Lukas 10
10
To panangibon ne̍ Je̍sus kadito pitu nga pulu ket duwa
1Ket kalpasan diyan, pimili manin ya Apu ka pitu nga pulu ket duwa nga toley, ket nibon na da nga sinagduduwa, nga mon-ona da nga mawe̍ kadiya tunggal ili se̍ lugar nga dumagasan nad ne̍ Je̍sus. 2Ket kinunen na kadito ibon na, “Arig nga adu win ya magani kuma, ngem e̍teng ngas diya aggani. Itu nga agkararag kayu kuma ngarud nga agadeng kayu iya akin-kuwa iya magani, tasun uwed da ibon na kuma nga mawe̍ manggani kadiya ipagani na.
3“Ket mawe̍ kayu ngarudin, ngem agannad kayu lugud. Ta ya panangibon ku dakayu ita, ket arig mettas nga uwed urbun karne̍ru nga iturung ku iya edyan diya atap nga asu nga nauyung. 4Ket idi nga ipeppen nu, awan kuma itarey nu nga kuwarta man, legpi winno re̍se̍rba nu nga palloka, se̍ madi kayu agsardeng iya dalan nga kumablaaw ka orey nagan na.
5“Ket no umuneg kayu iya isa nga baley, kumablaaw kayu nga mona, nga kunen nu, ‘Talna kuma ya uwed kadiya bumaley idi,’ kunen nu. 6Ket no uwed toley iyan nga baley nga makaawat nga tutu ka talna, maipaay ngarud igina ya kablaaw nu. Ngem no awan makaawat ka talna iyan, ket dakayu mettasin ya pakaipaayan niyan nga kablaaw nu. 7Agdagus kayu iyan mettas nga baley nga inuneg nu, nga madi kayu agal-alis ka pagdagusan nu. Ket ya ipasangu da dakayu, itu mettas ya kalinteggan nu nga kanen se̍ inumen, ta rumbeng ngarud nga matangdanan ya agtarabaku. 8Ket no dumateng kayu iya isa nga ili, se̍ rispitaren dakayu, ket kanen nu nga siiiyaman ya orey nagan na nga ipasangu da dakayu. 9Palaingen nu diya agsacsakit iyan nga ili, se̍ ibaga nu kadiya toley iyan nga, ‘Umadenni dakayun ya panangituray ne̍ Apu Diyus,’ kunen nu.
10“Ngem no makadateng kayu iya isa nga ili, ket madi dakayu rispitaren, ket mawe̍ kayu iya edyan diya kalkalsada niyan nga ili, ket agten idi ya kunen nu iya imatang diya toltoley iyan nga ili: 11‘Orey ya tapuc niya ili nu nga dumket kadiya saka mi, punasan min, tasun maemmuwan nu ngarud nga awan bibiyang mi dakayu. Ngem tandaanan nu lugud nga imadenni met dakayu ya panangituray ne̍ Apu Diyus,’ kunen nu. 12Ket pudnu met nga nad no madatngan ya panangukum ne̍ Apu Diyusin, nangnangruna nad nga kaasiyan ne̍ Apu Diyus dito iSuduma ngem diya toltoley iyan nga ili nga madi mangrispitar dakayu,” kunen na.
Dito il-ili nga awan mamati
Mat. 11:20-24
13Uwed manin kinunen ne̍ Je̍sus, nga agten idi: “Kackaasi kayu nga iKorasin se̍ dakayu nga iBe̍tsayda! Ta orey adu win diya nakaskasdaaw nga naipasingen dakayu iya ili nu, madi kayu latta nga agbabawi kadiya basbasul nu. Ket no dito iTiru se̍ iSidun kuma nga gennung ya nakaipasingnan diyan nga nakaskasdaaw, ket nalaka da lugud nga nipasingen nga agbabawi dan, nga agkawwes da ngarud ka nakatel nga luput, se̍ agtugtugew da kuma pe̍ iya dapagin gapu iya ladingit da.
14“Ket kinapudnu na, no iya timpu nad niya panangukum, nangnangruna nad nga kaasiyan ne̍ Apu Diyus dito iTiru se̍ iSidun ngem dakayu. 15Ket dakayu nga iKape̍rnaum, nagan na ya ipagarup nu? Maidayaw kayu nad ngata ka langit? Bekken met! Maipasegged kayu lugud met iya pagtuukan diya natey.”
16Ket kinunen ne̍ Je̍sus kadito ibon na, “Ya mangipangag dakayu, iyaken met ya tutu nga ipangag na. Ket ya toley nga madi mangdayaw dakayu, iyaken met ya madi na dayawen. Ket ya madi mangdayaw iyaken, ya nangibon met iyaken ya madi na dayawen,” kunen na.
Ito simoli dito pitu nga pulu ket duwa
17Ket kalpasan nito gagara dito pitu nga pulu ket duwa nga nibon ne̍ Je̍sus, simoli da nga siaanggem. Ket kinunen da, “Apu, orey diya sairu, ikasu dakami met gapu iya turay mu!” kunen da.
18Ket kinunen ne̍ Je̍sus igida, “Pudnu met yan, ta naimatangac met ya kellat nga pannakaidegsut ne̍ Satanas manipud ka langit, nga arig mettas nga panagsel-it. 19Tutu met nga ne̍cdan nakayun ka pannakabalin, tasun mabalin nu ya manggudel kadiya malaga se̍ gagamat, nga madi kayu maan-anu, se̍ tasun mangabac kayu iya amin nga pannakabalin nito mangkuntra dactida, ket awan ngarud pakaan-anuwan nu. 20Ngem orey ikasu dakayu diya sacsairu, bekken kuma nga itu ya paganggemman nu, no di lugud aganggem kayu gapu ta nailista diya nagan nu ka langitin,” kunen na.
To panagyaman ne̍ Je̍sus iya Ama
Mat. 11:25-27, 13:16-17
21Iyan mettas nga kanitu, pinagragsac met niya Ispiritu Santu nge̍ Je̍sus. Ket kinunen ne̍ Je̍sus nga sikakararag, “Agyaman nac ikew, Ama nga Apu niya langit se̍ ya lubung ngi. Agyaman nac ngarud, gapu ta nilimed mu didi nga banbanag kadiya uwed adal da se̍ kadiya mamasirib, ngem nipakaemmum nga gennungin kadiya kadawyan nas nga toley nga maiyarig ka ebbing nga awan pekkem adal na. Agten iyan ngarud ya wagas mu, Ama, ta itu met ya gabay mu,” kunen na.
22Ket kinunen manin ne̍ Je̍sus, “Nitalec niya Amac iyaken diya amin. Ket awan met makaem-emmu iya Anac, no di ngas ya Ama. Se̍ awan met makaem-emmu iya Ama, no di ngas ya Anac, se̍ diya gabay ngas niya Anac nga pangipakaemmuwan igina,” kunen na.
23Ket kalpasan niyan, simangu nge̍ Je̍sus kadito adalan na, ket ig-igida ya nangibagaan na, nga kinunen na, “Nagasat kayu gapu kadiya masingsingen nu ita. 24Ta kinapudnu na, adu dito mammadtu se̍ ar-ari nga nagtarigagay nga makasingen kuma kadidi nga masingsingen nu ita, ngem di da met nasingen. Se̍ ginabay da pe̍ ya makagicna kuma kadidi nga magicgicna nu ita, ngem di da met pe̍ nagicna,” kunen na.
To pangngarig maipanggep ito nanacman nga iSamarya
25Ket itun, uwed isa nga masirib iya Linteg nga nagsikad nga nangsintir e̍ Je̍sus, nga kinunen na, “Mistru, nagan ya masapul nga wanglec tasun magun-ud ku kuma ya biyag nga agnanayun?” kunen na.
26Ket kinunen ne̍ Je̍sus, “Nagan kad ya naisurat iya Linteg tida? Nagan ya panagawat mu iya maibasbasa nga pe̍yeng iya gigimungan?” kunen na.
27Ket simungbat to masirib nga kinunen na, “Kunen na iya Linteg nga, ‘Ayatem ngarud ya Apu nga Diyus mu iya amin nga kabaellam nga mangipateg nga uwed iya pusum, iya nakem mu, iya bileg mu, se̍ iya sirib mu.’ Se̍ kunen na pe̍ nga, ‘Ayatem ya padam nga toley, nga agten mettas iya panagayat mu iya beggim,’” kunen na.
28Ket kinunen ne̍ Je̍sus igina, “Kustu ya sungbat mu. Agten iyan kuma ya wanglem, ket uwed nad ngarud ikew yan nga biyag,” kunen na.
29Ngem to masirib iya Linteg, gabay na nga ikalinteggan latta ya beggi na, itu nga nagsaludsud manin e̍ Je̍sus nga kinunen na, “Bo a, ngem nagan na kuma ya naibilang nga kapadac?” kunen na.
30Ket nipalawag ne̍ Je̍sus nga kinunen na, “Agten idi: Uwed isa nga lalaki nga naggayat ka He̍rusale̍m, nga managus nga mawe̍ ka He̍riku. Ket uwed da met tulisan nga nangsaneb igina, ket inalac da ngarud amin diya uwed igina, agraman ya luput na. Kinabkabil da, ket pinanawan da nga makatkatayen nin.
31“Ket nairana met pe̍ ya managus iyan ya isa nga agsirsirbi iya Te̍mplu. Ket ito nasingen na to lalaki nga natulisan, liniclikan na ngas met nga tinaliban. 32Ket agten pe̍ iyan ya isa nga katulungan iya Te̍mplu nga kapututan nito Le̍bi, ta ito nanalan iyan se̍ nasingen na to natulisan, liniclikan na ngas met pe̍ nga tinaliban.
33“Ngem uwed met pe̍ isa nga iSamarya nga nanalan iyan. Ket ito nasingen na to natulisan, naasiyan igina. 34Inadenniyan na ngarud, ket inagasan na diya talingu na ka lana se̍ basi, se̍ na binedbeddanin. Kalpasan na, nisakey na to lalaki iya kabayu na, ket nawe̍ na nipen iya isa nga pagdadagusan, se̍ na inistimar antuni.
35“Ket ito kaagsapaan na, nange̍cde̍ to iSamarya ka duwa nga pirac ito agpadpadagus, ket kinunen na, ‘Istimarem kay yani nga toley. Ket no madi makaanay yan nga ne̍cde̍c, anayac nad no sumoli yac,’ kunen nito iSamarya,” kunen na.
36Ket kalpasan nidi nga panagpangngarig ne̍ Je̍sus, kinunen na ito masirib iya Linteg, “Iya panagkunem, nagan kadito tellu ya pudnu nga kapada nito toley nga sinaneb dito tulisan?” kunen na.
37Ket kinunen met nito masirib, “To nangaasi igina, a,” kunen na.
Ket kinunen ne̍ Je̍sus, “Agten iyan kuma ngarud ya wanglem,” kunen na.
De̍ Marta nge̍ Marya
38Ket ito nituluy de̍ Je̍sus ya pananalan da, dimateng da iya isa nga ili. Ket antuni, uwed isa nga babey nga nangsangaili igida, nga agnagan ka Marta. 39Ket uwed pe̍ babey nga kabsat ne̍ Marta nga agnagan ka Marya. Ket e̍ Marya, nakasalompe̍e̍ iya sangu niya Apu nga aggicgicna iya panursuru na. 40Ngem e̍ Marta nga gennung, malipuwessan iya adu nga panagisagana na. Itu nga nawe̍ iya edyan ne̍ Je̍sus, ket kinunen na, “Apu, awan kadi anyaman na ikew no ipamoya nac nge̍ kabsat ku iya panagistimar ku? Ibagam kay igina nga umbe̍t nac tulungan,” kunen na.
41Ngem kinunen niya Apu igina, “Ay, Marta, adu was ya pakadanagam se̍ pakariribukan niya panpanunut mu. 42Ngem bekken met nga adu diya masapul mu nga biyangan, no di yas is-isa. E̍ Marya, pinili na mettin ya mayat, ket pulus nga madi maipac igina yan,” kunen na.
Aktuálne označené:
Lukas 10: YBT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 1990 New Tribes Mission, Sanford, FL 32771-1487, USA.
Printed in the Philippines.