Yohani 6
6
U Yesu akubalyesya abantu 5,000
(Mat. 14.13-21; Mlko. 6.30-44; Luk. 9.10-17)
1Pisinda pache u Yesu akaloboka Inyanja iya Galileya (pamo inyanja iya Tibeliya ukuyana namumo yikwitiziliwa.) 2Ichilundilo ichikulu icha bantu chikamukonka pakuti bakennya ivimanyilo vivyo akabombagha pa babine. 3U Yesu akakwela pighamba nukwikala pasi na bamanyili bache. 4Akabalilo aka Lusekelo ulwa Pasa kakaba papipi. 5Bo u Yesu atalankannya akennya ichilundilo ichikulu icha bantu chikwiza kukwache, po akamulalusya u Filipu akati, “Nkimba tungaghula kwiyi ichakulya ichakukwana ukubalyesya abantu bosi banaba?” 6Akanena ichi pakumuyela bulo u Filipu pakuti akamanyila zila izyakubomba.
7U Filipu akamwamula akati, “Ukuti umuntu wesi alabuke panandi bulo, zikulondiwa isalabazya izyakuchila 200 pisiku lyoka#6.7 pisiku lyoka: Pamo indalama izya salabazya 200. zizyo umuntu angapokela pisiku lyoka.”
8Umumanyili wache weka, yuyo akaba we Andeleya, uwamwabo uwa Simoni Pitala akanena nawe akati, 9“Alipo yumo umulumendo pano, yuyo ali ni vibama fayivi ivya malezi nu tuswi tubili. Loli vinivi vitangabakwana abantu bosi banaba?”
10U Yesu akababuzya akati, “Mubabuzye abantu bikale pasi.” (Palapala pakabapo isote ilyinji.) Po abantu bosi bakikala pasi. Abanavuli bene bakabapo 5,000. 11U Yesu akasenda ivibama, akamupalizya u Chala nukubagabila abantu babo bakikala pasi palapala. Akabomba sona bunubu ni iswi zila, po bosi bakalya ukuyana namumo bakalondelagha. 12Bo bikuta, u Yesu akababuzya abamanyili bache akati, “Musebe utubululusya kokuti katakabepo nakamo akakutaghiwa.” 13Po bakaseba utubululusya tosi, bakizuzya ividudunga 12 nu tubululusya utwa vibama fayivi ivya malezi, vivyo vikasyala bo abantu balya.
14Bo abantu bennya ichimanyilo chicho u Yesu akabomba, bakati, “Naloli uyu mulaghuzi, yuyo akwiza muchisu ichapasi!” 15Bo u Yesu azyaghannya ukuti bakulonda ukwiza pakumulema ukuti bamwimike pakuba we Mwene, akanyokela sona kwighamba nukwiyekela mwene.
U Yesu akwenda pamizi
(Mat. 14.22-33; Mlko. 6.45-52)
16Bo kwanda pakwila, abamanyili aba Yesu bakikila kunyanja 17nukukwela mubwato. Bakaloboka inyanja nukubuka mu Kapelinahumu. Ubusiku bukafika bo u Yesu achili pakwiza kukwabo. 18Inyanja yikasambuka pachifukwa icha kuputa ukwa mpepo iyakoghofya yila. 19Bo benda ubutali ubwa mamita 5,000 pamo 6,000, bakamwennya u Yesu akwenda pamizi, akupalamila ku bwato, po ubogha bukabalema nkani. 20U Yesu akababuzya akati, “Mutakanyilaye! Nene.” 21Panapo bakahoboka nukumukwezya mubwato, sona umwalubilolubilo ubwato bukafika kwisila kuko bakabukagha.
Abantu bakumulonda u Yesu
22Ilyandabi, ichilundilo icha bantu chicho chikasyalikila kwisila ilya nyanja chikazyaghannya ukuti bukabapo ubwato boka mpela pabuzilo bula. Bakamanya ukuti u Yesu atakabuka poka na bamanyili bache, loli ukuti bakanyamuka bulo bene. 23Amabwato aghanji ghagho ghakafumila mu Tibeliya, ghakafika pabuzilo bubo abantu bakalyelapo ivibama bo u Mwene avisaya. 24Po bo ichilundilo icha bantu chennya ukuti u Yesu na bamanyili bache batalipo, chikakwela mu mabwato nukubuka mu Kapelinahumu pakumulonda u Yesu.
U Yesu we chibama ichipela ubumi
25Bo abantu bamwagha u Yesu kwisila ilinji ilya nyanja, bakamulalusya bakati, “Wee Mumanyisi, nkimba ukiza liyi kuno?”
26U Yesu akamula akati, “Naloli nkubabuzya ukuti amwe mutakandonda pachifukwa ichakuti mukennya ivimanyilo, loli pachifukwa ichakuti mukalya ivibama nukwikuta. 27Mutakabombaye imbombo ukuti mubanje ni chakulya chicho chikunanganika, loli bombela ichakulya chicho chikupa ubumi ubwa bwila na bwila. Ichi chakulya chicho u Mwana uwa Muntu akwiza pakubapa pakuti u Chala Uwise weyuyo abikitepo papache ichimanyilo ichakusimikizya.”
28Po bakamulalusya bakati, “Nkimba tungabomba ichoni ukuti tubombe imbombo zizyo u Chala akulonda ukuti tubombaye?”
29U Yesu akamula akati, “Imbombo zizyo u Chala akulonda ukuti mubombaye zyakuti mumusubilaye yuyo akamutuma.”
30Bakamulalusya sona bakati, “Nkimba ichimanyilo choni chicho ungabomba ukuti tuchennye nukukusubila? Nkimba ukwiza pakubomba ichoni? 31#Ukf. 16.4, 15; Mas. 78.24Abanyenya bitu bakalyanga ichakulya chicho bakachitizyanga ukuti umana munkolongo mula ukuyana na Masimbo aghakuti, ‘Akabapa ivibama ivyakumwanya ukuti balye.’ ” 32U Yesu akanena nabo akati, “Naloli nkubabuzya ukuti atakaba we Mozesi yuyo akabapa ichibama ichakufuma kumwanya awe; loli we Tata yuyo akabapa ichibama ichanaloli ichakufuma kumwanya. 33Pakuti ichibama chicho u Chala akupa weyuyo akwika kumwanya nukuchipa ichisu ichapasi ubumi.”
34Bakanena nawe bakati, “Mwene, utupanje bwila ichibama chinichi.” 35U Yesu akababuzya akati, “Ane ne chibama ichipela ubumi. Umuntu wesi yuyo akwiza kukwane atakwiza pakubapo nalumolumo nizala, sona umuntu wesi yuyo akunsubila atakwiza pakubapo nalumolumo ni nyota. 36Nkababuzya ukuti, napapo mwanyennya, loli mutakunsubila. 37Bosi babo Utata wane akumpa bakwiza kukwane, sona bosi babo bakwiza kukwane ntakwiza pakubasula, 38pakuti intikite kumwanya pakubomba ubwighane ubwane nu bwane, loli nizite pakubomba ubwighane ubwa yuyo akantuma. 39Po ubwighane ubwa yuyo akantuma bwakuti intakataghepo nayumo mubantu babo ampiye, loli ukuti imbazyusye bosi pisiku ilyabumalilo. 40Pakuti zizyo Utata wane akulonda zyakuti abantu bosi, babo bakumwennya u Mwana nukumusubila, babanje nubumi ubwa bwila na bwila. Po ane nkwiza pakubazyusya pisiku ilyabumalilo.”
41Pa ichi aba Yuda bakanda pakwilumbusya pachifukwa ichakuti u Yesu akati, “Ane ne chibama chicho chikika kumwanya.” 42Po bakati, “Nkimba uyu ate we Yesu u Mwana uwa Yosefu, yuyo uwise nu nyina tubamenye? Nkimba akunena bulibuli ukuti akika kumwanya?”
43U Yesu akabamula akati, “Mutakilumbusyanje mwebenebene. 44Ataliko nayumo umuntu yuyo angiza kukwane nanti Utata yuyo akantuma, atakumuwesela kukwane. Po nane nkwiza pakumuzyusya pisiku ilyabumalilo. 45#Yes. 54.13Abalaghuzi bakasimba bakati, ‘Bosi bakwiza pakumanyisiwa nu Chala.’ Umuntu wesi yuyo akwivwa zizyo u Tata akunena nukumanyila kukwache, weyuyo akwiza kukwane. 46Ichi chitakung'anamula ukuti nayumo umuntu yuyo amwenizyepo Utata, loli mwene yuyo afumite kwa Chala, weyuyo amwenizyepo Utata. 47Naloli nkubabuzya ukuti yuyo akusubila ali nabo ubumi ubwa bwila na bwila. 48Ane ne chibama ichipela ubumi. 49Abanyenya binyu bakalya umana munkolongo, loli bakafwa. 50Ichi chibama chicho chikwika ukufuma kumwanya, ichakuti umuntu wesi yuyo akulya ichibama chila atakafwanje. 51Ane ne chibama ichipela ubumi chicho chikika ukufuma kumwanya. Nanti umuntu wesi akulya ichibama chinichi, akwiza pakubangako bwila na bwila. Ichibama chicho nkwiza pakumupa gho mubili wane, chicho nkupa ukuti ichisu ichapasi chibanje nubumi.”
52Po aba Yuda bakanda pakudalinkana benebene. Bakalalusya bakati, “Nkimba umuntu yunuyu akwiza pakutupa bulibuli umubili wache ukuti tulyanje?”
53U Yesu akanena nabo akati, “Naloli nkubabuzya ukuti nanti mutakulya umubili uwa Mwana uwa Muntu, sona nanti mutakung'wela ibanda lyache, mutakwiza pakuba nubumi mumwinyu. 54Umuntu wesi yuyo akulya umubili wane nukung'wela ibanda lyane, ali nubumi ubwa bwila na bwila. Po nane nkwiza pakumuzyusya pisiku ilyabumalilo. 55Pakuti umubili wane cho chakulya ichanaloli, sona ibanda lyane cho chakung'wela ichanaloli. 56Umuntu wesi yuyo akulya umubili wane nukung'wela ibanda lyane, akwikala mumwane, po nane nkwikala mumwache. 57Ngati mumo Utata umumi akantumila nukuti ane ne mumi pachifukwa icha Tata, umwakuyana bulo umuntu wesi yuyo akundya, wepe akwiza pakuba nubumi pachifukwa icha nene. 58Chinichi cho chibama chicho chikika kumwanya. Chitayanite ni chibama chicho abanyenya binyu bakalya nukufwa pisinda pache. Loli bosi babo bakulya ichibama ichi bakwiza pakubangako bwila na bwila.”
59U Yesu akanena zinizi bo akumanyisya munyumba iyakwiputilamo mukaya aka Kapelinahumu.
Amazyu amapela bumi ubwa bwila na bwila
60Abamanyili bache abinji bakivwa zinizi nukuti, “Ubumanyisi ubu bupalapala nkani. Nkimba wewenu yuyo angabwivwisya?”
61Bo u Yesu azyaghannya ukuti abamanyili bache bakwilumbusya pazinizi, akanena nabo akati, “Nkimba zinizi zikubavulazya mumoyo ghinyu? 62Po zikwiza pakuba bulibuli bo mukwennya u Mwana uwa Muntu akukwela pakubuka kuko akabanga pakwanda? 63Umuzimu uwa Chala weyuyo akupa ubumi, amaka agha buntu ghate ni mbombo nayimoyimo. Amazyu ghagho nanena namwe ghakubapa u Muzimu uwa Chala nubumi. 64Loli balipo bamo mumwinyu babo batakusubila.” (Pakuti u Yesu akazimanyila zila ukwandila ko kubwandilo babo batakwiza pakusubila, sona na yuyo akwiza pakumubika munyobe izya balwani.) 65Po akati, “Ichi cho chifukwa nkababuzya ukuti nayumo umuntu yuyo angiza kukwane nanti Utata atakumwitikizya.”
66Pachifukwa chinichi, abakonki bache abinji bakanyokela kwisinda nukuleka pakwenda sona nawe. 67U Yesu akabalalusya abamanyili bache 12 bala akati, “Nkimba namwe bulo mukulonda pakubuka?” 68U Simoni Pitala akamwamula akati, “Wee Mwene, nkimba tungabuka kwa wenu? Awe uli nagho amazyu amapela bumi agha bwila na bwila. 69#Mat. 16.16; Mlko. 8.29; Luk. 9.20Losi ulu tukusubila nukumanya ukuti awe we Muzelu yuyo afuma kwa Chala.”
70U Yesu akabamula akati, “Nkabasala amwe 12. Nkimba mute momumo? Loli weka mumwinyu we Satana!” 71Akamunenagha u Yudasi, umwana uwa Simoni Sikaliyoti. Pakuti u Yudasi napapo akaba wabamo mu bamanyili 12 bala, akaba weyuyo uwakumubika u Yesu munyobe izya balwani.
Aktuálne označené:
Yohani 6: LMBNT2016
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Zistiť viac o Ulufingo Ulupya