JOHN 16
16
1Hihlungkim louh a na um louh na diingun hi thute na kawmvah ka soi ahi. 2Kikhopna innahte ahung nohdoh diing va; ahi, koipouh nanguh hung thatin Pathian tunga silhoih bawl a, a kingaihtuah hun uh ahung tung diing hi, 3Huleh hi silte na tungvah a bawl diing uh, Pa leh kei ahung heet louh jiahun. 4Hizongleh ahun ahung tun chianga hute ka hung hilhta chih na heetdohna diingun hi silte nanguh ka hung hilh ahi. Na kawmva ka um jiahin hi thute a chiilin na kawmvah ka soi sih hi. 5Hizongleh tuin chu ahung sawlpa kawma chiah diing ka hi a; kuamahin khoi a chiah diing na hiai? chi'n na hung dong sih uh. 6Hizongleh hi thute na kawmva ka soi jiahin na lungtang uh lunggimna in a dimta hi. 7Hizongleh thutah ka hung hilh hi; Ka chiahmang nanguh diingin a hoih hi; ajiahchu ka chiahmang louhleh Hamuantu na kawmvah ahung sih diing hi; ka chiah inchu na kawmvah ka hung sawl diing hi. 8Amah ahung tun chiangin sual thu ahte, dihtatna thu ahte, huleh vaihawmna thu ahte khovel a siamlouh dan a hesah diing hi. 9Sual thu ah siamlouh a tangsah diing, kei ahung gintaat louh jiahun. 10Dihtatna thu ah siamlouh a tangsah diing, ka Pa kawma chiah a, na hung muh nawn louh diing jiahun. 11Vaihawmna thu ah siamlouh a tangsah diing, Hi khovel lal vaihawmsah a, a um taah jiahin. 12Na kawmvah thu soi diing tampi ka neia, hizongleh tuin na po zou, nai sih uh. 13Hizongleh thutah Hagau ahung tun chiangin ama’n nanguh thutah zousiah ah ahung puiluut diing; ajiahchu amah phuaahthuh in thu a soi sih diing a, hizongleh a jah photmah chu a soi zaw diing; huleh sil hung tung diingte ahung musah diing hi. 14Ama’n kei ahung paahtawi diing; ajiahchu keimaha a la diing a, nanguh ahung musah diing hi. 15Pa sil neih zousiah keia ahi; hujiahin keimaha a la diing a, nanguh ahung musah diing, ka chi ahi.
Jesu’n a sihna diing leh a thohkiitna diing a soina
16Tomchakhat nung chian nangun na hung mu nawn sih diing uh; huleh tomchakhat nung chian na hung mu kiit diing uh, Pa kawma ka chiah diing jiahin, a chi a. 17Huin a nungjuite khenkhat in, Tomchakhat nungchian nangun na hung mu nawn sih diing uh, huleh tomchakhat nungchian na hung mu kiit diing uh, Pa kawma ka chiah diing jiahin, i kawma a chih bang a chihna ahiai? chi’n a kihou va. 18Hujiahin amahun, Hi a thu soi, Tomchakhat nungchian a chih bang a chihna ahiai? a chi va. 19Huchi'n amah a dong nuam uh chih Jesu’n a he a, a kawmvah, Tomchakhat nungchian na hung mu nawn sih diing uh, huleh tomchakhat nungchian na hung mukiit diing ah, chi a ka soi na kidongtuah uh ahi maw? 20Chihtahzetin, chihtahzetin, ka hung hilh ahi, Nanguh na kap diing va, na maau diing uh; hizongleh khovel a kipaah diing; nanguh chu na lunggim diing va, hizongleh na lunggimna uh kipaahna a suaah diing hi. 21Numeiin a nauvei laiin a lunggim veu, ahun a tun taah jiahin; hizongleh nau a suaah zoh tahin hu lunggimna chu a he nawn sih, mihing khat khovel a ahung pian kipaahna jiahin. 22Hujiahin tuin lunggimna na nei uh ahi; hizongleh nanguh ka hung mu kiit diing a, na lungtang ah a kipaah diing; huleh na kipaahna ah koima’n ahung laahsah sih diing hi. 23Huni chiangin nangun bangmah na hung ngen sih diing uh Chihtahzetin, chihtahzetin, ka hung hilh ahi, Ka mina Pa kawma na nget photmah uh ama’n nanguh ahung pe diing hi. 24Tutanin ka minin bangmah na ngen nai sih uh; ngen un, na mu diing ah, na kipaah uh a kimna diingin. 25Hi thute a heemin na kawmvah ka soi hi; hizongleh a heem a na kawmva thu soi nawn lou a, Pa tungtaang chiantaha ka hung heetsah diing hun tung diing ahita. 26Hu ni chiangin ka minin na hung ngen diing uh; nanguh diingin Pa ka ngen diing ka chi ahi sih hi. 27Ajiahchu nangun kei na hung lungsiat va, huleh Pa a kuana hung ka hi chih na gintaat jiahun Pa amah ngei in nanguh ahung lungsiat hi. 28Pa a kipana hungdoh a, khovel a hung ka hi, huleh khovel nusia a Pa kawma chiah kiit diing ka hi, a chi a. 29A nungjuite’n a kawmah, Ngai in, tuin chu a heemin na soi sih a, chiantahin na soita hi. 30Huleh tuin chu sil bangkim na he a, koimah in ahung dot na kiphamoh sih chih ka hechianta uh; hikhu jiahin Pathian a kipana hung pawt na hi chih ka gingta uhi, a chi va. 31Jesu’n amah uh a dawng a, Tuin na gingta uh maw? 32Ngai un, ahun ahung tung diing; ahi, tuin zong a tungta, michin na inn chiat vah na kithehdalh diing va, ka ngenin na hung nuse diing uh; ahihvangin Pa ka kawma a um jiahin ka ngen ka hi sih hi. 33Keimaha hamuanna na neihna diingun hi thute na kawmvah ka soi ahi. Khovel ah gimthuaahna na nei diing uh; hizongleh kipaahtahin um un, ke’n khovel ka zouta hi, a chi hi.
Aktuálne označené:
JOHN 16: SIMTBSI
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.