Juan 17
17
To panangikarkararag ne̍ Je̍sus kadiya pasurut na
1Kalpasan niya panangagi ne̍ Je̍sus kadiyan, limangad ka langit, ket nagkararag nga kinunen na, “Ama, nadatnganin ya timpu nga panangipadayaw mu iya Anac mu, tasun maipadayaw naka pe̍. 2Ta ne̍cdam ya Anac mu ka turay nga mangituray kadiya amin nga toltoley, tasun maipaay na ya biyag nga agnanayun kadiya amin nga nitalec mu igina. 3Ket ya banag nidi nga biyag nga agnanayun, ket itu ya pannakaem-emmu da ikew nga is-isa se̍ pudnu nga Diyus, se̍ ya pannakaem-emmu da pe̍ e̍ Je̍su Kristu, nga itu ya nibon mu. 4Iyaken, nidaydayaw naka ngarud idi nga lubungin, ta tinungpal kun ya nipawangel mu iyaken. 5Dikad pe̍ ita, Ama, ipadayaw nac iya imatang mu, ka dayaw nga agten mettas ito sigud nga kinadayaw ku ito uwed dac iya edyan mu ito sacbay nga naparsuwa yani nga lubung.
6“Nipakaemmu naka kadidi nga toley nga nitalec mu iyaken idi nga lubung. Kuwam da nga sigud, ket nitalec mu da iyaken. Ket igida, nagtungpal da iya kagim. 7Ket ita, emmu da ngarudin nga gayat ikew nga tutu diya amin nga nitalec mu iyaken. 8Ta nipakaemmuc igida diya amin nga nipaibagam iyaken igida, ket inawat dan. Ket emmu dan nga tutu nga gayat tac ikew, se̍ patiyen da pe̍ yin nga ikew ya nangibon iyaken.
9“Ket igida diya ikarkararagac kun. Bekken nga diya madi mamati ya ikarkararagac, no di lugud didi nga toley nga nitalec mu iyaken, ta kuwam da ngarud. 10Amin didi nga toley ku, kuwam met pe̍, ket kuwac met pe̍ amin nga toley mu. Ket naidaydayaw wac gapu igida. 11Ket ita, madic agedyan idi nga lubungin, ta sumoli yac ikew win. Ngem igida, mabati da pekkem iya lubung ngi. Ama nga Nailangitan, aywanam da kay gapu iya pannakabalin niya turay mu, nga itu mettas ya turay nga nitalec mu pe̍ iyaken. Aywanam da kuma ngarud, tasun agkaykaysa da kuma pe̍ nga agten iya panagkaykaysa ta. 12Bayat niya kauwed ku igida, iyaken ya nangaywan igida gapu iya turay mu nga nitalec mu iyaken. Ngarud, nislaanac da, ket awan igida ya napukaw ku, malacsid to isa, nga igina ya agpaay ka pannakapukaw, ta itu ya pakatungpalan nito naisurat iya Bibliya itun pekkem.
13“Ket ita, sumoli yac ikew win. Ngem kagiyec didi bayat niya kauwed ku pekkem iya lubung ngi, tasun naan-anay kuma igida ya panaganggem nga agten mettas iya panaganggem ku. 14Nipakaemmuc igida ya kagi mun. Ket diya bekken nga mamati nga uwed idi nga lubung, ginura da met didi nga mamati. Ta didi nga mamati, agten da mettas iyaken, nga bekken da pe̍ nga kamkameng diya uwed iya lubung ngi. 15Ket ya adngec kun para igida, madic adngen nga ipanaw mu da iya lubung ngi, no di lugud iliclic mu da kuma ngas iya diyablu nga managdacdake̍c. 16Ngarud, bekken da nga kamkameng diya uwed idi nga lubung, ta agten da pe̍ iyaken nin, nga bekken nac pe̍ nga kameng diya uwed idi nga lubung. 17Pagbalinem kay nga nasnup ka ngas nga pagsirbiyan da, gapu iya kinapudnu nga ipakaemmum igida. Ket ya kagim, itu met ya pudnu. 18Ket ita, nibon ku da nga mangtungpal iya gagara da idi nga lubung, nga agten pe̍ ito panangibon mu iyaken idi nga lubung. 19Ket gapu igida, isnup ku ya beggic nga agsirbi ikew, tasun igida, maisnup da kuma pe̍ nga maipaay ikew, gapu iya kagim nga kinapudnu.
20“Ngem bekken nas nga igida didi diya ikarkararagac, no di lugud pe̍ diya mamati nad iyaken gapu iya kasaba da. 21Ikarkararag ku nga agkaykaysa da kuma nga amin, nga agten mettas dacta, Ama. Ta naitipun ka iyaken, se̍ naitipun nac met pe̍ ikew, ket maitipun da kuma pe̍ dacta. Ngarud, agkaykaysa da kuma, tasun diya toley idi nga lubung nga madi pekkem mamati, patiyen da kuma nga tutu nga ikew ya nangibon iyaken idi.
22“Ket didi nga pasurut ku, ipaay ku igida ya agten mettas nga nadayaw nga kasasaad nga nipaay mu iyaken, tasun agkaykaysa da kuma pe̍ yin nga agten mettas iya panagkaykaysa ta. 23Naitipun nac igida. Ket ikew, naitipun ka met pe̍ iyaken tasun iya agten iyan, awan met pagkurangan niya panagkaykaysa da. Ket no agten iyan, maemmuwan ngarud diya toltoley iya lubung nga tutu nga nibon nac idi, se̍ maemmuwan da met pe̍ nga uwed panagayat mu kadiya mamati iyaken, nga agten met iya panagayat mu iyaken.
24“Ket Ama, no didi nga toley nga nitalec mu iyaken, gabay ku nga ya kapennac nga edyan, ket itu nad met pe̍ kuma ya edyan da. Gabay ku ngarud ya agten iyan, tasun masingen da kuma ya nadayaw nga kasasaad ku nga nipaay mu iyaken gapu iya panagayat mu iyaken nga sigud, orey ito di pekkem naparsuwa ya lubung.
25“Ama nga nalinteg, madi daka ngarud em-emmu diya madi mamati nga toltoley idi nga lubung. Ngem iyaken, em-emmu naka met. Ket didi pe̍ nga nitalec mu iyaken, emmu da met nga ikew ya nangibon iyaken. 26Nipakaemmu nakan igida, ket ituluy ku pekkem ya panangipakaemmuc ikew igida, tasun no kumaan niya panagayat mu iyaken, itu kuma pe̍ ya uwed igida, ket se̍ tasun maitipun nac pe̍ igida,” kunen ne̍ Je̍sus.
Aktuálne označené:
Juan 17: YBT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 1990 New Tribes Mission, Sanford, FL 32771-1487, USA.
Printed in the Philippines.