Aposteljeschicht 11
11
Petrus rajchtfoadicht sikj ver de Jemeent en Jerusalem
1Nu hieeden de Apostel un Breeda, dee en Judäa wieren, daut de Nichjuden uk Gott sien Wuat aunjenomen hauden. 2Aus Petrus no Jerusalem kjeem, mostaden de beschnädne jleewende am 3un säden: Du best bie de onbeschnädne nenn jegonen un hast met an toop jejäten! #Gal 2,12 4Dan vetald Petrus an omstendich, woo daut jekomen wia. 5Hee säd: Ekj wia en de Staut Joppe un bäd. Dan wia ekj met eemol buta mie selfst un sach eene Vision. Waut ekj sach wia soo aus een grootet Loaken, daut aun aule vea Akjen jehoolen, vom Himmel rauf jeloten wort, un daut kjeem doa rauf, wua ekj wia. #(5-17) Apost 10,9-48 6Ekj kjikjt doa nenn un sach veabeensche Tieren von oppe Ieed, wille Tieren un krupende Kjräten, un Väajel dee en de Loft flieejen. 7Un ekj hieed eene Stemm to mie sajen: Petrus, sto opp, schlacht un at! 8Ekj oba säd: Oo nä, Har; ekj hab noch niemols waut jemeenet ooda orreinet em Mul jenomen. 9Oba de Stemm vom Himmel säd noch emol to mie: Waut Gott jereinicht haft, saust du nich jemeen nanen. 10Dit passieed dree mol; un dan wort daut wada aula trigj em Himmel nenn jenomen. 11Krakjt dan stunden dree Mana dee von Cäsarea no mie jeschekjt wieren, ver daut Hus, wua ekj wia. 12Dan säd de Jeist to mie, daut ekj met an gonen sull, un aun nuscht twiewlen sull. Dise sas Breeda kjeemen uk met, un wie jinjen bie dän Maun em Hus nenn. 13Hee vetald ons, woo hee haud seenen een Enjel bie sikj em Hus nenn komen un sajen hieet: Schekj no Joppe un lot Simon Petrus holen; 14dee woat die Wieed sajen, wuaderch du un dien gaunzet Hus woaren seelich woaren. 15Un aus ekj aunfunk to an to räden, foll de Heilja Jeist opp an, soo aus dee em Aunfank opp ons foll. #Apost 2,1-4 16Dan foll mie bie, waut de Har jesajcht haud: Johanes deept met Wota, oba jie sellen met däm Heiljen Jeist jedeept woaren. #Apost 1,5 17Wan Gott an deeselwje Gow jejäft haft, dee hee ons jeef, aus wie aun dän Harn Jesus Christus jleewden, wäa wia ekj, to denkjen, daut ekj Gott trigjhoolen kunn. 18Aus see dit hieeden, worden see stell un lowden Gott un säden: Dan haft Gott de Velkja uk de Jeläajenheit jejäft sikj nom Harn to dreien, un daut Läwen to finjen!
De Jemeent en Antiochia
19Dee, dee sikj derch de Vefoljunk, dee äwa Stefanus kjeem, vestreit hauden, wieren soo wiet aus Feenizien, Ziepern, un Antiochia jekomen, oba prädijden daut Wuat to sest kjeenem aus de Juden. #Apost 8,1-4 20Doa wieren mank an oba eenje Mana, von Ziepern un Kiereen, dee, aus dee no Antiochia kjeemen, uk to de Griechen räden deeden, un prädijden dän daut Evangelium vom Harn Jesus. 21Un dän Harn siene kjraftje Haunt wia met an, un een groot deel Menschen jleewden un bekjieeden sikj toom Harn. #Apost 2,47
22Aul dit Nies kjrieech de Jemeent en Jerusalem to hieren, un dee schekjten Barnabas, daut hee bat Antiochia gonen sull. #Apost 4,36 23Aus hee hankjeem un jeseenen haud, waut Gott siene Jnod jedonen haud, freid hee sikj un spruak an Moot too, daut see dän Harn von gaunzem Hoaten tru bliewen sullen, 24wiels hee wia een fromma Maun, voll vom Heiljen Jeist un Gloowen. Un een groot deel Menschen worden fa dän Harn jewonnen. #Apost 5,14 25Dan veleet Barnabas om no Tarsus to gonen un Saul to sieekjen. #Apost 9,30 26Un aus hee am funk, brocht hee am no Antiochia. Un see bleewen een gaunzet Joa bie de Jemeent un lieeden väl Menschen. De Jinja worden daut ieeschte en Antiochia Christen jenant. #Gal 2,11
Methalp en Hungaschnoot fa de Jemeent en Jerusalem
27Un en dise Tiet kjeemen Profeeten von Jerusalem no Antiochia. #Apost 13,1; 15,32 28Un Agabus, eena von an, stunt opp un died derch dän Jeist aun, daut äwa de gaunze Welt eene groote Hungaschnoot komen wudd; un daut passieed en Kjeisa Klaudius siene Tiet. #Apost 21,10 29Un de Jinja worden sikj eenich, daut een jiedra doano aus hee kunn, de Breeda en Judäa methalpen wudd. 30Dit deeden see dan uk. See schekjten äare Gowen no de Eltestasch derch Barnabas un Saul. #Apost 12,25; 1Kor 16,1-4
Выбрано:
Aposteljeschicht 11: PB
Выделить
Поделиться
Сравнить
Копировать
Хотите, чтобы то, что вы выделили, сохранялось на всех ваших устройствах? Зарегистрируйтесь или авторизуйтесь
Plautdietsch Bible © 2003 Kindred Productions and United Bible Societies Association, Inc.
