OKHUCHIAKA 23
23
Sara yafwa ma Aburahamu nakula liloba liebilindwa
1Sara yamenya emihika emia ndala amakhumi kabili nende chine nachitaru. 2Yafwila musibala sia Kiriatsi Arabba, esilangwanga leelo mbu Heburoni, musibala sia Kanaani, ma Aburahamu niyekhuula okhusila khulwa okhufwa khwa Sara.
3Aburahamu narula ahomufuwe yali nali, natsia khu Bahiti, naboola mbu, 4“Ise ndi omucheni butswa omenyele muinywe, mungusiekhwo liloba elianzabilamwo omukhasi wanje.”#Heb. 11:9,13; Ebikh. 7:16
5Abahiti nibakalusia mbu, 6“Khuhul'le Omwami, ibe oli omukhulundu, owakhuhengangakhwo singa omwemeli omukhongo. Oyabile omukhasiwo mubilindwa biefwe ebichoomekhe. Sialiho omundu khu ifwe owakhakhwima esilindwa siokhuyabilamwo omufuwo tawe.”
7Ma Aburahamu nabenamila, 8naboola mbu, “Nimuba nimuhuchiliye mbu nzabile omufu wanje hano, yanze mureebele Efuroni omwana wa Sohari 9yangusie olwangaywa lwa Makipela, oluli ahembi khundulo khwomukunda kukwe. Mumureebe yangusichis'sie khubukusi bwatooto, imbeli wenywe, kho libe liloba lianje eliandakhakhola okhuba eliebilindwa.”
10Efuroni mwene yali niyekhaye nende Abahiti basie mumukhung'ano, nakalusia abandu bosi nibahul'langa abali nibali musilibwa sielitaala, naboola mbu, 11“Umbuyie bulahi omwami. Naakhuhe omukunda yikwo kwosi nende olwangaywa lulimwo. Khuheelanga imbeli wabandu banje bano bosi, khe obe onyala okhuyabilamwo omukhasiwo.”
12Aburahamu niyenama imbeli wa Bahiti 13ma nabool'la Efuroni, buli mundu nahul'langa mbu, “Noyanza umbul'le, nyenya ngule omukunda yikwo kwosi. Bukula omurungo kwobukusi bwomukunda, ma nzabilemwo omufu wanje.” 14Efuroni nakalusia mbu, 15“Omwami, obukusi bwomukunda yikwo nebitonye biefetsa ebihela etsimia tsine, nabio nisina hakari wanje n'nawe? Yabilamwo omukhasiwo.” 16Aburahamu nahuchiil'la amang'ana ka Efuroni, ma namuchel'la ebitonye biefetsa ebiayali naral'le imbeli wabandu bosi khubukusi obwarumikhilwanga nende abakholi beinganga.
17Nimbwo omukunda kwa Efuroni okwalinji Makipela, ebukwe wa Mamure, kwamala nikuba okwa Aburahamu. Kwalimwo omukunda, nende imbinga, ma nende emisaala chiosi okhwola khulwakho lwakwo. 18Biosi biamanyikha singa emiandu chia Aburahamu khu Bahiti bosi abali nibetsele mumukhung'ano.
19Aburahamu nayabila omukhasiwe Sara mumbinga yimwo eli musibala sia Kanaani. 20Kho esibala esialinji esia Abahiti nende imbinga eyalimwo, biamala nibiba omwandu kwa Aburahamu khulwokhuba liloba liokhuyabilamwo abafu.
Aktuálne označené:
OKHUCHIAKA 23: EBAIBO
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©Bible Society of Kenya, 2019