OKHUCHIAKA 24
24
Okhuteesia khwa Isaka
1Aburahamu yali niyasakhuye okhusila, ne OMWAMI yali niyamulaamila tsikhabi mukosi akayakholanga. 2Nabool'la omukholiwe owali omukhulundu khubosi ma khandi owali niyasinjil'la ebindu biosi ebiayali n'nabio mbu, “Nyenyanga ore omukhono kukwo mumarango#24:2 Omukhono kukwo mumarango Muluheburania nimbwo esiesuho sialombwanga sila okhukalukhanibwa. kanje, 3ma wesuuhe muliira lio MWAMI, Nyasaye welikulu nende esibala mbu siwakhel'lekhwo omwana wanje omukhasi okhurula mubakhaana ba Bakanaani bandamenyamwo tawe. 4Ne wakhatsie musibala siandebul'lwamwo ma olanyool'lemwo omwana wanje Isaka omukhasi okhurula mubekho befwe.”
5Nebutswa omukholi uyo nareeba, “Ne nikakhaba mbu omukhaana tsana yakhasuula okhwitsa n'nase musibala sino, ndakhabukula omwanawo ndamukalusia musibala siawarulamwo noho?”
6Aburahamu namubool'la mbu, “Orakhakalusiakhwo omwana wanje musibala yisio tawe. 7OMWAMI, Nyasaye welikulu yambinia mungo mwa papa, khandi musibala siandebul'lwamwo, ma niyandaka butinyu mbu yakhaheelesie olwibulo lwanje esibala sino. Narume om'malaika imbeliwo, ma nonyoole omukhasi khulwa omusiani wanje. 8Nikakhaba omukhaana siyakhahuchil'la okhwitsa n'nawe tawe, ne oba omulakhuule khusilakamunwa yisi. Nebutswa orakhakalusiakhwo omwana wanje ebwene iyio tawe.” 9Khe omukholi uyo yamala nara omukhonokwe mumarango ka Aburahamu, omwamiwe, ma namwesuhila khumang'ana yako.
10Omukholi uyo owalindanga emiandu chia Aburahamu yamala nabukula tsingamia tsiomwamiwe likhumi, ma narula natsia Mesopotamia mwitaala lia Nahori yamenyangamwo. 11Olwa yoolayo, yasikamia tsingamia ahembi nende esitaho esioba welitookho. Tsiali etsisaa tsiokhumukolooba olwa bakhasi betsanga okhwenda amaatsi musitaho. 12Nasaaya naboola mbu, “OMWAMI Nyasaye, womwami wanje Aburahamu, khusaayanga mbu unyal'le litukhu lino ma ohesie esilakamunwasio khu mwami wanje Aburahamu. 13Lola ndi khusitaho siamaatsi esiabakhaana bomwitookho muno betsa okhutahamwo amaatsi. 14Omukhaana wanambool'le khubo mbu, ‘Noyanza ruula isongoyo umbekhwo amaatsi nywe,’ naye naboola, ‘Nywa, khandi nzia khunywesia tsingamia tsitsio,’ nabe niye owaweleye omurumikhiliwo Isaka. Nase namanye mbu umubeeleye esirenda Omwami wanje.”
15Olwayali nasisaaya, Rebeka yoolaho nende isongo yamaatsi khumurwekwe. Rebeka yali omwana wa Betsweli, owali omwana womusiani wanga Aburahamu owalangwa Nahori halala nomukhasiwe Milika. 16Yali omukhaana welikondo lilahi okhusila ma nasili okhubakhwo nomusaatsa wosi tawe. Yakongoma musitaho, nataha amaatsi musongoye ma nachaaka oluchendo lwokhukalukha ingo. 17Omukholi wa Aburahamu natsia tsimbilo okhumwakan'na namubool'la mbu, “Noyanza mbeekhwo amaatsi musongo nywe.”
18Naye naboola, “Nywakhwo, omwami,” ne naruula isongo okhurula khwibeka namutiil'la ma nanywa. 19Olwayali namal'le okhunywa omukhaana naboola, “Lekha ndahile tsingamia tsitsio amaatsi natsio tsinywe katsihele.” 20Natsukha bwangu amaatsi kali musongoye mulukalayi lwamaatsi ma niyelukha natsia okhusomba amaatsi kandi okhwola olwe tsingamia tsiosi tsiali nitsinyweye. 21Omusaatsa uyo naye yamuhenga butswa nabun'ne alole nikali OMWAMI umulombeye oluchendo lulwe.
22Olwomukhaana uyo yali namal'le okhunywesia tsingamia tsiosi, omusaatsa uyo yahiinia epete yetsahabu eyobukusi obukali nende emikasa chibili echiokhura khumukhono. 23Namureeba mbu, “Oli omukhaana wa wiina? Yanza umbool'le nikali obweyangu bulikhwo munyumba yenywe obwakhwakhakonamwo.”
24Omukhaana nakalusia mbu, “Ise ndi omukhaana wa Betsweli omwana wa Nahori nende Milika. 25Khulikhwo nende amasakhwe nende ebiokhulia bietsingamia ma khandi khuli nende habundu aheinywe munyala okhukona.”
26Omusaatsa uyo nasikama hasi niyetsoomia OMWAMI. 27Yaboola mbu, “OMWAMI, Nyasaye womwami wanje Aburahamu yetsoomibwe, okhuba uhesisie esilakamunwa sisie khu Mwami wanje. OMWAMI unyemeleye okhwola khubekho bomwami wanje.”
28Omukhaana uyo niyelukha tsimbilo natsia nabool'la abali munyumba ya nyina amang'ana yako kosi. 29Ne Rebeka yali nende omwana wabwe owalangwa Labani, owarula tsimbilo natsia khusitaho ahomukholi wa Aburahamu yali. 30Labani yali naluutsi epete nende emikasa khumakhono komukhaana wabwe ma nahuliiye amang'ana komusaatsa uyo yali nabooye. Natsia khumukholi wa Aburahamu, owali nasinjiiye ahembi netsingamiatsie hasitaho. 31Ne namubool'la mbu, “Witse khutsie n'nawe ingo. Oli omundu owa Nyasaye yahelesia tsikhabi. Busina osinjiye hano? Mal'le okhukhulombela habundu hokhukona khandi nombeeye tsingamiatsio obweyangu.”
32Kho omundu uyo niyenjila munyumba, ne Labani nabohol'la ebiali khutsingamia ma natsihelesia amasakhwe. Ma naleer'ra omukholi wa Aburahamu halala nende abandube amaatsi kokhwesaaba ebilenje. 33Olwebiakhulia bialerwa omundu uyo naboola mbu, “Sindiakhwo nisili okhuboola akandi n'nako tawe.”
Labani naboola, “Khakaboolekhwo khul'le.”
34Naye naboola mbu, “Ise ndi omukholi wa Aburahamu. 35OMWAMI wahelesia omwami wanje tsikhabi tsinyinji ma wamukhola okhuba omuhinda. Womuhelesia amakondi nende tsimbusi, tsing'ombe, efetsa, etsahabu abasumba bes'saatsa nende abesikhasi, tsingamia ma nende etsipunda. 36Sara, omukhasi womwami wanje yamwibul'la omwana mubusiele bubwe, ne omwami wanje wahelesia omwanawe uyo ebindu biosi ebiali n'nabio. 37Omwami wanje yandesuhila naboola mbu, ‘Orakhaler'rakhwo omwana wanje omukhasi okhurula mubakhaana Abakanaani tawe. 38Nebutswa otsie musibala siefwe, musibala siabeekho banje, wel'lemwo omwana wanje omukhasi.’ 39Nase nireeba omwami wanje mbu, ‘Ne omukhaana tsana naba nasuula okhwitsa n'nase ndakhakhola mbwena?’ 40Naye niyambool'la mbu ‘OMWAMI owambulilanga khasotso narume om'malaikawe nakhulombele injila ma nonyool'le omwana wanje omukhasi okhurula mubandu befwe bene, abebule ba papa wanje. 41Niwakhoola mubekho banje ma nibakhusuula, noba omulakhuule musietsubo sianje!’ 42Olwa ndaali okhwola khusitaho n'nondi, ndaali okhusaaya nimboola mbu, ‘OMWAMI Nyasaye womwami wanje Aburahamu, umbechis'sie kosi akandikhwo. 43Lola ndi khusitaho siamaatsi, olwa omukhaana yetsa okhutaha amaatsi namureebe niyakhambakhwo amaatsi kokhunywa okhurula musongoye. 44Niyakhahuchil'la ma yambe amaatsi nywe ma khandi aleer'rekhwo tsingamia tsianje, abe niye owa OMWAMI yahuye okhuba omukhasi womwana womwami wanje!’ 45Olwa ndaali nisili okhumala lisaayo lianje, Rebeka amal'le niyetsa nende isongo yamaatsi khumurwekwe nabira natsia musitaho okhwenda amaatsi. Mal'le nimubool'la mbu, ‘Yanza umbekhwo amaatsi nywe.’ 46Yanguhile okhwisia isongoye okhurula khumurwe niyambool'la mbu, ‘Nywa, khandi nzia okhunywesia tsingamia tsitsio.’ Ma ninywa, khandi nanywesia tsingamia tsianje. 47Mal'le nimureeba mbu, ‘Oli omwana wa wina?’ Naye niyangalusia mbu, ‘Ise ndi omwana wa Betsweli nende Milika!’ Ma nimura epete m'moolu nende emikasa khumakhono. 48Nisikama hasi ninzitsoomia OMWAMI Nyasaye womwami wanje Aburahamu owainyemeleye okhwitsa mubekho bomwami wanje, abanyooyemwo omukhaana owanotekhele omusiani womwami wanje. 49Kho luno nimwakhenya okhukhol'la omwami wanje akesirenda nende obwatooto mumbool'le, ne nikaralimbwo tawe ma ndole ahanzia, khandi ndole obwakhola.”
50Labani nende Betsweli nibakalusia, “Khulwa mbu amang'ana kano karul'le khu MWAMI, sikali akefwe okhukhalaka tawe. 51Rebeka ngwoyu, mubukule otsie n'naye, abe omukhasi womwana wo Mwamiwe singa obwo MWAMI mwene yabooye.” 52Olwomukholi wa Aburahamu yahul'la amang'ana kabwe, yenama hasi niyetsoomia OMWAMI. 53Ma nahiinia tsingubo nende omukasa nefetsa nahelesia Rebeka. Khandi nahaana ebihanwa biobukusi obukali khumusiani wabwe nende nyina.
54Ma omukholi wa Aburahamu nende abandu abayali n'nabo nibalia, nibanywa ma nibakonayo. Olwa babuukha mukamba tsuli yaboola mbu, “Musebule ngalukhe homwami wanje.”
55Nebutswa omusiani wanga Rebeka nende nyina nibaboola mbu, “Lekha, omukhaana akhole nasimenya n'nefwe lihonga elala nohomba amatukhu likhumi, khe nayetse.”
56Naye naboola mbu, “Muranjelebia tawe. OMWAMI yakasisie oluchendo lwanje, inywe mulekhe ngalukhe ewo MWAMI wanje.”
57Nabo nibakalusia, “Lekha khulange omukhaana mwene khulole obwaboola.” 58Ma nibalanga Rebeka nibamureeba, “Wenyanga otsie nende omusaatsa uyu?”
Naye nakalusia “Yee, ndatsia n'naye.”
59Ma nibaseebula Rebeka nende omukholi wamulela nibarula nende omutiiyi wa Aburahamu ma nende abayali n'nabo. 60Nibalaamila Rebeka tsikhabi nibaboola,
“Mukhaana wefwe, obe nyina amakhumi kebikhumila!
Abolwibulo lulwo balaleke amataala kabasuku babwe!”
61Ma Rebeka nende abakhaana bayali n'nabo nibarula nibaniina khutsingamia nibalondana nende omukholi wa Aburahamu, nibachaaka oluchendo.
62Isaka yali niyetsele musitsiimi sia Beeri Lahai Roi#24:62 Beeri Lahai Roi Mbu Esitaho esie uyo olimwoyo khandi oundolanga., ne yali niyamenya enandete wesibala sia Kanaani. 63Yarula hamukolooba natsia okhuchenda m'mukunda ne nalola tsingamia nitsiitsanga. 64Olwa Rebeka yalola Isaka, yeekha okhurula khungamia yiye 65ne nareeba omukholi wa Aburahamu, “Niwina owitsanga okhukhwakaan'na ula?”
Omukholi naye naboola mbu, “No mwami wanje?” Ma Rebeka nabukula olububi niyefunikha m'moni.
66Omukholi nabool'la Isaka kosi akayali nakhol'le. 67Ma Isaka niyenjisia Rebeka mwiheema elia Sara nyina mwana yamenyangamwo, naba omukhasiwe. Isaka yayanza Rebeka ma nalemibwa omwoyo khukhufwa khwa nyina.
Aktuálne označené:
OKHUCHIAKA 24: EBAIBO
Zvýraznenie
Zdieľať
Kopírovať
Chceš mať svoje zvýraznenia uložené vo všetkých zariadeniach? Zaregistruj sa alebo sa prihlás
©Bible Society of Kenya, 2019