima igisavye mpiya awvre, igkis ikenes karukri ta arikut atiy.
2Ayteke ig hiyap pahavu madankuno danuh atere. Eg madiptivyo. Eg ikano mmukna kirehka ta arikut atiy, aynesawa karukri.
3Ig hiyapni hene, ig awna:
— Nor madankuno madiptivyo gukan pi kahayakte ta givetunat Uhokri ariw gikankis madikte neras hiyeg. Ihanabay inakni nuwnuh. Henewatbaki in. 4Mmanawa igkis kakanhaw akak gikakurakis asemne. Egme kakanhaw akak madikte gudahan gukakura. Yuma ariknawnema eg darih adahan isimno ku pariye gumawkanitnene.
Ka aynsima mbayka nehmnikuhpiye
Mt 24.1; Mk 13.1; 2Tim 4.1; 2Tim 3.1; Ap 6.1
5Ayteke ariwnteke ini gaytakkis gikannuhnivwi kavusa kinetihwa pawtak amin ini leglis Uhokri Givin ku samah in barewyewa paytwempu, in kehka akak barewyovwinen tip, in bereswavu akak hiyeg gikankis. Igme Kiyavwiye Jesus timapni hene, ig awna gitkis:
6— Mmah yis hiyap ini paytwempu? Aysawnemenek yis hiyapni madikte mehpikanek. In higohe madikte waykboritenek. Ine pohow tip ka misakwanek pavitmintak akak guyaki tip akiw.
7Igkis timapni hene, igkis ayavgi:
— Kiyavwiye, kabetvahki inakni piwn kahayaknek? Pariye danuh adahan areketni ku in kennesa adawnhanek?
8Igme kaytwa giwnkis:
— Ka yi muwaka kinikiswa ta gitkis hiyeg. Mmanawa aysawnemenek ka aynsima hiyeg kahayaknek nuwavrik ke wotbe ignes ayta nuwntakbe. Igkis awnanek: “Nahnewa Cristo, nah Uhokri gikanyan adahan yikumaduketni.” Hawata igkis awna: “Kuwis ahawkanavrik amaksemni hawkri.” Ka ba yi iha inakni giwnkis. 9Ku aysaw yis timapnek arak kutimniki akak kerka ka yi muwaka wadisasaw. Amawka ku inkit danuh, heneme kote danuhte amaksemni hawkri.
10Ayteke ig awna gitkis:
— Aysawnemenek pahabunene hiyegviyene kerbetvikisnek gikakkis nawenyewa hiyegviyene akiw. Guvelma kerbetvikis igkisweke guvelma. 11Avim ini ka aynsima sagkaki ka ahawnasima muwapuw waxribdiw. Hawata mbeyevye karayt biwh muwapunek. Hawata ka aynsima mihetniki danuh muwapunek. Hawata akiw mbeyevye arikna humawnek amadga en. In keh hiyeg avis ka aynsimanek.
Jesus gihiyegavu hiyapkiska mbeyne gitkisnek
Mt 10.19, 24.9; Mk 13.9; 2Tim 3.1
12— Heneme avit ini mbayka danuh, yis nuhiyegavu kamaxavepkanek gavitkis hiyegviyenenek yis hiyapkiska mbeyne yitnek. Avim ini yis kamiyevepkanek ariku gileglisakis. Ayteke nikwe yis paraksepkanek arikut parakseket. Hawata akiw yis kamiyevepkanek ta gitkis yikivara, ta gitkis hiyaptigi. Yis waxwavepkanek ta givetunatkis avatra ku samah yis nuhiyegavu.
Uhokri Gitip iki yit iwit adahan yis awna
Mt 10.19; Mk 13.11; Lk 12.11
13— Ka sam. Ini humaw yihawkanavriknek adahan yis kinetihwene nudahan. 14Ahekbetanabay yihiyekemni ku akak inin adahan yis ka ivegmina yihiyekemni adahan ku pariye yis awna gitkis avim ini hawkri. 15Nahwa iki yitnek iwit adahan yis awna gitkis avim ini. Nahwa iki yitnek hiyakemniki. Ayge yivetunyavu ka hiya asamanak adahan igkis diyuhkis yinetni. Igkis ka hiya igkisma kaytwa yiwn avim ini hawkri.
Aysawnemenek ignesweke pakebyekne kamaykisekbet
Mk 13.12
16— Avim ini hawkri yigwa kamaykisweynek, yinagwa kamaykisweynek, yikebyuvwiwa kamaykisweynek hawata yikagmadavuwa kamaykisweynek. He egkis umahkise yaytaknek. 17Ayge madikte hiyeg amiyhevyinek awaku ku samah yis nuhiyegavu. 18Ka sam. Uhokri avuriwyinek kabayntiwa. Yisemniwa ka matisnek. 19Ku yis ka isahkiswa nuwhunek, yis aymuhwa gimun Uhokrinek adahan avanenekwa.
Jerusalém mehpikanek
Mt 24.15; Mk 13.14; Lk 23.28
20— Ku aysaw yis hiyap Jerusalém kiyaraniw akak suwtat, ini areketni ku ahawkanavrik kuwis danuh adahan in mehpika. 21Ku aysaw in danuh nikwe amawka igkis pese ayteke kibehtenwa. Amawka ku pariye misekwenevwi ay Judeyamnaw amawka ku igkis bisike ahavwikute avuheku ini waxribdi. Igkisme ku pariye misekwenevwi ay avit Jerusalém amawka igkis pese ayteke nivititak. Igkisme ku pariye misekwenevwi avawyewa ariw ini paytwempu amawka igkis ka bisik atere nivitit. 22Mmanawa ahawkanavrik hiyeg jerusalémyenevwi katiwnivwevye avatra gitaraksankis. Madikte in danuh ta gitkis ku samah Uhokri gannasan awna. Metakwa in kahayak. 23Akayih. Ka aynsima mahikoriki avim ini hawkri gudahankis tinogben biwhkisnovwi hawata gudahankis tinogben ku pariye sukkisanyovwi. Ka aynsima mahiko adahan egnes bisik. Mmanawa ka aynsima mbayka danuhnek ta avitit inin waxri. Hiyeg hiyap mbeyne ka aynsima aynek avatra gitaraksankis. 24Ka aynsima hiyeg gaytakkis igkis umahavepkanek akak iwan. Ka aynsima hiyeg gaytakkis igkis kamaxavepkanek igkis waxwavepkanek ta avitit mpuse waxri. Avim ini ignes hiyeg kane judeyenevwima igkis xuwehe hiyeg jerusalémyenevwi giwaxigkis. Igkis misakwa ayge he ku aysaw gihawkanavrikis danuh adahan Uhokri pisenwa gikumadukankis ayge.
Jesus gidawnhan atan
Mt 24.29; Mk 13.24; 1Tes 1.7; 2Ped 3.10; Ap 1.7, 19.11
25— Ayteke ariwnteke ini, mbeye arikna humawnek arikvi hawkri akak kamuw akak kayg akak warukma akak waravyu. Ayme amadga wayk madikte hiyegviyenevwi kiyimwih ginaktinkisnek awaku ku samah paraw akak bobo kiman mpiynevevye parahwokwa. 26Hiyeg nuwiknawarumpi awaku gavisnikis abohri ku pariye me danuhmet gitkis. Mmanawa madikte ku pariye arikunene hawkri, avim ini in ayguhwebdinek ariw niwetri. 27Ayge avim ini nikwe hiyeg hiyavunek, nah ku pariye wageswe awayg amadgaya inin. Nah ayta abetimpi ukuhne akak madikte nudatni akak madikte nukiytani kabutennene. 28Yisme ku samah yis hiyap ini mbeyne danuh, ka yi muwaka avisasaw. Sarayhnay yivegyi ta inurikut adahan yis nuhivetni. Avim ini yamnihka humaw kibehtenwa.
Yuwit patuwesbunka amin “figeyra” akat
Mt 24.32; Mk 13.28
29Ayteke ig Kiyavwiye Jesus awna gitkis pahat iwit patuwesbuhka. Ig awna:
— Ivegnay ta gumkat nor ah akat “figeyra” akak arakembet ah akat akiw. 30Ku aysaw wis hiyap egnes kavanhaw akiw in areketni huwewe wot ku guhawkanavrikkis kennesa danuh adahan egkis kew. 31Hawata aysawnemenek ku aysaw yis hiyap ini mbeyne danuh, metakwa yis hiyakni kuri ku Uhokri gikumadukan ahawkanavrik kennesa danuh kuwis. 32Hiyeg ku pariye amedgenevwi inin avim ini hawkri, avit ignes madikte miyarapnek ayipa inakni madikte danuhnek gitkis ku samah nuwnuh. Ihanabay inakni nuwnuh. Henewatbaki in. 33En biyuke, waxri biyuke, heneme nuwnuh ka biyuk.
Misakwanabay ahegbet avanenekwa
Mt 24.42; Mk 13.35; Lk 12.35; 1Tes 5.4
34— Misakwanabay ahegbet avanenekwa avit ini hawkri danuh. Ka yi muwaka ikatuswa arit amadgaya inin. Ka yi muwaka ikatuswa arit fet arit uwkihwaki. Nawenetke pahaye adahan in hawkri danuh yis ka iknima. 35Ke pahavwi hiyegbe pahaye adahan ig sibuhe ariku tey ig ka hiyaknima. Pahaye adahan in dehekwig. Mmanawa henewa in danuh ta gitkis madikte hiyeg amedgenevwi inin. 36Amawka yis avuriwnenekwa avanenekwa, yis ayepnenekwa yawaygi ta git Uhokri adahan yis ka matakasaw arit madikte ini mbayka ku pariye nehmnikuhpiye. Amawka yis ayepnenekwa yawaygi adahan yis yidukwenewa tabirnene amadga hawkri he ku aysaw nuhawkanavrik danuh nah ku pariye wageswe awayg amadgaya inin.
Mpuse aygete Jesus pes paytwemputak
37Mpuse hewkevye ig Kiyavwiye Jesus kannuhekne ayge ariku ini leglis kewye Uhokri Givin. Mpuse aygete ig pes avuwitak paytwempu Jerusalém. Ig mpiyasa mpuse mitipka ta avitit ini waxri imuhgivitnene kewye Olivegvit.
38Igkisme hiyeg hewkevye danuhnes atere arikut ini Uhokri Givin adahan igkis timepnes Kiyavwiye Jesus giwn.
Выбрано:
Lúkas 21: pluPB
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© 2018, Wycliffe Bible Translators, Inc. All rights reserved.