JOHN 15
15
Grepgui leh a bate
1Kei grepgui dihtah chu ka hi, ka Pa a hu an enkoltu ahi. 2Keimah a um ba gahlou photmah chu a paaimang veu a; a gah photmah chu a susiangthou veu hi, a gah tam sem theihna diingin. 3Huin nang u’chu na kawmva ka thusoi jiahin na siang uhi. 4Keimah ah um ngiitngeet un, kei zong nanguh ah ka um ngiitngeet diing. Ba in grepguia a um ngiitngeet louhngalleh amah ngen a, a gah theih louh mahbangin, nanguh zong keimaha na um ngiitngeet louh uleh na gah thei sih diing uhi. 5Kei grepgui chu ka hi, nanguh a bate na hi uh; koipouh keimah a um ngiitngeet leh, kei amah a ka um ngiitngeet napa chu tampiin a gah veu hi; ajiahchu keimah louin bangmah na bawl thei sih uhi. 6Mi keimah a, a um ngiitngeet louhleh ba bangin paihdohin a um a, a vuai veu hi; huleh mi’n amahuh a tomkhawm a, meiah a paai va, a kaang veu hi. 7Keimaha na um ngiitngeet va, huleh ka thu zong nanguh a, a um ngiitngeet inchu na utut uh na ngen diing va, huchu ahung kibawlsah diing hi. 8Hikhu ah ka Pa paahtawi in a um hi, tampi a na gah vah; huchi'n ka nungjuite na hi diing uhi. 9Pa’n kei ahung lungsiat bangin ke'n nanguh ka hung lungsiat hi; ka lungsiatna ah um ngiitngeet un. 10Nangun ka thupiahte na juih uleh ka lungsiatna ah na um ngiitngeet diing uh; Ke’n ka Pa thupiahte ka juih a, a lungsiatna a ka um ngiitngeet mah bangin. 11Ka kipaahna nanguh a, a umden theihna diing leh, na kipaahna uh a bukim theihna diingin hi thute na kawmvah ka soi ahi. 12Ke’n nanguh ka hung lungsiat bangin nanguh zong khat leh khat kilungsiatun chih ka thupiah ahi. 13Mi’n a lawmte’ diing a hinna a piah sanga lianzaw lungsiatna koima’n a nei sih hi. 14Thu ka hung piah photmah na bawl unchu ka lawmte na hi diing uhi. 15Tu a kipat suaahte ka hung chi nawn sih diing; ajiahchu suaahin a pu in bang a bawl a he sih; lawmte ka hung chi zawta diing; ajiahchu ka Pa kawma ka jah zousiah na kawmvah ka hung hilhta hi. 16Nangun kei na hung teel sih va, ke’n nanguh ka hung teel zaw hi; huleh chiah a gah diing leh, na gah uh um zing diingin, huleh ka mina Pa kawma na nget photmah uh ahung piah theihna diingin nanguh ka hung guat hi. 17Hi thute nanguh ka hung pia hi, khat leh khat kilungsiat un.
Gingtute leh khovel kikal thu
18Khovel in nanguh ahung huat leh, nanguh ahung huat ma in kei ahung haw zouta chih he un. 19Khovel a hile u’chin khovel in amah a, a lungsiat diing hi; hizongleh khovel a hilou a, khovel a kipana ka hung teeldoh na hihzawh jiahun khovel in nanguh ahung hua ahi. 20Suaah a pu sangin a lianzaw sih chih na kawmva ka thusoi he zing un. Amahun kei ahung sawi unchu nanguh zong ahung sawi diing uh; ka thusoite a juih uleh nanguh soi zong a jui diing uh. 21Hizongleh ka min jiahin hi silte zousiah na tungvah a bawl diing uh, ahung sawlpa a heet louh jiahun. 22Kei hunglou a, a kawmva thu soilou hileng sualna nei lou diing hi va, hizongleh tuin chu a sualna uh khuh na diing a neita sih uhi. 23Koipouh kei hung huain ka Pa zong a hua ahi. 24Mi dang koimah bawl ngei louh nna a lahva bawllou hileng sualna nei lou diing hi va, hizongleh tuin chu muh zong ahung muta va, huleh kei leh ka Pa ka nih un hua zong ahung hua uhi. 25Hizongleh hichu, Amahun ajiah beiin ahung hua uh, chih a daanbu va kigial thu a taangtun na diing a hung um ahi. 26Hizongleh Pa kawm apat na kawmva ka hung sawl diing, Hamuantu, Pa apat hung pawt, thutah Hagau ahung tun chiangin, ama’n ka tanchin a hesah diing hi. 27Huleh nangun zong na hesah diing uh, a chiila kipana ka kawma um na hih jiahun.
Aktuálne označené:
JOHN 15: SIMTBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.