MAKISA 2
2
1PAKAFIKA dituku dia Pentekosto dyendeli, bungi bwabo bakakokama kidi kimokimwe. 2Yi munda mwa diulu mwakalwa mulaku mangwoso bea luna ngiembi a lupepele, akakwolubisa bungi bwa ncibo akaxikamabo munda. 3Yi ndimi mipanda yakabamonekyela bea ya mudilu, akaxikama pelu pa muntu mwoso yinabo. 4Yi bakakwolubixibwa bo-a-bwoso yi Mwoxixi a babala, yi bakabanga kutôya yi ndimi minga yakabapa Mwoxixi kusakola.
5Ku Yelusaleme lolo kwakakala bena Yuda, bena nkwami, ba kwa bubila bwoso muxi mwa diulu. 6Mo pakalwa mwoximo ou, kimbukuma kia bantu kiakasangilañana, yi bakakama kama, bwalo bwakabombwa muntu mwoso badi mu kutôya lwanci lubendo. 7Yi bakakama bungi bwabo, yi bakakwelafiana nkanyi ene, Mona, ki bantu boso baba badi mu kutôya badi bena Ngalili ? 8Ape coco twombombwa nako beci, muntu lwanci lubendo, muntu lwanci lubendo, lutwamalelebwa yinalu ? 9Bena Patia, yi bena Mede, yi bena Elama, yi bobo bakala mu Mesopotamia, mu Yudiya, mu Kapadokia, mu Ponto yi Asia, 10mu Filingia yi Pamafilla, mu Ecipito, yi mu mbata ya Libya idi pepe yi Kulene, yi bena Loma bakala kunu, yi bena Yuda yi betabusafiani yinabo, 11bena Kyelete yi bena Alabia,— tubombombwa badi mu kutôya ku ndimi yecu, dia makisa manene a Ncembi ! 12Yi bakakama boabwoso, bakantunka ntunka, bakakwambilafiana ene, Kifiani kieki ? 13Kaninga banga bakakyeca ene, Bamakwolubixibwa malufu a mwosolo.
14Mo Pita, akakwemana yi disangi yi umoumwe, akabandisa diyi dienci yi akabasakolela ene, Bantu ba Yudiya yi bungi bwa bena Yelusaleme, nulubukwi bwalo bobu, yi nwombwi meyi amene ; 15bantu baba kabasokwolubilañana malufu, anwakanyakanya nonu, bwalo butani nkyekyu ola amusatu a munyinya ; 16kate nako ndo diyi diakatôyebwa kudi mudimuxi Yoele, ene, 17Ncembi ene, Ku matuku a nyuma nakupangulula Mwoxixi amene kulu kwa munyu mwoso ; yi bana benu ba babalumi yi ba babakaxi banadimusa, yi mapulwa enu anamona bintu mu tulu, yi babakulu benu banalota melu ; 18ya, nakupangulula Mwoxixi amene pa basadi bamene isanga ba babalumi yi ba babakaxi ku matuku yia, yi banadimusa. 19Nakuteka lolo bikamakama mu diulu kulu, yi bilayixilu pa loboko muxi ; yi maxi, yi mudilu, yi munyinga ă mudilu ; 20diba dinakulumunibwa ku mwedima, yi ngondo ku maxi, buxi bulolwa diba dia Fumu, dedi dinene dia dikai bongonco. 21Kunakala lolo, muntu mwoso abila dina dia Fumu, unapandixibwa.
22Bena Isalele, nwombwi meyi aa : Yisu a ku Nasalete, muntu akakwalakanibwa ku mpala yenu kudi Ncembi ku makisa a ngulu, yi ku bikamakama, yi ku bilayixilu, biakakwenca Ncembi kudiyi pakacikaci penu, binwalubukwa mikyenu— 23You, akalongolebwa yi lukanyi lutasopeteyebwa yi kilubukilu kialubukibwa buxi kia Ncembi, nonu pako nwakakopeka ku nkulusu ku bianca bia boni, yi nwakamuxipa. 24Mo Ncembi akamubisa, akalebesa bipekye bia lufu, bwalo butalubukwayi kubambibwa kudilu. 25Bwalo bwakatôya Dafidi ku bwalo bwanci ene, Nakadingila Fumu matuku moso ku mpala amene ; bwalo budiyi ku kidyo kiamene bintaxenyingixibwa. 26Mbwôso mucima ămene ămaxekyelela, yi ludimi lwamene lwamakwembikisa ; yi munyu ămene kabidi unakala yi mudingidilu, 27bwalo kunaxiya kidimu kiamene munda mwa Adese, kunabolesa Muntu ebe a babala pwanci. 28Wakangulubukisa ncila ya môyo, unangwolubisa kiango bwalo bwa mpala ebe.
29Bena kwecu, mbenusakolela bimpe dia mwamukulu Dafidi, ene, akafwa yi akancikibwa, yi lukita lwanci ludi yinecu pôi dituku dedi. 30Bwalo bwakakalayi lolo mudimuxi, akalubukwa Ncembi amateya yinanci kiteyi pa kuteka mwana a makondu anci kulu kwa lukwasa Iwanci,— 31yei, bwalo bwakalubukwayi buxi, akatôya dia kwombuluka kwa Kalistu, ene, akadi kasokadeyebwa mu Adese, yi munyu ănci ăkadi kasobola pwanci pwanci. 32You Yisu—Ncembi akamubisa, utwamamutôbôlela ntôbô, bungi bwecu. 33Mbwôsô biamabandixibwayi kulu ku kianca kia kidyo kia Ncembi, biamangatayi lolo kudi Tete kilaka kia Mwoxixi a babala, ndo biamapangululayi noku bea binwamona yi binwombombwa. 34Bwalo butaximunini Dafidi munda mwa melu kulu, mo mikyenci amatôya ene, Fumu akatôyela Fumwami ene, Xikama ku kidyo kiamene, 35binakuteka bantu batanda yinebe katanda ka makasa ebe. 36Mbwôso bungi bwa nkumbu ya Isalele balubukwi sôsôlwo ene, Ncembi amateka Yisu you unwakakopeka ku nkulusu yi Fumu yi Kalistu.
37Pakakwombwabo lolo, bakatubudibwa ku mucima, yi bakatôyela Pita yi banga batumibwi ene, Tunakwenca kai, bena kwecu ? 38Yi Pita akabambila ene, Nudibeli, nunumeyebwi, muntu mwoso enu mu dina dia Yisu Kalistu, ku kulekyelebwa kwa mabi, yi nunangata dilongi dia Mwoxixi a babala. 39Bwalo budi kilaka ku bwalo bwenu, yi bwa bana benu, yi bwa bantu boso badi kulekule, bantu boso bakyeba Fumu Ncembi ecu kubabikila. 40Yi akatôbôla amo meyi mangi, yi akababondabonda ene, Nupandixibwi mwociya ou ă kwona. 41Mbwôso bobo bakangata diyi dienci dyendeli bakanumeyebwa, yi ku dituku dedi kwakabodeyebwa bantu bea nkone isatu.
42Yi bakaxina mwoxinu bô yi kweyesa kwa batumibwi, yi busangilañani bwabo ; yi kunyowa kwa mampa, yi ndombu. 43Yi bowa bwakakwata muntu mwoso, yi bikamakama bingi yi bilayixilu biakakwencebwa kudi batumibwi. 44Yi bungi bwabo bakakwetabusa bakadi kidi kimokimwe yi bakakwabanyañana yi bintu, 45yi bakakwodisa madidi abo, yi bima biabo, yi bakabilongola kudi bantu boso oka akadi muntu mwoso yi bokombi. 46Ku diba dioso lolo kwakakalabo mu tempelo yi lukanyi lumolumwe, yi bakanyowa mampa mu ncibo, yi bakangata bidya biabo yi kiango yi mucima utena buluba, 47badi mu kutumbisa Ncembi, yi bakadi yi makasa anengela ku mpala ya bungi bwa bantu ; yi Fumu akasangisa bantu ku dituku ku dituku badi mu kupandixibwa.
Выбрано:
MAKISA 2: Luna_NT
Выделить
Поделиться
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
© La Société biblique de Genève