Lukas 6
6
To panursuru ne̍ Je̍sus maipanggep iya Algew Ngilin
Mat. 12:1-8; Mar. 2:23-28
1Ito name̍nsan nga Algew Ngilin, manmanalan de̍ Je̍sus iya laplapug nga namulaan ka trigu. Ket dito adalan na, uwed kineltung da nga dawa diya trigu. Rinedred da nga rinunas, ket inukisan da, se̍ da ngarud kinan. 2Ket uwed da met Parisiyu nga nagkunen, “Ape̍ nga wanglen nu ya maiparit iya Linteg tida iya Algew Ngilin?” kunen da.
3Ket kinunen ne̍ Je̍sus, “Di nu pekkem aya nga nabasa ya maipanggep ito winangel nito Ari Dabid ito nabisin, se̍ dito kabulun na? 4Ta imuneg met to Dabid iya pagdaydayawan nga maawagan ka baley ne̍ Apu Diyus, ket nimet na dito tinapay nga naidatun mettas e̍ Apu Diyus. Ket nangan met to Dabid ito tinapay, se̍ ne̍cdan na met pe̍ dito kabulun na. Agten iyan ngarud ya winangel nito Dabid, orey emmu na nga sigun iya paglinteggan tida, diyan nas met agsirsirbi iya pagdaydayawan ya mapalubusan nga mangan iyan nga tinapay,” kunen na.
5Ket kinunen manin ne̍ Je̍sus kadito Parisiyu, “Ya Anac nga Naipatoley, igina met ya Apu niya Algew Ngilin,” kunen na.
To lalaki nga nacpe̍t ya ima na
Mat. 12:9-14; Mar. 3:1-6
6Ito isa nga Algew Ngilin manin, nawe̍ nge̍ Je̍sus iya gigimungan diya Hudyu, ket nangisursuru antuni nin. Ket uwed pe̍ iyan ya isa nga lalaki nga nacpe̍t ya diwanan nga ima na. 7Ket dito manursuru iya Linteg, se̍ dito Parisiyu, sicsiimen da met nge̍ Je̍susin, no mangpalaing iya Algew Ngilin, tasun uwed panggapuwan da nga mangidarum igina.
8Ngem emmu met ne̍ Je̍sus to panpanunuten da, itu nga kinunen na ito lalaki nga nacpe̍t ya ima na, “Umbe̍t ka agsikad idi, sangu mi,” kunen na. Ket ginumnukat ngarud to lalaki, ket nawe̍ nagsikad ito edyan ne̍ Je̍sus.
9Ket itun, kinunen ne̍ Je̍sus kadito agsicsiim, “Saludsudec man dakayu: Nagan kad ya maipalubus iya Linteg tida nga wanglen tida kuma iya Algew Ngilin? Ya panagwangel ka nabaru, winno ka dake̍c? Ya panangisalakan ka biyag, winno ya pumatey?” kunen na. 10Ket limanga met nge̍ Je̍sus nga simingsingen iya tunggal isa igidan, se̍ na kinunen ito lalaki nga nacpe̍t to ima na, “Ucnatem ya imam,” kunen na. Ket inucnat ngarud nito lalaki to ima na, ket nalaingan mettin.
11Ngem napalaus ya unget dito Parisiyu se̍ dito manursuru iya Linteg, ket nagtetebbaran da no kumaan kuma niya pamaayan da e̍ Je̍sus.
To panangpili ne̍ Je̍sus kadito sangapulu ket duwa nga apustule̍s
Mat. 10:1-4; Mar. 3:13-19
12Ket iya isa nga algew itun, nawe̍ nanang-at nge̍ Je̍sus iya isa nga tageytey, tasun agkararag. Ket nagwakas met ennan nga nagkarkararag e̍ Apu Diyus.
13Ket ito kadamlag na, inayaban na dito pasurut na, ket pimili ka sangapulu ket duwa igida. Ket itu dito toley nga inawagan na nga apustule̍s. 14Pinili na nge̍ Simon nga pinanaganan na pe̍ ka Pe̍dru, se̍ e̍ Andre̍s nga kabsat ne̍ Simon, de̍ Santiyagu nge̍ Juan, de̍ Pe̍lipe̍ nge̍ Bartulume̍, 15de̍ Matyu nge̍ Tumas, se̍ e̍ Santiyagu nga anac ne̍ Alpiyu, se̍ e̍ Simon nga maawagan ka Pasnec, 16se̍ e̍ Hudas nga anac ne̍ Santiyagu, se̍ to Hudas Iskariyute̍, nga itu to nagbalin nga nangliput.
To panursuru ne̍ Je̍sus
Mat. 4:23-25
17Ket ito managus da ito tageytey, nagsardeng nge̍ Je̍sus iya nasimpa nga lugar, ket uwed adu nga pasurut na antuni. Adu pe̍ diya duduma nga toley nga uwed ennan, nga gayat da kadiya il-ili ka prubinsiya nga Hudya, se̍ gayat da pe̍ ka He̍rusale̍m, se̍ uwed da pe̍ gayat ka Tiru, se̍ Sidun, nga itu dito duwa nga ili nga denni iya baybay. 18Nawe̍ da ngarud antuni, tasun aggigicna da e̍ Je̍sus, se̍ tasun paagasan da diya sacsakit da. Ket diya toley antuni nga parparigaten sairu, ket nalaingan da met. 19Ket amin dito toltoley, gabay da nga se̍cde̍ngen kuma nge̍ Je̍sus, ta uwed met pannakabalin nga tumaud igina nga mangpalaing igida nga amin.
Maipanggep kadiya nagasat se̍ diya kackaasi
Mat. 5:1-12
20Ket itun, siningen ne̍ Je̍sus diya pasurut na, ket kinunen na igida,
“Dakayu nga makasapul, nagasat kayu,
ta uwed dakayu ya panangituray ne̍ Apu Diyus.
21Dakayu nga mabisbisin ita, nagasat kayu,
ta mapnec kayu nad mettas.
Dakayu nga agladladingit ita, nagasat kayu,
ta aggalgalec kayu nad nga siraragsac.
22“Nagasat kayu met, orey no guraen dakayu diya toltoley, se̍ no isina dakayu winno amisen dakayu, winno umsiyen da ya kinaturay nu, gapu mettas iya panamati nu iya Anac nga Naipatoley. 23Ngarud, agragsac kayu lugud no mapasamac dakayu didi, se̍ ilagtuc nu kuma ngas ya napalaus nga anggem nu. Ta ya kinapudnu na, uwed met dackel nga gun-guna nu nad ka langit. Agragsac kayu ngarud, ta laglagipen nu kuma nga idi nga panangparigat da dakayu ita, ket agten met pe̍ ito panangparigat dito am-ama da kadito mammadtu itun.
24“Ngem no dakayu nga nabacnang,
kackaasi kayu nga gennung,
ta ita ngas met ya pannakaliwliwa nu.
25Dakayu nga awan kasapulan na ita,
kackaasi kayu pe̍,
ta agbisin kayu nad met.
Dakayu nga agag-agalec ita, kackaasi kayu pe̍,
ta agladingit se̍ agberrit kayu nad met.”
26“Kackaasi kayu pe̍ no idaydayaw dakayu diya toltoley yin, ta agten met pe̍ iyan to panangidayaw dito am-ama da kadito busid nga mammadtu itun.”
Maipanggep iya panangayat kadiya kumuntra dactida
Mat. 5:38-48, 7:12
27“Ngem dakayu nga aggigicna iyaken nin, kunec dakayu, nga ayaten nu lugud diya kumuntra dakayu, se̍ nabaru kuma ngas ya ipaay nu kadiya gumura dakayu. 28Ket adngen nu lugud ya panangaasi ne̍ Apu Diyus kadiya mangilunud dakayu, se̍ ikararagan nu kuma pe̍ diya mangpasakit dakayu. 29Ket no uwed mangtungpa iya pasngit mu, palubusam nga tungpaen na pekkem orey ya bangir. No uwed mangipanaw iya punyus mu, ket ipalubus mu met pe̍ nga alac na orey pe̍ ya badum. 30E̍cdan nu ngarud ya orey nagan na nga agadeng dakayu. Se̍ no uwed mangpilit nga mamet ka sanicwa nu, di nu met ipilit nga paisoli yin. 31Ngarud, ya gabay nu nga mawangel kuma dakayu, itu kuma ya wanglen nu mettas iya kapada nu.
32“Ket no diyan nas toley nga agayat dakayu ya ayaten nu, nagan ngarud ya pakaidayawan nu gapu iyan? Ta orey diya managbasul, ayaten da met pe̍ diya agayat igida. 33Se̍ agten pe̍ no diyan nas mangipaay dakayu ka nabaru ya ipaayan nu met ka nabaru, nagan ngarud ya pakaidayawan nu iyan? Ta orey diya managbasul, agten met pe̍ iyan ya pamaayen da. 34Ket no diyan nas siguradu nga agbayad kadiya utangen da ya pautangan nu, nagan kad ya pakaidayawan nu iyan? Ta orey diya managbasul, pautangan da met diya pada da nga managbasul, no namnamaen da nga mabayadan mettas ya ipautang da.
35“Ngem ya wanglen nu kuma nga gennung, ayaten nu lugud diya kumuntra dakayu, ket nabaru ya ipaay nu igida. Ket agpautang kayu nga orey awan namnamaen nu nga maibayad. Ket no agten iyan ya wanglen nu, dackel met ya maigun-guna dakayu, ket anac nakayu nga tutu ya Kangatuwan maigapu ka ugali. Ta igina, kaasiyan na met orey diya toley nga madi makaemmu nga agyaman, se̍ diya dake̍c nga toley. 36Ngarud, dakayu, masapul nga managkaasi kayu, nga agten mettas iya gangey niya Ama nu nga managkaasi.”
Maipanggep iya di tida kuma nga mangpabasul
Mat. 7:1-5
37“Ket madi kayu kuma pabasulen ya kapada nu, ket iya agten iyan, madi kayu met pe̍ mapabasul. Se̍ madi nu ukumen ya kapada nu, ket iya agten iyan, madi kayu pe̍ maukum. Mamakawan kayu, ket mapakawan kayu met pe̍. 38Mange̍cde̍ kayu, ket mae̍cdan kayu met pe̍. Ngarud, no agten iyan, mae̍cdan kayu ka adu nga maikamboy dakayu, ta kustu met ya pagsukat nga mausar para dakayu, se̍ nasedsed se̍ agpatpatutuc pe̍ agingga ka aglablabni yin. Ta no kumaan niya panangaasi nu, agten nad met iyan ya pannakakaasi nu,” kunen na.
39Ket kinagi pe̍ ne̍ Je̍sus igida yani nga pangngarig: “Kumaan ngarud niya panangge̍pe̍d niya isa nga kulap iya pada na nga kulap? Ta no agten iyan, di ngarud misacdul da nga duwa nga maipisuc ka ebbut? 40Agten pe̍ ya agad-adal, ket bekken met nga nangatngatu ngem iya mangisursuru igina. Ngem no maadal nan diya amin nga naisuru igina, agbalin nad nga agten mettasin iya nangisursuru igina,” kunen na.
41Ket kinunen manin ne̍ Je̍sus, “Ape̍ nga dellawem ya puling nga uwed iya mata niya kapadam, ngem madi ka met madlaw ya tabla nga uwed iya mismu nga matam? 42Ket bayat niya kauwed pekkem niya tabla iya matam, ape̍ nga kunem iya kapadam nga, ‘Da, kabsat, ta ipac ku ya puling mu.’ Ay! Aginlilinteg ka met no agten iyan! Ta masapul nga ipac mu pekkem nga mona ya tabla nga uwed iya mismu nga matam, tasun nabatad ya panagsingem nga mangipac iya puling nga uwed iya mata niya kapadam.”
To pangngarig maipanggep iya nabaru se̍ ya dake̍c nga kayu
Mat. 7:15-20, 12:33-35
43“Ket agten idi pe̍: Diya nabaru nga kayu, madi da met mamisic ka dake̍c. Se̍ diya dake̍c nga kayu, madi da met pe̍ mamisic ka nabaru. 44Ta ya mismu nga bisic niya tunggal kayu, itu mettas ya pakailasinan na. Tutu met nga bekken ngarud nga maburas ka narasi nga ruut ya bisic igus. Se̍ bekken met nga maburas ka narasi nga kayu ya bisic ubas. 45Ket agten pe̍ iyan ya toley, ta nabaru ya tumaud iya nanacman nga toley, gapu ta nabaru met ya uwed iya lemlemmet na. Ket dake̍c met ya tumaud iya dake̍c nga toley, gapu ta dake̍c ya uwed iya lemlemmet na. Ta ya uwed iya lemlemmet niya isa nga toley, itu mettas ya maikagi niya musung na.
To pangngarig maipanggep kadiya duwa nga agbaley
Mat. 7:24-27
46“Ape̍ aya nga awagan dac nga kunen nu nga, ‘Apuc, Apuc,’ kunen nu iyaken, ngem di nu met latta tungpalen diya ibagac dakayu? 47Ngem amin nga umbe̍t iyaken nga dumngeg kadiya kagic, se̍ agtungpal kadidi, agten idi ya kasasaad da: 48Ya agten kadiyan nga toley, maiyarig met iya isa nga nagpasikad ka baley. Nagkorob nga nona ka nauneg, ket pinas met ya nangisaadan na. Dikad pe̍ ito naglayusin, dinalapus na met yan nga baley, ket madi pulus nga naan-anu, ta nabaked ya pannakaisimpa na.
49“Ngem ya toley nga dumngeg iya kagic, ngem di na met tungpalen, ket maiyarig met iya isa nga toley nga nagpasikad ka baley iya rabaw niya ginet, nga awan nabaked nga nangibangunan na. Ket ito naglayusin, dinalapus na yan nga baley, ket dagus nga narogpac. Ket napirdi nga pudnu yan nga baley yin,” kunen na.
Aktuálne označené:
Lukas 6: YBT
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
© 1990 New Tribes Mission, Sanford, FL 32771-1487, USA.
Printed in the Philippines.