Juan 10
10
To pangngarig maipanggep iya kudal diya karne̍ru
1Uwed pangngarig nga kinagi ne̍ Je̍sus itun nga agten idi: “Pudnu yani nga ibagac dakayu: No bekken nga ya ruwangan ya umuneggan niya isa nga toley iya kudal diya karne̍ru, ket umune̍c nga gennung iya bekken nga ruwangan, ket isa nga agtatakew winno tulisan ya agten iyan nga toley. 2Ngem ya toley nga ya ruwangan ya dalanen na nga umuneg, igina ya pudnu nga agay-aywan kadiya karne̍ru. 3Ket ya agbanbantay iya ruwangan niya kudal, lukatan na para iyan nga pudnu nga agay-aywan kadiya karne̍ru. Ket diya karne̍ru na, mailasin da ya timec na no awagan na diya nagnagan da, no paruwaren na da. 4Ket no naparuwar na amin diya bukud na nga karne̍ru win, mon-ona ngem igida nga manalanin. Ket mipuyut ngarud diyan nga karne̍ru igina, gapu ta emmu da ya timec na. 5Ngem madi da mipuyut ka sabali nga toley nga bekken da nga apu, no di da lugud itagtagan, gapu ta madi da emmu ya timec na,” kunen na.
6Itu to pangngarig nga kinagi ne̍ Je̍sus igida itun, ngem madi da naawatan ya kaipapennan na.
E̍ Je̍sus ya maiyarig iya ruwangan se̍ iya agay-aywan
7Dikad pe̍ nipalawag ne̍ Je̍sus ya banag nito pangngarig, nga kinunen na, “Ibagac ya kinapudnu na dakayu: Iyaken ya maiyarig iya ruwangan nga umuneggan diya karne̍ru. 8Amin dito duduma nga inumbe̍t nga non-ona ngem iyaken nga nangawag kadiya karne̍ru, ket maiyarig da ka agtatakew winno tulisan. Ket orey nagawag da, madi nga nikasu diya karne̍ru.
9“Ngarud, iyaken ya arig nga ruwangan. Ket diya amin nga manalan iyaken nga umuneg, maisalakan da ngarud. Ket didi nga maiyarig ka karne̍ru, ket siwayawaya da nga umuneg winno rumwar nga mawe̍ iya pagaraban da nga awan kansing da.
10“No ya tulisan, umbe̍t tasun agtakew, pumatey se̍ mangpukaw. Ngem iyaken, bekken nac nga agten iyan, ta inumbe̍t tac tasun mange̍cde̍ yac ka biyag kadiya ibilang ku nga karne̍ruc. Ket iya agten iyan, uwed ngarud biyag da nga awan pagkurangan na.
11“Iyaken, maiyarig gac pe̍ iya isa nga nabaru nga agay-aywan kadiya karne̍ru. Ya nabaru nga agay-aywan, sisasagana nga matey, nga mangipaay iya biyag na tasun mangisalakan kadiya karne̍ru na. 12Ngem no ya makitangtangdan nga bekken na nga kuwa diya karne̍ru nga naitalec igina, agtalew ket baybay-an na diya karne̍ru no uwed masingen na nga umbe̍t nga atap nga asu nga nauyung. Dikad pe̍ makaalac ya nauyung nga asu kadiya karne̍ru, ket nawarawara dan. 13Ngarud, agtalew ya makitangtangdan, ta mangmangged ngas met nga awan panangisakit na kadiya aywan na nga karne̍ru.
14-15“Ngem iyaken met ya nabaru nga agay-aywan. Ket agten idi: Em-emmu nac ya Ama, se̍ em-emmuc met pe̍ ya Ama. Agten nac pe̍ iyan, ta em-emmuc diya karne̍ruc, se̍ em-emmu dac met pe̍. Ket iyaken, nakasagana ngac ngarud nga matey, nga mangipaay iya biyag ku para kadiya karne̍ruc. 16Ket uwed pe̍ duduma nga ibilang ku nga karne̍ruc nga madi pekkem naitipun idi nga bungguy. Ket masapul nga sakupec da met pe̍. Ipangag da nad ngarud ya timec ku no pekkawac da. Ket iya agten iyan, is-isa nad nga bungguy ya mangsakup igida, ket is-isa ya agay-aywan igidan.
17“Ya Ama, ay-ayaten nac gapu ta sisasagana ngac nga mangipaay iya biyag ku orey no matey yac, tasun awatec nad mettas manin yan nga biyag ku. 18Awan makapatey iyaken, ngem agdisnudu wac nga mangipalubus iya pannakapatey ku. Ta uwed iyaken ya turay nga mangiyawat iya biyag ku nga mapatey, se̍ uwed met pe̍ iyaken ya turay nga mangpasoli mettas iya biyag ku. Agten iyan ngarud to nibilin niya Amac nga wanglec,” kunen na.
19Ket dito Hudyu nga aggigicna, madi da manin nagkikinnaawatan gapu kadiyan nga kinagi ne̍ Je̍sus. 20Adu igida diya agkunkunen nga, “Naluganan met ka sairu yan! Agel-ellut mettin! Ape̍ nga dengdenggen nu ya kagi nan?” kunen da.
21Ngem kinunen diya duduma, “Bekken met nga agten idi ya panagkagkagi niya isa nga naluganan ka sairu! Madi ngarud pe̍ mabalin nga mangpalaing diya sairu kadiya mata diya kulap,” kunen da.
To panagmadi dito Hudyu e̍ Je̍sus
22Ket timpu lemmin itun, ket enna He̍rusale̍m, nadatnganin ya padaya diya Hudyu nga maawagan ka Padaya Panangilagip ito Palas-ud niya Te̍mplu. 23Ket e̍ Je̍sus, manmanalan itun ito parte̍ nga maawagan ka Purtiku ne̍ Sulumun enna emwag niya Te̍mplu. 24Ket inarikoyopan dito Hudyu nga nagsaludsud da igina, nga kinunen da, “Ape̍ ibaybayag mu pekkem ya panangipalawag mu iya kaipapennan niya panursurum? Ibagam dakamin a, no pudnu nga ikew ya Kristu,” kunen da.
25Ket kinunen ne̍ Je̍sus igida, “Nibagac met dakayun, ngem di dac met patiyen. Diya wangwanglec gapu iya kinaturay nga nipaay niya Amac iyaken, itu diyan diya mangipanecnec dakayu maipanggep iyaken. 26Ngem madi kayu latta nga mamati, ta bekken kayu nga nairaman iya bungguy diya karne̍ruc. 27Ta diya karne̍ruc, ikasu da met ya timec ku. Emmuc da, ket suruten dac met. 28Ket e̍cdac da ngarud iya agnanayun nga biyag, ket madi da mapukaw nga pulus, se̍ awan makaagaw igida iya panangaywan ku. 29Ya Amac, nitalec na da iyaken, ket igina met ya kangatuwan iya amin. Itu nga awan ngarud makaagaw igida iya panangaywan niya Ama. 30Ngarud, ya Ama se̍ iyaken, ket is-isa,” kunen na.
31Ket dito Hudyu, pimidit da manin ka batu nga pangdampag da kuma e̍ Je̍sus. 32Ket e̍ Je̍sus, kinunen na igida, “Adu diya nabaru nga winangel ku nga nipawangel niya Ama iyaken. Nagan kadiyan nga winangel ku ya pangdampagan nu iyaken?” kunen na.
33Ket kinunen met dito Hudyu igina, “Bekken nga gapu iya isa nga nabaru nga winangel mu ya pangdampagan mi ikew, no di lugud gapu iya kagim nga maikuntra iya kinapudnu maipanggep e̍ Apu Diyus. Ta toley ka ngas met, ngem pagbalinem met nga Diyus ya beggi mun!” kunen da.
34Ngem kinunen ne̍ Je̍sus, “Malagip nu kuma to naisurat iya Linteg nu maipanggep kadito manglinteg itun, ito kinunen ne̍ Apu Diyus nga agten idi: ‘Naibilang nakayu pe̍ nga didiyus,’ kunen na met iya Linteg. 35Ket emmu tida met nga pudnu ya naisurat iya Bibliya, ket madi mabaliwan orey ka agnanayun. Iya agten iyan, e̍ Apu Diyus mettas ya nanginagan kadito nangagiyan na nga diyus da kanu. 36Itu nga no maipanggep iyaken, ape̍ kunen nu nga maikuntra e̍ Apu Diyus ya kagic no kunec nga iyaken ya Anac ne̍ Apu Diyus? Ta iyaken, pinili nac met ya Ama nga agpaay iya panggep na, ket nibon nac ngarud iya lubung ngi.
37“Ngarud, no tutu kuma nga bekken nga diya ipawangel niya Amac ya wangwanglec, kustu met no di dac patiyen. 38Ngem orey di dac gabay nga patiyen, patiyen nu kuma lugud diya wangwanglec, tasun gapu kadidi nga pagilasinan, masursuruwan kayu se̍ maemmuwan nu kuma nga naitipun ya Ama iyaken, se̍ naitipun nac met pe̍ igina,” kunen na.
39Ket gapu kadiyan nga kinunen ne̍ Je̍sus, panggeppen da manin nga tacmen, ngem nakalisi met. 40Ket nawe̍ manin nge̍ Je̍sus iya demmang nito wangag Hordan, ito namautisaran nito Juan itun. Ket nagedyan nge̍ Je̍sus antuni nin.
41Adu diya toley nga nawe̍ ito edyan na. Ket kinunen da iya panagtetebbar da, “To Juan, awan nakaskasdaaw nga pagilasinan nga inariman na nga agten kadidi, ngem pudnu met dito amin nga nibaga na maipanggep idi nga toley,” kunen da. 42Ket iya agten iyan, adu diya toley nga namati e̍ Je̍sus antuni.
Aktuálne označené:
Juan 10: YBT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 1990 New Tribes Mission, Sanford, FL 32771-1487, USA.
Printed in the Philippines.